Read Pinyin 1 Korìntə̀ 6 Bible Online

1 Korìntə̀ 6 - Pinyin bible

1 Korìntə̀ 6

¹Ŋwùə̀ ɨwɨghə ɨ̀tse à tə pəla mbə nɨ ɨ̀sàʼa pobə moonə̀ Kristù ghùtse, a ghɨ̀rə̀ àkə lo a lòo ɨ̀sàʼa ghu ndèrə̀ ambo pànə̀ nɨ ka mɨ̀nwùə̀ ɨ̀mobə təəmə̀ e la mmyàʼtə̀ a nɨ lèrə̀ nɨ ẅèrə ambo pànə̀ pɨ Nẅùə̀ lo pobə naŋə̀?

²Ka nɨ̀ zhyə̂ a wɨghə lo pànə̀ pɨ Nẅùə̀ ghǎ saʼà ɨ̀sàʼa àtwuə̀ ɨ̀shyə̂ zanə? A tə pə lo nɨ̀ ghǎ saʼà ɨ̀sàʼa àtwuə̀ ɨ̀shyə̂ zə yi mbə̀ʼə a tyiʼə̀ ntsàarə̀ a wɨghə lə ɨla ghu a nɨ naŋə̀ a kɨyii mɨ̀nwùə̀ tsaʼa mèrə mə?

³Ka nɨ̀ zhyə̂ a wɨghə lo pə̀ənə̀ ghǎ saʼà ɨ̀sàʼa pəngèrə̀? A tə pəla mbə a lenə pɨ tyiʼə̀ ka saʼà e mɨ̀nwùə̀ mbə̀ʼə nɨ̀chyə̂mbyə̂ ntsàarə̀?

⁴Ntiirə̀ mɨ̀nwùə̀ tsaʼa mèrə ma tə nfurə̀ a tyiʼə̀ ngɨ̀rə̀ àkə lo nɨ̀ lòo ndèrə̀ ambo pànə̀ nɨ ka pobə pə a ghobə nɨ alyiʼə amwuə Àshwatə̀ ɨ̀poonə̀ pɨ Kristù lo pobə̂ naŋə̀?

⁵Ǹshwəŋə̀ lə mbə̀ʼə ɨ̀sɨŋnə̀ ɨ̂ koorə̀ a wɨghə. A chyə̂ lə lo ka ŋònə̀ ɨ̀tse amwuə pɨghə nɨ à zhìʼtə̀nə nzhyə̂ a nɨ naŋə̀ mɨ̀nwùə̀ mɨ ɨ̀sàʼa a tɨ̀tɨ̀rə̀ Ɨ̀poonə̀ pɨ kristù?

⁶La, moonə̀ Kristù à wə̀ nchi ndòo a ẅùə̀ ndèrə̀ a korə̀ ambo pɨ̀tɨ̀pyiimə̀ a Nẅùə̀ lo pɨ̀ saʼà ɨ̀sàʼa ɨ̀ghobə.

⁷Tyìʼə̀ tsaʼnə ɨ̀nwùə̀ mɨ̀sàʼa pənə a tɨ̀tɨ̀rə̀ pɨghə lə la, a nèrə̀ lo nɨ̀ wɨ̀ghə̀ mə tə ngwɨ̀ghə̀. Ka nɨ̀ zhyə̂ a wɨghə lo a pòŋə̀ lo a ghɨ̀rə̀ ŋònə̀ ɨ̀tse ngɨ̀rə̀ a tɨ̀pòŋə̀ aŋunə pɨghə? Ka nɨ̀ kɨ nzhyə̂ a wɨghə lo mbə̀ʼə pɨ kɨ nfɨ̀kə̀ a wɨghə nkẅiirə̀ ɨ̀pwuumə̀ ɨ̀pɨghə?

⁸La tyìʼə̀ pɨghə, nɨ̀ wə̀ ngɨ̀rə̀ a tɨ̀pòŋə̀ aŋunə pɨ̀tse pə̀ənə̀, nfɨ̀kə̀ pə̀ənə̀ nkẅiirə̀ ɨ̀pwuumə̀ ɨ̀pobə nkɨ ngɨ̀rə̀ a lenə farə aŋunə pɨlyimə ɨ̀pɨghə.

⁹Ka nɨ̀ zhyə̂ a wɨghə lo ka pànə̀ nɨ ka mɨ̀nwùə̀ ɨ̀mobə təəmə̀ e pə ghǎ zɨghə̀ a ghobə ànwùə̀ Nɨ̀fò Nẅùə̀? Kò nɨ̀ kɨ fɨ̀ghə̀ a wɨghə mbɨ̀ŋmə̀ ɨ̀zɨghə, mbə̀ʼnə ngàŋə məghàbə̀ kə̀ pànə̀ nɨ pɨ ghuʼtə̀nə pɨ̀tɨtoo kə̀ ngàŋə àfànə̀, kə̀ mbyàŋnə̀ nɨ pobə lyə̂nə nɨ pyə̀,

¹⁰kə̀ pɨ̀zə̀ərə̀, kə̀ ngàŋə àghə̀ʼə̀, kə̀ ɨ̀pàarə̀ mɨ̀lùʼù, kə̀ pànə̀ nɨ pɨ pa ndzòomə̀ pə̀ənə̀, kə̀ pɨ̀ntuŋə̀ ɨ̀shyə̂, ka pobə pə ghǎ zɨghə̀ a ghobə ànwùə̀ Nɨ̀fò Nẅùə̀.

