Read Pinyin 2 Korìntə̀ 4 Bible Online

2 Korìntə̀ 4 - Pinyin bible

2 Korìntə̀ 4

¹Tsaʼnə Nẅùə̀ à koorə̀nə mɨ̀lɨŋə̀ ɨ̀məənə̀ ŋŋâ àfàʼà zə̀ lo pəə fàʼà la, ka mɨ̀ntɨŋmə̀ ɨ̀məə chi mborə̀ e.

²Pəə twuunə̀ a wəə ɨ̀nwùə̀ ɨ̀sɨŋnə̀ ɨ̀tsùmə̀ nɨ pɨ pa ngɨ̀rə̀ pə a nɨ̀lə̀əmənə la. Ka pəə mə ngɨ̀rə̀ a wəə ɨ̀nwùə̀ mɨ̀fɨ̀ghə̀, ka kɨ mə kẅebə̀ a wəə ànwùə̀ Nẅùə̀. La pəə pa nshwəŋə̀ a wəə pə a nkǔŋə nkuŋə nɨ à pètə̀nə mɨ̀ntɨŋmə̀ ɨ̀mobə ngɨ̀rə̀ pobə pyiimə̀ ànwùə̀ àzəə a ɨ̀myə̂ Nẅùə̀.

³Pɨ tə pəla ndə̀əmə̀ ntwuumə̀ ghù ɨ̀shìʼnə̀ wa nɨ pəə pa nchwìitə̀ la, yi pɨ lə̀əmə̀ pə ambo pànə̀ nɨ pobə pə mbî ndèrə̀.

⁴Ntiinə ambo pobə, nẅùə̀ àtwuə̀ ɨ̀shyə̂ wə̀ a nàanə̀ mə mɨ̀ntɨŋmə̀ mɨ pànə̀ nɨ ka pobə nùŋə̀ a ghobə mɨ̀ntɨŋmə̀ ɨ̀mobə aŋunə Nẅùə̀ la lo kò pobə zəənə̀ a ghobə nkàʼà ntwuumə̀ ghù ɨ̀shìʼnə̀ mbə̀ʼə àghuʼtə̀ Kristù ẅùə̀ nɨ à pənə tsaʼa Nẅùə̀.

⁵Ngə̀ aŋunə ntwuumə̀ nɨ pəə pa nchwìitə̀, ka pəə chwìitə̀ a wəə pə mbə̀ʼə mbɨ̀ŋmə̀ ɨ̀zəə. Pəə pa nchwìitə̀ pə lo Yěsû Kristù a Ndòʼnə̀mbyə̂, pəə tyiʼə̀ mbə ngàŋə àfàʼà ɨ̀zɨghə ntii Yěsû.

⁶Mbə̀ʼnə à pənə Nẅùə̀ wa nɨ à lə̀ shwəŋə̀nə lo, “Nkàʼà ɨ̂ kyàʼà amwuə ndzùmə!” nɨ à ghɨ̀rə̀nə lo nkàʼà kyàʼà amwuə mɨ̀ntɨŋmə̀ ɨ̀məə. A ŋâ nkàʼà nɨ ɨ wa ngɨ̀rə̀ lo pəə zhyə̂ àghuʼtə̀ Nẅùə̀ za nɨ a za ntâ a ɨ̀sɨghə̀ Kristù la.

⁷La pəə nɨ pəə pənə nɨ ɨ̀pwuumə̀ pɨ tsə̂nə pə, pəə chyə̂ mbə la Mɨkɨŋə mɨ àpòomə, mbə̀ʼə nèrə̀ lo ɨ̀tɨ̀ŋnə̀ wa nɨ ɨ tsàarə̀nə mbô nɨ ɨ pənə amwuə ntwuumə̀ ghù ɨ̀shìʼnə̀ wa ka ɨ furə̀ e la ambo pəə. Ɨ furə̀ pə ambo Nẅùə̀.

⁸Pɨ ŋâ mə a wəə nɨ mbuurə̀ ngəʼə̀ ntsùmə̀ la ka mɨ̀ntɨŋmə̀ ɨ̀məə porə̀ e; ngɨ̀rə̀ ɨ̀twuə̀ ɨ̀pəə tsànkə̀ la ka ghɨ̀rə̀ e lo pəə myàʼtə̀;

⁹nnyàŋə̀ a wəə la ka Nẅùə̀ a waʼà e a wəə; ntsòo a wəə mmàʼà a ɨ̀shyə̂ la ka zhwuutə̀ e a wəə.

