Read Pinyin 1 Korìntə̀ 15 Bible Online

1 Korìntə̀ 15 - Pinyin bible

1 Korìntə̀ 15

¹Tɨ̀tsòŋə̀ nɨ pɨlyimə ɨ̀pâ, ǹtàʼà kẅuumə̀ a wɨghə nɨ ntwuumə̀ ghù ɨ̀shìʼnə̀ wa nɨ ndə̀ chwìitə̀nə ambo pɨghə nɨ̀ kɨ nkẅiirə̀ nnùŋə̀ ntɨŋmə̀ ɨ̀wɨghə ntəəmə̀ aŋunə ɨ̀shìʼnə̀ la.

²Ntwuumə̀ ẅèrə wə̀ la ntwuumə̀ nɨ ɨ lə̀ chwarə̀nə a wɨghə tsaʼnə nɨ̀ lə̀ ẅìimə̀nə a ẅèrə ntɨ̀ŋnə̀ aŋunə, a tə ka pə e a lenə, yi nɨ̀ lə̀ nùŋə̀ ntɨŋmə̀ ɨ̀wɨghə aŋunə la àfǐfǐ.

³Ndə̀ ŋâ mə ànwùə̀ nɨ ndə̀ kẅiirə̀nə ambo pɨghə tsaʼa ntsàambyə̀ ànwùə̀ yè ẅùunə, lo Kristù à lə̀ kwɨghə̀ ntii ɨ̀nwùə̀ tɨ̀pòŋə̀ ɨ̀pə̀ənə̀ a nɨ zùŋə̀ tsaʼnə àŋwàʼnə̀ Nẅùə̀ a lə̀ shwəŋə̀nə.

⁴Pɨ lə̀ tẅəŋə̀ a Yěsû nchi nzhwuumə̀ e aŋunə nɨ̀wɨghə̀ aŋunə njyə̂ ɨtarə tsaʼnə àŋwàʼnə̀ a lə̀ shwəŋə̀nə lo

⁵à lə̀ kɨ nnèrə̀ mbɨ̀ŋmə̀ e ambo Sefàsə̀ nkɨ nnèrə̀ ambo pobə pa ntsòbə̀ ɨpaa.

⁶À lə̀ chi nnèrə̀ mbɨ̀ŋmə̀ e ambo ɨ̀zùŋə̀ ndzùmə̀ ɨ̀pe pɨ̀tse nɨ làŋə̀nə nkɨrə ɨtaanə̀. Pobə pèrə pə pɨ̀noʼnə pirə̀ pɨ̀tɨ̀ŋnə̀ mbaa pə tsaʼnə pɨ̀tse kwɨkə̀ mə.

⁷À lə̀ nèrə̀ mbɨ̀ŋmə̀ e ambo Jemə̀ nkɨ nchi nnèrə̀ ambo ngàŋə ntwuumə̀ ɨ̀ze za ɨ̀tsùmə̀.

⁸À lə̀ lẅùutə̀ nnèrə̀ mbɨ̀ŋmə̀ e ambo mɨ̀ŋə̀ tsaʼa ŋònə̀ nɨ ka pɨ pyə̂ e a ye amwuə ngotə nkwùə̀.

⁹Mbə̀ʼnə m̀bənə la ndẅùə̀ndzùmə̀ amwuə ngàŋə ntwuumə̀ Kristù, ka kùʼnə̀ mə̀ lo pɨ̀ fuŋə̀ a mə̀ nɨ ngàŋə̀ ntwuumə̀ Kristù ntiinə ndə̀ nyàŋə̀ àshwatə̀ ɨ̀poonə̀ pɨ Nẅùə̀.

¹⁰La a nɨ làŋə̀ a ndzùmə̀ àpòŋə̀ ntɨŋmə̀ Nẅùə̀ mbə ŋònə̀ nɨ m̀bənə ẅèrə lə̀. Ka ɨ̀pòŋə̀ e lə̀ làŋə̀ àfǐfǐ aŋunə mɨ̀ŋə̀. Ndə̀ fàʼà ntsàarə̀ a zhyə̀ ngàŋə ntwuumə̀, mbaa pə tsaʼnə ka a lə̀ pə e ɨ̀tɨ̀ŋnə̀ mə̀, a lə̀ pə àpòŋə̀ ntɨŋmə̀ Nẅùə̀ nɨ a lə̀ pənə pəə ze.

