Read Pinyin 2 Korìntə̀ 6 Bible Online

2 Korìntə̀ 6 - Pinyin bible

2 Korìntə̀ 6

¹Tsaʼa pànə̀ nɨ pobə pa nfàʼà pobə pɨ Nẅùə̀, pəə pə mbuʼù mbô ambo pɨghə lo kò nɨ̀ ghɨ̀rə̀ àpòŋə̀ ntɨŋmə̀ Nẅùə̀ za nɨ à ŋânə ambo pɨghə a lèrə̀ àfǐfǐ.

²Mbə̀ʼnə Nẅùə̀ à shwəŋə̀nə lo, “Ndə̀ zuʼù o amwuə ngotə nkwùə̀, ndə̀ yèmpə̀ o aŋunə njyə̂ za a nɨ chwarə̀ o amwuə ngəʼə̀.” Nɨ̀ zhwiʼtə̀, lə̌ nkwùə̀ ghu nɨ ɨ̀ kùʼnə̀nə ambo Nẅùə̀ a nɨ yèmpə̀ a wɨghə. Lə̌ njyə̂ ghu nɨ Nẅùə̀ à pɨ chwarə̀ a wɨghə ɨ̀ zə̀ lə.

³Ka pəə nùŋə̀ a wəə a kɨ̀lə̀ʼə̀ amwuə àlàŋə ŋònə̀ ɨ̀tse, njiilo kò ŋònə̀ a ŋâ e ɨ̀fèrə amwuə àfàʼà àzəə.

⁴La aŋunə mɨ̀nwùə̀ mɨ̀tsùmə̀ nɨ pəə pa ngɨ̀rə̀, pəə pa nnèrə̀ ɨ̀pɨ̀ŋmə̀ ɨ̀wəə tsaʼa ngàŋə àfàʼà Nẅùə̀. Pəə pa ngẅìimə̀ ntɨŋmə̀ amwuə ntòmnə̀ nɨ ngəʼə̀, farə amwuə mɨ̀tse mɨ̀nwùə̀ mɨ̀tɨ̀ŋnə̀.

⁵Pɨ lə̀ puʼù a wəə nkwùə̀ noʼnə, nchyâ a wəə a ɨ̀tsaŋə̀ nkwùə̀ noʼnə, nkɨ nkyiinə̀ nzhwàʼà ɨlyiʼə ntii wəə. Pɨ ghɨ̀rə̀ pəə tsòo mbɨ̀ŋmə̀ ɨ̀zəə nɨ ɨ̀fàʼà ndyə̂ a nɨ̀lyìinə̀, ka pə wəə nɨ àzwuumə̀ nɨ mbə̀ʼə pəə zɨghə̀.

⁶Ɨ̀nwùə̀ pèrə pə kɨ nnèrə̀ ambo pànə̀ lo pəə la ngàŋə àfàʼà Nẅùə̀ tsaʼnə mbòomə ɨ̀wəə a lə̀ laanə̀nə, pəə kɨ nzhyə̂ a nkǔŋə nkuŋə nɨ à pənə amwuə ntwuumə̀ ghù ɨ̀shìʼnə̀ wa ngẅìimə̀ mɨ̀ntɨŋmə̀ ɨ̀məə, ngɨ̀rə̀ mɨ̀nwùə̀ mɨ ɨ̀shìʼnə̀ aŋunə pə̀ənə̀, nkɨ mbə nɨ Àzhwùə̀ Nẅùə̀ pobə ngotə ɨ̀kòŋnə̀.

⁷Pəə shwəŋə̀ pə a nkǔŋə nkuŋə, mbə nɨ ɨ̀tɨ̀ŋnə̀ Nẅùə̀, ntwuʼtə̀ ɨ̀pwuumə̀ ntsòo pɨ mɨ̀nwùə̀ mɨ təəmə̀nə a àpô yè zɨghə̀nə pobə yè kẅàbə̀.

⁸Pànə̀ pa nguʼtə̀ a wəə, pɨ̀tse pə ngwâ a wəə nshwəŋə̀ ɨ̀nwùə̀ tɨ̀pòŋə̀ pobə pɨ ɨ̀shìʼnə̀ àtwuə̀ pəə. Pɨ naŋə̀ a wəə tsaʼa ngàŋə pɨ̀chwìrə̀, la pəə pə nshwəŋə̀ pə a nkǔŋə nkuŋə.

