Read Pinyin 2 Korìntə̀ 2 Bible Online

2 Korìntə̀ 2 - Pinyin bible

2 Korìntə̀ 2

¹Tsaʼnə a pənə lə la, ǹnùŋə̀ amwuə ntɨŋmə̀ mə̀ lo ka mbə chi tô karə̀ mə̀ a wɨghə a nɨ ghɨ̀rə̀ nɨ̀ kẅirə̀ mbə nɨ àsòmnə̀.

²Ǹtə pəla ngɨ̀rə̀ lo nɨ̀ sòmnə̀, ɨ̀wə̌ a tyiʼə̀ mbə ghu a nɨ ghɨ̀rə̀ lo n̂gaʼà? Ndàŋə̀ e wɨghə wa nɨ ǹgɨ̀rə̀nə lo nɨ̀ pə nɨ àsòmnə̀ la.

³Ndə̀ ŋwàʼnə̀ àŋwàʼnə̀ za ambo pɨghə la ntiinə ka ndə̀ tàʼà mə̀ a nɨ tô ntsirə̀ pànə̀ nɨ pobə pənə ghɨ̀rə̀ n̂gaʼà, pobə̂ tyiʼə̀ ngɨ̀rə̀ m̂bə pə nɨ àsòmnə̀. Ntiinə ǹzhyə̂ tyìʼə̀ ɨ̀shìʼnə̀ lo nkwùə̀ ɨ̀tsùmə̀ nɨ m̀bənə nɨ nɨ̀ghaʼà, pɨghə pɨ̀tsùmə̀ pa nkɨ mbə nɨ nɨ̀ghaʼà

⁴Ndə̀ ŋwàʼnə̀ àŋwàʼnə̀ za ambo pɨghə nɨ nchyə ɨ̀myə̂ pobə ntòmnə̀ amwuə ntɨŋmə̀ mə̀. Ka a pə e pə a nɨ ŋâ a wɨghə nɨ ngəʼə̀. A lə̀ pə pə a nɨ ghɨ̀rə̀ nɨ̀ zhyə̂ tsaʼnə ǹkòŋə̀nə a wɨghə pɨ̀tsùmə̀.

⁵Ŋònə̀ ɨ̀tse à tə pəla ngɨ̀rə̀ lo ŋwùə̀ wɨghə ɨ̀tse â sòmnə̀, yi ka à ghɨ̀rə̀ e la aŋunə mɨ̀ŋə̀. À ghɨ̀rə̀ pə aŋunə pɨghə pɨ̀tsùmə̀, la a chyə̂ pètə̀ a wɨghə pə pɨ̀mɨlyiʼə kə̀ tɨsɨŋnə. (Ǹshwəŋə̀ a lenə la ntiinə ka ǹtàʼà mə̀ a nɨ ghɨ̀rə̀ ngəʼə̀ ghu pə tsaʼa ɨ̀ noʼò tɨsɨŋnə).

⁶Ngəʼə̀ nɨ pànə̀ pɨ̀noʼnə chyânə aŋunə ze ɨ̀ kùʼnə̀ ambo ze.

⁷Njiilo mbə̀ʼə nɨ̀ lə̀ənə̀ ɨ̀fàntə̀ ɨ̀nwùə̀ ɨ̀pe, ngyèmpə̀ e mbə̀ʼə a kaŋə sòmnə̀ tɨsɨŋnə lə̀ənə̀ mbɨ̀ŋmə̀ e.

⁸M̀buʼù mbô ambo pɨghə lo nɨ̀ ghɨ̀rə̀ â zhyə̂ lo nɨ̀ tsùŋə̀ nkòŋə̀ e.

⁹Lə̌ ɨ̀sùmə ànwùə̀ nɨ ndə̀ ŋwàʼnə̀nə àŋwàʼnə̀ zə̀ ambo pɨghə la. Ndə̀ ŋwàʼnə̀ a zèrə la a nɨ zhwiʼì a wɨghə zəənə̀ lo nɨ̀ wa ndanə ndzuʼnə̀ mɨ̀nwùə̀ nɨ ngwa ntəətə̀ a wɨghə nɨ mèrə nkwùə̀ ɨ̀tsùmə̀ lo.

