Read Pinyin 2 Korìntə̀ 1 Bible Online

2 Korìntə̀ 1 - Pinyin bible

2 Korìntə̀ 1

¹Àŋwàʼnə̀ zə̀ à ŋwàʼnə̀ Pàolò, mbə ngàŋə̀ ntwuumə̀ Kristù Yěsû amwuə ndwuumə̀ nɨ Nẅùə̀ à lə̀ tàʼnə pobə ndyimə ɨ̀wə̀ənə̀ Timotì. Pobə pwuutə̀ ntsàa a zèrə ambo àshwatə̀ ɨ̀poonə̀ pɨ Kristù nɨ a pənə a àlaʼà Korìntə̀, farə ambo pànə̀ pɨ Nẅùə̀ pɨ̀tsùmə̀ nɨ pɨ pənə amwuə pàa àlaʼà Àkayà.

²Àpòŋə̀ ntɨŋmə̀ ghobə àporə̀porə̀ nɨ a furə̀nə ambo Tǎ Nẅùə̀ pobə Ndòʼnə̀mbyə̂ Yěsû Kristù â pə ambo pɨghə.

³Nɨ̀ ghɨ̀rə̀ pə̀ənə̀ ŋâ a mɨyàa ambo Nẅùə̀ Tǎ pɨ Ndòʼnə̀mbyə̂ Yěsû Kristù, Tǎ nɨ à wa nkoorə̀ mɨ̀lɨŋə̀ nkɨ mmə ndə̀ʼtə̀ mɨ̀ntɨŋmə̀.

⁴Ẅùə̀ nɨ à wa ndə̀ʼtə̀ mɨ̀ntɨŋmə̀ ɨ̀məənə̀ amwuə mɨ̀ngəʼə̀ mɨ̀tsùmə̀, njiilo pə̀ənə̀ tyiʼə̀ ndə̀ʼtə̀ mɨ̀ntɨŋmə̀ mɨ pànə̀ nɨ pobə pənə amwuə ngəʼə̀ a nɨ zùŋə̀ tsaʼnə Nẅùə̀ à kɨnə ndə̀ʼtə̀ mɨ̀ntɨŋmə̀ ɨ̀məənə̀ la.

⁵Tyìʼə̀ tsaʼnə pə̀ənə̀ kɨnə ntsùŋə̀ mmə ndzəənə̀ ngəʼə̀ nɨ Yěsû Kristù à lə̀ zəənə̀nə la, Nẅùə̀ ǎ kɨ tsùŋə̀ lə̀ʼtə̀ mɨ̀ntɨŋmə̀ ɨ̀məənə̀ làŋə̀ a ndzùmə̀ Kristù.

⁶Pəə tə mə ndzəənə̀ ngəʼə̀ yi pəə zəənə̀ la a nɨ yèmpə̀ ndə̀ʼtə̀ a wɨghə mbə̀ʼə nɨ̀ chwarə̀. Nẅùə̀ a tə lə̀ʼtə̀ mɨ̀ntɨŋmə̀ ɨ̀məə yi a ghɨ̀rə̀ la mbə̀ʼə pəə kɨ ndə̀ʼtə̀ ɨ̀mɨghə, mbə̀ʼə nɨ̀ kɨ mbə nɨ àẅìimə̀ ntɨŋmə̀ amwuə ngəʼə̀ nɨ nɨ̀ wə̀ ndzəənə̀ tsaʼnə pəə pə nkɨ ndzəənə̀.

⁷Tsaʼnə a pənə lə la, àkwàŋə̀ nɨ pəə pənə nɨ zèrə mbə̀ʼə wɨghə ka a kẅebə̀ e ntiinə pəə zhyə̂nə lo, tsaʼnə nɨ̀ kɨnə mmə ndzəənə̀ ngəʼə̀ nɨ pəə mənə ndzəənə̀ la, Nẅùə̀ ǎ kɨ lə̀ʼtə̀ mɨ̀ntɨŋmə̀ ɨ̀mɨghə tsaʼnə à kɨnə mmə ndə̀ʼtə̀ mɨ̀ntɨŋmə̀ ɨ̀məə la.

