Read Pinyin 1 Korìntə̀ 14 Bible Online

1 Korìntə̀ 14 - Pinyin bible

1 Korìntə̀ 14

¹Ɨ̀kòŋnə̀ la àzwuumə̀ nɨ nɨ̀ taŋnə̀ a nɨ pə nɨ ẅèrə. Nɨ̀ kyiitə̀ nɨ ntɨŋmə̀ ɨ̀wɨghə ɨ̀tsùmə̀ a nɨ pə nɨ àzwuumə̀ nɨ Àzhwùə̀ Nẅùə̀ a za ŋŋâ, kɨ tô nɨ̀zuʼù ntwuumə̀ Nẅùə̀ nshwəŋə̀.

²Mbə̀ʼnə ka ŋònə̀ nɨ à wa nshwəŋnə̀ mbuurə̀ ɨ̀shwəŋnə̀ pɨ̀shwuə̀ pɨ̀tse â mə nshwəŋnə̀ e la ambo pə̀ənə̀, à wa nshwəŋnə̀ la ambo Nẅùə̀, ntiinə ka ŋònə̀ ɨ̀tse a pə ndzuʼù e ànwùə̀ nɨ à wə̀ nshwəŋə̀, la a pə nshwəŋə̀ la mɨ̀nwùə̀ mɨ lə̀əmə̀nə nɨ ɨ̀tɨ̀ŋnə̀ Àzhwùə̀ Nẅùə̀.

³Ngə̀ aŋunə ŋònə̀ nɨ à wa ndzuʼù ntwuumə̀ Nẅùə̀ nshwəŋə̀ ambo pə̀ənə̀, à wa ngyèmpə̀ la ghobə lo pobə kẅuə̀, ngɨ̀rə̀ mɨ̀ntɨŋmə̀ ɨ̀mobə tɨ̀ŋnə̀ nkɨ ndə̀ʼtə̀ a ghobə.

⁴Ŋònə̀ nɨ à wa nshwəŋə̀nə mbuurə̀ ɨ̀shwəŋnə̀ pɨ̀shwuə̀ pɨ̀tse à wa ngyèmpə̀ e la ndàʼà mbɨ̀ŋmə̀ e, la ŋònə̀ nɨ à wa ndzuʼù ntwuumə̀ Nẅùə̀ nshwəŋə̀, a wa ngyèmpə̀ la àshwatə̀ ɨ̀poonə̀ pɨ Kristù àtsùmə̀ lo pobə kẅuə̀.

⁵Mbɨ kòŋə̀ lo pɨghə pɨ̀tsùmə̀ zhyə̂ shwəŋə̀nə mbuurə̀ ɨ̀shwəŋnə̀ pɨ̀shwuə̀ pɨ̀tse; La ntsùŋə̀ nkòŋə̀ lo nɨ̀ zhyə̂ zuʼù ntwuumə̀ Nẅùə̀ nshwəŋə̀ ambo pə̀ənə̀. Ntiinə ŋònə̀ nɨ à wa ndzuʼù ntwuumə̀ Nẅùə̀ nshwəŋə̀ a wa ngɨ̀rə̀ la ànwùə̀ nɨ a tsàarə̀nə yè ŋònə̀ wa nɨ à wa nshwəŋə̀nə pə mbuurə̀ ɨ̀shwəŋnə̀ pɨ̀shwuə̀ pɨ̀tse la. Ŋwùə̀ a tə pə ghu nɨ mbə̀ʼə a tiitə̀ ɨ̀sùmə ɨ̀shwəŋnə̀ pɨ̀shwuə̀ pɨ̀tse pə̀, a pòŋə̀ lo a tiitə̀ mbə̀ʼə zèrə zə̀ a yèmpə̀ àshwatə̀ ɨ̀poonə̀ pɨ Kristù pobə kẅuə̀.

