Read Pinyin 2 Korìntə̀ 8 Bible Online

2 Korìntə̀ 8 - Pinyin bible

2 Korìntə̀ 8

¹Pɨlyimə ɨ̀pəə, pəə tàʼà lo nɨ̀ zhyə̂ àpòŋə̀ ntɨŋmə̀ Nẅùə̀ nɨ à nèrə̀nə ambo ɨ̀shwatə̀ ɨ̀poonə̀ pɨ Kristù nɨ pənə a àlaʼà Màsèdonyà.

²Pobə lə̀ patə mbə pə nɨ mɨ̀ngəʼə̀ mɨ̀noʼnə nɨ Nẅùə̀ à lə̀ zhwiʼnə a ghobə nɨ mèrə la, nɨ̀ghaʼà à lə̀ kɨ ndẅenə̀ lẅenə̀nə amwuə mɨ̀ntɨŋmə̀ ɨ̀mobə ngɨ̀rə̀ lo pobə̂ ŋâ ka mɨ̀zùŋə mbaa pə tsaʼnə pobə lə̀ pənə nɨ àfumə̀ la.

³Ngwə̀ nshwəŋə̀ lə tsaʼa ŋònə̀ nɨ à lə̀ mənə ndzəənə̀ tsaʼnə pobə lə̀ mənə ŋŋâ; mmə ŋŋâ àzwuumə̀ nɨ pobə pənə nɨ zèrə, nkɨ nchi mmə ŋŋâ ntsàarə̀ farə àzwuumə̀ nɨ pobə pənə nɨ zèrə; mmə ŋŋâ tyìʼə̀ tɨghu ŋwùə̀ à wə̀ ntinə̀ a ghobə.

⁴Pobə lə̀ puʼù mbô nkẅirə̀ mbuʼù lo pəə ŋâ a ghobə nɨ ɨ̀sàanə̀ pobə̂ ŋâ àzobə àyèmpə̀ ambo pànə̀ pɨ Nẅùə̀ nɨ pɨ pənə a àlaʼà Judyà.

⁵La ka pobə lə̀ ghɨ̀rə̀ a ghobə amwuə ndwuumə̀ nɨ pəə lə̀ kwàŋə̀nə! Pobə lə̀ pyə̀ ŋŋâ mbɨ̀ŋmə̀ ɨ̀zobə ambo Ndòʼnə̀mbyə̂ mbòŋə̀ ŋâ ambo pəə a nɨ zùŋə̀ tsaʼnə Nẅùə̀ à tàʼnə.

⁶Lenəla pəə lə̀ puʼù mbô ambo Titus nɨ à kɨ pìʼnə̀nə àfàʼà zèrə zə lo â làŋə̀ nɨ mbyə̀ ngyèmpə̀ a wɨghə nɨ̀ myàanə̀ àfàʼà àpòŋə̀ ntɨŋmə̀ zə̀.

⁷Tɨ̀tsòŋə̀, tsaʼnə nɨ̀ koʼnə mbyàa aŋunə alyiʼə nɨ mbə̀ʼə nɨ̀ ghɨ̀rə̀ ànwùə̀ àtsùmə̀ ɨ̀shìʼnə̀ la; tsaʼa àpyiimə̀ ntɨŋmə̀, nɨ ndwuumə̀ nɨ nɨ̀ wa nshwəŋnə̀, nɨ nɨ̀zhyə̂ mɨ̀nwùə̀, nɨ nɨ̀pə nɨ ntɨŋmə̀ a nɨ yèmpə̀, farə tsaʼnə nɨ̀ wa nkòŋə̀ a wəə, pəə mə ntyiʼə̀ ntàʼà lo nɨ̀ làŋə̀ nɨ mbyə̀ nɨ àfàʼà ɨ̀kòŋnə̀ zèrə zə̀ a nɨ mə ngyèmpə̀ pànə̀ pɨ Nẅùə̀.

