Read Pinyin 1 Korìntə̀ 11 Bible Online

1 Korìntə̀ 11 - Pinyin bible

1 Korìntə̀ 11

¹Nɨ̀ mə mmɨ̀ŋnə̀ mə̀ tyìʼə̀ tsaʼnə ngwa mmɨ̀ŋnə̀ a Kristù la.

²Ngwə̀ ngaʼà mbə̀ʼə wɨghə ntiinə nɨ̀ wə̀ nkẅempə̀ mə̀ nkɨ mmə mmɨ̀ŋnə̀ mə̀ aŋunə ɨ̀nwùə̀ ɨ̀tsùmə̀ tyìʼə̀ tsaʼnə ndə̀ nèrə̀nə a wɨghə la.

³La, ǹtàʼà la lo nɨ̀ tsùŋə̀ nzhyə̂ lo, Kristù la àtwuə̀ ambo ŋònə̀ mbyàŋnə̀ ntsùmə̀. Ŋònə̀ mbyàŋnə̀ a kɨ mbə àtwuə̀ ambo ngẅùə e. Nẅùə̀ a kɨ ntyiʼə̀ mbə àtwuə̀ ambo Kristù.

⁴Lenəla, ŋònə̀ mbyàŋnə̀ ntsùmə̀ nɨ a chàʼtə̀nə a Nẅùə̀ kə̀ nchwìitə̀ ntwuumə̀ nɨ tɨ̀làarə̀ a àtwuə̀ ze, a chyâ la ɨ̀sɨŋnə̀ àtwuə̀ Kristù wa nɨ à pənə àtwuə̀ ze la.

⁵Mə̀ngyə̌ wa ntsùmə̀ nɨ à wa nchàʼtə̀ a Nẅùə̀ kə̀ nchwìitə̀ ntwuumə̀ Nẅùə̀ tɨ korə̀ àtwuə̀ e, a chyâ la ɨ̀sɨŋnə̀ àtwuə̀ ndwuumə̀ e nɨ a pənə àtwuə̀ ze la, ntiinə a tyiʼnə la tsaʼa a koomə̀ àtwuə̀ e.

⁶Mə̀ngyə̌ à tə pə ka korə̀ e àtwuə̀ e, a pòŋə̀ lo â koomə̀. Tsaʼnə a pənə ɨ̀sɨŋnə̀ ambo mə̀ngyə̌ a nɨ koomə̀ àtwuə̀ e la, a pòŋə̀ lo a korə̀ a zèrə.

⁷Ka a kùʼnə̀ e lo ŋònə̀ mbyàŋnə̀ a tə ntuŋə̀ a tɨ̀làarə̀ ntiinə a chyə̂ mbə la àshwùə Nẅùə̀ nkɨ mbə àghuʼtə̀ ambo Nẅùə̀; la mə̀ngyə̌ a pə àghuʼtə̀ ambo ŋònə̀ mbyàŋnə̀.

⁸[Mbə̀ʼnə ka ŋònə̀ mbyàŋnə̀ a lə̀ furə̀ e aŋunə mə̀ngyə̌, la lə̀ furə̀ mə̀ngyə̌ aŋunə ŋònə̀ mbyàŋnə̀.

⁹Ka Nẅùə̀ a lə̀ ntsùŋə̀ e a ŋònə̀ mbyàŋnə̀ ambo mə̀ngyə̌, la ntsùŋə̀ a mə̀ngyə̌ la ntii ŋònə̀ mbyàŋnə̀].

¹⁰La ɨ̀sùmə nɨ a pòŋə̀nə lo mə̀ngyə̌ a pə nɨ àlènə̀[2] a àtwuə̀ ze ntii pəngèrə̀.

¹¹[Mbaa pə tsaʼnə a pə̀ənə̀ chyə̂nə mbə taʼà ŋònə̀ pə̀ənə̀ pɨ Ndòʼnə̀mbyə̂ la, ka mə̀ngyə̌ a pə e àtwuə̀ nɨ ze, ka ŋònə̀ mbyàŋnə̀ a kɨ pə e àtwuə̀ nɨ ze.

¹²Tsaʼnə a pənə lo mə̀ngyə̌ à lə̀ furə̀ aŋunə ŋònə̀ mbyàŋnə̀ la, a kɨ mbə ndəŋə ndəŋə lo mə̀ngyə̌ ǎ tyiʼə̀ pyə̂ a ŋònə̀ mbyàŋnə̀. Lenəla, mɨ̀nwùə̀ mɨ̀tsùmə̀ furə̀ ambo Nẅùə̀].

¹³Nɨ̀ naŋə̀ tyìʼə̀ pɨghə ndzəənə̀ lo a kùʼnə̀ ambo mə̀ngyə̌ a nɨ chàʼtə̀ a Nẅùə̀ tɨ kẅupə̀ àtwuə̀ e?

