Read Pinyin 1 Korìntə̀ 2 Bible Online

1 Korìntə̀ 2 - Pinyin bible

1 Korìntə̀ 2

¹Pɨlyimə ɨ̀pâ, nkwùə̀ nɨ ndə̀ tônə ambo pɨghə, ka ndə̀ shwəŋə̀ mə̀ pə ɨ̀shwəŋnə̀ pɨ̀nẅiʼtə̀nə kə̀ ɨ̀shwəŋnə̀ ɨ̀zhìʼtə̀ a nɨ tiitə̀ a nkǔŋə nkuŋə nɨ a lə̀əmə̀nə mbə̀ʼə Nẅùə̀.

²Ndə̀ nùŋə̀ mə a ntɨŋmə̀ mɨ̀ŋə̀ a nɨ lə̀ənə̀ àzwuumə̀ àtsùmə̀, kẅempə̀ pə ndàʼà Yěsû Kristù pobə nɨ̀wɨghə̀ e aŋunə àtɨ̀ghə pànkə̀nə.

³Lenəla, ndə̀ kɨ tô ambo pɨghə, mbɨ̀ŋmə̀ mə̀ porə̀, mbə nɨ àkẅàrə̀ mmə ngwùrə̀ ka mɨ̀zùŋə.

⁴Tsaʼnə ndə̀ mənə nshwəŋnə̀ nkɨ mmə nchwìitə̀ ntwuumə̀ Nẅùə̀, ka ndə̀ lòo mə̀ pə àshwəŋnə̀ yè ɨ̀shìʼnə̀ a nɨ shwəŋnə̀ àzhìʼtə̀ tsaʼnə pànə̀ lə̀ tàʼnə. La ndə̀ shwəŋə̀ pə zhyə̀ nɨ ŋwùə̀ à tə pəla ndzuʼù, a ghoŋə̀ e tɨ zhyə̂ lo a mɨ̀tɨ̀ŋnə̀ mɨ Àzhwùə̀ Nẅùə̀ nɨ mɨ fàʼnə apə̀.

⁵Kò nɨ̀ kɨ nnùŋə̀ a wɨghə àpyiimə̀ àzɨghə pə aŋunə àzhìʼtə̀ pànə̀ pɨ mɨsoŋə. Nɨ̀ nùŋə̀ pə aŋunə ɨ̀tɨ̀ŋnə̀ Nẅùə̀.

⁶La ndòo àzhìʼtə̀ yè noʼnə pə a nɨ shwəŋə̀nə ambo pànə̀ nɨ pobə tsùŋə̀nə nnùŋə̀ àpyiimə̀ àzobə aŋunə Nẅùə̀. Ka ǹdòo mə̀ pə àzhìʼtə̀ nɨ pànə̀ pɨ àtwuə̀ ɨ̀shyə̂ ghə̀ lòonə, kə̀ àzhìʼtə̀ pànə̀ nɨ pobə chyə̂nə nɨ ɨ̀tɨ̀ŋnə̀ a nɨ puʼtə̀ àtwuə̀ ɨ̀shyə̂ zə̀ la mmə mbî mɨ̀tɨ̀ŋnə̀ ɨ̀mobə.

⁷Ngwə̀ shwəŋə̀ lə mbə̀ʼə ànwùə̀ àzhìʼtə̀ Nẅùə̀ nɨ ka pànə̀ zhyə̂ a ghobə. A lə̀ lə̀əmə̀ a ghobə nɨ àzhìʼtə̀ ghu, nnùŋə̀ a zèrə a nɨ furə̀ nkwùə̀ nɨ a lə̀ tsùŋə̀nə àtwuə̀ ɨ̀shyə̂ lo ghǎ lòo a zèrə tsùŋə̀ a wəənə̀ ghu aŋunə àghuʼtə̀ àzəənə̀.

⁸Ka ŋònə̀ ɨ̀tse nɨ à wa mbuʼtə̀ pə̀ənə̀ a àtwuə̀ ɨ̀shyə̂ ghə a pə e ghu nɨ à lə̀ zhyə̂nə a zə̀ mbuurə̀ àzhìʼtə̀, ntiinə pobə lə̀ pəla nzhyə̂, yi ka pobə lə̀ kẅùumə̀ a ghobə a Ndòʼnə̀mbyə̂ wa nɨ à pənə nɨ àghuʼtə̀ la aŋunə àtɨ̀ghə pànkə̀nə.

