Read Pinyin 1 Korìntə̀ 16 Bible Online

1 Korìntə̀ 16 - Pinyin bible

1 Korìntə̀ 16

¹Aŋunə ànwùə̀ a nɨ tsòbə̀ nkabə̀ ŋŋâ ambo pànə̀ pɨ Nẅùə̀ a Judyà, nɨ̀ pə ngɨ̀rə̀ tyìʼə̀ tsaʼnə ndə̀ shwəŋə̀nə ambo ɨ̀shwatə̀ ɨ̀poonə̀ pɨ Kristù a Galatia la.

²A pə ntsàambyə̀ njyə̂ amwuə ngàbə̀, ŋwùə̀ moʼo moʼo amwuə pɨghə a fuukə̀ nkabə̀ nɨ ɨ̀ kùʼnə̀nə a nɨ zùŋə̀ aŋunə àzwuumə̀ nɨ à fùʼnə amwuə ngàbə̀ ghu ndòʼnə̀ a ndâ ze, mbə̀ʼə m̀bəla ntô nɨ̀ chi ntsòbə̀ a wɨghə nkabə̀ nkwùə̀ ghu apə̀.

³Njiilo nkwùə̀ nɨ ǹtônə, mbɨ ŋwàʼnə̀ àŋwàʼnə̀ ŋŋâ ambo pànə̀ nɨ nɨ̀ tsoʼnə lo pobə̂ lòo àyèmpə̀ àzɨghə ngə̀ ŋŋâ ambo pànə̀ pɨ Yèrusalèmə̀.

⁴A tə mbəla nkùʼnə̀ lo n̂dèrə̀ àzâ, yi pànə̀ pɨ̀ghu tyiʼə̀ zùŋə̀ a mə̀ pəə pɨ pobə lèrə̀.

⁵Nkwùə̀ nɨ ngǎ karə̀ a Màsèdonyà, ngǎ tô ambo pɨghə ntiinə ndə̀ mə nkwàŋə̀ a nɨ karə̀ a Màsèdonyà.

⁶Nchyə̂ ghǎ tô chyə̂ pə̀ənə̀ aŋunə mətùmə nkwùə̀, kə̀ ntô nchyə̂ pə̀ənə̀ amwuə nkwùə̀ ghɨɨmə àtsùmə̀. Lenəla, nɨ̀ tyiʼə̀ ngyèmpə̀ mə̀ lo n̂gyìinə̀ nɨ ɨ̀tɨ̀ŋnə̀ ndèrə̀ a alyiʼə àtsùmə̀ nɨ m̀mənə ntàʼà lèrə̀.

⁷Ka ǹtàʼà mə̀ lo tô mə làŋə̀ làŋə̀nə zaʼà pòŋə̀ zəənə̀ a wɨghə. Ǹtàʼà lo tsùŋə̀ chyə̂ pə̀ənə̀ ɨ̀shìʼnə̀, mbə̀ʼə Ndòʼnə̀mbyə̂ a pyiimə̀.

⁸La mbɨ chyə̂ a àlaʼà Efesòsə̀ tə pyàa njyə̂ Pentekòsə̀,

⁹ntiinə ɨ̀sàanə̀ ngẅùunə ɨ furə̀ ambo mɨ̀ŋə̀ a nɨ fàʼà àfàʼà ɨ̀shìʼnə̀, mbaa pə tsaʼnə pànə̀ pɨ̀tse pə a nɨ̀ghə̂ mmə ndzòŋnə̀ a mə̀.

¹⁰Timotì à tə pəla ntô ambo pɨghə nɨ̀ kẅiirə̀ e ɨ̀shìʼnə̀ ntiinə à fàʼà la tyìʼə̀ àfàʼà Ndòʼnə̀mbyə̂ tsaʼnə ǹkɨ mmə nfàʼà la.

¹¹Lenəla, kò ŋwùə̀ ɨwɨghə ɨ̀tse a wâ e a ye, la nɨ̀ yèmpə̀ â lèrə̀ nɨ mbyə̀ nɨ àkwùə̀ nɨ̀yìinə̀ e àporə̀porə̀, njiilo à kẅirə̀ ntô ambo mɨ̀ŋə̀, ntiinə ngwə̀ mbyabə̀ e pobə pɨlyimə a ndzùmə̀ Kristù.

