Read Pinyin 2 Korìntə̀ 13 Bible Online

2 Korìntə̀ 13 - Pinyin bible

2 Korìntə̀ 13

¹Lə̌ nòmbàa nkwùə̀ ɨtarə nɨ ngwə̀ ntô ambo pɨghə. Ànwùə̀ àtsùmə̀ nɨ pɨ̌ shwəŋnə̀ mbə̀ʼə ŋwùə̀, nɨ̀ zəənə̀ lo pɨ̀ndzəənə̀ zəənə̀nə pə pɨpaa kə̀ pɨtarə a nɨ pyiimə̀ lo ànwùə̀ ghu a nkǔŋə nkuŋə.

²Ndə̀ kwàtə̀ pànə̀ pa nɨ pobə lə̀ ghɨ̀rə̀nə a tɨ̀pòŋə̀ farə pɨ̀tse pə̀ənə̀ nkwùə̀ nɨ ndə̀ tônə nkarə̀ a wɨghə aŋunə nòmbàa nkwùə̀ ɨpaa la. Ǹtàʼà kẅirə̀ ŋâ àkwàtə̀ ghu tsaʼnə ka mbə mə̀ pə̀ənə̀ lə: nkwùə̀ nɨ mbɨ ghǎ kẅirə̀ tô, ka mbə ghǎ myàʼtə̀ mə̀ a ŋònə̀ ɨ̀tse.

³Tsaʼnə nɨ̀ wə̀ ntàʼà a nɨ zəənə̀ àlènə̀ lo Kristù à wə̀ ndàŋə̀ a ndzùmə̀ mɨ̀ŋə̀ nshwəŋnə̀ la, nɨ̌ zəənə̀! Ka à porə̀ e amwuə ndwuumə̀ nɨ à wa nfàʼà pɨghə pɨ pobə, la mmə nfàʼà nɨ ɨ̀tɨ̀ŋnə̀ a tɨ̀tɨ̀rə̀ pɨghə.

⁴Mbə̀ʼnə ka à lə̀ pə e nɨ ɨ̀tɨ̀ŋnə̀ nkwùə̀ nɨ pɨ lə̀ mənə nkẅùumə̀ e aŋunə àtɨ̀ghə pànkə̀nə la, à kùmə̀ mbə tɨ̀tsòŋə̀ ghù ntɨ̀ŋnə̀ lə ntii ɨ̀tɨ̀ŋnə̀ Nẅùə̀. Tsaʼnə pəə pɨ Kristù chyə̂nə mbə taʼà ŋwùə̀ la, pəə kɨ mborə̀ àzəə. La nkwùə̀ nɨ pəə̌ pə pə̀ənə̀ a nɨ naŋə̀ mɨ̀nwùə̀ ɨ̀mɨghə, pəə̌ pə taʼà ŋwùə̀ pəə pɨ Kristù nɨ à pənə ghù ntɨ̀ŋnə̀ la, tyiʼə̀ pə nɨ ɨ̀tɨ̀ŋnə̀ Nẅùə̀.

⁵Nɨ̀ naŋə̀ mbɨ̀ŋmə̀ ɨ̀zɨghə ndzəənə̀ lo nɨ̀ wə̀ mbirə̀ nnùŋə̀ ntɨŋmə̀ ɨ̀wɨghə aŋunə Kristù; nɨ̀ zhwiʼì mbɨ̀ŋmə̀ ɨ̀zɨghə. Ka nɨ̀ zəənə̀ a wɨghə lo Yěsû à wə̀ amwuə pɨghə, ndàŋə̀ e lo nɨ̀ wɨ̀ghə̀ àkwàʼnə̀ ghu?

⁶Ǹkwàŋə̀ lo nɨ̌ kɨ zəənə̀ lo ka pəə àtwuə̀ mbɨ̀ŋmə̀ àzəə kɨ ngwɨ̀ghə̀ a wəə.

⁷Pəə pə nchàʼtə̀ a Nẅùə̀ lo kò nɨ̀ ghɨ̀rə̀ a wɨghə ànwùə̀ àtse nɨ a pɨ̂nə, ka pə e pə a nɨ nèrə̀ pànə̀ zəənə̀ lo pəə làŋə̀ àkwàʼnə̀ ghu. La a chyə̂ pə lo nɨ̀ ghɨ̀rə̀ mɨ̀nwùə̀ nɨ mɨ təəmə̀nə, mbaa pə tsaʼnə pànə̌ mə shwəŋə̀ lo pəə wɨ̀ghə̀.

⁸Mbə̀ʼnə mbə̀ʼə ka pəə ghɨ̀rə̀ a wəə ànwùə̀ àtse aŋunə nkǔŋə nkuŋə. Pəə pa ngɨ̀rə̀ ànwùə̀ àtsùmə̀ pə a nɨ tompə̀ a nkǔŋə nkuŋə.

⁹Pəə pa ngaʼà nkwùə̀ ɨ̀tsùmə̀ nɨ pəə pənə mborə̀ la nɨ̀ pə ntɨ̀ŋnə̀, nkɨ mmə nchàʼtə̀ a Nẅùə̀ lo mɨ̀nwùə̀ ɨ̀mɨghə pòŋə̀ ndèrə̀ nɨ mbyə̀.

¹⁰Ngwə̀ ŋŋwàʼnə̀ mɨ̀nwùə̀ mə tɨ̀tsòŋə̀ ambo pɨghə lə ntiinə ka mbə mə̀ pə̀ənə̀, njiilo nkwùə̀ nɨ ǹtônə kò nsaʼà mə̀ a wɨghə. Ndòʼnə̀mbyə̂ à lə̀ ŋâ ɨ̀tɨ̀ŋnə̀ ambo mɨ̀ŋə̀ pə lo n̂gɨ̀rə̀ nɨ̀ kẅuə̀ ndèrə̀ pə nɨ mbyə̀, ka pə e pə a nɨ shàʼtə̀ a wɨghə.

¹¹A nɨ lẅùutə̀ nɨ pɨlyimə ɨ̀pâ, nɨ̀ nwuunə̀ ɨ̀shìʼnə̀. Nɨ̀ taŋnə̀ a nɨ zəənə̀ lo mɨ̀nwùə̀ ɨ̀mɨghə təəmə̀, nzhwiʼtə̀ mɨ̀nwùə̀ nɨ ngwə̀ nshwəŋə̀. Nɨ̀ nwuunə̀ tsaʼa taʼà ŋwùə̀, nkɨ mbə nɨ àporə̀porə̀. Nẅùə̀ wa nɨ à wa nkòŋə̀ pə̀ənə̀ nkɨ mmə ŋŋâ àporə̀porə̀ la â pə pɨghə pɨ pobə.

¹²Nɨ̀ kampə̀ mbɨ̀ŋmə̀ ɨ̀zɨghə pɨghə nɨ pɨghə nɨ ntɨŋmə̀ ghu laanə̀nə.

¹³Pànə̀ pɨ Nẅùə̀ pɨ̀tsùmə̀ pə̀ nchàʼtə̀ a wɨghə.

¹⁴Àpòŋə̀ ntɨŋmə̀ Ndòʼnə̀mbyə̂ Yěsû Kristù, pobə ɨ̀kòŋnə̀ Nẅùə̀ nɨ Àzhwùə̀ Nẅùə̀ za nɨ a pwuutə̀nə a wəənə̀ pɨ̀tsùmə̀ la pə pɨghə pɨ pobə.