¹⁴Nɨ̀ tə zəənə̀ amwuə ndwuumə̀ nɨ Nẅùə̀ à lə̀ tsùŋə̀nə àtwuə̀ ɨ̀shyə̂ zə̀, nɨ̀ zəənə̀ lo a ɨ̀sɨŋnə̀ ambo ŋònə̀ mbyàŋnə̀ a nɨ waʼà ɨ̀nyùŋə̀ àtwuə̀ ze ɨ̂ sàatə̀.

¹⁵La ɨ̀nyùŋə̀ àtwuə̀ mə̀ngyə̌ ɨ̀ tə sàatə̀, a ka pə e la nɨ̀ngòonə̀ ɨ̀tse? Ntiinə ɨ̀nyùŋə̀ àtwuə̀ mə̀ngyə̌ ɨ̀ chyə̂ mbə la tsaʼa àkẅupə̀ ambo ze.

¹⁶Ŋònə̀ ɨ̀tse à tə pə la mmə ntànkə̀ mbə̀ʼə a zèrə, yi ntsùmə̀ ntsùmə̀ nɨ mbə̀ʼə ǹshwəŋə̀ à chyə̂ pə lo ka pəə pɨ ɨ̀shwatə̀ ɨ̀poonə̀ pɨ Nẅùə̀ chi mbə a wəə nɨ mbòomə ɨ̀tse a nɨ ghuʼtə̀ a Nẅùə̀ ghu ndàŋə̀ e a wə̀.

¹⁷Aŋunə pɨ̀mbòomə pə, ka ǹchi mbyiimə̀ mə̀ a wɨghə ntiinə nɨ̀ pə nkwùə̀ nɨ nɨ̀ shwatə̀nə tsaʼa ɨ̀poonə̀ pɨ Nẅùə̀, nɨ̀ wa ngɨ̀rə̀ pə mɨ̀nwùə̀ nɨ mɨ ma ndòo pə ngəʼə̀ ntô ntsàarə̀ a nɨ ghɨ̀rə̀ mɨ̀nwùə̀ nɨ mɨ pòŋə̀nə.

¹⁸Ntsàambyə̀ ànwùə̀ à chyə̂ lo, ǹdzuʼù lo nkwùə̀ nɨ nɨ̀ tônə mbwùumə̀ tsaʼa ɨ̀poonə̀ pɨ Nẅùə̀, àghàpə̀ a za ntô a tɨ̀tɨ̀rə̀ pɨghə. Mbə̀ʼə ǹnyaʼa mbyiimə̀ lo a nkǔŋə nkuŋə.

¹⁹Ka m̀mɨnkə̀ mə̀ lo àghàpə̀ a chyə̂ a nɨ pə a tɨ̀tɨ̀rə̀ pɨghə. A ghɨ̀rə̀ lə la mbə̀ʼə pànə̀ nɨ pobə pa ngɨ̀rə̀ mɨ̀nwùə̀ mɨ təəmə̀nə furə̀ pɨ̀ zəənə̀.

²⁰Nkwùə̀ nɨ nɨ̀ tônə mbwùumə̀ a taʼà alyiʼə ka nɨ̀ mə nchi ndzɨghə̀ a wɨghə la ntarə̀,

²¹ntiinə nkwùə̀ nɨ nɨ̀ mənə ndzɨghə̀, ŋwùə̀ a lèrə̀ nɨ mbyə̀ mmə ndzɨghə̀ pə ɨ̀me mɨ̀zɨghə̀. Ẅùə̀ a pə nnwuunə̀ njyə̀, ẅùə̀ a pə nnô mbaarə̀.

²²Zèrə zə̀ ànwùə̀ a làŋə̀ ɨla? Ka nɨ̀ pə wɨghə nɨ mɨmwuə mɨlyiʼə ɨ̀mɨghə nɨ mbə̀ʼə nɨ̀ zɨghə̀ nkɨ nô ghu? Kə̀ nɨ̀ wâ lə̀ àshwatə̀ ɨ̀poonə̀ pɨ Nẅùə̀ zə̀ ntyiʼə̀ nchyâ ɨ̀sɨŋnə̀ àtwuə̀ pyə̀ nɨ ka pobə pə a ghobə nɨ àzwuumə̀ àtse? Mbə̀ʼə ǹtyiʼə̀ nshwəŋə̀ lə lo àkə ambo pɨghə? Mbə̀ʼə mbyiimə̀ lo nɨ̀ ghɨ̀rə̀ ànwùə̀ yè ɨ̀shìʼnə̀? Ngaŋə! Mbə̀ʼə ǹgɨ̀rə̀ mə̀ a lenə apə̀.