¹¹Lenəla, kə̀ nɨ ntwuumə̀ ghu a lə̀ chwiitə̀nə pobə kə̀ mɨ̀ŋə̀ ambo pɨghə yi pəə pɨ pobə lə̀ chwìitə̀ la taʼà ntwuumə̀ nɨ ɨ pənə ntwuumə̀ wa nɨ nɨ̀ lə̀ pyiimə̀nə la.

¹²Tɨ̀tsòŋə̀, pɨ tə mə nchwìitə̀ lo pɨ lə̀ zhwuumə̀ a Kristù aŋunə nɨ̀wɨghə̀, pɨghə pɨ̀tse tyiʼə̀ nshwəŋə̀ lo ka pɨ̀kwuə̀ pə ghǎ zhwuumə̀ a ghobə nɨ̀wɨghə̀ lə ɨla ghu?

¹³A tə pə zhyə̀ nɨ ka pɨ̀kwuə̀ pə ghǎ zhwuumə̀ a ghobə a nɨ̀wɨghə̀ yi ka pɨ lə̀ kɨ nzhwuumə̀ e a Kristù aŋunə nɨ̀wɨghə̀.

¹⁴A tə pə lo ka pɨ lə̀ zhwuumə̀ e a Kristù aŋunə nɨ̀wɨghə̀ yi ànwùə̀ Nẅùə̀ nɨ pəə pa nchwìitə̀ la a tyìʼə̀ àfǐfǐ, àpyiimə̀ àzɨghə a kɨ mbə tyìʼə̀ àfǐfǐ.

¹⁵A tə pə lo ka ɨ̀kwuə̀ pə̀ənə̀ zhwuumə̀ a ghobə a nɨ̀wɨghə̀ yi pə̀ənə̀ nyìi la pɨ̀chwìrə̀ àtwuə̀ Nẅùə̀ ntiinə pə̀ənə̀ pə nshwəŋə̀ lo à lə̀ zhwuumə̀ a Kristù aŋunə nɨ̀wɨghə̀ la nɨ ka à lə̀ zhwuumə̀ e a ye mbə̀ʼə a pə nkǔŋə nkuŋə lo ka ɨ̀kwuə̀ pə̀ənə̀ zhwuumə̀ e a nɨ̀wɨghə̀.

¹⁶Mbə̀ʼnə a tə pə lo ka pɨ zhwuumə̀ e ɨ̀kwuə̀ pə̀ənə̀ yi ka pɨ lə̀ kɨ nzhwuumə̀ e a Kristù.

¹⁷A tə pə zhyə̀ nɨ pɨ pirə̀nə e a Kristù tɨ zhwuumə̀ aŋunə nɨ̀wɨghə̀, yi àpyiimə̀ ntɨŋmə̀ àzɨghə a tyìʼə̀ àfǐfǐ, nɨ̀ kɨ mbirə̀ a wɨghə amwuə tɨ̀pòŋə̀ ɨwɨghə.

¹⁸Njiilo pànə̀ nɨ pɨ lə̀ lyə̂nə amwuə Kristù pî a ghobə la pînə.

¹⁹Pə̀ənə̀ tə chyâ ntɨŋmə̀ ɨ̀wəənə̀ aŋunə Kristù ntii nɨ̀chyə̂mbyə̂ àtwuə̀ ɨ̀shyə̂, yi pə̀ənə̀ chyə̂ mbə la pànə̀ nɨ mbə̀ʼə pɨ yìi mɨ̀liŋə̀ ɨ̀mobə ntsàarə̀ pànə̀ pɨ̀tsùmə̀.

²⁰La, a nkǔŋə nkuŋə lo pɨ lə̀ zhwuumə̀ a Kristù aŋunə nɨ̀wɨghə̀ a pə ntsàambyə̀ ŋwùə̀ a nɨ zhwuumə̀ nɨ̀wɨghə̀ amwuə pànə̀ pa nɨ pobə lyə̂nə a pɨlô la,

²¹ntiinə nɨ̀wɨghə̀ a lə̀ làŋə̀ la a ndzùmə̀ ŋònə̀ mbyàŋnə̀ nkwuunə̀ amwuə àtwuə̀ ɨ̀shyə̂ zə̀, nɨ̀zhwuumə̀ aŋunə nɨ̀wɨghə̀ a kɨ ndàŋə̀ tyìʼə̀ a ndzùmə̀ ŋònə̀ mbyàŋnə̀.