⁹Pànə̀ zhyə̂ a wəə la nnaŋə̀ a wəə tsaʼa ka pɨ zhyə̂ e a wəə; mbə tsaʼa ɨ̀kwuə̀ pə̀ənə̀, la nɨ̀ mə ndzəənə̀ a wəə pəə kɨ mmə nchyə̂ a wəə tyìʼə̀ chyə̂nə. Mbaa pə tsaʼnə pɨ mənə ntòmnə̀ a wəə la, ka pɨ mə nzhwuutə̀ e a wəə;

¹⁰Pɨ lə̀ patə ngɨ̀rə̀ pəə sòmnə̀ sòmnə̀nə la, pəə kɨ mbə pə nɨ nɨ̀ghaʼà nkwùə̀ ɨ̀tsùmə̀; pəə pə tsaʼa ngàŋə àfumə̀, la ngɨ̀rə̀ pànə̀ pɨ̀noʼnə pə nɨ nkabə̀; mbə tsaʼa pànə̀ nɨ ka pobə pə a ghobə nɨ àzwuumə̀, la mbə nɨ ɨ̀pwuumə̀ ɨ̀tsùmə̀.

¹¹Pɨ̀swùə ɨ̀pəə pànə̀ pɨ Korìntə̀, pəə lanə nshwəŋnə̀ ambo pɨghə a sàŋə̀ sàŋə̀ nkɨ nnyaʼkə̀ mɨ̀ntɨŋmə̀ ɨ̀məə ŋŋâ ambo pɨghə.

¹²Ka pəə kẅupə̀ a wəə mɨ̀ntɨŋmə̀ ɨ̀məə ambo pɨghə, la kẅupə̀ e pɨghə nkẅupə̀ mɨ̀ntɨŋmə̀ ɨ̀mɨghə ambo pəə.

¹³Ǹtyiʼə̀ nshwəŋnə̀ ambo pɨghə tɨ̀tsòŋə̀ la tsaʼa ŋwùə̀ a shwəŋnə̀ ambo ɨ̀poonə̀ ɨ̀pe. Nɨ̂ kɨ nnyaʼkə̀ mɨ̀ntɨŋmə̀ ɨ̀mɨghə.

¹⁴Kò nɨ̀ kɨ mbwuutə̀ nfàʼà a wɨghə pɨghə pɨ̀tɨ̀pyiimə̀ a Nẅùə̀. Ànwùə̀ yè ɨ̀shìʼnə̀ pobə yè tɨ̀pòŋə̀ a pwuutə̀ lə ɨla ghu? Kə̀ nkaʼà pobə ndzùmə pwuutə̀ lə ɨla ghu?

¹⁵Mbə̀ʼə Kristù pobə devə̀lə̀ shwəŋnə̀ ndzuʼnə̀ lə ɨla ghu? Ŋònə̀ nɨ à nùŋə̀nə ntɨŋmə̀ e aŋunə Kristù a chyə̂ nɨ àkə a nɨ ghɨ̀rə̀ pobə ŋònə̀ nɨ ka à nùŋə̀ e ntɨŋmə̀ e aŋunə Kristù?

¹⁶Mbə̀ʼə Ndâ Mɨ̀shwàʼà Nẅùə̀ pə nɨ ànwùə̀ àtse pobə pɨ̀tɨtoo? Pə̀ənə̀ la Ndâ Mɨ̀shwàʼà Nẅùə̀ wa nɨ à wə̀ nchyə̂ la; Tsaʼnə Nẅùə̀ àtwuə̀ ɨ̀pɨ̀ŋmə̀ e à shwəŋə̀nə lo, 1 “Mbɨ chyə̂ amwuə pə̀ənə̀ ɨ̀pâ mmə yìinə̀ amwuə pobə. Mbɨ pə Nẅùə̀ ɨghobə, pobə̂ kɨ mbə pə̀ənə̀ ɨ̀pâ.”

¹⁷Lenəla, Ndòʼnə̀mbyə̂ à shwəŋə̀ lo, “Nɨ̀ furə̀ amwuə pobə kò nɨ̀ chi nchyə̂ pɨghə pɨ pobə. Kò nɨ pə a wɨghə nɨ ànwùə̀ a nɨ ghɨ̀rə̀ pɨghə pɨ àzwuumə̀ nɨ ka a laanə̀ e; lenəla yi mbɨ kẅiirə̀ a wɨghə.

¹⁸Mbɨ tyiʼə̀ pə tǎ ɨwɨghə, nɨ kɨ mbə ɨ̀poonə̀ ɨ̀pâ pɨ mbyàŋnə̀ pobə pɨ pə̀ngyə̌, la shwəŋə̀ Ndòʼnə̀mbyə̂ Àkoʼntsirə̀.”