¹⁰Nɨ̀ tə lə̀ənə̀ àfàntə̀ ànwùə̀ nɨ ŋwùə̀ à ghɨ̀rə̀nə, nkɨ ndə̀ənə̀ àzâ. Ǹtə pəla ndə̀ənə̀ àfàntə̀ ànwùə̀ ŋònə̀ ɨ̀tse, mbə̀ʼə a nɨ nɨ mbə nkǔŋə nkuŋə lo ǹchyə̂ a nɨ lə̀ənə̀ àfàntə̀ ànwùə̀ ŋwùə̀, yi mbɨ ghɨ̀rə̀ a lenə a mbyə̀ Kristù la ntii wɨghə,

¹¹ngɨ̀rə̀ a lenə mbə̀ʼə Satàanə̀ a kaŋə tsàarə̀ a àzhìʼtə̀ àzəənə̀ ntiinə pə̀ənə̀ zhyə̂nə ɨ̀kwàŋə̀ tɨ̀pòŋə̀ ɨ̀pe.

¹²Nkwùə̀ nɨ ndə̀ tônə a àlaʼà Troas a nɨ chwìitə̀ ntwuumə̀ ghù ɨ̀shìʼnə̀ wa mbə̀ʼə Kristù la, ndə̀ zəənə̀ lo Ndòʼnə̀mbyə̂ a lə̀ nyaʼkə̀ àlàŋə ambo mɨ̀ŋə̀ aŋunə àfàʼà nɨ a lə̀ pənə ghu.

¹³La ndə̀ pə nɨ ntòmnə̀ ntiinə ka ndə̀ zəənə̀ mə̀ a ndyimə mə̀ Titus. Lenəla, ndàʼnə̀ pànə̀ nɨ pɨ lə̀ pənə ghu ntyiʼə̀ ndèrə̀ a Màsèdonyà.

¹⁴Ŋ̀ŋâ a mɨyàa ambo Nẅùə̀ wa nɨ à wa ngɨ̀rə̀ nkwùə̀ ntsùmə̀ lo pə̀ənə̀ yìinə̀ pə̀ənə̀ pɨ Kristù nɨ à zɨghə̀nə ntsòo. Nẅùə̀ a wa ndòo a wəənə̀ ngɨ̀rə̀ lo pə̀ənə̀ sìimə̀ ntwuumə̀ ghù ɨ̀shìʼnə̀ wa mbə̀ʼə Kristù a ɨlyiʼə ɨ̀tsùmə̀ tsaʼa àzwuumə̀ àzhyǎ yè ɨ̀shìʼnə̀.

¹⁵Mbə̀ʼnə pə̀ənə̀ la àzwuumə̀ àzhyǎ yè ɨ̀shìʼnə̀ za nɨ Kristù a ŋânə ambo Nẅùə̀, a tyiʼə̀ mmə nsìimə̀ ndèrə̀ ambo pànə̀ nɨ pɨ chwarə̀nə pobə pyə̀ nɨ pɨ pînə.

¹⁶Ambo pànə̀ nɨ pobə pînə, a àzhyǎ tɨ̀pòŋə̀ za nɨ a zhwuutə̀nə. La ambo pànə̀ nɨ pobə chwarə̀nə, a àzwuumə̀ àzhyǎ yè ɨ̀shìʼnə̀ za nɨ a za tônə nɨ nɨ̀chyə̂mbyə̂. Tsaʼnə a pənə lə la, ɨ̀wə̌ a kùʼnə̀ aŋunə mbuurə̀ ɨ̀fàʼà pèrə pə.

¹⁷Ka pəə pə wəə tsaʼa pànə̀ pɨ̀noʼnə nɨ pobə lòonə àshwəŋnə̀ Nẅùə̀ pə tsaʼa àzwuumə̀ mɨ̀tàanə. La tsaʼnə Nẅùə̀ a lə̀ twuumə̀nə a wəə la, pəə shwəŋə̀ pə a nkǔŋə nkuŋə a mbyə̀ ze tsaʼa ngàŋə àfàʼà Kristù.