⁸Pɨlyimə ɨ̀pâ, ka pəə tàʼà a wəə lo nɨ̀ ghoŋə̀ tɨ zhyə̂ mbuurə̀ ngəʼə̀ nɨ pəə lə̀ zəənə̀nə a pàa àlaʼà Asia. Àpìʼì nɨ pəə lə̀ pìʼnə a lə̀ lìrə̀ tɨsɨŋnə tə pəə kwàŋə̀ lo ka pəə pə chi chyə̂ a wəə.

⁹Pəə lə̀ kwàŋə̀ lo pɨ lə̀ lə̂ ɨ̀sàʼa ɨ̀wəə lo pəə kwɨkə̀, la ànwùə̀ zə̀ a lə̀ furə̀ a lenə la lo kò pəə zəʼnə̀ a wəə pə aŋunə mbɨ̀ŋmə̀ ɨ̀zəə, ɨ pəə zəʼnə̀ pə aŋunə Nẅùə̀ wa nɨ à wa nzhwuumə̀ pə̀ənə̀ aŋunə nɨ̀wɨghə̀.

¹⁰Nẅùə̀ à lə̀ kẅiirə̀ a wəə a ntswùə̀ nɨ̀wɨghə̀, mbə kɨ chwarə̀ a wəə. Pəə kùmə̀ nnùŋə̀ ɨ̀kwàŋə̀ ɨ̀pəə aŋunə ze lo ǎ làŋə̀ nɨ mbyə̀ tə chwarə̀ a wəə,

¹¹tsaʼnə nɨ̌ yèmpə̀ a nɨ chàʼtə̀ a Nẅùə̀ kẅempə̀ a wəə. Pànə̀ pɨ̀noʼnə̌ ŋâ a mɨyàa a àtwuə̀ nɨ pəə mbə̀ʼə mborə̀ zhyə̀ nɨ à ŋânə ambo pəə ndàŋə̀ a ndzùmə̀ àchàʼtə̀ Nẅùə̀ pànə̀ pɨ̀noʼnə ntiinə à zuʼù àchàʼtə̀ Nẅùə̀ àzɨghə.

¹²Pəə pə ntèrə̀ a wəə ntiinə mɨ̀ntɨŋmə̀ ɨ̀məə nèrə̀ nkǔŋə nkuŋə lo nɨ̀chyə̂mbyə̂ ɨ̀wəə amwuə àtwuə̀ ɨ̀shyə̂, nkɨ tô nɨ̀chyə̂ ɨ̀wəə a tɨ̀tɨ̀rə̀ pɨghə, à ghɨ̀rə̀ Nẅùə̀ lo â laanə̀ mmyàanə̀. Pəə lə̀ chyə̂ a lenə ndàŋə̀ pə a ndzùmə̀ àpòŋə̀ ntɨŋmə̀ Nẅùə̀, ka pə e pə a ndzùmə̀ àzhìʼtə̀ àtwuə̀ ɨ̀shyə̂.

¹³Mbə̀ʼnə pəə ŋwàʼnə̀nə la tyìʼə̀ mɨ̀nwùə̀ nɨ mbə̀ʼə nɨ̀ fuŋə̀ nzhyə̂. Ǹkɨ nkwàŋə̀ lo,

¹⁴nɨ̀ patə zhyə̂ pə a mɨlyiʼə mbə̀ʼə pəə la, nɨ̀ ghǎ zhyə̂ ɨ̀shìʼnə̀ lo mbə̀ʼə nɨ̀ tsòo a ghàŋə̀ ɨwɨghə ntii wəə, tsaʼnə pəə ghǎ kɨ tsòo a ghàŋə̀ ɨwəə ntii wɨghə aŋunə njyə̂ nɨ Ndòʼnə̀mbyə̂ Yěsû a ghǎ tô.

