Read Pinyin 1 Korìntə̀ 12 Bible Online

1 Korìntə̀ 12 - Pinyin bible

1 Korìntə̀ 12

¹Pɨlyimə ɨ̀pâ, ngə̀ aŋunə mɨntyaŋnə mɨ Àzhwùə̀ Nẅùə̀, ka ntàʼà mə̀ lo nɨ̀ nwuunə̀ tɨ zhyə̂.

²Nɨ̀ zhyə̂ lo nkwùə̀ nɨ nɨ̀ lə̀ pirə̀nə a wɨghə a Kristù tɨ pyiimə̀, pɨ lə̀ fɨ̀ghə̀ a wɨghə amwuə ɨ̀làŋə pɨ̀noʼnə ngɨ̀rə̀ nɨ̀ tyiʼə̀ nguʼtə̀ pɨ̀tɨtoo.

³A tə pə a lenə, ntàʼà lo nɨ̀ zhyə̂ lo mbə̀ʼə ka ŋònə̀ nɨ a pənə nɨ Àzhwùə̀ Nẅùə̀ a shwəŋə̀ e lo, “Ndòonə̀ ɨ wa àtwuə̀ Yěsû.” Mbə̀ʼə ŋwùə̀ a kɨ shwəŋə̀ e lo “Yěsû la Ndòʼnə̀mbyə̂” tɨghu a pə nɨ Àzhwùə̀ Nẅùə̀ apə̀.

⁴Ɨ̀pwuumə̀ nɨ Àzhwùə̀ Nẅùə̀ a za ŋŋâ àfǐfǐ chyə̂ a mbuurə̀ mbuurə̀, la a pèrə ɨ̀tsùmə̀ a mə ŋâ taʼà Àzhwùə̀.

⁵Ɨ̀fàʼà nɨ pə̀ənə̀ pa nfàʼà ambo Nẅùə̀ chyə̂ a mbuurə̀ mbuurə̀, la pə̀ənə̀ pa nfàʼà la tyìʼə̀ ambo taʼà Ndòʼnə̀mbyə̂.

⁶Ɨ̀làŋə nɨ pànə̀ pa nfàʼà ambo Nẅùə̀ chyə̂ chwìi chwìi, la a ghɨ̀rə̀ e taʼà Nẅùə̀ ngɨ̀rə̀ pànə̀ zhyə̂ ɨ̀làŋə nɨ mbə̀ʼə pobə fàʼà.

⁷Nẅùə̀ à ŋâ ɨ̀pwuumə̀ pə̀ nɨ nèrə̀nə àfàʼà Àzhwùə̀ Nẅùə̀ ambo ŋwùə̀ moʼo moʼo mbə̀ʼə â yèmpə̀ pànə̀ pɨ̀tsùmə̀.

⁸Pɨ ŋâ ambo ghùtse ŋwùə̀ a nɨ làŋə̀ a ndzùmə̀ Àzhwùə̀ lo â tə nshwəŋə̀ ɨ̀shwəŋnə̀ àzhìʼtə̀, a kɨ ŋâ tyìʼə̀ Àzhwùə̀ ghu ŋŋâ àzhyə̂ ànwùə̀ ambo ghùtse ŋwùə̀.

⁹Tyìʼə̀ Àzhwùə̀ zèrə zə̀ a ŋâ àpyiimə̀ ntɨŋmə̀ ambo ghùtse ŋwùə̀ nkɨ ŋâ ɨ̀tɨ̀ŋnə̀ a nɨ parə̀ ambo ghùtse ŋwùə̀

¹⁰À wa ngɨ̀rə̀ lo ghùtse ŋwùə̀ a tə ngɨ̀rə̀ mɨ̀nwùə̀ mɨ yerə̀nə yerə̀nə. Ghùtse a pə ndzuʼù ntwuumə̀ Nẅùə̀ nshwəŋə̀, ambo ghùtse, a ghɨ̀rə̀ lo a zhyə̀ tə̀chwìi a tɨ̀tɨ̀rə̀ ɨ̀zhwùə̀ tɨ̀pòŋə̀ pobə Àzhwùə̀ Nẅùə̀, nkɨ ŋâ ambo ghùtse mɨntyaŋnə a nɨ shwəŋə̀ mbuurə̀ ɨ̀shwəŋnə̀ pɨ̀shwuə̀ pɨ̀tse, nkɨ ŋâ ambo ghùtse, mɨntyaŋnə a nɨ shantə̀ ɨ̀shwəŋnə̀ pɨ̀shwuə̀ pɨ̀ghu.

