Read Pinyin 1 Korìntə̀ 3 Bible Online

1 Korìntə̀ 3 - Pinyin bible

1 Korìntə̀ 3

¹Pɨlyimə ɨ̀pâ, ka ndə̀ chi nshwəŋnə̀ mə̀ ambo pɨghə tsaʼa pànə̀ nɨ pɨ pənə nɨ Àzhwùə̀ Nẅùə̀, la nshwəŋnə̀ ambo pɨghə pə tsaʼa pànə̀ nɨ pɨ pirə̀nə ndzùŋə̀ mɨ̀nwùə̀ mɨ àtwuə̀ ɨ̀shyə̂, la mbə ɨ̀poonə̀ pɨ̀porə̀ a nɨ zùŋə̀ a Kristù.

²Ndə̀ ŋâ a wɨghə pə nɨ nɨ̀pɨŋnə̀, ka pə e mɨ̀zɨghə̀ mɨ̀tɨ̀ŋnə̀, ntiinə ka nɨ̀ lə̀ kùʼnə̀ a wɨghə a nɨ zɨghə̀ a mèrə. Tə pyàa farə tɨ̀tsòŋə̀ wə̀ ka nɨ̀ kùʼnə̀ a wɨghə.

³Nɨ̀ wə̀ mbirə̀ a wɨghə la amwuə mbòbə̀ mbɨ̀ŋmə̀, Mbəʼnə àghə̀ʼnə̀ pobə àsaʼnə̀ a zə mbirə̀ e amwuə pɨghə, ka nɨ̀ pirə̀ a wɨghə amwuə mbòbə̀ mbɨ̀ŋmə̀, ka kɨ pə fàʼà a wɨghə lə tsaʼa pànə̀ pɨ mɨsoŋə?

⁴Nkwùə̀ nɨ taʼà ŋwùə̀ wɨghə ɨ̀tse a shwəŋə̀nə lo, “Nchyə̂ pəə pɨ Pàolò,” ẅùə̀ a kɨ nchi nshwəŋə̀ lo, “Nchyə̂ pəə pɨ Àpolòsə̀,” ka nɨ̀ fàʼà a wɨghə lə tsaʼa pànə̀ nɨ pɨ zùŋə̀nə mɨ̀nwùə̀ mɨ àtwuə̀ ɨ̀shyə̂?

⁵Àpolòsə̀ a ɨ̀wə̌, Pàolò a kɨ mbə ɨ̀wə̌? Pəə pɨ̀tsùmə̀ a ngàŋə àfàʼà Nẅùə̀, zhyə̀ nɨ nɨ̀ lə̀ làŋə̀nə a ndzùmə̀ mbyiimə̀ a Kristù. Ŋwùə̀ a pə nɨ àtwuə̀ àfàʼà e, ŋwùə̀ a kɨ mbə nɨ àtwuə̀ àfàʼà tsaʼnə Ndòʼnə̀mbyə̂ a lə̀ ŋânə.

⁶Ndə̀ pyə̀ ngẅàrə̀ ɨ̀pwuumə̀, Àpolòsə̀ a tsùbə̀, Nẅùə̀ a tyiʼə̀ ngɨ̀rə̀ zèrə saʼà.

⁷Lenəla, ŋònə̀ nɨ à pyə̀nə nɨ ŋònə̀ nɨ à tsùbə̀nə ka pobə pə ghobə àzwuumə̀ àtse, a kɨ mbə tyìʼə̀ Nẅùə̀ nɨ à wa ngɨ̀rə̀ ɨ̀pwuumə̀ pə koʼò.

⁸La ŋònə̀ nɨ à pyə̀nə pobə ŋònə̀ nɨ à tsùbə̀nə pobə chyə̂ tyìʼə̀ ndəŋə ndəŋə. Nẅùə̀ à pɨ ghǎ tyaŋə̀ àfàʼà o tsaʼnə wə̀ fàʼnə.

⁹Mbə̀ʼnə pəə pənə ngàŋə àfàʼà Nẅùə̀, nɨ̀ pə ɨ̀swùumə Nẅùə̀, nkɨ mbə ndâ Nẅùə̀ nɨ a korə̀nə.

¹⁰A nɨ zùŋə̀ àpòŋə̀ ntɨŋmə̀ Nẅùə̀ nɨ a lə̀ ŋânə ambo mɨ̀ŋə̀, ndə̀ fàʼà tsaʼa mboomə̀ ndâ yi ɨ̀shìʼnə̀, mboomə̀ àtsirə̀ ndâ, ŋònə̀ nyàanə a tyiʼə̀ mmə mboomə̀ ndâ aŋunə. Ŋwùə̀ ntsùmə̀ nɨ à poomə̀nə ndâ aŋunə àtsirə̀ zə̀ â zhìʼtə̀.

¹¹Ntiinə mbə̀ʼə ka ŋwùə̀ a chi mboomə̀ e àtsirə̀ ndâ yè nyaanə ndàŋə̀ e a zhyə̀ nɨ a pyə̀ mə mbə ghu, mbə Yěsû Kristù la.

