Read Pinyin 2 Korìntə̀ 3 Bible Online

2 Korìntə̀ 3 - Pinyin bible

2 Korìntə̀ 3

¹A chyə̂ lə lo pəə pə nchi mbyiimə̀ àfàʼà àzəə pəə nɨ pəə? Kə̀ a pə lə lo pəə tàʼà ɨ̀ŋwàʼnə̀ nɨ tônə kə̀ nfurə̀ ambo pɨghə mbyiimə̀ àfàʼà àzəə tsaʼa pɨ̀tse pànə̀?

²Pɨghə àtwuə̀ ɨ̀pɨ̀ŋmə̀ àzɨghə nɨ̀ chyə̂ mbə la ɨ̀ŋwàʼnə̀ pɨ̀ghu nɨ pɨ ŋwàʼnə̀nə amwuə mɨ̀ntɨŋmə̀ ɨ̀məə, lo pànə̀ pɨ̀tsùmə̀ zhyə̂ nkɨ nfuŋə̀.

³A zə̀ nnèrə̀ ɨ̀shìʼnə̀ ambo ŋwùə̀ mɨsoŋə a nɨ zəənə̀ lo nɨ̀ chyə̂ mbə la àŋwàʼnə̀ nɨ a furə̀nə ambo Kristù nɨ pəə ŋânə. Ka pɨ̀ ŋwàʼnə̀ e àŋwàʼnə̀ zə̀ pə nɨ nɨkoŋə nɨ àŋwàʼnə̀ la pɨ ŋwàʼnə̀ pə nɨ Àzhwùə̀ Nẅùə̀ wa nɨ à pənə ghù ntɨ̀ŋnə̀. Ka pɨ̀ ŋwàʼnə̀ e pə aŋunə ɨ̀pàpə̀ mɨ̀ghòorə, la pɨ ŋwàʼnə̀ pə aŋunə mɨ̀ntɨŋmə̀ pànə̀ pɨ mɨsoŋə.

⁴Pəə shwəŋə̀ a lenə la ntiinə pəə nùŋə̀nə ntɨŋmə̀ ɨ̀wəə tyìʼə̀ nkǔŋə nkuŋə aŋunə Nẅùə̀ ndàŋə̀ la a ndzùmə̀ Kristù.

⁵Ka pəə shwəŋə̀ a wəə pə lo pəə pə nɨ ɨ̀tɨ̀ŋnə̀ a nɨ ghɨ̀rə̀ ànwùə̀ àtse, à ghɨ̀rə̀ Nẅùə̀ pəə zhyə̂ a nɨ fàʼà ɨ̀fàʼà pèrə pə.

⁶À ghɨ̀rə̀ Nẅùə̀ lo pəə kùʼnə̀ a nɨ pə ngàŋə àfàʼà amwuə ɨ̀kàanə̀ yɨ̀ shwuə̀. Ka à ghɨ̀rə̀ e a lenə la ntii mbòomə ɨ̀tse. À ghɨ̀rə̀ a lenə la ntii Àzhwùə̀. Mbòomə à wa nzhwuutə̀ a ŋwùə̀ mɨsoŋə, la Àzhwùə̀ a mə ŋŋâ a nɨ̀chyə̂mbyə̂.

⁷A tə mbə lo ɨ̀kàanə̀ wa nɨ ɨ lòonə a nɨ̀wɨghə̀ ntô nɨ pɨ lə̀ ŋwàʼnə̀nə àtwuə̀ mɨ̀ghòorə ɨ pə ntsìinə̀ tɨsɨŋnə amwuə ndwuumə̀ nɨ mbə̀ʼə ka pànə̀ pɨ Israel lə̀ zhyə̂ a ghobə a nɨ naŋə̀ ɨ̀sɨghə̀ Mǔsî, mbaa pə tsaʼnə ka ɨ lə̀ chi mmə tsìinə̀ e ɨ̀shìʼnə̀ la,

⁸mbə̀ʼə ka nɨ̀tsìinə̀ ɨ̀kàanə̀ nɨ à pənə àfàʼà Àzhwùə̀ Nẅùə̀ la a tsìinə̀ e ntsàarə̀?

⁹A tə mbə lo ɨ̀kàanə̀ wa nɨ ɨ wa nchyâ ɨ̀sàʼa aŋunə pə̀ənə̀ la lə̀ pə ntsìinə̀, nɨ̀tsìinə̀ ɨ̀kàanə̀ wa nɨ ɨ wa ngɨ̀rə̀ mɨ̀nwùə̀ mɨ pànə̀ təəmə̀ la lə̀ ka tsìinə̀ e tsàarə̀?

