Read Pinyin 2 Korìntə̀ 10 Bible Online

2 Korìntə̀ 10 - Pinyin bible

2 Korìntə̀ 10

¹Mɨ̀ŋə̀ àtwuə̀ mbɨ̀ŋmə̀ mə̀ Pàolò wa nɨ nɨ̀ shwəŋə̀nə lo ngwa mbonə̀ nkwùə̀ nɨ m̀bənə pə̀ənə̀, la ntsə̂ nkwùə̀ nɨ ka mbə mə̀ pə̀ənə̀. Ǹdòo àpotə̀ mbɨ̀ŋmə̀ pobə nɨ̀ponə̀ Kristù,

²mbuʼù mbô ambo pɨghə lo kò nɨ̀ ghɨ̀rə̀ lo n̂tsə̂ aŋunə pɨghə nkwùə̀ nɨ ǹtônə. Mbəʼnə ǹzhyə̂nə lo mbɨ tô tsə̂ aŋunə pànə̀ pa nɨ pobə pa nkwàŋə̀ àzobə pə lo pəə pa nfàʼà ndzùŋə̀ pə àlàŋə pànə̀ pɨ àtwuə̀ ɨ̀shyə̂.

³Pəə patə mmə nchyə̂ pə àtwuə̀ ɨ̀shyə̂ ghə̀ la, ka zòŋnə̀ a wəə ntsòo tsaʼa àtwuə̀ ɨ̀shyə̂.

⁴Ka ɨ̀pwuumə̀ ntsòo ɨ̀pəə pə e la pɨ àtwuə̀ ɨ̀shyə̂. Ɨ̀pwuumə̀ ntsòo ɨ̀pəə la mɨ̀tɨ̀ŋnə̀ mɨ Nẅùə̀ mɨ̀ẅùunə a nɨ lòo nshàʼtə̀ mɨ̀nkaʼà mɨ̀tɨ̀ŋnə̀ ma nɨ Satàanə̀ à korə̀nə la.

⁵Pəə pa nshàʼtə̀ ɨ̀tànkə̀ mɨ̀nwùə̀ ɨ̀tsùmə̀ pobə àkoʼò mbɨ̀ŋmə̀ nɨ pànə̀ lòonə nàanə̀ lo kò pànə̀ zhyə̂ a ghobə a Nẅùə̀. Pəə pa nkẅiirə̀ ɨ̀kwàŋə̀ ɨ̀pobə ɨ̀tsùmə̀ ngɨ̀rə̀ lo pobə tyiʼə̀ ndzuʼnə̀ a Kristù.

⁶Nkwùə̀ nɨ nɨ̀ nèrə̀nə nɨ ntɨŋmə̀ ɨ̀wɨghə ɨ̀tsùmə̀ lo nɨ̌ mə zuʼnə̀ a Nẅùə̀, pəə̌ kɨ chwuʼtə̀ mbɨ̀ŋmə̀ a nɨ chyâ ngəʼə̀ aŋunə pànə̀ pɨ̀tsùmə̀ nɨ pobə pa tɨ̀ŋnə̀ àtwuə̀ ambo Kristù.

⁷Nɨ̀ tsùŋə̀ nnaŋə̀ ɨ̀shìʼnə̀: Ŋwùə̀ ɨwɨghə ɨ̀tse à tə pəla ntsùŋə̀ nzhyə̂ lo à chyə̂ ambo Kristù, a chi ntsùŋə̀ nnaŋə̀ mbɨ̀ŋmə̀ e ɨ̀shìʼnə̀, ǎ kɨ zəənə̀ lo pəə kɨ mbə àzəə ambo Kristù tsaʼa ze.

⁸Ka mbə pə mə̀ nɨ ɨ̀sɨŋnə̀ mbə̀ʼə m̀bəla ntsòo a ghàŋə̀ tɨsɨŋnə mbə̀ʼə ɨ̀tɨ̀ŋnə̀ nɨ Nẅùə̀ à ŋânə ambo pəə ntiinə à pənə ɨ̀tɨ̀ŋnə̀ a nɨ poomə̀ a wɨghə, ka pə e a nɨ tsə̀ŋə̀ a wɨghə.

⁹Ka a pə e pə tsaʼa lo ngwə̀ ntàʼà a nɨ shwàŋə̀ a wɨghə nɨ ɨ̀ŋwàʼnə̀ ɨ̀pâ.