⁹La tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo, “Àzwuumə̀ nɨ ŋwùə̀ mɨsoŋə à pirə̀ mə e tɨ zəənə̀ kə̀ ndzuʼù, farə a zhyə̀ za nɨ à pirə̀ mə e tɨ kwàŋə̀ lo mbə̀ʼə zèrə a gha ngɨ̀rə̀, la àzwuumə̀ za nɨ Nẅùə̀ à tsùŋə̀ mə ambo pànə̀ nɨ pɨ kòŋə̀nə e.”

¹⁰La kùmə̀ mbə pə̀ənə̀ nɨ Nẅùə̀ à lə̀ ghɨ̀rə̀nə lo pə̀ənə̀ zhyə̀ ɨ̀pwuumə̀ pə ndàŋə̀ a ndzùmə̀ Àzhwùə̀ e. Àzhwùə̀ zə a za nnaŋə̀ ɨ̀pwuumə̀ ɨ̀tsùmə̀ ɨ̀shìʼnə̀, tə mbyàa aŋunə pyə̀ nɨ pèrə lə̀əmə̀nə amwuə àkwàŋə̀ Nẅùə̀.

¹¹Ngə̀ aŋunə ŋwùə̀, la àzhìʼtə̀ nɨ a pənə amwuə ntɨŋmə̀ e nɨ a zhyə̂nə ànwùə̀ àtsùmə̀ nɨ a pənə a ntɨŋmə̀ ze. A tyìʼə̀ ndəŋə ndəŋə lo, a kɨ mbə ndàʼà Àzhwùə̀ Nẅùə̀ nɨ a zhyə̂nə ànwùə̀ àtsùmə̀ mbə̀ʼə Nẅùə̀.

¹²Ka pə̀ənə̀ kẅiirə̀ a wəənə̀ la Àzhwùə̀ àtwuə̀ ɨ̀shyə̂ zə̀, la nkẅiirə̀ pə a zhyə̀ nɨ Nẅùə̀ à tsàanə ambo pə̀ənə̀, mbə̀ʼə pə̀ənə̀ zhyə̂ àzwuumə̀ nɨ Nẅùə̀ à wa ŋŋâ ambo pə̀ənə̀.

¹³Lenəla, ka pəə pə nshwəŋə̀ a wəə la àshwəŋnə̀ nɨ ŋwùə̀ mɨsoŋə à wa nnèrə̀ nɨ àze àzhìʼtə̀, la pəə lòo pə àshwəŋnə̀ nɨ Àzhwùə̀ Nẅùə̀ a za nnèrə̀ a wəə ndòo nnèrə̀ a nkǔŋə nkuŋə nɨ à pənə amwuə Àzhwùə̀, ambo pànə̀ nɨ pobə pənə nɨ Àzhwùə̀.

¹⁴La ŋònə̀ nɨ ka a pə e nɨ Àzhwùə̀ Nẅùə̀, mbə̀ʼə a kɨ nkẅiirə̀ ɨ̀pwuumə̀ pa nɨ Àzhwùə̀ Nẅùə̀ a za ŋŋâ la apə̀ ntiinə pèrə chyə̂nə mbə ɨ̀kɨ̀ghə̀ mɨ̀nwùə̀ ambo ze, ka a kɨ nzhyə̂ e a pèrə, ntiinə mbə̀ʼə a kɨ nzhyə̂ pə ŋònə̀ nɨ a pənə nɨ Àzhwùə̀ nzhyə̂ lo pèrə pòŋə̀.

¹⁵Ŋònə̀ nɨ à pənə nɨ Àzhwùə̀ Nẅùə̀ amwuə ze à wa ntiitə̀ mɨ̀nwùə̀ mɨ̀tsùmə̀, la ŋònə̀ nɨ ka à pə e nɨ Àzhwùə̀ a tiitə̀ e mɨ̀nwùə̀ apə̀.

¹⁶Tsaʼnə Àŋwàʼnə̀ Nẅùə̀ a za nshwəŋə̀ lo, “A zhyə̂ ɨ̀wə̌ nzhyə̂ àkwàŋə̀ Ndòʼnə̀mbyə̂ nɨ mbə̀ʼə a təətə̀ e?” La aŋunə pə̀ənə̀, pə̀ənə̀ chyə̂ nɨ àkwàŋə̀ Kristù amwuə pə̀ənə̀.