²²Tyìʼə̀ tsaʼnə pànə̀ pɨ̀tsùmə̀ lə̀ kwɨkə̀nə ndàŋə̀ a ndzùmə̀ Adàmə̀ la, a kɨ mbə tyìʼə̀ tsaʼnə pɨ ghǎ ghɨ̀rə̀ pànə̀ pɨ̀tsùmə̀ zhwuumə̀ a nɨ̀wɨghə̀ ndàŋə̀ a ndzùmə̀ Kristù.

²³La ɨ̀nwùə̀ ɨ̀tsùmə̀ furə̀ la tsaʼnə pɨ lə̀ tyankə̀nə; Kristù à lə̀ pyə̀ nzhwuumə̀; amwuə nkwùə̀ nɨ à ghǎ tô, pànə̀ nɨ pɨ pənə ɨ̀pe pɨ tyiʼə̀ zùŋə̀ e.

²⁴Ndẅùutə ɨ̌ tô, a tyiʼə̀ ntsə̀ŋə̀ ɨ̀tɨ̀ŋnə̀ ɨ̀zhwùə̀ pobə mɨ̀tɨ̀ŋnə̀ ma nɨ mèrə puʼtə̀nə mbyə̂ zə̀ tyìʼə̀ ntsùmə̀ kẅirə̀ ŋâ Ànwùə̀ Nɨ̀fò ambo Nẅùə̀ Tǎ.

²⁵Mbə̀ʼnə Kristù à chyə̂ a nɨ puʼtə̀ mbyə̂ zə̀ mbyàa nkwùə̀ nɨ Nẅùə̀ à ghǎ nùŋə̀ ngàŋə kɨpaanə ɨ̀ze a ɨ̀sùmə mɨ̀kwùə̀ ze.

²⁶Ndẅùə̀ndzùmə̀ ngàŋə̀ mbwùunə̀ nɨ pɨ̌ tsə̀ŋə̀ la nɨ̀wɨghə̀,

²⁷ntiinə àŋwàʼnə̀ Nẅùə̀ a shwəŋə̀ lo, Nẅùə̀ a nyìmə̀ àzwuumə̀ àtsùmə̀ ntsàa a ɨ̀sùmə mɨ̀kwùə̀ mɨ Yěsû a tyiʼə̀ mbuʼtə̀. A laanə̀ lo pɨ̀ tə shwəŋə̀ lo; “ɨ̀pwuumə̀ ɨ̀tsùmə̀,” yi ka Nẅùə̀ a pə e amwuə, ntiinə ɨ̀pwuumə̀ ɨ̀tsùmə̀ la a nyìmə̀ e ze ntsàa ɨ̀sùmə mɨ̀kwùə̀ Yěsû.

²⁸La nkwùə̀ nɨ Nẅùə̀ à nùŋə̀nə ɨ̀pwuumə̀ ɨ̀tsùmə̀ a ɨ̀sùmə Yěsû, yi ze àtwuə̀ mbɨ̀ŋmə̀ Moonə̀ ǎ tyiʼə̀ ŋâ mbɨ̀ŋmə̀ e a ɨ̀sùmə Nẅùə̀ nɨ à nùŋə̀nə ɨ̀pwuumə̀ a ɨ̀sùmə ze, Nẅùə̀ â tyiʼə̀ mbuʼtə̀ a àzwuumə̀ àtsùmə̀.

²⁹Tɨ̀tsòŋə̀, ànwùə̀ pànə̀ nɨ pobə kẅiirə̀nə nchyə àtwuə̀ nɨ ɨ̀kwuə̀ pə̀ənə̀ a tyiʼə̀ mbə lo àkə? Pèrə pə pànə̀ tyiʼə̀ kwàŋə̀ lo pobə pə nɨ àkə, mbə̀ʼə a pə lo pɨ pa ka zhwuumə̀ e ɨ̀kwuə̀ pə̀ənə̀ aŋunə nɨ̀wɨghə̀, pɨ tyiʼə̀ ŋŋâ àkẅiirə̀ nchyə ambo pə̀ənə̀ aŋunə nɨ̀linə̀ pɨ̀kwùə lə ɨla?

³⁰Aŋunə pəə, pəə̂ tyiʼə̀ chyâ mbɨ̀ŋmə̀ ɨ̀zəə a ntswùə̀ nɨ̀wɨghə̀ nkwùə̀ ɨ̀tsùmə̀ lə ntii àkə?

