Read Pinyin 2 Korìntə̀ 5 Bible Online

2 Korìntə̀ 5 - Pinyin bible

2 Korìntə̀ 5

¹Mbə̀ʼnə pəə zhyə̂nə lo pɨ tə shàʼtə̀ àzuŋə̀ zə̀ nɨ pə̀ənə̀ pə nchyə̂ amwuə a àtwuə̀ ɨ̀shyə̂ ghə̀ lə̀, yi pə̀ənə̌ pə nɨ ndâ a nɨ̀pwuurə̀ nɨ Nẅùə̀ ǎ ŋâ, a pə ndâ nɨ ka pɨ korə̀ e nɨ mbô, nkɨ ngoŋə̀ nɨ nkuŋə.

²Tɨ̀tsòŋə̀, pə̀ənə̀ pə ntswaamə̀ a chwèrə̀ amwuə ndâ zə̀ nɨ pə̀ənə̀ pə amwuə lə̀, ntyiʼə̀ mmə mbyabə̀ a nɨ pə nɨ ndâ ɨ̀zəənə̀ a nɨ̀pwuurə̀ nɨ ɨ̌ kẅupə̀ a wəənə̀,

³ntiinə nkwùə̀ nɨ ndâ ghu ɨ tə nkẅupə̀ a wəənə̀, pə̀ənə̀ chi mbə wəənə̀ nɨ ntǔmnə̀ apə̀.

⁴Tsaʼnə pə̀ənə̀ pirə̀nə amwuə àzuŋə̀ zə̀ la, pə̀ənə̀ pə ntswaamə̀ a chwèrə̀ mbə nɨ àsòmnə̀ ka pə e pə lo pə̀ənə̀ tàʼà a nɨ sòrə̀ atsəʼə zə nɨ pə̀ənə̀ ẅînə lə. Pə̀ənə̀ tàʼà pə lo ẅî a zhyə̀ za nɨ a furə̀nə a nɨ̀pwuurə̀ àtwuə̀ zèrə njiilo àzwuumə̀ nɨ a za nkwɨghə̀ a pə̀ŋə̀ ntyiʼə̀ mbə àzwuumə̀ nɨ a za nchyə̂ nɨ nkuŋə̀.

⁵Nẅùə̀ la ŋònə̀ nɨ à chwuʼtə̀nə a wəənə̀ aŋunə ànwùə̀ zèrə zə̀, ŋŋâ a wəənə̀ nɨ Àzhwùə̀ e a nɨ nèrə̀ lo kẅepə̀ ẅèrə wə̀ ǎ tô.

⁶Tsaʼnə a pənə a lenə la pə̀ənə̀ tyiʼə̀ mbə nɨ àẅìimə̀ ntɨŋmə̀ nkwùə̀ ɨ̀tsùmə̀. Pə̀ənə̀ zhyə̂ lo tsaʼnə pə̀ənə̀ pənə amwuə ndâ zə̀ nɨ ɨ̀ pənə mbòbə̀ mbɨ̀ŋmə̀ ɨ̀zə̀ənə̀ la, pə̀ənə̀ pa a ndyə̌ sàa pə̀ənə̀ pɨ Ndòʼnə̀mbyə̂,

⁷ntiinə pə̀ənə̀ zhyə̂nə lo mɨ̀nwùə̀ mə la nkǔŋə nkuŋə ntiinə pə̀ənə̀ pa nchyə̂ a nɨ̀chyə̂mbyə̂ ɨ̀wə̀ənə̀ ndàŋə̀ la a ndzùmə àpyiimə̀ ntɨŋmə̀ àzəənə̀, ka pə e pə ntii mɨ̀nwùə̀ nɨ pə̀ənə̀ pa ndzəənə̀.

⁸Pəə pə ngẅìimə̀ ntɨŋmə̀, mmə ngyìi a nɨ myàʼtə̀ mbɨ̀ŋmə̀ zə̀ ghə̀ pə a ɨmwuə alyiʼə pəə pɨ Ndòʼnə̀mbyə̂.

⁹La pə̀ənə̀ tə pə a ɨmwuə alyiʼə kə̀ a alyiʼə yè nyaanə, àtwuə̀ ànwùə̀ àzəənə̀ a chyə̂ pə a nɨ ghɨ̀rə̀ ànwùə̀ nɨ ǎ pə nɨ nɨ̀ghaʼà,

¹⁰ntiinə pə̀ənə̀ pɨ̀tsùmə̀ ghǎ təəmə̀ aŋunə nɨ̀ghòorə nɨ korə̀ nɨ Kristù kẅiirə̀ mɨ̀ntsoʼnə̀ mɨ àfàʼà ɨ̀məənə̀. Ŋwùə̀ ntsùmə̀ à ghǎ kẅiirə̀ ɨ̀pòŋə̀ kə̀ tɨ̀pòŋə̀ zùŋə̀ la aŋunə ànwùə̀ nɨ à lə̀ mənə nfàʼà amwuə mbɨ̀ŋmə̀ e.

¹¹Tsaʼnə pəə zhyə̂nə ànwùə̀ nɨ a pənə zèrə a nɨ pô Ndòʼnə̀mbyə̂ la, pəə̌ kɨ kyiitə̀ ghɨ̀rə̀ pɨ̀tse pànə̀ zhyə̂. Nẅùə̀ à zhyə̂ a wəə tyìʼə̀ ɨ̀shìʼnə̀, ǹkɨ nkwàŋə̀ lo nɨ̀ kɨ nzhyə̂ a wəə tyìʼə̀ ɨ̀shìʼnə̀ amwuə mɨ̀ntɨŋmə̀ ɨ̀mɨghə.

