Read Pinyin 1 Korìntə̀ 9 Bible Online

1 Korìntə̀ 9 - Pinyin bible

1 Korìntə̀ 9

¹Ka mbə mə̀ la ŋwùə̀ àtwuə̀ nɨ ze? Ka mbə mə̀ la ngàŋə̀ ntwuumə̀ Yěsû? Ka ndə̀ zəənə̀ mə̀ Yěsû Kristù Ndòʼnə̀mbyə̂ ɨ̀wə̀ənə̀? Ka nɨ̀ pə wɨghə la àpô àfàʼà mə̀ amwuə Ndòʼnə̀mbyə̂?

²Pɨ̀tse pànə̀ tə mə shwəŋə̀ lo ka mbə mə̀ ngàŋə̀ ntwuumə̀ Yěsû, yi ambo pɨghə, mɨ̀ŋə̀ a ngàŋə̀ ntwuumə̀ Yěsû. Ntiinə pɨghə la àlènə̀ mə̀ a nɨ nèrə̀ lo mɨ̀ŋə̌ ngàŋə̀ ntwuumə̀ Ndòʼnə̀mbyə̂.

³Lə̌ àshwəŋnə̀ nɨ ngwa nshwəŋə̀ a nɨ kẅiirə̀ ntaŋə mə̀ ambo pànə̀ nɨ pɨ̌ naŋə̀ ɨ̀sàʼa mə̀.

⁴Ka a pə e alyiʼə ànwùə̀ mə̀ a nɨ kẅiirə̀ mɨ̀zɨghə̀ pobə mɨ̀lùʼù ɨ̀məə ambo pɨghə?

⁵Ka à pə e alyiʼə ànwùə̀ mə̀ a nɨ yìinə̀ pəə ngẅùə mə̀ tsaʼa pɨ̀tse ngàŋə ntwuumə̀ Kristù nɨ pɨ momaa pɨ Ndòʼnə̀mbyə̂ pobə Pità pa ngɨ̀rə̀ la?

⁶Kə̀ nɨ̀ kwàŋə̀ lo a ye pəə Barnabas nɨ pəə ze chyə̂nə a nɨ fàʼà zaʼà mbòŋə̀ zɨghə̀?

⁷A ẅèrə soyì nɨ mbə̀ʼə a fàʼà tɨghu pɨ twuə̀ e? A ɨ̀wə̌ nɨ mbə̀ʼə a pyə̀ mɨ̀tɨ̀ghə nɨ mɨ ma ndzumə̀ mɨ̀ntàamə la ka chi zɨghə̀ e mɨ̀ntàamə mɨ̀ghu? A ɨ̀wə̌ nɨ mbə̀ʼə a pə mbyabə̀ mɨ̀nyàamə̀ ka pə nô e a mɨlikə̀?

⁸Ǹshwəŋə̀ a lenə lə pə nɨ ɨ̀tɨ̀ŋnə̀ ŋwùə̀ mɨsoŋə? Ka mbòomə a kɨ nshwəŋə̀ e la lenə?

⁹Mbə̀ʼnə pɨ ŋwàʼnə̀nə amwuə àŋwàʼnə̀ mbòomə Mǔsî lo, “Kò nɨ̀ tə nkorə̀ a wɨghə ntswùə̀ ɨ̀fòŋə̀ nkwùə̀ nɨ ɨ mənə nkə̀brə̀ nkẅùə̀.” Nẅùə̀ a ma nshwəŋə̀ a lenə la ambo ndàʼà mɨ̀fòŋə̀?

¹⁰Ka Nẅùə̀ a shwəŋə̀ e àshwəŋnə̀ zə̀ la ambo pə̀ənə̀? Pɨ lə̀ ŋwàʼnə̀ àshwəŋnə̀ zə la ambo pəə, ntiinə ŋònə̀ nɨ à lyiʼnə ɨ̀swùumə pobə ŋònə̀ nɨ à fùʼnə mɨ̀zɨghə̀ pobə fàʼà la nɨ àkwàŋə̀ lo pə nɨ ɨ̀mobə mɨ̀zɨghə̀.

¹¹Pəə pyə̀ mɨ̀zɨghə̀ mɨ Àzhwùə̀ amwuə pɨghə, pəə tə pyiitə̀ ɨ̀pwuumə̀ àtwuə̀ ɨ̀shyə̂ ambo pɨghə yi mbə̀ʼə a pə lo pəə mbyiitə̀ tɨsɨŋnə?