¹²Ŋònə̀ ɨ̀tse à tə pəla ndòo àtɨ̀ŋnə goldə̀, ẅùə̀ a lòo a silbà, ghù nyàanə a lòo mɨ̀ghòorə mɨ tsə̂nə kə̀ mɨ̀tɨ̀ghə, kə̀ ɨ̀pɨ̀ŋnə, kə̀ àkɨ̀kàʼà,

¹³yi pɨ ghǎ zəənə̀ tsaʼnə ɨ̀fàʼà ɨ̀pobə pòŋə̀nə mbə amwuə njyə̂ nɨ Yěsû a ghǎ tô nnèrə̀ a sàŋə̀ sàŋə̀, ntiinə amwuə njyə̂ ghu pɨ ghǎ zhwiʼì àfàʼà ŋwùə̀ ntsùmə̀ nɨ ɨ̀mǔ, ɨ tòonə̀ nnèrə̀ tsaʼnə ɨ̀fàʼà pɨ̀ghu pənə.

¹⁴Àfàʼà ŋònə̀ ɨ̀tse a tə ghoŋə̀ e tɨ sɨghə̀ amwuə ɨ̀mǔ ghu, yi ngàŋə̀ ǎ kẅiirə̀ mɨntyaŋnə mɨ àfàʼà ɨ̀me.

¹⁵Ɨ̀mǔ wa tə mbəla ntòonə̀ ndâ za ɨ̀tse, yi ŋònə̀ nɨ à poomə̀nə ndâ ghu ǎ pî mɨntyaŋnə ɨ̀me, la ze àtwuə̀ ɨ̀pɨ̀ŋmə̀ e a chwarə̀ tsaʼa ŋònə̀ nɨ a kɨ̀ɨrə̀nə nfurə̀ amwuə ɨ̀mǔ.

¹⁶Ka nɨ̀ zhyə̂ a wɨghə lo nɨ̀ chyə̂ mbə la Ndâ Mɨ̀shwàʼà Nẅùə̀, Àzhwùə̀ Nẅùə̀ a pə amwuə pɨghə?

¹⁷Ŋwùə̀ a tə ntsə̀ŋə̀ Ndâ Mɨ̀shwàʼà Nẅùə̀ yi Nẅùə̀ ǎ kɨ tsə̀ŋə̀ e ntiinə Ndâ Mɨ̀shwàʼà Nẅùə̀ ɨ̀ laanə̀ mmyàanə̀. Ndâ Mɨ̀shwàʼà ghu ɨ̀ pə la pɨghə àtwuə̀ ɨ̀pɨ̀ŋmə̀ àzɨghə.

¹⁸Kò ŋònə̀ ɨ̀tse a fɨ̀ghə̀ e mbɨ̀ŋmə̀ e. Ŋònə̀ ɨ̀tse amwuə pɨghə a tə mbəla mmə nkwàŋə̀ lo a zhìʼtə̀ mbə àzwuumə̀ àtse àtwuə̀ ɨ̀shyə̂ ghə̀ yi a pòŋə̀ lo a pə̀ŋə̀ ntyiʼə̀ àkɨ̀ghə̀ mbə̀ʼə chi tsùŋə̀ zhìʼtə̀.

¹⁹Mbə̀ʼnə zhyə̀ nɨ àtwuə̀ ɨ̀shyə̂ zə̀ a za ndòo tsaʼa àzhìʼtə̀ la a àkɨ̀ghə̀ a ɨ̀myə̂ Nẅùə̀. Àŋwàʼnə̀ Nẅùə̀ a shwəŋə̀ lo, “Nẅùə̀ a wa nkô ngàŋə àzhìʼtə̀ ndàŋə̀ la aŋunə ɨ̀kɨ̀ghə̀ ɨ̀zhìʼtə̀ ɨ̀pobə.”

²⁰A kɨ nchi mbə amwuə àŋwàʼnə̀ Nẅùə̀ lo, “Ndòʼnə̀mbyə̂ a zhyə̂ lo mɨ̀nwùə̀ nɨ ngàŋə̀ àzhìʼtə̀ à wa nkwàŋə̀ chyə̂ mbə ɨ̀fǐfǐ mɨ̀nwùə̀.”

²¹Lenəla, kò ŋwùə̀ a tə ntsòo a ghàŋə̀ mbə̀ʼə pə̀ənə̀, ntiinə àzwuumə̀ àtsùmə̀ àtwuə̀ ɨ̀shyə̂ a chyə̂ ambo pɨghə.

²²Kə̀ a pə Pàolò kə̀ Àpolòsə̀ nɨ Sefàsə̀, kə̀ àtwuə̀ ɨ̀shyə̂, kə̀ nɨ̀chwarə̀, kə̀ nɨ̀wɨghə̀, kə̀ tɨ̀tsòŋə̀ nɨ nkwùə̀ nɨ ɨ ghǎ tô, àzwuumə̀ àtsùmə̀ a àzɨghə.

²³Nɨ̀ chyə̂ mbə pànə̀ pɨ Kristù, Kristù a tyiʼə̀ nkɨ mbə Moonə̀ Nẅùə̀.