Read Pinyin 2 Korìntə̀ 11 Bible Online

2 Korìntə̀ 11 - Pinyin bible

2 Korìntə̀ 11

¹Ǹtàʼà lo nɨ̀ ẅìimə̀ mɨ̀ntɨŋmə̀ ɨ̀mɨghə ntii mɨlyiʼə àkɨ̀ghə̀ mə̀. Nɨ̀ ẅìimə̀ mɨ̀ntɨŋmə̀ ɨ̀mɨghə pə̀ənə̀.

²Ngwə̀ ngə̀ʼnə̀ a wɨghə tyìʼə̀ tsaʼnə Nẅùə̀ à kɨnə mmə ngə̀ʼnə̀. Mbɨ ŋâ a wɨghə ambo ndwuumə̀ lo â zoʼò nɨ à pənə Kristù. Nɨ̀yìi mə̀ à chyə̂ mbə lo n̂ga ŋŋâ a wɨghə ambo taʼà ŋònə̀ mbyàŋnə̀ â tsoʼò mɨ̀lùʼù mɨ àtwuə̀ ɨ̀mɨghə tsaʼa môngwàngòonə̀ nɨ à pirə̀ mə e a mômbyàŋnə̀ tɨ zhyə̂.

³La ngwə̀ mbô mbə̀ʼə pɨ tô nfɨ̀kə̀ a wɨghə tyìʼə̀ tsaʼnə ɨ̀nyoorə̀ za ɨ̀ lə̀ fɨ̀kə̀nə a Ifə̀ nɨ àzhìʼtə̀ àfɨ̀ghə̀ e za, ntsə̀ŋə̀ ɨ̀kwàŋə̀ ɨ̀pɨghə, ngɨ̀rə̀ lo kò nɨ̀ chi nkòŋə̀ a wɨghə a Kristù nɨ ntɨŋmə̀ ɨ̀wɨghə ɨ̀tsùmə̀.

⁴Àkẅàrə̀ mə̀ a chyə̂ la lo nɨ̀ wa nfàʼà mbyiimə̀ a ŋònə̀ wa ntsùmə̀ nɨ à chwìitə̀nə ntwuumə̀ mbə̀ʼə Kristù ghù nyàanə ntsàarə̀ a ẅùə̀ nɨ pəə pa nchwìitə̀ ambo pɨghə. Nɨ̀ kɨ mmə nkẅiirə̀ Àzhwùə̀ yè nyaanə ntsàarə̀ a zhyə̀ nɨ nɨ̀ pyə̀ mə nkẅiirə̀, nkɨ mə mbyiimə̀ ntwuumə̀ ghu nyaanə nɨ ka ẅèrə pə e ntwuumə̀ ghù ɨ̀shìʼnə̀ wa nɨ nɨ̀ lə̀ pyə̀ mə mbyiimə̀ la.

⁵Ǹkwàŋə̀ lo ka ǹkɨ̂ mə̀ ntsàarə̀ pànə̀ pèrə pə nɨ nɨ̀ wa nfuŋə̀ nɨ ngàŋə ntwuumə̀ Kristù yi ẅùunə lə.

⁶Ǹtə pəla ka zhyə̂ shwəŋnə̀ mə̀ ɨ̀shìʼnə̀ ka a pə e la lo m̀buŋə̀ àzhìʼtə̀. Pəə ghɨ̀rə̀ la lo zèrə zə a laanə̀ ambo pɨghə amwuə ɨ̀làŋə ɨ̀tsùmə̀.

⁷Nɨ̀ kwàŋə̀ lo ndə̀ fànə̀ la ànwùə̀ lo shwuʼkə̀ mbɨ̀ŋmə̀ mə̀ a ɨ̀shyə̂ a nɨ ŋaŋə̀ a wɨghə àtɨ̀ghə, nchwìitə̀ ntwuumə̀ Nẅùə̀ ghù ɨ̀shìʼnə̀ ambo pɨghə tɨ kẅiirə̀ àzwuumə̀ àtse?