¹¹Mɨntyaŋnə mèrə mə, mɨ furə̀ la tyìʼə̀ ambo Àzhwùə̀ zèrə zə̀, a mə ŋâ ambo ŋwùə̀ moʼo moʼo tsaʼnə à kòŋə̀nə.

¹²Tsaʼnə taʼà mbɨ̀ŋmə̀ à pənə nɨ ɨlaamə pɨ̀noʼnə nkɨ mbirə̀ mbə e tyìʼə̀ taʼà mbɨ̀ŋmə̀ ghu la, a kɨ mbə ndəŋə ndəŋə tsaʼnə pə̀ənə̀ noʼò la nkɨ mbə tyìʼə̀ taʼà mbɨ̀ŋmə̀ amwuə Kristù.

¹³Mbəʼnə àkẅiirə̀ nchyə ambo pə̀ənə̀ la à lə̀ ŋâ taʼà Àzhwùə̀. Àzhwùə̀ za nɨ pə̀ənə̀ lə̀ kẅiirə̀nə amwuə mɨ̀ntɨŋmə̀ ɨ̀məənə̀ la a tyiʼə̀ ngɨ̀rə̀ pə̀ənə̀ pə taʼà mbɨ̀ŋmə̀. (Kə̀ wə̀ pə ŋwùə̀ pɨ̀Jew, kə̀ ŋònə̀ nɨ ka à pə e ŋwùə̀ pɨ̀Jew, kə̀ wə̀ pə àpùʼù kə̀ ka pə o àpùʼù). Nẅùə̀ à lə̀ kɨ ngɨ̀rə̀ pə̀ənə̀ pɨ̀tsùmə̀ nô la a taʼà Àzhwùə̀.

¹⁴Ka mbɨ̀ŋmə̀ ɨ̀ pə e la nɨ taʼà alaamə, ɨ̀ chyə̂ la nɨ ɨlaamə pɨ̀noʼnə.

¹⁵Àkwùə̀ a tə pəla nshwəŋə̀ lo, “Tsaʼnə ka mbə mə̀ àpô la, ka mbə mə̀ alaamə mbɨ̀ŋmə̀.” Ka zèrə zə a ghɨ̀rə̀ e lo kò a pə e alaamə mbɨ̀ŋmə̀.

¹⁶Nɨtugrə tə pəla nkɨ nshwəŋə̀ àze lo, “Tsaʼnə ka mbə mə̀ nɨ̀lyə̂ la, ka mbə mə̀ alaamə mbɨ̀ŋmə̀.” Ka zèrə zə̀ a ghɨ̀rə̀ e lo kò a pə e alaamə mbɨ̀ŋmə̀.

¹⁷Mbɨ̀ŋmə̀ ntsùmə̀ ɨ̀ tə pəla mbə nɨ̀lyə̂, yi pɨ tyiʼə̀ zuʼù ànwùə̀ nɨ àkə? Mbɨ̀ŋmə̀ ntsùmə̀ ɨ̀ tə pəla mbə nɨtugrə, yi pɨ tyiʼə̀ zuʼù àzhyǎ àzwuumə̀ nɨ àkə?

¹⁸La tsaʼnə a pənə la, Nẅùə̀ à tyankə̀ ɨlaamə mbɨ̀ŋmə̀ pèrə pə aŋunə mbɨ̀ŋmə̀ moʼo moʼo amwuə ndwuumə̀ nɨ à kòŋə̀nə.

¹⁹Ɨlaamə mbɨ̀ŋmə̀ pèrə pə tə pəla mbə taʼà, yi mbɨ̀ŋmə̀ ɨ̌ furə̀ ɨghə?

²⁰Tsaʼnə a pənə a lenə la, ɨlaamə mbɨ̀ŋmə̀ pèrə pə noʼò, la mbə e la taʼà mbɨ̀ŋmə̀.

²¹Lenəla mbə̀ʼə nɨ̀lyə̂ shwəŋə̀ e ambo àpô lo, “Ka ntàʼà mə̀ a ghò” apə̀. Kə̀ àtwuə̀ a shwəŋə̀ e ambo mɨ̀kwùə̀ lo, “Ka ntàʼà mə̀ a wɨghə.”

²²Ngaŋə, ka pə e lenə, ntiinə ɨlaamə pa nɨ pənə tsaʼa pèrə porə̀ la chyə̂ mbə la pyə̀ nɨ mbə̀ʼə ka mbɨ̀ŋmə̀ ɨ chyə̂ e tɨ pèrə.

