Read Pinyin 2 Korìntə̀ 12 Bible Online

2 Korìntə̀ 12 - Pinyin bible

2 Korìntə̀ 12

¹Mbɨ làŋə̀ nɨ mbyə̀ kɨ tsòo mə̀ a ghàŋə̀ tsòonə, mbaa pə tsaʼnə ka àpìi àtse a pə e amwuə la, n̂tyiʼə̀ ndàŋə̀ nɨ mbyə̀ nshwəŋə̀ mbə̀ʼə ndzə̀əmə̀ nɨ ɨ̀ lə̀ làŋə̀nə a ɨ̀myə̂ mɨ̀ŋə̀ pobə mɨ̀nwùə̀ nɨ Ndòʼnə̀mbyə̂ Yěsû à lə̀ nèrə̀nə ambo mɨ̀ŋə̀.

²Ǹzhyə̂ a moonə̀ Kristù ghùtse nɨ tɨ̀tsòŋə̀ a nguʼu ntsòbə̀ nɨ̀kwàa tsaʼnə Nẅùə̀ à lə̀ lòonə e nkoʼò ndèrə̀ nɨ ẅèrə a nɨ̀pwuurə̀ nɨ Àkoʼntsirə̀ (kə̀ nɨ à lə̀ pənə tyìʼə̀ ànwùə̀ nɨ a lə̀ lòonə alyiʼə kə̀ à lə̀ pə ndzə̀əmə̀ nɨ ɨ̀ lə̀ làŋə̀nə a ɨ̀myə̂ mɨ̀ŋə̀, yi ka ǹzhyə̂ mə̀; à zhyə̂ Nẅùə̀ nzhyə̂).

³Nẅùə̀ à lə̀ lòo a ŋònə̀ wə̀ ndèrə̀ a Paradise; (kə̀nə à lə̀ pənə tyìʼə̀ ànwùə̀ nɨ a lə̀ lòonə alyiʼə kə̀ à lə̀ pə ndzə̀əmə̀ nɨ ɨ̀ làŋə̀nə a ɨ̀myə̂ mɨ̀ŋə̀, ka ǹzhyə̂ mə, à zhyə̂ Nẅùə̀ nzhyə̂).

⁴A lə̀ koʼò ndèrə̀ ndzuʼù mɨ̀nwùə̀ nɨ mbə̀ʼə ŋwùə̀ mɨsoŋə a shwəŋə̀ e apə̀; nkɨ mbə myə̀ nɨ mbə̀ʼə ka ŋwùə̀ a shwəŋə̀ e ambo ŋwùə̀.

⁵Mbɨ tsòo a ghàŋə̀ mbə̀ʼə mbuurə̀ ŋònə̀ zə̀, la ka pə tsòo mə̀ pə mbə̀ʼə mbɨ̀ŋmə̀ mə̀; ndàŋə̀ e lo mbə̀ʼə ntsòo pə mbə̀ʼə mɨ̀nwùə̀ nɨ mɨ nèrə̀nə lo m̀borə̀.

⁶Ntə pə tsòo a ghàŋə̀, mbə mə̀ àpuukə̀ apə̀ ntiinə mbɨ mə shwəŋə̀ pə a nkǔŋə nkuŋə. La ǹkùmə̀ ntwuunə̀ a nɨ tsòo a ghàŋə̀ ntiinə ka ǹtàʼà mə̀ lo ŋònə̀ ɨ̀tse a tyiʼə̀ nkwàŋə̀ lo ǹfaŋə̀ ntsàarə̀ mɨ̀nwùə̀ nɨ ze à zəənə̀nə kə̀ mmə ndzuʼù kə̀ mmə ngɨ̀rə̀.

⁷A nɨ ghɨ̀rə̀ lo kò ntsòo mə̀ a ghàŋə̀ tɨsɨŋnə, mɨ̀nwùə̀ mɨ kə̀ʼnə̀nə mɨ noʼò nɨ ndə̀ zəənə̀nə, pɨ lə̀ chyâ àndzaŋə aŋunə mɨ̀ŋə̀: a tyiʼə̀ mbə tsaʼa ngàŋə̀ àfàʼà Satàanə̀ nɨ à ŋânə ngəʼə̀ ambo mɨ̀ŋə̀, a nɨ ghɨ̀rə̀ lo kò nchi tsòo mə a ghàŋə̀ tɨsɨŋnə.