¹⁰Pànə̀ pɨ̀tse pa shwəŋə̀ lo, “ɨ̀ŋwàʼnə̀ Pàolò pa ntɨ̀ŋnə̀, la nkwùə̀ nɨ a pənə pə̀ənə̀ pɨ pobə àtwuə̀ mbɨ̀ŋmə̀ e a wa mborə̀ ka ɨ̀shwəŋnə̀ ɨ̀pe pə e ànwùə̀ àtse.”

¹¹A pòŋə̀ lo pànə̀ pɨ̀ghu zhyə̂ lo ɨ̀nwùə̀ nɨ pəə shwəŋə̀nə amwuə ɨ̀ŋwàʼnə̀ nkwùə̀ nɨ ka pəə pə wəə pə̀ənə̀ la, a ɨ̀nwùə̀ nɨ pəə ghɨ̀rə̀nə nkwùə̀ nɨ pəə pənə pə̀ənə̀.

¹²La mbə̀ʼə ka pəə lòo a wəə mbɨ̀ŋmə̀ ɨ̀zəə mmɨ̀nkə̀ aŋunə pànə̀ pa nɨ pobə pa ndòo mbɨ̀ŋmə̀ ɨ̀zobə lo pobə tsàarə̀ a ŋwùə̀ ntsùmə̀. Pobə la ɨ̀kɨ̀ghə̀ pə̀ənə̀ ntiinə pobə mɨ̀nkə̀nə mbɨ̀ŋmə̀ ɨ̀zobə ndzùŋə̀ pə ɨ̀làŋə ɨ̀pobə.

¹³Ngə̀ aŋunə pəə, mbə̀ʼə pəə tèrə̀ a wəə ndàŋə̀ àndànə̀ apə̀. Kɨ̀tèrə̀ ɨ̀wəə a təəmə̀ aŋunə àfàʼà nɨ Nẅùə̀ a ŋânə ambo pəə. Àfàʼà àzəə zèrə zə̀ a tô mbyàa farə ambo pɨghə.

¹⁴Tsaʼnə pəə lə̀ tônə nɨ ntwuumə̀ ghù ɨ̀shìʼnə̀ mbə̀ʼə Kristù ntô mbyàa ambo pɨghə la, pəə lə̀ pirə̀ la tyìʼə̀ amwuə alyiʼə àfàʼà nɨ Nẅùə̀ à lə̀ ŋânə ambo pəə.

¹⁵Ka pəə tsòo a wəə a ghàŋə̀ ndàŋə̀ nkwuunə̀ amwuə ɨ̀fàʼà pànə̀ pɨ̀nyaanə. Nɨ̀yìi ɨ̀wəə a chyə̂ lo àpyiimə̀ ntɨŋmə̀ àzɨghə a kẅùə̀, àfàʼà àzəə a tɨ̀tɨ̀rə̀ pɨghə â kẅìʼnə̀ ndèrə̀ nɨ mbyə̀.

¹⁶Lenəla, pəə tyiʼə̀ nchwìitə̀ ntwuumə̀ ghù ɨ̀shìʼnə̀ wa amwuə ɨ̀laʼà pɨ̀nyaanə. Nɨ ndwuumə̀ wə̀ ka pəə chyə̂ a wəə a nɨ tsòo a ghàŋə̀ ntii ɨ̀fàʼà nɨ pəə fàʼà mə aŋunə ɨ̀sàanə̀ pànə̀ pɨ̀nyaanə.

¹⁷La àŋwàʼnə̀ Nẅùə̀ a shwəŋə̀ lo, “Ŋwùə̀ wa ntsùmə̀ nɨ à wa ntsòo a ghàŋə̀, â tsòo pə aŋunə nɨ̀linə̀ nɨ Ndòʼnə̀mbyə̂.”

¹⁸Mbə̀ʼnə ŋwùə̀ à wa ka naŋə̀ e ɨ̀pɨ̀ŋmə̀ e shwəŋə̀ lo à kùʼnə̀ ntiinə à wə̀ ngɨ̀rə̀ ànwùə̀ nɨ a pòŋə̀nə. À wa nnaŋə̀ e Ndòʼnə̀mbyə̂ nnaŋə̀ nshwəŋə̀ lo ŋwùə̀ à kùʼnə̀.