⁶Tɨ̀tsòŋə̀ nɨ pɨlyimə ɨ̀pâ, ntə tô ambo pɨghə mmə nshwəŋə̀nə mbuurə̀ ɨ̀shwəŋnə̀ pɨ̀shwuə̀ pɨ̀tse, yi mbɨ yèmpə̀ a wɨghə la nɨ àkə? Ka àyèmpə̀ àtse a pə e ghu ndàŋə̀ e lo ǹnyaʼkə̀ mɨ̀nwùə̀ mɨ̀lə̀əmə̀nə kə̀ mɨ̀nwùə̀ nɨ ǹzhyə̂nə, nkɨ ndzuʼù ntwuumə̀ Nẅùə̀ nshwəŋə̀ ambo pɨghə, kə̀ nnèrə̀ ɨ̀nwùə̀ ambo pɨghə.

⁷Pə̀ənə̀ lòo ɨ̀pwuumə̀ àpinə̀ tsaʼa ndoŋə̀ pobə nɨ̀lùŋə nɨ ka pèrə pə e nɨ nɨ̀chyə̂mbyə̂; mbə̀ʼə ŋwùə̀ a zhyə̂ àzwuumə̀ nɨ pɨ pə mbuʼù lə ɨla mbə̀ʼə ngyə̀ ɨzobə ka mə furə̀ e ɨ̀shìʼnə̀?

⁸Ŋwùə̀ à tə pəla ntoŋə̀ ntàŋnə̀ lo pɨ̀ lèrə̀ a ntsòo la ka ànwùə̀ nɨ ntàŋnə̀ ghu ɨ̀ shwəŋə̀nə a furə̀ e ndaanə̀ e, ɨ̀wə̌ a tyiʼə̀ nchwuʼtə̀ mbɨ̀ŋmə̀ a nɨ lèrə̀ ntsòo?

⁹A kɨ mbə tyìʼə̀ a lenə ambo pɨghə. Nɨ̀ tə mbəla mmə nshwəŋnə̀ mbuurə̀ ɨ̀shwəŋnə̀ pɨ̀shwuə̀ pɨ̀tse nɨ ka ŋwùə̀ a mə ndzuʼù e ànwùə̀ nɨ nɨ̀ wə̀ nshwəŋə̀, ŋwùə̀ a tyiʼə̀ nzhyə̂ ànwùə̀ nɨ nɨ̀ shwəŋə̀nə la ɨla? Ntiinə àshwəŋnə̀ àzɨghə yèghu a zə̀ ndàŋə̀ pə amwuə ɨ̀fə̂.

¹⁰Ɨ̀shwəŋnə̀ pɨ̀noʼnə pa amwuə àtwuə̀ ɨ̀shyə̂, la ka yètse a pə e ghu nɨ ka pɨ mə ndzuʼù e.

¹¹La ǹtə ka mə zuʼù mə̀ àshwəŋnə̀ nɨ ŋwùə̀ à wə̀ nshwəŋnə̀ ambo mɨ̀ŋə̀, yi mbɨ pə la ŋwùə̀ àtwuumə̀ ambo ze, â kɨ mbə ŋwùə̀ àtwuumə̀ ambo mɨ̀ŋə̀.

¹²Lenəla, tsaʼnə nɨ̀ wə̀ ntaŋnə̀ a nɨ pə nɨ ɨ̀pwuumə̀ pa nɨ Àzhwùə̀ a za ŋŋâ la, nɨ̀ kyiitə̀ a nɨ pə nɨ pyə̀ pa nɨ mbə̀ʼə pèrə yèmpə̀ àshwatə̀ ɨ̀poonə̀ pɨ Kristù a kẅuə̀.

¹³Njiilo, ŋònə̀ nɨ à shwəŋə̀nə mbuurə̀ àshwəŋnə̀ yèshwuə̀ àtse la â chàʼtə̀ a Nẅùə̀ lo â ŋâ e nɨ mɨntyaŋnə a nɨ tiitə̀ ɨ̀sùmə ànwùə̀ nɨ à shwəŋə̀nə.

¹⁴Mbə̀ʼnə ǹtə mə nchàʼtə̀ a Nẅùə̀ amwuə àshwəŋnə̀ yè shwuə̀ yètse yi la àchàʼtə̀ e ndàʼà Àzhwùə̀ mə̀ la ka àtwuə̀ mə̀ a zhyə̂ e ànwùə̀ nɨ ngwə̀ nshwəŋə̀.