¹²Pɨ̀tse pànə̀ tə mbə nɨ ɨ̀sàanə̀ a nɨ pyiitə̀ ɨ̀pwuumə̀ pə̀ ambo pɨghə yi mbə̀ʼə ka pəə pə wəə nɨ ɨ̀sàanə̀ ntsàarə̀ a ghobə. La pəə lə̀ myàʼtə̀ ɨ̀sàanə̀ zèrə zə̀ mbə̀ʼə pəə kaŋə pə àtɨ̀ghə nɨ a twaanə̀nə àlàŋə aŋunə ntwuumə̀ Kristù ghù ɨ̀shìʼnə̀.

¹³Ka nɨ̀ zhyə̂ a wɨghə lo pànə̀ nɨ pobə pa nfàʼà a Ndâ Mɨ̀shwàʼà Nẅùə̀ pa ndòo mɨ̀zɨghə̀ ɨ̀mobə la a Ndâ Mɨ̀shwàʼà Nẅùə̀? Lenəla pànə̀ nɨ pobə pa nfàʼà aŋunə alyiʼə mɨ̀shwàʼà Nẅùə̀ kɨ mmə ndzɨghə̀ àzobə mɨ̀zɨghə̀ nɨ mɨ furə̀nə aŋunə ɨ̀pwuumə̀ nɨ pɨ ŋânə aŋunə alyiʼə mɨ̀shwàʼà Nẅùə̀.

¹⁴A kɨ mbə tyìʼə̀ ndəŋə ndəŋə tsaʼnə Ndòʼnə̀mbyə̂ à shwəŋə̀nə lo mɨ̀zɨghə̀ mɨ pànə̀ nɨ pɨ mənə nsìimə̀ ntwuumə̀ ghù ɨ̀shìʼnə̀ wa chyə̂ a nɨ kɨ nfurə̀ aŋunə ntwuumə̀ ghù ɨ̀shìʼnə̀.

¹⁵La ǹkùmə̀ mmyàʼtə̀ mɨ̀sàanə̀ mèrə mə. Ka ǹkɨ mmə ŋŋwàʼnə̀ mə̀ àŋwàʼnə̀ zə̀ la nɨ àkwàŋə̀ lo nɨ̀ ghɨ̀rə̀ mɨ̀nwùə̀ mə ambo mɨ̀ŋə̀. A tɨshyə n̂gɨ̀rə̀ a lenə, ǹkwɨghə̀ ntsàarə̀ ambo ŋwùə̀ a nɨ kẅiirə̀ a kɨ̀tèrə̀ mə̀ ghu.

¹⁶Ntə pəla mmə nchwìitə̀ ntwuumə̀ ghù ɨ̀shìʼnə̀, ka zèrə za a ŋâ e a gha nɨ ɨ̀sàanə̀ a nɨ tsòo a ghàŋə̀ ntiinə alyiʼə ànwùə̀ mə̀ a nɨ chwìitə̀ ntwuumə̀ ẅèrə wə̀. Ngəʼə̀ noʼnə ɨ̀ chyə̂ àtwuə̀ mɨ̀ŋə̀ mbə̀ʼə ǹka chwìitə̀ mə̀ ntwuumə̀ ghù ɨ̀shìʼnə̀ wə̀.

¹⁷Ntə mə fàʼà àfàʼà zə̀ la tsaʼnə ǹkòŋə̀nə, yi mɨntyaŋnə mɨ àfàʼà ma mə ghu; La ka mə chwìitə̀ mə̀ ntwuumə̀ wə̀ la tsaʼnə ǹkòŋə̀nə nfàʼà la pə àfàʼà nɨ pɨ ŋânə ambo mɨ̀ŋə̀.

¹⁸Lenəla mɨ̀ntsoʼnə̀ mɨ àfàʼà ɨ̀mâ tyiʼə̀ mbə la àkə? Tyìʼə̀ lo n̂chwìitə̀ ntwuumə̀ ghù ɨ̀shìʼnə̀ wə̀ ambo pə̀ənə̀ tɨghu mbyiitə̀ àzwuumə̀ àtse, ka kɨ chi mə nkẅiirə̀ a mə̀ zhyə̀ nɨ a pənə àzâ mə̀ a nɨ chwìitə̀ ntwuumə̀ ghù ɨ̀shìʼnə̀ wə̀.