⁸Ndə̀ fɨ̀kə̀ ɨ̀shwatə̀ ɨ̀poonə̀ pɨ Kristù pɨ̀nyaanə nkẅiirə̀ nkabə̀ ambo pobə a nɨ yèmpə̀ mə̀ lo nfàʼà ambo pɨghə.

⁹La tsaʼnə ndə̀ pənə pə̀ənə̀ la, ka ndə̀ ŋâ mə̀ wɨghə nɨ ngəʼə̀ ɨ̀tse nkwùə̀ nɨ ndə̀ puŋə̀nə àzwuumə̀, ntiinə ɨ̀pwuumə̀ ɨ̀pâ lə̀ pə nfurə̀ ambo pɨlyimə ɨ̀pâ a àlaʼà Màsèdonyà. La ɨ̀sùmə nɨ ndə̀ ntwuunə̀ mə̀ a nɨ ŋâ ngəʼə̀ ambo pɨghə, nkɨ mbirə̀ mmə ntwuunə̀ a mə̀ a nɨ ŋâ ngəʼə̀ ambo pɨghə amwuə ɨ̀làŋə ɨ̀tsùmə̀.

¹⁰Tsaʼnə nkǔŋə nkuŋə Kristù à pənə amwuə mɨ̀ŋə̀ la, mbə̀ʼə ka pɨ nwuunə̀ e tɨ zhyə̂ ànwùə̀ zə̀ nɨ ngwə̀ ntsòo a ghàŋə̀ aŋunə lə a pàa àlaʼà Àkayà.

¹¹A ghɨ̀rə̀ àkə ka nkẅiirə̀ mə̀ ɨ̀pwuumə̀ ambo pɨghə? A chyə̂ pə ntiinə ka ǹkòŋə̀ mə̀ a wɨghə? Nẅùə̀ à zhyə̂ lo ǹkòŋə̀ a wɨghə.

¹²Mbɨ kɨ làŋə̀ nɨ mbyə̀ mə fàʼà pə àfàʼà nɨ m̀mənə nfàʼà, njiilo ǹfuukə̀ àtɨ̀tsaʼa a ɨ̀sùmə mɨ̀kwùə̀ mɨ pànə̀ nɨ pobə pa nkoʼò mbɨ̀ŋmə̀ nshwəŋə̀ lo pobə chyə̂ mbə tsaʼa pə̀ənə̀ aŋunə ɨ̀pwuumə̀ nɨ pobə mənə nkoʼò mbɨ̀ŋmə̀ aŋunə la.

¹³Mbə̀ʼnə mbuurə̀ pànə̀ zèrə zə̀ la ngàŋə ntwuumə̀ Kristù pɨ̀chwìrə̀, mbə ngàŋə àfàʼà àfɨ̀ghə̀ nɨ pobə pa nfɨ̀kə̀ nnèrə̀ lo pobə la ngàŋə ntwuumə̀ Kristù.

¹⁴Ka ànwùə̀ zèrə zə̀ a pə e ànwùə̀ kə̀ʼnə̀nə ntiinə Satàanə̀ àtwuə̀ ɨ̀pɨ̀ŋmə̀ e à wa nfɨ̀kə̀ nshwəŋə̀ lo ze chyə̂ mbə e la angèrə̀ nkàʼà.

¹⁵Lenəla, ka a pə e ànwùə̀ shwuə̀ ambo ngàŋə àfàʼà za nɨ pobə pa nfɨ̀kə̀ lo pobə̌ ngàŋə àfàʼà Nẅùə̀ nɨ mɨ̀nwùə̀ ɨ̀mobə təəmə̀nə. Ndẅùutə ɨ̀zobə ɨ ghǎ nèrə̀ tsaʼnə ɨ̀fàʼà ɨ̀pobə lə̀ pənə.