¹²Ngə̀ aŋunə ndyimə ɨ̀wəənə̀ Àpolòsə̀, ndə̀ tinə̀ e amwuə ɨ̀làŋə ɨ̀tsùmə̀ lo pobə pɨlyimə ɨ̀pə̀ənə̀ pɨ̀tse tô nkarə̀ a wɨghə. La ka à lə̀ kòŋə̀ e a nɨ lèrə̀ nkwùə̀ ghu. Ǎ tô tô nkwùə̀ nɨ à gerə̀nə ɨ̀sàanə̀.

¹³Nɨ̀ nwuunə̀ a nɨ̀lyìinə̀, ntəəmə̀ ntɨ̀ŋnə̀ amwuə àpyiimə̀ ntɨŋmə̀ àzɨghə. Nɨ̀ ẅìimə̀ ntɨŋmə̀ nkɨ ntɨ̀ŋnə̀.

¹⁴Nɨ̀ fàʼà ɨ̀fàʼà ɨ̀tsùmə̀ nɨ ɨ̀kòŋnə̀.

¹⁵Pɨlyimə ɨ̀pâ, nɨ̀ zhyə̂ lo ngẅàrə̀ Stèfanàsə̀ ɨ̀ lə̀ pə ntsàambyə̀ ngẅàrə̀ a nɨ nùŋə̀ ntɨŋmə̀ aŋunə Yěsû Kristù amwuə àlaʼà Àkayà, nkɨ ŋŋâ mbɨ̀ŋmə̀ ɨ̀zobə a nɨ fàʼà ambo pànə̀ pɨ Nẅùə̀.

¹⁶M̀buʼù mbô ambo pɨghə lo nɨ̀ tə ndzuʼnə̀ mbuurə̀ pànə̀ tsaʼa zèrə̀ zə, nkɨ ndzuʼnə̀ a ŋwùə̀ wa ntsùmə̀ nɨ à wa nfàʼà tsaʼa pobə.

¹⁷Ndə̀ lanə ngaʼà nkwùə̀ nɨ Stèfanàsə̀, pobə Fotunatus nɨ Achaicus lə̀ tônə, ntiinə pobə lə̀ tônə ngɨ̀rə̀ ànwùə̀ zhyə̀ nɨ nɨ̀ lə̀ pənə ghɨ̀rə̀.

¹⁸Pobə lə̀ ghɨ̀rə̀ ntɨŋmə̀ mə̀ ɨ fiitə̀ tsaʼnə pobə lə̀ kɨnə ngɨ̀rə̀ ɨ̀mɨghə fiitə̀. Nɨ̀ tsùŋə̀ nzhwiʼtə̀ ànwùə̀ nɨ pànə̀ tsaʼa pèrə pə pa nshwəŋə̀.

¹⁹Ɨ̀shwatə̀ ɨ̀poonə̀ pɨ Kristù nɨ pənə a pàa àlaʼà Asia pə̀ nchàʼtə̀ a wɨghə. Aquila pobə Prìsilà, nɨ àshwatə̀ ɨ̀poonə̀ pɨ Kristù nɨ à shwatə̀nə a ndâ pobə, a kɨ tsùŋə̀ nchàʼtə̀ a wɨghə aŋunə nɨ̀linə̀ nɨ Ndòʼnə̀mbyə̂

²⁰Pɨlyimə ɨ̀pə̀ənə̀ pɨ̀tsùmə̀ nɨ pɨ pənə a nɨ̀ghə̂ kɨ tsùŋə̀ nchàʼtə̀ a wɨghə. Nɨ̀ chàʼtə̀ nkampə̀ mbɨ̀ŋmə̀ ɨ̀zɨghə.

²¹A ŋwàʼnə̀ mɨ̀ŋə̀ Pàolò, ŋŋwàʼnə̀ àŋwàʼnə̀ zə̀ mmə nchàʼtə̀ a wɨghə.

²²Ndòonə̀ ɨ chyə̂ àtwuə̀ ŋònə̀ wa nɨ ka à kòŋə̀ e a Ndòʼnə̀mbyə̂ ɨ̀wə̀ənə̀. Maranatha, Ndòʼnə̀mbyə̂ ɨ̀wə̀ənə̀ â tô!

²³Àpòŋə̀ ntɨŋmə̀ Ndòʼnə̀mbyə̂ Yěsû â pə pɨghə pɨ pobə.

²⁴Ɨ̀kòŋnə̀ mə̀ ɨ̂ pə pɨghə pɨ pobə pɨ̀tsùmə̀ ndàŋə̀ a ndzùmə̀ Yěsû Kristù. Amen.