⁸Ndə̀ puʼù mbô ndoonə̀ ambo Ndòʼnə̀mbyə̂ nkwùə̀ ɨtarə lo â tsoʼò àndzaŋə zə̀ aŋunə mɨ̀ŋə̀.

⁹A shwəŋə̀ ambo mɨ̀ŋə̀ lo “Àpòŋə̀ ntɨŋmə̀ mə̀ a kùʼnə̀ ambo ghò, ntiinə ɨ̀tɨ̀ŋnə̀ mə̀ ɨ̀tsùmə̀ ɨ nèrə̀ mbɨ̀ŋmə̀ e ɨ̀shìʼnə̀ amwuə mbɨ̀ŋmə̀ nɨ ɨ̀ porə̀nə.” Lenəla mbɨ pə nɨ nɨ̀ghaʼà a nɨ tsòo a ghàŋə̀ mə̀ amwuə nɨ̀porə̀ mə̀, mbə̀ʼə ɨ̀tɨ̀ŋnə̀ Kristù ɨ̂ tô aŋunə mɨ̀ŋə̀.

¹⁰La, ɨ̀sùmə nɨ ngwə̀ ngaʼà mbə̀ʼə Kristù amwuə nɨ̀porə̀ mə̀, amwuə mɨ̀ndzòomə̀, amwuə ngəʼə̀, amwuə nɨ̀nyàŋə̀, amwuə nkwùə̀ nɨ mɨ̀nwùə̀ mənə ntsàarə̀ mə̀ ntii Kristù. Mbə̀ʼnə nkwùə̀ nɨ m̀borə̀nə la nkwùə̀ nɨ ngwa ntɨ̀ŋnə̀.

¹¹Ǹdòo mbɨ̀ŋmə̀ mə̀ ngɨ̀rə̀ àpuukə̀ ghu, la a ghɨ̀rə̀ pɨghə ngɨ̀rə̀. La pə pyiimə̀ pɨghə pyiimə̀ a àfàʼà, mbə̀ʼnə mbatə ka pə mə pə àzwuumə̀ la ka kɨ̂ mə̀ tsàarə̀ ngàŋə ntwuumə̀ Kristù ɨ̀zɨghə yɨ̀ ẅùunə za.

¹²Ndə̀ nèrə̀ ambo pɨghə tsaʼnə ǹchyə̂nə mbə ngotə ngàŋə̀ ntwuumə̀ Kristù amwuə ndwuumə̀ nɨ ndə̀ ẅìimə̀nə mbɨ̀ŋmə̀ mə̀ ndzəənə̀ ngəʼə̀ nkɨ ngɨ̀rə̀ ɨ̀lènə̀ ɨ̀nwùə̀ nɨ mɨ̀nwùə̀ kə̀ʼnə̀nə pobə mɨ̀nwùə̀ mɨ yerə̀nə yerə̀nə a tɨ̀tɨ̀rə̀ pɨghə.

¹³Ndə̀ nèrə̀ amwuə zèrə àlàŋə lo ǹkòŋə̀ àshwatə̀ ɨ̀poonə̀ pɨ Kristù pɨ̀tse ntsàarə̀ a wɨghə ndàŋə̀ e lo ka ndə̀ pə mə̀ àpìʼì yè lìrə̀nə àtse àtwuə̀ pɨghə? A tə mbə lo ndə̀ ghɨ̀rə̀ a tɨ̀pòŋə̀ a nɨ ka pyiitə̀ mə̀ a wɨghə lo nɨ̀ ŋâ ɨ̀pwuumə̀ ngyèmpə̀ mə̀, yi nɨ̀ lə̀ənə̀ mə̀.

¹⁴Ngwə̀ nchwuʼtə̀ mbɨ̀ŋmə̀ a nɨ tô ngaanə̀ a wɨghə aŋunə nòmbàa nkwùə̀ ɨtarə. Mbɨ tô la pə mə̀ àpìʼì àtse ambo pɨghə apə̀ ntiinə ǹtàʼnə pə a wɨghə, ka ǹtàʼà mə̀ pə ɨ̀pwuumə̀ ɨ̀pɨghə. A pyə̀ mbə la lo pɨ̀tǎ pobə pɨ̀mǎ nùŋə̀ ɨ̀pwuumə̀ ambo ɨ̀poonə̀ ɨ̀pobə ka pə e ɨ̀poonə̀ a nɨ nùŋə̀.