¹⁵Lenəla mbɨ tyiʼə̀ ghɨ̀rə̀ lə ɨla? A pòŋə̀ lo n̂chàʼtə̀ a Nẅùə̀ amwuə Àzhwùə̀ nkɨ mmə nchàʼtə̀ nɨ àzhìʼtə̀ mə̀. A pòŋə̀ lo n̂tə ndzòbə̀ nchyə amwuə Àzhwùə̀ nkɨ mmə ndzòbə̀ nɨ àzhìʼtə̀ mə̀.

¹⁶Wə̀ tə mmə ŋŋâ a mɨyàa ambo Nẅùə̀ amwuə Àzhwùə̀ ndàʼà, ŋònə̀ nɨ à tônə e tônə amwuə pɨghə a tyiʼə̀ ndàŋə̀ ɨla nshwəŋə̀ “Amen” aŋunə ànwùə̀ nɨ nɨ̀ wə̀ nshwəŋə̀ nɨ ka à mə ndzuʼù e?

¹⁷Àchàʼtə̀ Nẅùə̀ yèghu a tə pyə̀ mbòŋə̀ pə ɨla, a yèmpə̀ e a ŋwùə̀ apə̀.

¹⁸Ŋ̀ŋâ a mɨyàa ambo Nẅùə̀ lo ǹshwəŋə̀ ɨ̀shwəŋnə̀ pɨ̀shwuə̀ pɨ̀tse ntsàarə̀ a wɨghə pɨ̀tsùmə̀.

¹⁹Mbaa pə tsaʼnə a pənə lə la, mbɨ kòŋə̀ lo ǹtə mbə amwuə àshwatə̀ ɨ̀poonə̀ pɨ Kristù ǹshwəŋə̀ ɨ̀shwəŋnə̀ pyə̀ nɨ panə̌ zuʼù, ɨ̀shwəŋnə̀ pɨ̀ghu kɨ ntəətə̀ a ghobə ntsàarə̀ a nɨ shwəŋə̀ ɨ̀shwəŋnə̀ nkaamə̀ nɨ̀ghumə̀ amwuə mbuurə̀ ɨ̀shwəŋnə̀ pɨ̀shwuə̀ pɨ̀tse nɨ ka pànə̀ pə zuʼù a ghobə.

²⁰Pɨlyimə ɨ̀pâ, kò nɨ̀ tə kwàŋə̀ a wɨghə ànwùə̀ tsaʼa àghòbə; Nɨ̀ pə tsaʼa àghòbə nɨ ka pobə zhyə̂ a ghobə tɨ̀pòŋə̀ la ntyiʼə̀ nkwàŋə̀ mɨ̀nwùə̀ tsaʼa pɨ̀lɨ̀ŋmə̂.

²¹Pɨ ŋwàʼnə̀ amwuə àŋwàʼnə̀ pɨ̀mbòomə lo, “Ndòʼnə̀mbyə̂ a shwəŋə̀ lo, mbɨ lòo mbuurə̀ ɨ̀shwəŋnə̀ pɨ̀shwuə̀ pɨ̀tse ɨ chyâ a ntswùə̀ pɨ̀tô tônə ɨ pobə shwəŋə̀nə ambo pɨghə. Ntə shwəŋə̀ shwəŋə̀nə ambo pə̀ənə̀ pə, pobə zhwiʼtə̀ a ghobə ànwùə̀ nɨ nshwəŋə̀nə apə̀[4].”

²²Nɨ̀shwəŋnə̀ ɨ̀shwəŋnə̀ pɨ̀shwuə̀ pɨ̀tse à chyə̂ mbə la àlènə̀ ambo pànə̀ nɨ ka pobə pyiimə̀ a ghobə a Kristù ka pə e ambo pànə̀ nɨ pɨ pyiimə̀nə a kristù. Nɨ̀zuʼù ntwuumə̀ Nẅùə̀ nshwəŋə̀ a chyə̂ ambo pànə̀ nɨ pobə pyiimə̀nə a Kristù ka pə e ambo pànə̀ nɨ ka pobə pyiimə̀ a ghobə a Kristù.

