Read Pinyin 1 Korìntə̀ 13 Bible Online

1 Korìntə̀ 13 - Pinyin bible

1 Korìntə̀ 13

¹Ntə pəla mmə nshwəŋnə̀ ɨ̀shwəŋnə̀ pànə̀ pɨ àtwuə̀ ɨ̀shyə̂ kə̀ ɨ̀shwəŋnə̀ pəngèrə̀, la ka pə mə̀ nɨ ɨ̀kòŋnə̀, yi àshwəŋnə̀ mə̀ a tyiʼə̀ pə tsaʼa nkɨ̀ɨmə̀ nɨ pɨ pa mbuʼù a pyəŋə pyəŋə, kə̀ tsaʼa ɨ̀pàa nkàʼà nɨ pɨ pa mbuʼù.

²Ǹtə pəla mbə nɨ mɨntyaŋnə a nɨ shwəŋə̀ ànwùə̀ nɨ Nẅùə̀ à chyânə a ntɨŋmə̀ mɨ̀ŋə̀, kə̀ nzhyə̂ mɨ̀nwùə̀ mɨ lə̀əmə̀nə a ɨ̀myə̂ pə̀ənə̀, nkɨ mbə nɨ àzhìʼtə̀ àtsùmə̀ nɨ àpyiimə̀ ntɨŋmə̀ a nɨ shwəŋə̀ lo mɨ̀mbarə̀ lòo nkyopə̀ ɨlyiʼə, la ka pə mə̀ nɨ ɨ̀kòŋnə̀, yi mɨ̀ŋə̀ àfǐfǐ

³Ntə pəla ŋŋâ àzwuumə̀ àtsùmə̀ nɨ m̀bənə nɨ zèrə ambo ngàŋə àfumə̀, ŋŋâ mbɨ̀ŋmə̀ mə̀ lo pɨ tòonə̀ la ka pə mə̀ nɨ ɨ̀kòŋnə̀ yi ka àpìi àtse a pə e ghu.

⁴Ɨ̀kòŋnə̀ la nɨ̀ẅìimə̀ mbɨ̀ŋmə̀ pobə nɨ̀ghɨ̀rə̀ ɨ̀pòŋə̀. Ka ɨ̀kòŋnə̀ ɨ pə e nɨ àghə̀ʼnə̀, ka ɨ̀kòŋnə̀ ɨ tsòo e a ghàŋə̀, ka nèrə̀ e mbɨ̀ŋmə̀.

⁵Ka ɨ̀kòŋnə̀ ɨ pə e nɨ àshwəŋnə̀ tɨ̀pòŋə̀, ka pə e nɨ àghə̀ʼə̀, ka faʼa zaŋə̀ e a loŋə, ka mə nùŋə̀ e mɨ̀nwùə̀ mɨ tɨ̀pòŋə̀.

⁶Ka ɨ̀kòŋnə̀ ghaʼà e aŋunə ɨ̀nwùə̀ tɨ̀pòŋə̀, ɨ ghaʼà pə aŋunə mɨ̀nwùə̀ nɨ mɨ təəmə̀nə.

⁷Ka ɨ̀kòŋnə̀ ɨ kaanə̀ e a nɨ kẅiirə̀ ànwùə̀ àtsùmə̀, ka kɨ mə kaanə̀ e a nɨ pyiimə̀ ànwùə̀ àtsùmə̀ nɨ ɨ zuʼnə, mmə mbyiimə̀ mbyabə̀ àzwuumə̀ yè ɨ̀shìʼnə̀ nɨ a ghǎ tô, nkɨ mmə ẅìimə̀ ntɨŋmə̀ aŋunə ànwùə̀ àtsùmə̀.

⁸Ka ɨ̀kòŋnə̀ ɨ̂ lẅùutə̀ e; ngə̀ aŋunə nɨ̀shwəŋə̀ ànwùə̀ nɨ Nẅùə̀ à chyânə a ntɨŋmə̀ ŋwùə̀ a ghǎ lẅùutə̀. Mbuurə̀ ɨ̀shwəŋnə̀ pɨ̀shwuə̀ pɨ̀tse ghǎ myə̀, àzhyə̂ ànwùə̀ â kɨ myə̀.

⁹Pə̀ənə̀ zhyə̂ mɨ̀nwùə̀ mə la ɨ̀tùmə ɨ̀tùmə nkɨ mmə nshwəŋə̀ ànwùə̀ nɨ Nẅùə̀ à ŋânə lo pə̀ənə̀ shwəŋə̀ la ɨ̀tùmə ɨ̀tùmə.

¹⁰La nkwùə̀ nɨ mɨ̀nwùə̀ nɨ mɨ koʼnə mbwùumə̀ tônə, zhyə̀ nɨ ka à koʼò mbwùumə̀ e a myə̀.

¹¹Nkwùə̀ nɨ ndə̀ pənə mɨnkɨ̂, ndə̀ mə shwəŋə̀nə tsaʼa mɨnkɨ̂, mmə nkwàŋə̀ tsaʼa mɨnkɨ̂, mmə nnaŋə̀ ànwùə̀ tsaʼa mɨnkɨ̂. Nkwùə̀ nɨ ndə̀ pənə ndɨ̀ŋmə̂, ndə̀ waʼà ɨ̀nwùə̀ mɨnkɨ̂ ɨ̀tsùmə̀.

¹²Tɨ̀tsòŋə̀ wə̀ pə̀ənə̀ pə ndzəənə̀ mɨ̀nwùə̀ mɨ pə pə tsaʼa ləgrə amwuə malèmə̀; la a ghǎ pə nkwùə̀ ghu pə̀ənə̀ pə ndzəənə̀ ɨ̀sɨghə̀ e a kɨ mmə ndzəənə̀ ɨ̀wəənə̀. Tɨ̀tsòŋə̀, nzhyə̂ pə pɨ̀mɨlyiʼə la a ghǎ pə nkwùə̀ ghu nzhyə̂ e ɨ̀shìʼnə̀ tyiʼə̀ tsaʼnə à zhyə̂nə mə̀ ɨ̀shìʼnə̀.

¹³Lenəla, ɨ̀nwùə̀ ɨtarə ghoŋə̀: àpyiimə̀ ntɨŋmə̀, àzwuumə̀ nɨ pə̀ənə̀ pa mbyabə̀ nɨ ɨ̀kòŋnə̀. La, zhyə̀ nɨ a faŋə̀nə ntsàarə̀ a pèrə ɨ̀tsùmə̀ a ɨ̀kòŋnə̀.