¹⁹Mbatə mbə pə ŋwùə̀ àtwuə̀ nɨ mɨ̀ŋə̀ la, ka mbə mə̀ àpùʼù ŋònə̀ ɨ̀tse. La ǹgɨ̀rə̀ mbɨ̀ŋmə̀ mə̀ aŋunə àpùʼù ambo ŋwùə̀ ntsùmə̀ mbə̀ʼə lòo pànə̀ pɨ̀noʼnə tô ambo Kristù.

²⁰Ǹtə mə nfàʼà pəə pɨ̀Jew, mbə tsaʼa ŋwùə̀ pɨ̀Jew mbə̀ʼə ghɨ̀rə̀ pobə zhyə̂ tyìʼə̀ Kristù. Ambo pànə̀ nɨ pɨ pənə a ɨ̀sùmə mbòomə ǹkɨ mbə tsaʼa ŋònə̀ nɨ à pənə a ɨ̀sùmə mbòomə (mbaa pə tsaʼnə ka mbə mə̀ a ɨ̀sùmə mbòomə la), mbɨ ghɨ̀rə̀ a lenə mbə̀ʼə lòo pànə̀ nɨ pɨ pənə a ɨ̀sùmə mbòomə tô ambo Kristù.

²¹A ndəŋə ndəŋə, nkwùə̀ nɨ m̀bənə pəə pɨ pànə̀ nɨ ka pobə mə ndzùŋə̀ a ghobə a mbòomə, nkɨ mbə la tsaʼa pobə (ka à pə e la lo ǹtsoʼò àpô mə̀ aŋunə mbòomə Nẅùə̀, ngwə̀ a ɨ̀sùmə mbòomə Kristù), ngɨ̀rə̀ a lenə mbə̀ʼə lòo a ghobə tô ambo Kristù.

²²Ambo pànə̀ nɨ pobə porə̀nə, ǹkɨ porə̀ mbə̀ʼə sùŋə̀ a ghobə tô ambo Kristù. Ǹtyiʼə̀ mbyiimə̀ ntsùmə̀ ntsùmə̀ ntii pànə̀ pɨ̀tsùmə̀ mbə̀ʼə ghɨ̀rə̀ ànwùə̀ àtsùmə̀ a nɨ chwarə̀ a pɨ̀tse pə̀ənə̀.

²³Ǹgɨ̀rə̀ ànwùə̀ àtsùmə̀ la ntii ntwuumə̀ ghù ɨ̀shìʼnə̀ wa mbə̀ʼə ghǎ kɨ kẅiirə̀ ɨ̀zà mborə̀ nɨ ɨ̀ pənə amwuə ntwuumə̀ ghù ɨ̀shìʼnə̀ ghu.

²⁴Ka nɨ̀ zhyə̂ a wɨghə lo amwuə mɨ̀ndəənə̀, pànə̀ pɨ̀tsùmə̀ pa mmàŋnə̀ la a kẅiirə̀ taʼà ŋwùə̀ nkẅiirə̀ ɨ̀ntsoʼò àfàʼà e? Lenəla nɨ̀ kɨ̀ɨrə̀ amwuə ndwuumə̀ nɨ mbə̀ʼə nɨ kẅiirə̀ ɨ̀ntsoʼò àfàʼà ɨzɨghə.

²⁵Ŋwùə̀ ntsùmə̀ nɨ à wa nkɨ̀ɨrə̀ mɨ̀ndəənə̀ à wa ngẅìimə̀ mbɨ̀ŋmə̀ e aŋunə mɨ̀nwùə̀ mɨ̀tsùmə̀. Pobə pa ngɨ̀rə̀ a lenə la mbə̀ʼə pɨ̀ tuŋə̀ ngùʼu ɨzobə zhyə̀ nɨ ka ɨ̀ pə ghǎ ghoŋə̀ e nɨ nkuŋə̀; la ɨ̀zə̀ənə̀ ngùʼu ɨ̀ pənə zhyə̀ nɨ ɨ̀ ghǎ ghoŋə̀ nɨ nkuŋə̀.

²⁶La ɨ̀sùmə nɨ ngwa ka kɨ̀ɨrə̀ mə̀ a pyəŋə pyəŋə, ka kɨ mə zòŋnə̀ mə̀ tsaʼa ŋònə̀ nɨ à wa ntsòo a pyəŋə pyəŋə.

²⁷Ǹtsòo mə mbɨ̀ŋmə̀ mə̀ mmèrə̀kə̀ a zèrə mbə̀ʼə ǹkaŋə mə shwəŋə̀ ànwùə̀ Nẅùə̀ ambo pànə̀ pɨ̀nyaanə, la ghǎ saamə̀ ngùʼu mə̀.