⁸Ka m̀mə ŋâ mə̀ a wɨghə pə nɨ ntə̌ ɨ̀tse, la ǹtàʼà pə mbə̀ʼə nɨ̀ làŋə̀ a ndzùmə̀ pɨ̀tse pə̀ənə̀ nɨ pɨ pənə nɨ ntɨŋmə̀ a nɨ yèmpə̀, nnèrə̀ tsaʼnə ɨ̀kòŋnə̀ ɨ̀wɨghə ɨ pənə ghu nkǔŋə nkuŋə.

⁹Mbə̀ʼnə nɨ̀ zhyə̂nə àpòŋə̀ ntɨŋmə̀ Ndòʼnə̀mbyə̂ Yěsû Kristù ɨ̀wəənə̀; mbaa pə tsaʼnə à lə̀ pənə ngàŋə̀ nkabə̀ la, à lə̀ pə̀ŋə̀ ntyiʼə̀ ngàŋə̀ àfumə̀ ntii wəənə̀, mbə̀ʼə làŋə̀ a ndzùmə̀ àfumə̀ e za pə̀ənə̀ tyiʼə̀ ngàŋə nkabə̀.

¹⁰Àkwàŋə̀ mə̀ a chyə̂ lo, a pòŋə̀ lo nɨ̀ myàanə̀ ànwùə̀ nɨ nɨ̀ lə̀ pìʼnə̀nə nguʼu la tɨ̀tsòŋə̀. Nɨ̀ lə̀ pə pɨ̀tsàa pɨ̀mbyə̀, ka pə wɨghə pə aŋunə ndàʼà a nɨ fàʼà, nɨ̀ lə̀ kɨ mmə ntàʼà a nɨ fàʼà.

¹¹Nɨ̀ làŋə̀ nɨ mbyə̀ mmyàanə̀ àfàʼà ghu. Tsaʼnə nɨ̀ lə̀ pənə nɨ ntɨŋmə̀ a nɨ tyankə̀ ànwùə̀ zə la, nɨ̌ kɨ pə nɨ ntɨŋmə̀ a nɨ myàanə̀ a zèrə.

¹²Mbə̀ʼə nɨ̀ tə mə ngaʼà a nɨ ŋâ yi Nẅùə̀ ǎ kɨ kẅiirə̀ àzwuumə̀ nɨ nɨ̀ ŋânə, ndzùŋə̀ aŋunə àzwuumə̀ nɨ nɨ̀ pənə nɨ zèrə ka pə e aŋunə àzwuumə̀ zhyə̀ nɨ ka nɨ̀ pə wɨghə nɨ zèrə.

¹³Ka ntàʼà mə̀ pə lo àyèmpə̀ nɨ nɨ̀ ŋânə ambo pànə̀ la a pə àpìʼì nɨ pɨ tə̂nə àtwuə̀ pɨghə.

¹⁴La tsaʼnə nɨ̀ pənə nɨ zèrə tɨ̀tsòŋə̀ a noʼò la, a pòŋə̀ nkɨ nkùʼnə̀ lo nɨ̀ yèmpə̀ pànə̀ nɨ ka àzobə a pə e ghu. Mbə̀ʼə a ghǎ mbə nkwùə̀ nɨ nɨ̀ puŋə̀nə, pobə kɨ mbə nɨ zèrə a noʼò, pobə kɨ ngyèmpə̀ a wɨghə. Lenəla a pə ndəŋə ndəŋə lo nɨ̌ yèmpə̀ a wəə pəə̂ kɨ ngyèmpə̀ a wɨghə.

¹⁵A tsaʼnə àŋwàʼnə̀ Nẅùə̀ a shwəŋə̀nə lo, “Ŋònə̀ nɨ à shwatə̀nə a yè noʼnə la ka à pə e nɨ yè noʼnə tɨsɨŋnə, ŋònə̀ nɨ à shwatə̀nə a yè kɨ̂nə la ka à pə e nɨ yè kɨ̂nə tɨsɨŋnə.”

