Read Pinyin 1 Korìntə̀ 4 Bible Online

1 Korìntə̀ 4 - Pinyin bible

1 Korìntə̀ 4

¹A pòŋə̀ lo nɨ̀ lòo a wəə tsaʼa ngàŋə àfàʼà Kristù za nɨ à lə̀ nùŋə̀nə lo pobə̂ tə nnaŋə̀ mɨ̀nwùə̀ mɨ Nẅùə̀ ma nɨ mɨ pənə a nɨ̀lə̀əmə̀ la.

²Ànwùə̀ nɨ a kùʼnə̀nə ambo ngàŋə àfàʼà tsaʼa zèrə zə, a chyə̂ lo pobə fàʼà ambo tǎ pɨ àfàʼà ɨghobə nɨ ntɨŋmə̀ ɨ̀ghobə ɨ̀tsùmə̀.

³La ambo mɨ̀ŋə̀, ka ǹtòʼò mə̀ lo kò nɨ̀ naŋə̀ ɨ̀sàʼa mə̀ kə̀ ndâ ɨ̀sàʼa nɨ àtwuə̀ ɨ̀shyə̂ a nùŋə̀nə. Mbə̀ʼə ka ǹsaʼà mə̀ ɨ̀sàʼa ɨ̀pɨ̀ŋmə̀ mə̀.

⁴Ka ǹzhyə̂ mə̀ ànwùə̀ tɨ̀pòŋə̀ àtse nɨ ǹgɨ̀rə̀nə, la ka à pə e pə lo ǹdaanə̀, ŋònə̀ nɨ à wa nsaʼà ɨ̀sàʼa mə̀ a Ndòʼnə̀mbyə̂.

⁵Tsaʼnə a pənə a lenə la, kò nɨ̀ saʼà a wɨghə ɨ̀sàʼa ŋònə̀ ɨ̀tse tɨghu nkwùə̀ ɨ̀ kùʼù. Nɨ̀ myàʼtə̀ tə mbyàa nkwùə̀ nɨ Ndòʼnə̀mbyə̂ à ghǎ tô, à ghǎ fuukə̀ mɨ̀nwùə̀ mɨ̀tsùmə̀ nɨ mɨ pənə amwuə ndzùmə pobə ɨ̀kwàŋə̀ nɨ pənə amwuə mɨ̀ntɨŋmə̀ pànə̀ pɨ mɨsoŋə a sàŋə̀. Nkwùə̀ ghu, ŋwùə̀ ntsùmə̀ a tyiʼə̀ nkẅiirə̀ àghuʼtə̀ e nɨ a kùʼnə̀nə ambo Nẅùə̀.

⁶Pɨlyimə ɨ̀pâ, ŋ̀ŋâ mbɨ̀ŋmə̀ ɨzəə Àpolòsə̀ tsaʼa àlènə̀ zèrə zə̀ ntii wɨghə, mbə̀ʼə nɨ̀ lanə̀ ànwùə̀ nɨ àshwəŋnə̀ zèrə zə̀ a za nshwəŋə̀ lo, “Kò nɨ̀ tə ngɨ̀rə̀ ànwùə̀ ntsàarə̀ a zhyə̀ nɨ pɨ ŋwàʼnə̀nə.” Kò ŋwùə̀ ɨwɨghə a tə ntsòo a ghàŋə̀ mbə̀ʼə ghùtse ŋwùə̀ ngwâ a ghùtse ŋwùə̀

⁷À ghɨ̀rə̀ ɨ̀wə̌ ngɨ̀rə̀ wə̀ tsàarə̀ a yɨ̀tse ŋwùə̀? A àkə nɨ wə̀ pənə nɨ zèrə tɨghu pɨ ŋâ ŋânə ambo ghò? Wə̀ tə pəla nkẅiirə̀ kẅiirə̀nə a tyiʼə̀ ngɨ̀rə̀ àkə wə̀ tə ntsòo a ghàŋə̀ tsaʼa ka pɨ ŋâ e ŋânə ambo ghò?

⁸Nɨ̀ pə mə nɨ àzwuumə̀ àtsùmə̀ nɨ nɨ̀ tàʼnə? Nɨ̀ tyiʼə̀ mə a wɨghə pɨ̀ghàŋə pɨ nkabə̀? Nɨ̀ tyiʼə̀ a wɨghə pɨ̀fò mbaa pə tsaʼnə ka pəə pə a wəə pɨ̀fò? Nɨ̀ lə pəla mbə ngotə pɨ̀fò yi pəə lə̀ kɨ nkòŋə̀ a nɨ pə pɨ̀fò tsaʼa pɨghə.