¹⁶Ǹtàʼà kẅirə̀ shwəŋə̀ lo kò ŋònə̀ ɨ̀tse a lòo e a gha tsaʼa àkɨ̀ghə̀. La nɨ̀ pəla ngɨ̀rə̀ a lenə, nɨ̀ lòo mə̀ tsaʼa àkɨ̀ghə̀ mbə̀ʼə nyaʼa mbə nɨ mɨlyiʼə ànwùə̀ nɨ mbə̀ʼə ntsòo a ghàŋə̀ aŋunə.

¹⁷Zèrə zə̀ ànwùə̀ nɨ ngwə̀ nshwəŋə̀ lə ka a pə e ànwùə̀ nɨ Ndòʼnə̀mbyə̂ à pyiimə̀nə lo n̂shwəŋə̀. Ǹshwəŋə̀ pə tsaʼa àkɨ̀ghə̀ aŋunə ànwùə̀ nɨ̀tsòo a ghàŋə̀ zèrə zə̀.

¹⁸Tsaʼnə pànə̀ pɨ̀noʼnə pənə ghu nɨ pobə tsòonə a ghàŋə̀ tsaʼa pànə̀ pɨ àtwuə̀ ɨ̀shyə̂ ghə̀ la, mbɨ kɨ tsòo a za.

¹⁹Nɨ̀ wə̀ ngaʼà a nɨ ẅìimə̀ mbɨ̀ŋmə̀ ɨ̀zɨghə pɨghə pɨ ɨ̀kɨ̀ghə̀ ntiinə nɨ̀ pənə ngàŋə àzhìʼtə̀.

²⁰Nɨ̀ wa ngẅìimə̀ mbɨ̀ŋmə̀ ɨ̀zɨghə mbyiimə̀ ambo ŋònə̀ nɨ à wa ndòo a wɨghə aŋunə ɨ̀pùʼù, ndə̀ʼə̀ ɨ̀zə̀ʼə̀ lo nɨ̀ kwɨghə̀ amwuə, ndzɨghə̀ a wɨghə kə̀ ngwâ a wɨghə kə̀ ndùbə̀ a wɨghə a ɨ̀sɨghə̀.

²¹A lanə mbə tyìʼə̀ ànwùə̀ ɨ̀sɨŋnə̀ ambo mɨ̀ŋə̀ a nɨ pyiimə̀ lo pəə lə̀ porə̀ a nɨ ghɨ̀rə̀ mɨ̀nwùə̀ mèrə mə ambo pɨghə. La ŋònə̀ ɨ̀tse à tə mə ntsòo a ghàŋə̀, (ǹshwəŋə̀ tsaʼa àkɨ̀ghə̀) yi ǹchyə̂ kɨ tsòo ɨ̀ghà.

²²Pobə chyə̂ pə la pɨ̀Hibrù? Yi nkɨ mbə ghùtse. Pobə chyə̂ mbə la pànə̀ pɨ Israel? Yi nkɨ mbə ghùtse. Pobə chyə̂ mbə la ngẅàrə̀ Abràhamə̀? Yi nkɨ mbə ghùtse.

²³Pobə la ngàŋə àfàʼà Kristù? (Ngwə̀ nshwəŋə̀ lə tsaʼa àpaarə̀). La mbə ngàŋə̀ àfàʼà ɨ̀shìʼnə̀ ntsàarə̀ a ghobə. Ǹfàʼà mə ntsàarə̀ a ghobə, ǹkwuunə̀ mə a ɨ̀tsaŋə̀ nkwùə̀ noʼnə, pɨ kəʼə̀ mə mə̀ ɨ̀shìʼnə̀ nkwùə̀ noʼnə, m̀byàa mə a ntswùə̀ nɨ̀wɨghə̀ nkẅirə̀ mbyàa.

²⁴Pɨ̀Jew kəʼə̀ mə mə̀ nɨ ɨ̀tɨ̀ŋnə̀ nɨ à lə̀ tyiʼnə mbuŋə̀ e taʼà a pə ngwàanə̀ mɨ̀ghumə̀ nɨ̀kwàa nkwùə̀ ɨtaanə̀

²⁵Pɨ̀Roman kəʼə̀ mə mə̀ nkwùə̀ ɨtarə; ntumpə̀ mə̀ nɨ mɨ̀ghòorə a taʼà nkwùə̀, àpaŋə̀ a shàʼtə̀ mə nɨ mɨ̀ŋə̀ amwuə nkwùə̀ ɨtarə. Ǹchyə̂ mə amwuə nchyə ghu nɨŋnə̀nə amwuə ɨ̀twuʼə̀ ghobə njyə̂.