²³Lenəla, ɨlaamə mbɨ̀ŋmə̀ pa nɨ ka pɨ̀ lòo e a pèrə tsaʼa àzwuumə̀ àtse la, pə̀ənə̀ pa nguʼtə̀ a pèrə tyìʼə̀ ɨ̀shìʼnə̀. Ɨlaamə pa nɨ ka pèrə pòŋə̀ e a nɨ zəənə̀ la, pə̀ənə̀ pa mbyatə̀ a pèrə ɨ̀shìʼnə̀.

²⁴Ka ɨlaamə mbɨ̀ŋmə̀ pa nɨ pèrə pòŋə̀nə a wəənə̀ tàʼà e lo pɨ̀ tə mbyatə̀ ntiinə Nẅùə̀ àtwuə̀ ɨ̀pɨ̀ŋmə̀ e à tsùŋə̀ mbɨ̀ŋmə̀ amwuə ndwuumə̀ nɨ àghuʼtə̀ yè noʼnə ǎ pə aŋunə ɨlaamə pa nɨ ka pɨ lòo e tsaʼa àzwuumə̀ àtse la.

²⁵Njiilo kò àghàpə̀ a pə e aŋunə mbɨ̀ŋmə̀ mbə̀ʼə ɨlaamə mbɨ̀ŋmə̀ zhyə̂ naŋə̀ mbɨ̀ŋmə̀ ɨzobə.

²⁶Taʼà alaamə a tə mə zuʼù ngəʼə̀ yi ɨlaamə ɨ̀tsùmə̀ kɨ zuʼù ngəʼə̀. Mbə̀ʼə taʼà alaamə à tə pə nɨ àghuʼtə̀ ɨlaamə ɨ̀tsùmə̀ pə nɨ nɨ̀ghaʼà pobə pɨ pobə.

²⁷Tɨ̀tsòŋə̀ wə̀ nɨ̀ chyə̂ mbə la mbɨ̀ŋmə̀ Kristù, ŋwùə̀ ɨwɨghə moʼo moʼo a tyiʼə̀ mbə alaamə mbɨ̀ŋmə̀ ghu.

²⁸Amwuə àshwatə̀ ɨ̀poonə̀ pɨ Kristù, Nẅùə̀ à zàamə̀ ntsoʼò ngàŋə ntwuumə̀ Kristù mbaatə̀ nɨ ngàŋə ntwuumə̀ Nẅùə̀, ndzùŋə̀ nɨ pɨ̀nèrə̀ nɨ pànə̀ nɨ pobə pa ngɨ̀rə̀ mɨ̀nwùə̀ mɨ̀yerə̀nə yerə̀nə, nɨ pànə̀ nɨ pobə pa mbarə̀ pə̀ənə̀, nɨ ngàŋə àyèmpə̀, nɨ pànə̀ nɨ pobə pa ntwuʼtə̀ pə̀ənə̀, ndẅùutə̀ nɨ pànə̀ nɨ pobə pa nshwəŋnə̀ mbuurə̀ ɨ̀shwəŋnə̀ pɨ̀shwuə̀

²⁹A ŋwùə̀ ntsùmə̀ nɨ a pənə ngàŋə ntwuumə̀ Kristù? A ŋwùə̀ ntsùmə̀ nɨ a zuʼnə ntwuumə̀ Nẅùə̀ nshwəŋə̀? A ŋwùə̀ ntsùmə̀ nɨ a pənə ɨ̀nèrə̀? A ŋwùə̀ ntsùmə̀ nɨ a ghɨ̀rə̀nə mɨ̀nwùə̀ mɨ̀yerə̀nə yerə̀nə?

³⁰A ŋwùə̀ ntsùmə̀ nɨ à pənə nɨ mɨntyaŋnə a nɨ parə̀ pànə̀? A ŋwùə̀ ntsùmə̀ nɨ à wa nshwəŋnə̀ amwuə ɨ̀shwəŋnə̀ pɨ̀nyaanə? A ŋwùə̀ ntsùmə̀ nɨ à wa mbə̀ŋə̀ ɨ̀shwəŋnə̀?

³¹Nɨ̀ yìi a nɨ pə nɨ mɨntyaŋnə mɨ Àzhwùə̀ Nẅùə̀ nɨ mɨ tsàarə̀nə mɨntyaŋnə mɨ̀tsùmə̀. Mbɨ nèrə̀ wɨghə nɨ àlàŋə nɨ a pòŋə̀nə ntsàarə̀.