¹⁵Mbɨ ghaʼà ghaʼnə a nɨ ŋâ ɨ̀pwuumə̀ ɨ̀pâ ambo pɨghə, ŋŋâ farə mbɨ̀ŋmə̀ mə̀ a nɨ yèmpə̀ a wɨghə ghu. Ntə pəla nkòŋə̀ a wɨghə tɨsɨŋnə nɨ̀ tyiʼə̀ ka tsùŋə̀ kɨ kòŋə̀ a wɨghə a gha ntii àkə?

¹⁶Nɨ̌ pyiimə̀ lo ka ndə̀ zhiʼə̀ mə̀ a wɨghə nɨ àpìʼì àtse. La pànə̀ pɨ̀tsě shwəŋə̀ lo ndə̀ ghɨ̀rə̀ nkòbə̀ nkɨ nfɨ̀kə̀ a wɨghə nɨ pɨ̀chwìrə̀.

¹⁷Ndə̀ kɨ pəla ngɨ̀rə̀ nkòbə̀ nkẅiirə̀ ɨ̀pwuumə̀ ɨ̀pɨghə ndàŋə̀ a ndzùmə̀ pànə̀ nɨ ndə̀ tsàanə ambo pɨghə?

¹⁸Ndə̀ puʼù mbô ambo Titus ntwuumə̀ a ghobə yɨ̀tse moonə̀ Kristù wa. Titus à lə̀ tô la ngɨ̀rə̀ nkòbə̀ nkẅiirə̀ ɨ̀pwuumə̀ ɨ̀pɨghə? Ka pəə ze fàʼà a wəə la nɨ taʼà ntɨŋmə̀ kə̀ ndzùŋə̀ a taʼà àlàŋə?

¹⁹Nkwùə̀ ɨ̀tse nɨ̀ mə nkwàŋə̀ lo pəə pə ntàŋə̀ pə ɨ̀twuə̀ ɨ̀pəə ambo pɨghə. A ye Nẅùə̀ nɨ à zhyə̂nə lo pəə shwəŋə̀ tyìʼə̀ a nkǔŋə nkuŋə tsaʼa ngàŋə àfàʼà Kristù. Ntiinə ɨ̀nwùə̀ ɨ̀tsùmə̀ nɨ pəə pa ngɨ̀rə̀ la nɨ pɨlyimə ɨ̀pâ nɨ ǹkòŋə̀nə, pəə pa ngɨ̀rə̀ pə a nɨ yèmpə̀ a wɨghə lo mbə̀ʼə nɨ̀ kẅùə̀.

²⁰Ngwə̀ mbô lo mbə̀ʼə ǹtô ka zəənə̀ mə̀ a wɨghə nɨ̀ pə mbuurə̀ pànə̀ nɨ ǹkòŋə̀nə lo nɨ̀ pə, nɨ̀ kɨ ka zəənə̀ a wɨghə a gha m̂bə ŋònə̀ nɨ nɨ̀ kòŋə̀nə lo m̂bə. Ngwə̀ mbô lo mbɨ tô kɨ tsirə̀ a wɨghə nɨ̀ pə amwuə àsaʼnə̀ pobə àghə̀ʼnə̀, nɨ̀ mə ndzaŋə̀ a loŋə, mmə ngəʼə̀, mmə ntsə̀ŋə̀ mɨ̀linə̀ nkɨ mmə nkwə̀əmə̀, nkɨ mbə nɨ àsàa mbɨ̀ŋmə̀ pobə àzhwàʼà.

²¹Ngwə̀ mbô lo mbə̀ʼə nkẅirə̀ ntô Nẅùə̀ a chyâ ɨ̀sɨŋnə̀ àtwuə̀ mɨ̀ŋə̀ a mbyə̀ pɨghə. Ngwə̀ mbô lo ngǎ mə yìi ntii pə̀ənə̀ amwuə pɨghə nɨ pobə pa ndèrə̀ pə nɨ mbyə̀ a nɨ ghɨ̀rə̀ a tɨ̀pòŋə̀ nɨ pobə lə̀ pyə̀nə mmə ngɨ̀rə̀, ka myàʼtə̀ a ghobə mɨ̀nwùə̀ nɨ ka mèrə laanə̀ e tsaʼa àfànə̀ pobə məghàbə̀ nɨ mɨ̀nwùə̀ mɨ ntsɨ̀ŋnə mɨ̀tsùmə̀.