⁹A zə mbə pə tsaʼa Nẅùə̀ à nùŋə̀ a wəə ngàŋə ntwuumə̀ Kristù tsaʼa pɨ̀lẅùə̀ pɨ̀ndzùmə̀, tsaʼa pànə̀ pa nɨ pɨ təəmə̀nə lo pɨ̀ zhwuutə̀, ntiinə pə̀ənə̀ pənə ɨ̀myə̂ mɨ àtwuə̀ ɨ̀shyə̂ ambo pəngèrə̀ pobə pɨ pànə̀ pɨ mɨsoŋə

¹⁰Ntii Kristù, pəə̌ ɨ̀puukə̀ nɨ̀ tyiʼə̀ mbə ngàŋə àzhìʼtə̀ amwuə Kristù. Pəə porə̀ nɨ̀ tyiʼə̀ ntɨ̀ŋnə̀. Nɨ̀ tyiʼə̀ mbə pànə̀ nɨ pɨ pa nguʼtə̀ a wɨghə la mmə ngwâ a wəə.

¹¹Tə mbyàa tɨ̀tsòŋə̀, pəə pə nɨ njyə̀, njyə̀ nchyə ɨ mə ndzaŋə̀ a wəə, pɨ pə mbuʼù a wəə, pəə pə ngẅî ɨ̀sìitə̀ ɨtsəʼə ka kɨ pə a wəə nɨ mɨ̀ndâ,

¹²pəə pa ntsòo mbɨ̀ŋmə̀ nfàʼà nɨ mɨ̀tɨ̀ŋnə̀ pobə mbô. Pànə̀ pa nchyâ ndòonə̀ àtwuə̀ pəə la pəə mə nchyâ mborə̀. Pɨ pə nnyàŋə̀ a wəə la pəə mə ngẅìimə̀ mɨ̀ntɨŋmə̀ ɨ̀məə;

¹³pɨ zòomə̀ a wəə, pəə kẅùə̀ nɨ ɨ̀shwəŋnə̀ pɨ̀potə̀nə. Tə pyàa tɨ̀tsòŋə̀ ambo àtwuə̀ ɨ̀shyə̂, pəə̌ ɨ̀kɨ̀ghɨɨ nɨ pɨ waʼà mə.

¹⁴Ka ŋ̀ŋwàʼnə̀ mə̀ a zə ambo pɨghə la a nɨ chyâ ɨ̀sɨŋnə̀ àtwuə̀ pɨghə. Ŋ̀ŋwàʼnə̀ pə lo təətə̀ a wɨghə tsaʼa ɨ̀poonə̀ ɨ̀pâ pyə̀ nɨ ǹkòŋə̀nə.

¹⁵Nɨ̀ patə mbə pə nɨ pànə̀ nkaamə̀ nɨ̀ghumə̀ nɨ pɨ pa ntəətə̀ a wɨghə tsaʼa pànə̀ pɨ Kristù la, tǎ ɨwɨghə la taʼà tǎ, ntiinə ǹtyiʼnə lə tǎ ɨwɨghə a nɨ làŋə̀ a ndzùmə̀ ntwuumə̀ ghù ɨ̀shìʼnə̀.

¹⁶Ngwə̀ ntəətə̀ a wɨghə lo nɨ̀ tə mɨ̀ŋnə̀ àkwùə̀ nɨ̀yìinə̀ mə̀.

¹⁷La ɨ̀sùmə nɨ ǹtsàanə a Timotì, moonə̀ mə̀ a ndzùmə̀ Kristù ẅùə̀ nɨ ǹkòŋə̀nə a kɨ mmə nfàʼà ambo Ndòʼnə̀mbyə̂ nɨ ntɨŋmə̀ e ɨ̀tsùmə̀. À ghǎ tô kẅempə̀ a wɨghə amwuə ndwuumə̀ nɨ ɨ̀làŋə ɨ̀pâ pənə pəə pɨ Kristù a nɨ zùŋə̀ tsaʼnə ngwa nnèrə̀ ambo àshwatə̀ ɨ̀poonə̀ pɨ Kristù alyiʼə àtsùmə̀ nɨ ǹdèrə̀nə.

¹⁸Pɨghə pɨ̀tse pə nkoʼò mbɨ̀ŋmə̀ mbə pə tsaʼa nɨ̀ wə̀ nkwàŋə̀ lo ka mbə ghǎ chi tô karə̀ mə̀ a wɨghə.

¹⁹Ndòʼnə̀mbyə̂ à tə pəla mbyiimə̀ yi mbɨ tô karə̀ a wɨghə aŋunə mətùmə nkwùə̀. Ǹtə tô yi ka mbə naŋə̀ a mə̀ pə ndàʼà mɨ̀nwùə̀ nɨ ngàŋə àkoʼò mbɨ̀ŋmə̀ zèrə zə̀ za nshwəŋə̀, mbɨ kɨ zəənə̀ mɨ̀tɨ̀ŋnə̀ ɨ̀mobə,

²⁰ntiinə ka ànwùə̀ Nɨ̀fò Nẅùə̀ a pə e la àshwəŋnə̀ ntswùə̀, a ànwùə̀ ɨ̀tɨ̀ŋnə̀.

²¹Nɨ̀ kòŋə̀ a zèrə? Nɨ̀ kòŋə̀ lo ntô nɨ ngwàanə̀ ambo pɨghə kə̀ ntô pə nɨ ɨ̀kòŋnə̀ nɨ àzhwùə̀ àporə̀porə̀?