³¹Pɨlyimə ɨ̀pâ, ngwə̀ ndzəənə̀ a nɨ̀wɨghə̀ amwuə ɨ̀twuʼə̀ ɨ̀tsùmə̀ nɨ ɨ̀myə̂ ɨ̀mâ. Kɨ̀tèrə̀ nɨ m̀bənə nɨ ẅèrə ntii wɨghə nɨ nɨ̀ pwuutə̀nə pə̀ənə̀ amwuə Ndòʼnə̀mbyə̂ ɨ̀wə̀ənə̀ a ghɨ̀rə̀ lo n̂shwəŋə̀ ànwùə̀ zèrə zə̀.

³²Ndə̀ pəla ndzòŋnə̀ pəə pɨ mɨ̀nyàamə̀ mɨ̀tsə̂nə a àlaʼà Efesòsə̀, yi àpìi mə̀ a tyiʼə̀ mbə àkə? A tə mbə zhyə̀ nɨ ka pɨ̀ zhwuumə̀ e ɨ̀kwuə̀ pə̀ənə̀ aŋunə nɨ̀wɨghə̀, “Pə̀ənə̀ tə ndzɨghə̀ nnô, ntiinə à ghǎ pə ngẅùʼə pə̀ənə̀ kwɨkə̀.”

³³Kò nɨ̀ tə nfɨ̀kə̀ mbɨ̀ŋmə̀ ɨ̀zɨghə, nɨ̀ tə mmə ngyìinə̀ pɨghə pɨ àkwùə̀ tɨ̀pòŋə̀ yi pobə pɨ tsə̀ŋə̀ ngɨ̀rə̀ mɨ̀nwùə̀ ɨ̀zɨghə yɨ̀ ɨ̀shìʼnə̀.

³⁴Nɨ̀ sùŋə̀ ɨ̀zhìʼtə̀ ɨ̀pɨghə nkẅirə̀ nkwə̂. Kò nɨ̀ chi ngɨ̀rə̀ ɨ̀nwùə̀ tɨ̀pòŋə̀ ntiinə ka pɨghə pɨ̀tse zhyə̂ a wɨghə a Nẅùə̀. Ǹshwəŋə̀ a zə̀ a nɨ chyâ ɨ̀siŋnə̀ àtwuə̀ pɨghə.

³⁵La ŋònə̀ ɨ̀tse ǎ pyiitə̀ lo, “Pɨ zhwuumə̀ pànə̀ aŋunə nɨ̀wɨghə̀ lə ɨla? Pobə chyə̂ tyiʼə̀ tô lə nɨ zèrə mbuurə̀ mbòbə̀ mbɨ̀ŋmə̀?”

³⁶Àpuukə̀ ŋònə̀! ka àzwuumə̀ nɨ pɨ pyə̀nə a ɨ̀shyə̂ a saʼà e tɨghu a pyə̀ nkwɨghə̀.

³⁷La àzwuumə̀ nɨ wə̀ pyə̀nə, kə̀nə à pənə mbùmə̀ nkẅùə̀ kə̀ mbùmə̀ àzwuumə̀ ɨ̀tse, ka pə e mbɨ̀ŋmə̀ àtɨ̀ghə ghu nɨ ɨ pə koʼò pə a zèrə.

³⁸Nẅùə̀ a ŋâ mbɨ̀ŋmə̀ ambo mbùmə̀ àzwuumə̀ la tsaʼnə à kòŋə̀nə. Nkɨ mə ŋâ mɨ̀mbɨ̀ŋmə̀ myə̀ nɨ mɨ kùʼnə̀nə ambo mbuurə̀ ɨ̀pwuumə̀ la chwìi chwìi.

³⁹Ka mbòbə̀ mbɨ̀ŋmə̀ ɨ̀pwuumə̀ nɨ pèrə pa nchyə̂ ɨ pə e ndəŋə. Pànə̀ pɨ mɨsoŋə chyə̂ nɨ taʼà mbuurə̀ mbòbə̀ mbɨ̀ŋmə̀, mbòbə̀ mbɨ̀ŋmə̀ mɨ̀nyàamə̀ ɨ̀ pə chwìi, yɨ̀ pɨ̀sɨ̀ŋə pə chwìi, yɨ̀ ɨ̀swuə̀ ɨ̀ kɨ mbə chwìi.

⁴⁰Mbòbə̀ mbɨ̀ŋmə̀ nɨ̀pwuurə̀ ɨ̀ za ghu, mbòbə̀ mbɨ̀ŋmə̀ àtwuə̀ ɨ̀shyə̂ ɨ̀ kɨ mbə ghu. Nɨ̀pòŋə̀ mbòbə̀ mbɨ̀ŋmə̀ nɨ̀pwuurə̀ a pə chwìi, yɨ̀ mbòbə̀ mbɨ̀ŋmə̀ àtwuə̀ ɨ̀shyə̂ à kɨ mbə chwìi.