²³Tsaʼnə a pənə lə la, pànə̀ pɨ̀tsùmə̀ tə mə nshwəŋnə̀ amwuə mbuurə̀ ɨ̀shwəŋnə̀ pɨ̀shwuə̀ pɨ̀tse amwuə àshwatə̀ ɨ̀poonə̀ pɨ Kristù, pànə̀ nɨ ka pɨ mə ndzuʼù a ghobə kə̀ pànə̀ nɨ ka pɨ pyiimə̀ a ghobə a Kristù pobə ka shwəŋə̀ a ghobə lo nɨ̀ paarə̀?

²⁴Pobə tə mə ndzuʼù ntwuumə̀ Nẅùə̀ nshwəŋə̀, yi ŋònə̀ nɨ ka à nùŋə̀ e ntɨŋmə̀ e aŋunə Nẅùə̀ kə̀ ŋònə̀ nɨ ka à pə e ŋwùə̀ wɨghə, a tô nkwuunə̀ amwuə pɨghə yi mɨ̀nwùə̀ ma nɨ pɨ shwəŋə̀nə la pɨ ẅìimə̀ e a zəənə̀ lo à chyə̂ mbə ngàŋə̀ ngɨ̀rə̀ ɨ̀nwùə̀ tɨ̀pòŋə̀,

²⁵mɨ̀nwùə̀ mɨ lə̀əmə̀nə nɨ mɨ pənə a ntɨŋmə̀ ze furə̀ a ɨsɨghə. Lenəla a kunə̀ a ɨ̀shyə̂ àkùbəkubə̀ nguʼtə̀ a Nẅùə̀, nshwəŋə̀ lo, “A nkǔŋə nkuŋə, Nẅùə̀ à wə̀ a tɨ̀tɨ̀rə̀ pɨghə”.

²⁶Pɨlyimə ɨ̀pâ, pəə shwəŋə̀ lə lo àkə? Nɨ̀ tə tô mbwùumə̀ alyiʼə àtse nɨ taʼà ŋwùə̀ à pənə nɨ nchyə a nɨ zòbə̀, taʼà ŋwùə̀ a pə nɨ ànwùə̀ a nɨ nèrə̀, ghùtse a pə nɨ ntwuumə̀ Nẅùə̀ nɨ à zuʼnə̀ mbə shwəŋə̀, ghùtse a pə nɨ mbuurə̀ ɨ̀shwəŋnə̀ pɨ̀shwuə̀ pɨ̀tse a nɨ shwəŋə̀ kə̀ a nɨ tiitə̀ ɨ̀sùmə àshwəŋnə̀. Mɨ̀nwùə̀ mèrə mə mɨ̀tsùmə̀ pə a nɨ yèmpə̀ a àshwatə̀ â kẅùə̀.

²⁷Pànə̀ tə mbəla mbə nshwəŋnə̀ mbuurə̀ ɨ̀shwəŋnə̀ pɨ̀shwuə̀ pɨ̀tse, a shwəŋnə̀ pànə̀ pɨpaa kə̀ pɨtarə; pɨ mə nshwəŋnə̀, a shwəŋə̀ tyìʼə̀ ŋwùə̀ moʼo moʼo a taʼà nkwùə̀, ghùtse ŋwùə̀ a kɨ ntiitə̀ ɨ̀sùmə.

²⁸La ŋwùə̀ a ka pə e ghu a nɨ tiitə̀ ɨ̀sùmə ànwùə̀ ghu, a pòŋə̀ lo ŋònə̀ nɨ à mənə nshwəŋnə̀ la â zhwemnə̀ amwuə àshwatə̀ ɨ̀poonə̀ pɨ Kristù ntyiʼə̀ nshwəŋnə̀ ambo mbɨ̀ŋmə̀ e pobə Nẅùə̀.

²⁹Ngàŋə ntwuumə̀ Nẅùə̀ ɨpaa kə̀ ɨtarə ɨ̂ shwəŋnə̀, pyə̀ pànə̀ tyiʼə̀ nnaŋə̀ ànwùə̀ ghu ndzəənə̀ lo a kùʼnə̀ kə̀ ka kùʼnə̀ e.