²³Mbə̀ʼnə ànwùə̀ nɨ mbɨ shwəŋə̀ ambo pɨghə la, ndə̀ kẅiirə̀ a zèrə la ambo Ndòʼnə̀mbyə̂, lo Ndòʼnə̀mbyə̂ Yěsû, amwuə ɨ̀twuʼə̀ wa nɨ pɨ lə̀ shwùunə̀nə e la, à lə̀ piinə̀ àpaanə̀,

²⁴ŋŋâ a mɨyàa, mbiʼtə̀ a zèrə, nshwəŋə̀ lo, “Lə̌ mbɨ̀ŋmə̀ mə̀ nɨ ngwə̀ ŋŋâ ambo pɨghə[3]. Nɨ̀ tə ngɨ̀rə̀ a lenə mmə nkẅempə̀ mə̀.”

²⁵Tyìʼə̀ a lenə, à lə̀ kɨ mbìʼì ndoŋə̀ nkwùə̀ nɨ pobə lə̀ zɨghə̀nə mmyàanə̀, nshwəŋə̀ lo, “Ndoŋə̀ zə̀ la ɨ̀kàanə̀ ghù shwuə̀ nɨ Nẅùə̀ à lə̀ wàrə̀nə nɨ àləəmə̀ mə̀. Nkwùə̀ ɨ̀tsùmə̀ nɨ nɨ̀ mənə nnô, nɨ̀ kẅempə̀ mə̀.”

²⁶Zèrə zə̀ a nèrə̀ la lo nkwùə̀ ɨ̀tsùmə̀ nɨ nɨ̀ kwurə̀nə àpaanə̀ zə̀ nkɨ nnô ndoŋə̀ zə̀, nɨ̀ chwìitə̀ la nɨ̀wɨghə̀ Ndòʼnə̀mbyə̂ tə mbyàa nkwùə̀ nɨ à ghǎ tô.

²⁷Lenəla, ŋònə̀ nɨ à kwurə̀nə àpaanə̀ zə̀ nkɨ nnô ndoŋə̀ zə̀ amwuə àlàŋə nɨ ka a kùʼnə̀ e, à wɨ̀ghə̀ la ànwùə̀ aŋunə mbɨ̀ŋmə̀ Ndòʼnə̀mbyə̂ nɨ àləəmə̀ e.

²⁸Ŋwùə̀ moʼo moʼo â naŋə̀ mbɨ̀ŋmə̀ e zaʼà mbòŋə̀ kwurə̀ àpaanə̀ za nkɨ nnô ndoŋə̀ zə̀,

²⁹ntiinə ŋònə̀ nɨ à kwurə̀nə nkɨ nnô tɨ zhyə̂ lo a mbɨ̀ŋmə̀ Ndòʼnə̀mbyə̂, à pìʼì la ndòonə̀ e.

³⁰La ɨ̀sùmə ànwùə̀ nɨ pànə̀ pɨ̀noʼnə a tɨ̀tɨ̀rə̀ pɨghə tyiʼnə ɨ̀porə̀ pə̀ənə̀, pɨ̀tse tyiʼə̀ pɨghoonə, pɨ̀noʼnə kɨ mmə nkwɨkə̀.

³¹Pə̀ənə̀ tə zàamə̀ nnaŋə̀ mbɨ̀ŋmə̀ ɨ̀zə̀ənə̀ ɨ̀shìʼnə̀, ndòonə̀ Nẅùə̀ chi ngẅìimə̀ e a wəənə̀ apə̀.

³²La nkwùə̀ nɨ Ndòʼnə̀mbyə̂ à wa nchyâ ngəʼə̀ aŋunə pə̀ənə̀, à wa nshìitə̀ a wəənə̀ la shìitə̀nə mbə̀ʼə pə̀ənə̀ ghǎ mbî pə̀ənə̀ pɨ pànə̀ pɨ àtwuə̀ ɨ̀shyə̂.

³³Lenəla nɨ pɨlyimə ɨ̀pâ, nkwùə̀ nɨ nɨ̀ pwuutə̀nə a nɨ zɨghə̀ mɨ̀zɨghə̀, nɨ̀ pyabə̀ pɨ̀tse pə̀ənə̀.

³⁴Njyə̀ ɨ̀ pəla mmə ndzaŋə̀ a ŋònə̀ ɨ̀tse, a zɨghə̀ a ndâ ze zaʼà mbòŋə̀ ntô, njiilo nkwùə̀ nɨ pə̀ənə̀ tônə mbwùumə̀ kò ŋwùə̀ a ghɨ̀rə̀ e ànwùə̀ nɨ ǎ pìʼì ndòonə̀. Ngə̀ aŋunə mɨ̀tse mɨ̀nwùə̀, mbɨ tô tiitə̀ a wɨghə nɨ ànwùə̀ a nɨ ghɨ̀rə̀ nkwùə̀ nɨ ǹtônə.