⁴¹Nẅùumə̀ à chyə̂ nɨ ɨye nɨ̀pòŋə̀, məŋwɨgrə̀ a pə nɨ ɨye, pɨsaŋə kɨ mbə nɨ ɨghobə nɨ̀pòŋə̀. Tyìʼə̀ amwuə pɨsaŋə pɨ̀ghu, wə̀ saŋə a pə nɨ ɨye nɨ̀pòŋə̀ chwìi, ẅùə̀ a kɨ mbə nɨ nɨ̀pòŋə̀ chwìi.

⁴²Lə̌ tsaʼnə pɨ ghǎ zhwuumə̀ ɨ̀kwuə̀ pə̀ənə̀. Pɨ tẅəŋə̀ la mbɨ̀ŋmə̀ zhyə̀ nɨ ɨ̀ za nkwɨghə̀, pɨ zhwuumə̀ a zèrə ɨ̀ tyiʼə̀ zhyə̀ nɨ ka ɨ̀ mə nkwɨghə̀ e.

⁴³Nkwùə̀ nɨ pɨ tẅəŋə̀nə, ɨ̀ porə̀ nkɨ mbɨ̂ a nɨ zəənə̀. Nkwùə̀ nɨ pɨ zhwuumə̀nə, ɨ̀ pòŋə̀ nkɨ ntɨ̀ŋnə̀.

⁴⁴Pɨ kɨ ntẅəŋə̀, ɨ pə mbòbə̀ mbɨ̀ŋmə̀, pɨ zhwuumə̀ a zèrə ɨ tyiʼə̀ mbɨ̀ŋmə̀ Àzhwùə̀. Mbòbə̀ mbɨ̀ŋmə̀ ɨ̀ tə mbə ghu a pə lo mbɨ̀ŋmə̀ àzhwùə̀ ɨ̀ za nkɨ mbə ghu.

⁴⁵Tyìʼə̀ tsaʼnə pɨ lə̀ ŋwàʼnə̀nə amwuə àŋwàʼnə̀ Nẅùə̀ lo, “Adàmə̀ ghù ntsàambyə̀ à lə̀ tyiʼə̀ ŋwùə̀ yɨ̀ ntɨ̀ŋnə̀.” La ndẅùə̀ndzùmə̀ Adàmə̀ a pə Àzhwùə̀ za nɨ a ŋânə a nɨ̀chyə̂mbyə̂ la.

⁴⁶Ka la zàamə̀ e mbɨ̀ŋmə̀ àzhwùə̀, a zàamə̀ e mbòbə̀ mbɨ̀ŋmə̀ zaʼà ye àzhwùə̀ pòŋə̀ tô.

⁴⁷Ntsàambyə̀ ŋwùə̀ Adàmə̀ nɨ pɨ lə̀ tsùŋə̀nə nɨ àtɨ̀tsaʼa, à lə̀ furə̀ la amwuə àtɨ̀tsaʼa. Àpaatə̀ Adàmə̀ a tyiʼə̀ nfurə̀ a nɨ̀pwuurə̀.

⁴⁸Ŋònə̀ wa nɨ à lə̀ furə̀nə amwuə àtɨ̀tsaʼa a chyə̂ la tsaʼa pànə̀ pɨ àtwuə̀ ɨ̀shyə̂ ghə. Àpaatə̀ nɨ a lə̀ furə̀nə a nɨ̀pwuurə̀ a kɨ ntyiʼə̀ mbə tsaʼa pànə̀ nɨ furə̀nə a nɨ̀pwuurə̀.

⁴⁹Tsaʼnə pə̀ənə̀ lə̀ pənə nɨ mbɨ̀ŋmə̀ ɨ shwuə̀nə yi ŋwùə̀ nɨ a furə̀nə amwuə àtɨ̀tsaʼa la, pə̀ənə̀ ghǎ kɨ pə nɨ mbɨ̀ŋmə̀ ŋwùə̀ nɨ a furə̀nə a nɨ̀pwuurə̀.

