Read Pinyin 2 Korìntə̀ 7 Bible Online

2 Korìntə̀ 7 - Pinyin bible

2 Korìntə̀ 7

¹Tsaʼnə ɨ̀nwùə̀ pèrə pə̀ ɨ̀tsùmə̀ nɨ Nẅùə̀ à kàʼnə chyə̂nə ambo pə̀ənə̀ la nɨ pɨ̀swùə ɨ̀pâ, pə̀ənə̀ sùu mbɨ̀ŋmə̀ ɨ̀zəənə̀ laanə̀ aŋunə ntsɨ̀ŋnə ɨ̀tsùmə̀ nɨ za ntsə̀ŋə̀ mbɨ̀ŋmə̀ ɨ̀zəənə̀ pobə ɨ̀zhwùə̀ ɨ̀pə̀ənə̀, njiilo pə̀ənə̀ laanə̀ mmyàanə̀ mbə nɨ àkẅàrə̀ Nẅùə̀.

²Nɨ̀ nyaʼkə̀ mɨ̀ntɨŋmə̀ ɨ̀mɨghə ŋŋâ ambo pəə; ka pəə wɨ̀ghə̀ a wəə ànwùə̀ àtse ambo ŋònə̀ ɨ̀tse, ka ghùbrə̀ a wəə àzwuumə̀ ŋònə̀ ɨ̀tse, ka kɨ kẅiirə̀ a wəə àzwuumə̀ ŋònə̀ ɨ̀tse nɨ mɨ̀tɨ̀ŋnə̀.

³Ka m̀mə nshwəŋə̀ mə̀ la a nɨ ŋâ ɨ̀fèrə ɨ̀wɨghə, ntiinə ndə̀ pyə̀ mə nshwəŋə̀ ambo pɨghə lo nɨ̀ wa amwuə mɨ̀ntɨŋmə̀ ɨ̀məə amwuə ndwuumə̀ nɨ mbə̀ʼə ka àzwuumə̀ àtse a ghàbə̀ e a wəənə̀, kə̀ a pə nɨ̀chyə̂ ntɨ̀ŋnə̀ kə̀ nɨ̀wɨghə̀.

⁴Ǹdanə nnùŋə̀ ntɨŋmə̀ aŋunə pɨghə nkɨ mmə ntsòo a ghàŋə̀ ntii wɨghə; mbə̀ʼnə amwuə mɨ̀ngəʼə̀ ɨ̀məənə̀ mɨ̀tsùmə̀, ngwə̀ nɨ ntɨŋmə̀ ghu ɨ̀tɨ̀ŋnə̀, ka nɨ̀ghaʼà mə̀ a kɨ mbə e nɨ àndànə̀.

⁵Nkwùə̀ nɨ pəə lə̀ kwuunə̀nə a Màsèdonyà, ka pəə lə̀ zhwùutə̀ a wəə tyìʼə̀ pɨ̀mɨlyiʼə. Ngəʼə̀ ɨ̀ tô aŋunə pəə nfurə̀ a pɨ̀pàa pɨ̀pàa; pəə zòŋnə̀ pəə pɨ pə̀ənə̀ a àpyìinə, nkɨ mbə nɨ àkẅàrə̀ amwuə pəə.

⁶La Nẅùə̀ nɨ à wa ndə̀ʼtə̀ mɨ̀ntɨŋmə̀ mɨ pànə̀ nɨ pobə pa nsòmnə̀, à lə̀ʼtə̀ mɨ̀ntɨŋmə̀ ɨ̀məə tsaʼnə à lə̀ tsàanə a Titus a tô.

⁷Ka a lə̀ pə e la ntiinə Titus à lə̀ tônə ndàʼà, a lə̀ kɨ mbə ntiinə nɨ̀ lə̀ pənə mmə mbyatə̀ e. À lə̀ tiitə̀ a wəə tsaʼnə nɨ̀ lə̀ mə ngyìi a nɨ zəənə̀ mə̀, tsaʼnə nɨ̀ lə̀ kɨnə mmə nsòmnə̀ mbə̀ʼə ànwùə̀ nɨ a lə̀ làŋə̀nə, tsaʼnə nɨ̀ lə̀ mənə ndzòŋnə̀ mbə̀ʼə mə̀; njiilo nɨ̀ghaʼà mə̀ à lèrə̀ nɨ mbyə̀.

⁸Ndə̀ pə la ghɨ̀rə̀ lo nɨ̀ pə nɨ àsòmnə̀ amwuə àŋwàʼnə̀ nɨ ndə̀ tsàanə ambo pɨghə yi ka a lə̀ pɨ̂ e a gha, la a lə̀ pɨ̂ mə̀ tyìʼə̀ pɨ̀mɨlyiʼə. Ǹdzəənə̀ lo àŋwàʼnə̀ ghu a lə̀ ghɨ̀rə̀ nɨ̀ sòmnə̀, la nsòmnə̀ pə aŋunə mətùmə nkwùə̀.