¹⁰Nkwùə̀ ɨ̀tsùmə̀ pəə pa mbìʼì a nɨ̀wɨghə̀ Kristù a mbɨ̀ŋmə̀ pəə mbə̀ʼə pɨ zəənə̀ a nɨ̀chyə̂mbyə̂ Kristù aŋunə mbɨ̀ŋmə̀ ɨ̀zəə.

¹¹Amwuə nɨ̀chyə̂mbyə̂ ɨ̀wəə nkwùə̀ ɨ̀tsùmə̀ pəə pa a ntswùə̀ nɨ̀wɨghə̀ ntii Yěsû, mbə̀ʼə pɨ̀ zəənə̀ a nɨ̀chyə̂mbyə̂ e aŋunə mbɨ̀ŋmə̀ ɨ̀zəə nɨ ɨ̀ ghǎ kwɨghə̀.

¹²Tsaʼnə a pənə a lenə la, pəə pa ntyiʼə̀ nchyə̂ la a ntswùə̀ nɨ̀wɨghə̀ mbə̀ʼə nɨ̀ chyə̂.

¹³Pɨ ŋwàʼnə̀ amwuə àŋwàʼnə̀ Nẅùə̀ lo, “Ndə̀ shwəŋə̀ ntiinə ndə̀ nùŋə̀nə ntɨŋmə̀ aŋunə Nẅùə̀.” A ndəŋə ndəŋə lo pəə kɨ mbə la nɨ mbuurə̀ àpyiimə̀ ntɨŋmə̀ ghu ntyiʼə̀ mə nshwəŋə̀ ntwuumə̀ ghù ɨ̀shìʼnə̀ wa.

¹⁴Pəə zhyə̂ lo Nẅùə̀ wa nɨ à lə̀ zhwuumə̀nə a Ndòʼnə̀mbyə̂ Yěsû la a ghǎ kɨ zhwuumə̀ a wəə pɨ Yěsû, lòo a wəə pəə tô nnwuunə̀ a mbyə̀ ze.

¹⁵Mèrə mə mɨ̀nwùə̀ chyə̂ la ntii wɨghə mbə̀ʼə àpòŋə̀ ntɨŋmə̀ Nẅùə̀ â sìimə̀ ambo pànə̀ pɨ̀noʼnə, mbə̀ʼə nɨ̀ŋâ a mɨyàa ambo Nẅùə̀ â noʼò nkɨ ntô nɨ àghuʼtə̀ ambo Nẅùə̀.

¹⁶Tsaʼnə a pənə lə la, mbə̀ʼə pəə chi mborə̀ a wəə nkwə̂ nɨ ndzùmə̀ apə̀. Mbaa pə tsaʼnə mbòbə̀ mbɨ̀ŋmə̀ ɨ̀zəə ɨ zə̀ mborə̀ nkwɨghə̀ ndèrə̀ la, Nẅùə̀ a kɨ mə ŋŋâ pə mɨ̀tɨ̀ŋnə̀ mɨ shwuə̀ njyə̂ ɨ̀tsùmə̀ ambo Àzhwùə̀ àzəə.

¹⁷Mɨlyiʼə ngəʼə̀ wə̀ nɨ pəə pə ndzəənə̀ aŋunə mətùmə nkwùə̀ lə ɨ̀ ghǎ tô nɨ àghuʼtə̀ za nɨ a lẅenə̀nə nkɨ ngoŋə̀ nɨ nkuŋə̀ amwuə nkwùə̀ za nɨ pəə pənə a mbyə̀ Nẅùə̀ la.

¹⁸Lenəla, ka pəə mə nnaŋə̀ a wəə pə ɨ̀pwuumə̀ pyə̀ nɨ pəə pa ndzəənə̀ nɨ ɨ̀myə̂ ɨ̀məə, la ntə̂ àtwuə̀ pə aŋunə pyə̀ nɨ ka pəə mə ndzəənə̀ a wəə. Ɨ̀pwuumə̀ pa nɨ pɨ pa ndzəənə̀ chyə̂ la aŋunə mətùmə nkwùə̀, la pyə̀ nɨ ka pɨ mə ndzəənə̀ e ghoŋə̀ nɨ nkuŋə.