³⁰La Nẅùə̀ à tə mbəla ŋŋâ ntwuumə̀ ghùtse ambo ŋònə̀ nɨ à nwuunə̀nə a ɨ̀shyə̂ amwuə àshwatə̀, a pòŋə̀ lo ŋònə̀ nɨ à tənə mmə nshwəŋnə̀ â zhwemnə̀.

³¹Ntiinə nɨ̀ tə mə ndzuʼù ntwuumə̀ Nẅùə̀ nshwəŋə̀ moʼo moʼo, yi pànə̀ pɨ̀tsùmə̀ pɨ lanə̀ ànwùə̀, a kɨ mə mbə̀ʼkə̀ mɨ̀ntɨŋmə̀ ɨ̀mobə.

³²Pànə̀ nɨ pobə pənə nɨ mɨntyaŋnə a nɨ zuʼnə̀ ntwuumə̀ Nẅùə̀ nshwəŋə̀ pobə̂ zhyə̂ tsaʼnə mbə̀ʼə pobə twuʼtə̀ mbɨ̀ŋmə̀ ɨzobə,

³³ntiinə ka Nẅùə̀ a pə e Nẅùə̀ àtsànkə̀ mɨ̀nwùə̀. A Nẅùə̀ àporə̀porə̀. Lə tsaʼnə mbə̀ʼə a pə amwuə ɨ̀shwatə̀ ɨ̀poonə̀ pɨ̀ Nẅùə̀ ɨ̀tsùmə̀.

³⁴Amwuə ɨ̀shwatə̀ ɨ̀poonə̀ pɨ̀ Nẅùə̀ ɨ̀tsùmə̀, kò pə̀ngyə̌ shwəŋnə̀ a ghobə amwuə. Ntiinə ka mbòomə a pyiimə̀ e lo pobə̂ shwəŋnə̀. Pobə̂ mə nzhwiʼtə̀ mɨ̀nwùə̀ nɨ pànə̀ pa nshwəŋə̀ tsaʼnə mbòomə à shwəŋə̀nə.

³⁵Ànwùə̀ àtse a tə pəla mbə ghu nɨ pobə tàʼnə lo zhyə̂ pobə kwə̂ a ɨmwuə ɨlyiʼə mbyiitə̀ pɨ̀lwuumə̀ ɨ̀pobə ntiinə la ɨ̀sɨŋnə̀ ambo mə̀ngyə̌ a nɨ shwəŋnə̀ amwuə àshwatə̀.

³⁶A ànwùə̀ àkə? Àshwəŋnə̀ Nẅùə̀ a lə̀ furə̀ ambo pɨghə, kə̀ a lə̀ kɨ ntô mbyàa e la ndàʼà ambo pɨghə?

³⁷Ŋwùə̀ ɨwɨghə ɨ̀tse à tə pəla nkwàŋə̀ lo à chyə̂ mbə ngàŋə̀ ntwuumə̀ Nẅùə̀ kə̀ lo à wə̀ nɨ mɨntyaŋnə mɨ Àzhwùə̀ Nẅùə̀, a zhyə̂ ɨ̀shìʼnə̀ lo ànwùə̀ zə̀ nɨ ngwə̀ ŋŋwàʼnə̀ ambo pɨghə la ntə̌ Ndòʼnə̀mbyə̂.

³⁸La ŋònə̀ ɨ̀tse à tə pəla ka pyiimə̀ ntə̌ wə̀, kò nɨ̀ kɨ mbyiimə̀ a wɨghə ànwùə̀ nɨ à wə̀ nshwəŋə̀.

³⁹Lenəla nɨ pɨlyimə ɨ̀pâ, nɨ̀ taŋnə̀ a nɨ zuʼù ntwuumə̀ Nẅùə̀ nshwəŋə̀, la kò nɨ̀ kɨ nnàanə̀ a wɨghə lo kò pɨ shwəŋnə̀ mbuurə̀ ɨ̀shwəŋnə̀ pɨ̀shwuə̀ pɨ̀tse.

⁴⁰Nɨ̀ ghɨ̀rə̀ mɨ̀nwùə̀ amwuə ndwuumə̀ nɨ mbə̀ʼə pɨ ghɨ̀rə̀ a kɨ kùʼnə̀.