¹⁰Pə̀ənə̀ tyiʼə̀ nshwəŋə̀ tɨ̀tsòŋə̀ lo nɨ̀tsìinə̀ ɨ̀kàanə̀ wa nɨ pə̀ənə̀ pənə amwuə ẅèrə tɨ̀tsòŋə̀ la à ghɨ̀rə̀ mə lo nɨ̀tsìinə̀ yɨ̀ ntsàambyə̀ wa à tyiʼə̀ àfǐfǐ.

¹¹A tə mbə lo àzwuumə̀ za nɨ ka a ghoŋə̀ e nɨ nkuŋə̀ a lə̀ mə ntsìinə̀, yi àzwuumə̀ za nɨ a ghoŋə̀nə nɨ nkuŋə̀ la a ka tsìinə̀ e tsàarə̀?

¹²Lenəla, tsaʼnə a pənə ànwùə̀ nɨ pə̀ənə̀ nùŋə̀ ntɨŋmə̀ ɨ̀wə̀ənə̀ aŋunə tə mbyabə̀ la, pə̀ənə̌ chwìitə̀ tɨ àkẅàrə̀.

¹³Ka pəə pə wəə tsaʼa Mǔsî nɨ à lə̀ lòonə atsəʼə nkẅupə̀ ɨ̀sɨghə̀ e ghu lo kò pànə̀ pɨ Israel zəənə̀ a ghobə lo nɨ̀tsìinə̀ wa a wə̀ mborə̀ ndèrə̀.

¹⁴Lenəla, pɨ lə̀ fɨ̀ŋnə̀ ɨ̀zhìʼtə̀ ɨ̀pobə tə ntô mbyàa sìnə̀ wə̀. Pɨ tə mə nfuŋə̀ àŋwàʼnə̀ ɨ̀kàanə̀ yɨ̀ lwùnə̀, atsəʼə ghu a kɨ mbirə̀ nnàanə̀ e ɨ̀zhìʼtə̀ ɨ̀pobə nàanə̀nə, ntiinə mbə̀ʼə pɨ kɨ ndàŋə̀ e pə a ndzùmə̀ Kristù ntsoʼò atsəʼə zə̀.

¹⁵Ee, mbyàa pə sìnə̀, pɨ tə mə nfuŋə̀ àŋwàʼnə̀ pɨ̀mbòomə pɨ Mǔsî, atsəʼə ghu a kɨ mbirə̀ nkẅupə̀ e ɨ̀zhìʼtə̀ ɨ̀pobə kẅupə̀nə.

¹⁶La nkwùə̀ nɨ ŋwùə̀ a pə̀ŋə̀nə nnùŋə̀ ntɨŋmə̀ e aŋunə Ndòʼnə̀mbyə̂, atsəʼə ghu a tsoʼnə̀ a ɨ̀sɨghə̀ ze.

¹⁷Tɨ̀tsòŋə̀, Ndòʼnə̀mbyə̂ nɨ à shwəŋə̀nə la a Àzhwùə̀ Nẅùə̀. Ŋwùə̀ ntsùmə̀ nɨ Àzhwùə̀ Ndòʼnə̀mbyə̂ a pənə aŋunə ze ka à pirə̀ e àpùʼù.

¹⁸Pə̀ənə̀ pɨ̀tsùmə̀ nɨ pə̀ənə̀ tsoʼò mə atsəʼə za a ɨ̀sɨghə̀ pə̀ənə̀ ngwaʼà, nɨ̀tsìinə̀ Ndòʼnə̀mbyə̂ a tyiʼə̀ nkyàʼà a ɨ̀sɨghə̀ pə̀ənə̀ ngɨ̀rə̀ pə̀ənə̀ tyiʼə̀ ndzəənə̀ a nɨ̀tsìinə̀ Ndòʼnə̀mbyə̂ wa nɨ à ghɨ̀rə̀nə pə̀ənə̀ kẅùə̀ amwuə nɨ̀tsìinə̀ ghu mbə̀ŋə̀ ntyiʼə̀ tsaʼa ze. Zèrə zə ànwùə̀ a furə̀ tyìʼə̀ ambo Ndòʼnə̀mbyə̂ wa nɨ à pənə Àzhwùə̀ la.