⁵⁰Pɨlyimə ɨ̀pâ, ànwùə̀ nɨ nshwəŋə̀nə ambo pɨghə a chyə̂ lo, ka mbòbə̀ mbɨ̀ŋmə̀ zə̀ nɨ àləəmə̀ zə̀ pə ghǎ zɨghə̀ ànwùə̀ Nɨ̀fò Nẅùə̀. Mbə̀ʼnə mbòbə̀ mbɨ̀ŋmə̀ za nɨ ɨ̀ za nkwɨghə̀ la mbə̀ʼə ɨ̀ waʼà e tɨ kwɨghə̀ apə̀.

⁵¹Nɨ̀ tsùŋə̀ nzhwiʼtə̀ a nkǔŋə nkuŋə nɨ à pənə a nɨ̀lə̀əmə̀ la: ka pə̀ənə̀ pə ghǎ kwɨkə̀ a wəənə̀ pɨ̀tsùmə̀. La nkwùə̀ nɨ ndẅùutə̀ ntàŋnə̀ ɨ̀ ghǎ toŋə̀, pɨ̌ kɨ nyaʼkə̀ ɨ̀myə̂ nɨ pə̀ənə̀ pɨ̀tsùmə̀ kẅebə̀ mə. Ntiinə nkwùə̀ nɨ ntàŋnə̀ za ɨ̀ ghǎ tswuə̀ la, ɨ̀kwuə̀ pə̀ənə̀ ghǎ lòo a ɨ̀shyə̂ pòŋə̀ chi kwɨghə̀ a ghobə apə̀. La nkwùə̀ nɨ pə̀ənə̀ pɨ̀tsùmə̀ ghǎ kẅebə̀.

⁵²

⁵³Mbə̀ʼnə pɨ chyə̂ a nɨ kẅebə̀ àzwuumə̀ nɨ a za nkwɨghə̀ nɨ àzwuumə̀ nɨ a za ka kwɨghə̀ e. Ntiinə pɨ chyə̂ a nɨ kẅebə̀ mbɨ̀ŋmə̀ za nɨ mbə̀ʼə ɨ̀ kwɨghə̀ la nɨ mbɨ̀ŋmə̀ nɨ mbə̀ʼə ka ɨ̀ kwɨghə̀ e.

⁵⁴Nkwùə̀ nɨ mbɨ̀ŋmə̀ za nɨ ɨ̀ za mbɨ̂ la ɨ̀ ghǎ pə̀ŋə̀ tyiʼə̀ zhyə̀ za nɨ ɨ̀ za ka pɨ̂ e la, mbɨ̀ŋmə̀ nɨ ɨ̀ za nkwɨghə̀ ɨ̂ pə̀ŋə̀ ntyiʼə̀ zhyə̀ nɨ ɨ̀ za ka kwɨghə̀ e, àshwəŋnə̀ Nẅùə̀ a gha nkoʼò mbwùumə̀ tsaʼnə pɨ lə̀ ŋwàʼnə̀nə lo, “Pɨ zòŋnə̀ mə ntsàarə̀ a nɨ̀wɨghə̀ a taʼà nkwùə̀.”

⁵⁵“Nɨ̀wɨghə̀, ɨ̀tɨ̀ŋnə̀ o ɨ ghə a nɨ tsàarə̀ a ŋwùə̀? Nɨ̀wɨghə̀, ɨ̀tɨ̀ŋnə̀ o ɨ ghə? Nɨ̀wɨghə̀ mɨsoŋə ɨ̀mô ghə?”

⁵⁶Mɨsoŋə mɨ nɨ̀wɨghə̀ la ɨ̀nwùə̀ tɨ̀pòŋə̀, ɨ̀tɨ̀ŋnə̀ ɨ̀nwùə̀ tɨ̀pòŋə̀ pə mbòomə.

⁵⁷Mɨyàa ambo Nẅùə̀ nɨ à lə̀ ghɨ̀rə̀nə pə̀ənə̀ zòŋnə̀ ntsàarə̀ ndàŋə̀ a ndzùmə̀ Ndòʼnə̀mbyə̂ Yěsû Kristù.

⁵⁸Pɨlyimə ɨ̀pâ, tsaʼa a pənə lə la, nɨ̀ təəmə̀ ntɨ̀ŋnə̀. Kò nɨ̀ kɨ nnə̀ʼnə̀. Nɨ mə fàʼà ɨ̀fàʼà Ndòʼnə̀mbyə̂ nkwùə̀ ɨ̀tsùmə̀ ntiinə ka nkwùə̀ ɨ̀tse nɨ nɨ̀ wa nfàʼà ambo Ndòʼnə̀mbyə̂ ɨ̂ làŋə̀ e àfǐfǐ.