¹⁵Tsaʼnə ndə̀ zhyə̂nə lo nɨ̀ pɨ zuʼù nzhyə̂ la, ndə̀ tàʼà a nɨ pyə̀ ndàŋə̀ nkarə̀ a wɨghə mbə̀ʼə nɨ̀ pə nɨ mborə̀ nkwùə̀ ɨpaa.

¹⁶Ndə̀ pyə̀ nkwàŋə̀ la lo mbɨ karə̀ a wɨghə nkwùə̀ nɨ m̀mənə ndàŋə̀ ndèrə̀ a Màsèdonyà, chi karə̀ a wɨghə nkwùə̀ nɨ ǹkẅirə̀nə mmə nkwə̂, nɨ̀ tyiʼə̀ ngyèmpə̀ mə̀ n̂dèrə̀ a Judyà.

¹⁷Ndə̀ kɨ kwàŋə̀ a lenə la, àtwuə̀ mə̀ a tsànkə̀ tsànkə̀nə? Kə̀ ndə̀ kwàŋə̀ a lenə pə tsaʼa ŋwùə̀ àtwuə̀ ɨ̀shyə̂ ghə nɨ à pyiimə̀nə ndàʼnə̀ e tyìʼə̀ nkwùə̀ ghu?

¹⁸La tsaʼnə Nẅùə̀ à pənə Nẅùə̀ nkǔŋə nkuŋə la, ntwuumə̀ ɨ̀wəə ambo pɨghə ka ɨ̀ pə e “ee” pobə “ngaŋə.”

¹⁹Mbə̀ʼnə Yěsû Kristù, Moonə̀ Nẅùə̀ wa nɨ pəə Salàsə̀ nɨ Timotì lə̀ chwìitə̀nə ambo pɨghə la, ka à lə̀ pə e “ee” pobə “ngaŋə.” La ambo ze, àze ànwùə̀ a lə̀ kɨ mbə pə lo “ee” nkwùə̀ ɨ̀tsùmə̀.

²⁰Ntiinə nkàʼnə Nẅùə̀ ɨ̀tsùmə̀ nɨ ɨ̀ pənə “ee” ɨ̀ chyə̂ la amwuə Kristù. La ɨ̀sùmə nɨ pə̀ənə̀ pa nshwəŋə̀ “Amen” ndàŋə̀ aŋunə ze nguʼtə̀ a Nẅùə̀.

²¹La, à pwuutə̀ Nẅùə̀ mbwuutə̀ a wəənə̀ ngɨ̀rə̀ lo pə̀ənə̀ təəmə̀ ntɨ̀ŋnə̀ aŋunə Kristù, nkɨ ntsoʼò a wəənə̀ ntə̂ aŋunə àfàʼà e,

²²nchyâ àlènə̀ e aŋunə pə̀ənə̀, nkɨ nchyâ Àzhwùə̀ e amwuə mɨ̀ntɨŋmə̀ ɨ̀məənə̀, mbə̀ʼə ghɨ̀rə̀ a laanə̀ lo à lòʼnə̀ ɨ̀pwuumə̀ ɨ̀tsùmə̀ ambo pə̀ənə̀.

²³Ǹfuŋə̀ a Nẅùə̀ tsaʼa ndzəənə̀ zəənə̀nə mə̀; À zhyə̂ ntɨŋmə̀ mə̀ lo nɨ̀ka kẅirə̀ tô mə̀ a àlaʼà Korìntə̀, ka a lə̀ pə e la a nɨ chyâ ngəʼə̀ aŋunə pɨghə.

²⁴Ka pəə mə ntàʼà a wəə pə lo nyìimə̀ a wɨghə lo nɨ̀ pyiimə̀ ànwùə̀ nɨ pəə pə nshwəŋə̀; Pəə zhyə̂ lo nɨ̀ təəmə̀ ntɨ̀ŋnə̀ aŋunə àpyiimə̀ ntɨŋmə̀ àzɨghə. Pəə tàʼà fàʼà pə̀ənə̀ pə amwuə àlàŋə nɨ nɨ̌ pə nɨ nɨ̀ghaʼà.