²⁶Aŋunə ɨ̀kwùə̀ nɨ̀yìinə̀ ɨ̀pâ pɨ̀noʼnə, m̀bə mə a ntswùə̀ nɨ̀wɨghə̀ a nɨ ẅènə̀ amwuə nchyə farə ambo pɨ̀ntuŋə̀ ɨ̀shyə̂. M̀bə mə a ntswùə̀ nɨ̀wɨghə̀ ambo pɨ̀Jew pobə pànə̀ nɨ ka pobə pə ghobə pɨ̀Jew; mbə a ntswùə̀ nɨ̀wɨghə̀ amwuə mbòmpə àlaʼà ngẅùunə pobə alyiʼə waakə, nkɨ mbə a ntswùə̀ nɨ̀wɨghə̀ amwuə nchyə ghu nɨŋnə̀nə pobə pɨlyimə pɨ pɨ̀chwìrə̀.

²⁷Ntsòo mə mbɨ̀ŋmə̀ ndzəənə̀ ngəʼə̀, ndyə̂ a nɨ̀lyìinə̀ nkwùə̀ noʼnə, njyə̀ mɨ̀zɨghə̀ pobə njyə̀ nchyə ɨ̀ zaŋə̀ mə̀; nkwùə̀ noʼnə ka mbə mə̀ nɨ àzwuumə̀ a nɨ zɨghə̀, ka pə mə̀ nɨ alyiʼə a nɨ lyə̂, ɨ̀fə̂ ɨ̀ mə nkoorə̀ a mə̀ ka mbə mə̀ nɨ ɨtsəʼə a nɨ kẅupə̀.

²⁸A nɨ waʼà a mɨ̀tse mɨ̀nwùə̀, àkwàŋə̀ mə̀ njyə̂ ɨ̀tsùmə̀ a chyə̂ mbə̀ʼə ɨ̀shwatə̀ ɨ̀poonə̀ pɨ Kristù àtsùmə̀.

²⁹A ɨ̀wə̌ ŋwùə̀ nɨ à porə̀nə, ka mbɨ̀ŋmə̀ mə̀ ɨ kɨ mborə̀ e? A ɨ̀wə̌ ŋwùə̀ nɨ à kunə̀nə amwuə tɨ̀pòŋə̀, ǹka lẅenə̀ mə̀ nɨ àsòmnə̀ e?

³⁰Ǹtə mə ntsòo a ghàŋə̀ yi ǹtsòo la aŋunə ɨ̀pwuumə̀ pa nɨ pèrə pa nnèrə̀ lo m̀borə̀.

³¹Nẅùə̀koʼò wa nɨ à pənə Tǎ pɨ Ndòʼnə̀mbyə̂ Yěsû Kristù ẅùə̀ nɨ mborə̀ tɨ myə̀ ɨ̀ pənə aŋunə nɨ̀linə̀ ɨ̀tse à zhyə̂ lo ka mmə nyìi mə̀ a chwìrə̀.

³²Nkwùə̀ nɨ ndə̀ pənə a Dàmaskòsə̀ la, govɨnò mbòmpə àlaʼà ghu nɨ à lə̀ pənə a ɨ̀sùmə ɨ̀fò Aretas a tsàa pɨ̀soyì lo pobə̂ tô mbyabə̀ a mə̀ a ntswùə̀ nkaʼà nkô.

³³La pɨ chyâ mə̀ amwuə nkaamə ntsàa amwuə nɨ̀fə̀ŋə nɨ nkaʼà, nshwuʼkə̀ mə̀ a ɨ̀shyə̂ ǹtyiʼə̀ kɨ̀ɨrə̀.