Read Pinyin 1 Korìntə̀ 5 Bible Online

1 Korìntə̀ 5 - Pinyin bible

1 Korìntə̀ 5

¹Pɨ lanə ntiitə̀ ambo mɨ̀ŋə̀ lo àfànə̀ a zə a tɨ̀tɨ̀rə̀ pɨghə, mbə mbuurə̀ àfànə̀ nɨ ka a pyə̀ mbə e a tɨ̀tɨ̀rə̀ pànə̀ nɨ ka pobə pə ghobə pɨ̀Jew; ntiinə pɨ tiitə̀nə mə̀ lo ŋwùə̀ à wə̀ ndyə̂ nɨ ngẅùə tǎ ɨghobə.

²Nɨ̀ tyiʼə̀ mmə ntèrə̀ àkə? A ànwùə̀ nɨ a kùʼnə̀nə lo mbə̀ʼə pɨ yìi yìinə. Nɨ̀ fuukə̀ a ŋònə̀ nɨ à wa ngɨ̀rə̀ ntiirə̀ ànwùə̀ zə a tɨ̀tɨ̀rə̀ pɨghə.

³M̀batə ka pə mə̀ pə̀ənə̀ nɨ mbòbə̀ mbɨ̀ŋmə̀ mə̀ la, mbə amwuə Àzhwùə̀. Ǹsaʼà mə ɨ̀sàʼa mbuurə̀ ŋònə̀ ẅèrə wə̀ tyìʼə̀ tsaʼa ngwə̀ a tɨ̀tɨ̀rə̀ pɨghə.

⁴Nkwùə̀ nɨ nɨ̀ tônə mbwùumə̀ aŋunə nɨ̀linə̀ nɨ Ndòʼnə̀mbyə̂ ɨ̀wə̀ənə̀ Yěsû, ngwa pə̀ənə̀ amwuə Àzhwùə̀, ɨ̀tɨ̀ŋnə̀ Ndòʼnə̀mbyə̂ Yěsû Kristù ɨ kɨ mbə pɨghə pɨ pobə,

⁵nɨ̀ ŋâ mbuurə̀ ŋònə̀ zèrə zə̀ ambo Satàanə̀ â tsə̀ŋə̀ mbòbə̀ mbɨ̀ŋmə̀ e lo mbə̀ʼə àzhwùə̀ e a chwarə̀ amwuə njyə̂ Ndòʼnə̀mbyə̂ Yěsû.

⁶Mbuurə̀ nɨ nɨ̀ wa nkoʼò mbɨ̀ŋmə̀ ka à pòŋə̀ e. Ka nɨ̀ zhyə̂ a wɨghə lo taʼà mbaŋə a wa ntsə̀ŋə̀ nɨ̀kwùʼə̀ nɨ àtswuʼə̀.

⁷Nɨ̀ chyə̂ a nɨ fuukə̀ ntsɨŋə̀ àpaanə̀ ndwùnə̀ za nɨ ɨ̀ pənə amwuə pɨghə mbə ɨ̀nwùə̀ tɨ̀pòŋə̀ la mbə̀ʼə laanə̀. Nɨ̀ tə ghɨ̀rə̀ a lenə, nɨ̀ tyiʼə̀ tsaʼa ntsɨŋə̀ àpaanə̀ yɨ̀ shwuə̀ nɨ ka mbyə̌ àpaanə̀ ɨ pə e amwuə. Ntiinə pɨ lə̀ zhwuutə̀ mə a Kristù nɨ à pənə mômbyə̂ nɨ̀shwàʼà mɨ̀zɨghə̀ mɨ Àlàŋə̀ Mmyàʼtə̀.

⁸A pòŋə̀ lo pə̀ənə̀ zɨghə̀ a nɨ̀ghaʼà ẅèrə wə̀, ka pə zɨghə̀ e pə nɨ àpaanə̀ za nɨ a pənə nɨ mbyə̌ yɨ̀ ndwùnə̀ nɨ ɨ̀ pənə nɨ ntɨŋmə̀ ghù shyə pobə tɨ̀pòŋə̀. Pə̀ənə̀ zɨghə̀ pə nɨ àpaanə̀ za nɨ ka à pə e nɨ mbyə̌, a pə ntɨŋmə̀ ghu laanə̀nə pobə nkǔŋə nkuŋə.

⁹Ndə̀ ŋwàʼnə̀ amwuə àŋwàʼnə̀ nɨ ndə̀ tsàanə ambo pɨghə la lo kò nɨ̀ kɨ ngyìinə̀ a wɨghə pɨghə pɨ ngàŋə àfànə̀

¹⁰Ka ndə̀ shwəŋə̀ mə̀ la mbə̀ʼə pɨ̀tɨ̀pyiimə̀ a Nẅùə̀ nɨ pɨ pənə ngàŋə àfànə̀ kə̀ pànə̀ pɨ tɨ̀pòŋə̀, kə̀ ngàŋə àghə̀ʼə̀, kə̀ pɨ̀zə̀ərə̀ kə̀ pànə̀ nɨ pɨ ghuʼtə̀nə pɨ̀titoo. A tə pə a lenə yi a nèrə̀ lo nɨ̌ myàʼtə̀ àtwuə̀ ɨ̀shyə̂ zə̀ lèrə̀ alyiʼə nyaanə.

¹¹Ndə̀ ŋwàʼnə̀ pə lo kò nɨ̀ yìinə̀ a wɨghə pɨghə pɨ ŋònə̀ ɨ̀tse nɨ à fuŋə̀nə mbɨ̀ŋmə̀ e nɨ ndyimə ɨ̀wə̀ənə̀ la ànwùə̀ àfànə̀, nɨ ànwùə̀ àghə̀ʼə̀, nɨ ànwùə̀ nɨ̀ghuʼtə̀ pɨ̀tɨtoo, nɨ ànwùə̀ nɨ̀shwəŋə̀ ànwùə̀ tɨ̀pòŋə̀ àtwuə̀ ŋwùə̀, nɨ ànwùə̀ nɨ̀nô mbaarə̀ pobə ɨ̀nwùə̀ zə̀ərə̀ pə aŋunə ze. Kò nɨ̀ pyə̀ nnwuunə̀ tyìʼə̀ lo zɨghə̀ pɨghə pɨ mbuurə̀ ŋònə̀ zèrə zə̀,

¹²ntiinə àzâ la àkə a nɨ saʼà ɨ̀sàʼa ngàŋə àpyìinə? Nɨ̀ chyə̂ la a nɨ saʼà ɨ̀sàʼa pànə̀ nɨ pɨ pənə amwuə Àshwatə̀ ɨ̀poonə̀ pɨ Kristù.

¹³Ǎ saʼà Nẅùə̀ saʼà ɨ̀sàʼa ngàŋə àpyìinə. Tsaʼnə àŋwàʼnə̀ Nẅùə̀ a shwəŋə̀nə lo, “Fuukə̀ ngàŋə ntɨŋmə̀ ghù shyə a tɨ̀tɨ̀rə̀ pɨghə.”