¹⁶Pəə ŋâ a mɨyàa ambo Nẅùə̀ nɨ à ghɨ̀rə̀nə lo Titus â pə nɨ ntɨŋmə̀ a nɨ yèmpə̀ a wɨghə tyìʼə̀ tsaʼnə pəə kɨnə mbə àzəə la.

¹⁷Ka à lə̀ pyiimə̀ e pə ndàʼà ànwùə̀ nɨ pəə lə̀ shwəŋə̀nə lo â ghɨ̀rə̀, à lə̀ kɨ mbə nɨ ntɨŋmə̀ a nɨ tô ambo pɨghə àtwuə̀ nɨ ze.

¹⁸Pəə pə ntsàa e pobə pɨ ndyimə wa nɨ ɨ̀shwatə̀ ɨ̀poonə̀ pɨ Kristù pɨ̀noʼnə kòŋə̀nə e la ntii àfàʼà e a nɨ chwìitə̀ ntwuumə̀ ghù ɨ̀shìʼnə̀ wa.

¹⁹Ka a pə e pə ndàʼà zèrə zə, ɨ̀shwatə̀ ɨ̀poonə̀ pɨ Kristù lə̀ kɨ ntsoʼò e ntsàa lo pəə pɨ pobə lèrə̀ aŋunə àkwùə̀ nɨ̀yìinə̀ zə lo fàʼà àfàʼà ɨ̀kòŋnə̀ zə a nɨ ghuʼtə̀ a Ndòʼnə̀mbyə̂, mbə̀ʼə kɨ nèrə̀ lo pəə kòŋə̀ a nɨ yèmpə̀.

²⁰Pəə pə ntə̂ àtwuə̀ a nɨ zəənə̀ lo kò pànə̀ shwəŋnə̀ a tɨ̀pòŋə̀ mbə̀ʼə pəə aŋunə ɨ̀pwuumə̀ pyə̀ nɨ pànə̀ ŋânə nɨ mɨ̀ntɨŋmə̀ ɨ̀mobə mɨ̀tsùmə̀ lo pəə fàʼà nɨ pèrə.

²¹Ntiinə pəə pə ntə̂ àtwuə̀ a nɨ zəənə̀ lo pəə ghɨ̀rə̀ ànwùə̀ nɨ a təəmə̀nə a ɨ̀myə̂ Ndòʼnə̀mbyə̂ farə a ɨ̀myə̂ pànə̀ pɨ mɨsoŋə.

²²Pəə pə nkɨ ntsàa a momaa ɨ̀wəə pobə pɨ pobə. Pəə zhwiʼì mə e nkwùə̀ noʼnə ndzəənə̀ lo à kòŋə̀ a nɨ yèmpə̀. Tɨ̀tsòŋə̀ nɨ a nùŋə̀nə ntɨŋmə̀ e aŋunə pɨghə la, à chyə̂ nɨ ntɨŋmə̀ a nɨ yèmpə̀ tyìʼə̀ ɨ̀shìʼnə̀.

²³Ngə̀ aŋunə Titus, a ŋwùə̀ àkwùə̀ mə̀ nɨ à wa nfàʼà pəə ze a nɨ yèmpə̀ a wɨghə. Ngə̀ aŋunə pyə̀ pànə̀ nɨ pɨ tônə pobə pɨ pobə la, pobə tyiʼə̀ ntəəmə̀ àtwuə̀ nɨ ɨ̀shwatə̀ ɨ̀poonə̀ pɨ Kristù ŋŋâ àghuʼtə̀ ambo Kristù.

²⁴Lenəla, nɨ̀ nèrə̀ a ghobə nɨ ɨ̀kòŋnə̀, mbə̀ʼə ɨ̀shwatə̀ ɨ̀poonə̀ pɨ Kristù ɨ̀tsùmə̀ zəənə̀ a nkǔŋə nkuŋə, mbyiimə̀ lo pəə lə̀ tsòo pɨ̀ghàŋə̀ ɨ̀pəə la ntii a wɨghə.