¹¹Pɨghə pɨ̀tse lə̀ pə la a lenə, la pɨ sùu mə a wɨghə, ngɨ̀rə̀ nɨ̀ tyiʼə̀ pànə̀ pɨ Nẅùə̀ pyə̀ nɨ pɨ laanə̀nə, ngɨ̀rə̀ mɨ̀nwùə̀ ɨ̀mɨghə təəmə̀ ambo Nẅùə̀ aŋunə nɨ̀linə̀ nɨ Ndòʼnə̀mbyə̂ Yěsû Kristù pobə Àzhwùə̀ Nẅùə̀ ɨ̀wəənə̀.

¹²Ŋònə̀ ɨ̀tse à ghǎ shwəŋə̀ lo, “Mbə̀ʼə ǹgɨ̀rə̀ ànwùə̀ àtsùmə̀.” La ka ànwùə̀ àtsùmə̀ a mə ngyèmpə̀ e. Mbɨ shwəŋə̀ lo mbə̀ʼə ǹgɨ̀rə̀ ànwùə̀ àtsùmə̀. La ka mbə pə mə̀ àpùʼù ambo àzwuumə̀ àtse.

¹³Ghùtse ŋwùə̀ ǎ shwəŋə̀ lo, “Mɨ̀zɨghə̀ chyə̂ ambo nɨ̀pùmə̀, nɨ̀pùmə̀ kɨ mbə ambo mɨ̀zɨghə̀.” Ee, a tyìʼə̀ nkǔŋə nkuŋə. La Nẅùə̀ a ghǎ pyaatə̀ ɨ̀nwùə̀ pèrə pə ntsùmə̀. Ka mbɨ̀ŋmə̀ ŋwùə̀ mɨsoŋə pə e la aŋunə ànwùə̀ àfànə̀ ɨ chyə̂ pə ambo Ndòʼnə̀mbyə̂, Ndòʼnə̀mbyə̂ a kɨ mbə ambo mbɨ̀ŋmə̀.

¹⁴Nẅùə̀ à lə̀ pə̀ʼkə̀ a Ndòʼnə̀mbyə̂ aŋunə nɨ̀wɨghə̀, à ghǎ kɨ pə̀ʼkə̀ a wəənə̀ nɨ ɨ̀tɨ̀ŋnə̀ e.

¹⁵Ka nɨ̀ zhyə̂ a wɨghə lo mbɨ̀ŋmə̀ ɨ̀zɨghə la ɨlaamə mbɨ̀ŋmə̀ Kristù? Mbə̀ʼə ǹtyiʼə̀ ndòo alaamə mbɨ̀ŋmə̀ Kristù lə ɨla ndòo ngɨ̀rə̀ alaamə mbɨ̀ŋmə̀ àkwàrə̀ ghu? Ngaŋə! Mbə̀ʼə a pə e a lenə apə̀.

¹⁶Kə̀ ka nɨ̀ zhyə̂ a wɨghə lo ŋònə̀ nɨ à pwuutə̀nə mbɨ̀ŋmə̀ e pobə àkwàrə̀, pobə ze pɨ̀tsùmə̀ tyiʼə̀ la taʼà mbɨ̀ŋmə̀.

¹⁷La ŋònə̀ wa nɨ à pwuutə̀nə mbɨ̀ŋmə̀ e pobə Ndòʼnə̀mbyə̂, pobə ze kɨ ntyiʼə̀ taʼà ŋwùə̀ amwuə Àzhwùə̀.

¹⁸Nɨ̀ tə nkɨ̀ɨrə̀ ɨ̀nwùə̀ ɨ̀fànə̀. Pɨ̀tse ɨ̀nwùə̀ tɨ̀pòŋə̀ nɨ ŋwùə̀ a ghɨ̀rə̀nə ka ɨ kwuunə̀ a mbɨ̀ŋmə̀ ze. La ŋwùə̀ nɨ a ghɨ̀rə̀nə àfànə̀, a ghɨ̀rə̀ la tɨ̀pòŋə̀ aŋunə mbɨ̀ŋmə̀ e.

¹⁹Ka nɨ̀ zhyə̀ wɨghə lo mbɨ̀ŋmə̀ ɨ̀zɨghə la a Ndâ Mɨ̀shwàʼà Àzhwùə̀ Nẅùə̀ zhyə̀ nɨ ɨ̀ pənə amwuə pɨghə, nkɨ mbə zhyə̀ nɨ nɨ̀ ɨ̀ furə̀nə ambo Nẅùə̀? Ka nɨ̀ pə wɨghə la àtwuə̀ nɨ pɨghə.

²⁰A lə̀ zwuunə̀ a wɨghə nɨ nkabə̀ nɨ tə nguʼtə̀ e nɨ mbɨ̀ŋmə̀ ɨ̀zɨghə.