¹²Ka pəə chi mmə ntàʼà a wəə la a nɨ pyiimə̀ ànwùə̀ àzəə pəə nɨ pəə ambo pɨghə. Pəə tàʼà ghɨ̀rə̀ nɨ̀ zhyə̂ lo mbə̀ʼə nɨ̀ tsòo a ghàŋə̀ ɨwɨghə ntii wəə mbə̀ʼə kɨ zhyə̂ ndwuumə̀ nɨ nɨ̀ wa nkẅùə̀ àshwəŋnə̀ ambo pànə̀ pa nɨ pobə pa ntsòo pɨ̀ghàŋə̀ ɨ̀pobə amwuə ndwuumə̀ nɨ pobə pa ndzəənə̀ pə̀ənə̀ nɨ ɨ̀myə̂, ka pə e pə tsaʼnə mbòomə ɨghobə à pənə.

¹³Pəə tə pəla mbaarə̀ paarə̀nə, yi pəə paarə̀ la ntii Nẅùə̀. Pəə tə pəla ka paarə̀ a wəə, yi a chyə̂ a lenə la ntii wɨghə.

¹⁴Mbə̀ʼnə a wəə la à wa ndə̀ʼtə̀ e ɨ̀kòŋnə̀ Kristù, ntiinə pəə zhyə̂ lo taʼà ŋwùə̀ à lə̀ kwɨghə̀ àtwuə̀ nɨ pànə̀ pɨ̀tsùmə̀. Lenəla, a tyiʼə̀ mbə lo ŋwùə̀ ntsùmə̀ à lə̀ kwɨghə̀.

¹⁵À lə̀ kwɨghə̀ àtwuə̀ nɨ pànə̀ pɨ̀tsùmə̀ nɨ pobə pirə̀nə pɨ̀tɨ̀ŋnə̀ lo kò pobə chi nchyə̂ pə mbə̀ʼə mbɨ̀ŋmə̀ ɨ̀zobə, pobə̂ chyə̂ pə mbə̀ʼə ẅùə̀ wa nɨ à lə̀ kwɨghə̀nə àtwuə̀ nɨ pobə pɨ kɨ nchi nzhwuumə̀ e aŋunə nɨ̀wɨghə̀ la.

¹⁶A nɨ furə̀ tɨ̀tsòŋə̀ wə̀, ka pəə chi nnaŋə̀ a wəə a ŋònə̀ la tsaʼnə pànə̀ pɨ àtwuə̀ ɨ̀shyə̂ pa nnaŋə̀. Mbaa pə tsaʼnə a lə̀ pənə nkwùə̀ ɨ̀tse pə̀ənə̀ pə nnaŋə̀ a Kristù tsaʼa ŋwùə̀ mɨsoŋə la, ka pəə chi nnaŋə̀ a wəənə̀ a ye tɨ̀tsòŋə̀ a lenə.

¹⁷Lenəla, ŋwùə̀ ntsùmə̀ nɨ à pwuutə̀nə mbə pobə Kristù, à tyiʼə̀ ŋònə̀ shwuə̀. Nɨ̀chyə̂mbyə̂ yɨ̀ ndwùnə̀ à làŋə̀ mə, yɨ̀ shwuə̀ a tô.

¹⁸Mèrə mə mɨ̀nwùə̀ furə̀ la ambo Nẅùə̀ wa nɨ à lə̀ làŋə̀nə a ndzùmə̀ Yěsû Kristù ndòo a wəənə̀ ngɨ̀rə̀ pɨ̀swùə ɨ̀pe ghu, ntyiʼə̀ ŋŋâ àfàʼà ambo pə̀ənə̀ lo pə̀ənə̀ tyiʼə̀ mmə ngɨ̀rə̀ lo pɨ̀tse pànə̀ pə pɨ̀swùə ɨ̀pe;

¹⁹Nẅùə̀ à lə̀ làŋə̀ la a ndzùmə̀ Kristù nkẅirə̀ ndòo pànə̀ pɨ àtwuə̀ ɨ̀shyə̂ aŋunə pɨ̀swùə ɨ̀pe, ka chi naŋə̀ e ɨ̀nwùə̀ tɨ̀pòŋə̀ ɨ̀pobə la ntyiʼə̀ ŋŋâ a wəənə̀ nɨ ntwuumə̀ lo pə̀ənə̀ lòo pànə̀ ngɨ̀rə̀ pɨ̀swùə ɨ̀pe ghu.

²⁰Pə̀ənə̀ chyə̂ mbə la àtwuə̀ nɨ Kristù, Nẅùə̀ a tyiʼə̀ ndàŋə̀ a ndzùmə̀ pəə nshwəŋnə̀ ambo pə̀ənə̀. Pəə puʼù mbô ambo pɨghə aŋunə nɨ̀linə̀ nɨ Kristù lo nɨ̀ pə̀ŋə̀ ntyiʼə̀ pɨ̀swùə pɨ Nẅùə̀.

²¹Mbə̀ʼnə Nẅùə̀ à lə̀ ghɨ̀rə̀ Kristù wa nɨ ka à lə̀ ghɨ̀rə̀ e a tɨ̀pòŋə̀ la a tyiʼə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀ ntii wəənə̀, mbə̀ʼə pə̀ənə̀ tyiʼə̀ mbwuutə̀ pə̀ənə̀ pɨ Kristù mɨ̀nwùə̀ ɨ̀məənə̀ təəmə̀ a mbyə̀ Nẅùə̀.