⁹La tɨ̀tsòŋə̀, ngwə̀ ngaʼà; ka ghaʼà mə̀ pə lo ndə̀ ghɨ̀rə̀ nɨ̀ sòmnə̀, ngaʼà pə ntiinə àsòmnə̀ àzɨghə yèghu a lə̀ ghɨ̀rə̀ nɨ̀ kẅebə̀ ɨ̀làŋə tɨ̀pòŋə̀ ɨ̀pɨghə. Nẅùə̀ à lə̀ pètə̀ a wɨghə amwuə àsòmnə̀ àzɨghə zə, lenəla ka pəə lə̀ ghɨ̀rə̀ a wəə ànwùə̀ tɨ̀pòŋə̀ àtse aŋunə pɨghə,

¹⁰ntiinə ŋwùə̀ à tə mmə nsòmnə̀ amwuə àlàŋə nɨ Nẅùə̀ à tàʼnə, yi ǎ ghɨ̀rə̀ a pə̀ŋə̀ ntɨŋmə̀ e nchwarə̀. Lenəla, ka zèrə za àsòmnə̀ a pɨ̂ e. La ŋwùə̀ à tə mmə nsòmnə̀ pə amwuə ndwuumə̀ nɨ pànə̀ pɨ àtwuə̀ ɨ̀shyə̂ pa nsòmnə̀, yi zèrə za ǎ lòo a nɨ̀wɨghə̀ tô.

¹¹Nɨ̂ zəənə̀ tsaʼnə Nẅùə̀ à ghɨ̀rə̀nə nɨ àsòmnə̀ àzɨghə zèrə zə: nɨ̀ zəənə̀ tsaʼnə à ghɨ̀rə̀nə nɨ̀ shwəŋə̀ a nkǔŋə nkuŋə, ndzəənə̀ tsaʼnə nɨ̀ pa ndanə nnèrə̀ lo ka nɨ̀ lə̀ ghɨ̀rə̀ a wɨghə a tɨ̀pòŋə̀, ndzəənə̀ tsaʼnə ànwùə̀ ghu a lə̀ pənə ndzaŋə̀ a wɨghə, ndzəənə̀ tsaʼnə nɨ̀ lə̀ pənə mbô, ndzəənə̀ tsaʼnə nɨ̀ lə̀ chwuʼtə̀nə mbɨ̀ŋmə̀ a nɨ fàʼà, ndzəənə̀ tsaʼnə nɨ̀ twuʼtə̀nə ntɨŋmə̀ aŋunə pɨ̀tse pə̀ənə̀, ndzəənə̀ tsaʼnə nɨ̀ twuʼtə̀nə ntɨŋmə̀ a nɨ chyâ ngəʼə̀ aŋunə ŋwùə̀ nɨ a ghɨ̀rə̀nə tɨ̀pòŋə̀. Nɨ̀ nèrə̀ mə amwuə ɨ̀làŋə ɨ̀tsùmə̀ lo ka nɨ̀ zhyə̂ a wɨghə ànwùə̀ àtse amwuə ɨ̀sàʼa ghu.

¹²Ndə̀ patə ŋŋwàʼnə̀ pə àŋwàʼnə̀ zə̀ ambo pɨghə la, ka a lə̀ pə e la ntii ŋònə̀ nɨ à lə̀ mənə ngɨ̀rə̀ a tɨ̀pòŋə̀ ghu, kə̀ ŋònə̀ wa nɨ pɨ lə̀ mənə ngɨ̀rə̀ a tɨ̀pòŋə̀ aŋunə ze. A lə̀ pə a nɨ nèrə̀ nɨ̀ zhyə̂ a mbyə̀ Nẅùə̀ lo nɨ̀ chyə̂ mbə la pànə̀ nɨ pobə pa ntsùŋə̀ nkòŋə̀ a wəə.

¹³Lenəla, pəə lə̀ tyiʼə̀ mbə nɨ nɨ̀ghaʼà. Nɨ̀ghaʼà wə̀ nɨ pəə lə̀ pənə nɨ ẅèrə a lə̀ kẅìʼnə̀ ntii nɨ̀tô Titus nɨ a lə̀ tônə nkẅìʼnə̀ a nɨ̀ghaʼà ɨ̀wəə. Pɨghə pɨ̀tsùmə̀ tyiʼə̀ ngɨ̀rə̀ ntɨŋmə̀ e pə nɨ àporə̀porə̀.

¹⁴Ka a lə̀ pə e ànwùə̀ ɨ̀sɨŋnə̀ ambo mɨ̀ŋə̀ a nɨ tsòo a ghàŋə̀ mə̀ ambo ze mbə̀ʼə wɨghə. La tsaʼnə ànwùə̀ àtsùmə̀ nɨ pəə shwəŋə̀nə ambo pɨghə a chyə̂ mbə nkǔŋə nkuŋə la, njiilo nɨ̀tsòo a ghàŋə̀ ɨ̀wəə a mbyə̀ Titus à lə̀ nèrə̀ lo pəə shwəŋə̀ nkǔŋə nkuŋə.

¹⁵Lenəla, ɨ̀kòŋnə̀ nɨ à lə̀ pənə nɨ ẅèrə aŋunə pɨghə ɨ wə̀ nkẅuə̀ ndèrə̀ nɨ mbyə̀ amwuə nkwùə̀ nɨ à kẅempə̀nə tsaʼnə pɨghə pɨ̀tsùmə̀ lə̀ zuʼnə̀nə ànwùə̀ nɨ à lə̀ nèrə̀nə, farə tsaʼnə nɨ̀ lə̀ kẅiirə̀nə e nɨ àkẅàrə̀ pobə àwùrə̀kə̀ ntɨŋmə̀.

¹⁶Ǹdanə mbə nɨ nɨ̀ghaʼà lo mbə̀ʼə ǹdzəʼnə̀ aŋunə pɨghə aŋunə mɨ̀nwùə̀ mɨ̀tsùmə̀ nɨ nɨ̀ pə ngɨ̀rə̀.