Read Pinyin 2 Korìntə̀ 9 Bible Online

2 Korìntə̀ 9 - Pinyin bible

2 Korìntə̀ 9

¹Ka ɨ̀sùmə ɨ̀tse ɨ pə e ghu ambo mɨ̀ŋə̀ a nɨ ŋwàʼnə̀ ambo pɨghə mbə̀ʼə àyèmpə̀ nɨ pɨ ŋânə ambo ɨ̀poonə̀ pɨ Nẅùə̀ a Judyà,

²ntiinə ǹzhyə̂nə lo nɨ̀ wa nɨ ntɨŋmə̀ a nɨ yèmpə̀. M̀byə̀ mmə ntsòo a ghàŋə̀ mə̀ mbə̀ʼə wɨghə ambo pànə̀ pɨ Màsèdonyà, nshwəŋə̀ lo pɨghə a àlaʼà Àkayà lə̀ chwuʼtə̀ mə mbɨ̀ŋmə̀ ɨ̀zɨghə a nɨ furə̀ nguʼu. Ntɨŋmə̀ nɨ nɨ̀ pənə nɨ ẅèrə a nɨ yèmpə̀ ɨ pə̀ʼkə̀ a ghobə pɨ̀noʼnə.

³La ngwə̀ ntwuumə̀ pɨlyimə ɨ̀pə̀ənə̀ ambo pɨghə pə lo kò nɨ̀tsòo a ghàŋə̀ mə̀ a lèrə̀ àfǐfǐ. La tsaʼnə ndə̀ shwəŋə̀nə la, nɨ̂ chwuʼtə̀ mbɨ̀ŋmə̀ ɨ̀zɨghə a nɨ yèmpə̀ a ghobə.

⁴A tə pəla mbə lo pànə̀ pɨ Màsèdonyà tô pəə pɨ pobə ndzəənə̀ lo nɨ̀ pirə̀ a wɨghə mbɨ̀ŋmə̀ tɨ chwuʼtə̀, yi ǎ pə ɨ̀sɨŋnə̀ àtwuə̀ pəə, kɨ pə ɨ̀sɨŋnə̀ yɨ̀noʼnə àtwuə̀ pɨghə ntiinə pəə zhyə̂nə nkǔŋə nkuŋə lo nɨ̌ yèmpə̀.

⁵Lenəla lə̌ ànwùə̀ ghu nɨ ndə̀ kwàŋə̀nə lo tsàa pɨlyimə ɨ̀pə̀ənə̀ lo pobə̂ zàamə̀ ntô ntsirə̀ a wɨghə mbə̀ʼə shwatə̀ ɨ̀pɨghə ɨ̀pwuumə̀ pa nɨ nɨ̀ lə̀ kàʼnə la zaʼà m̂bòŋə̀ tô tsirə̀ a wɨghə. Njiilo nɨ̀ ŋâ nɨ ntɨŋmə̀ ɨ̀wɨghə ɨ̀tsùmə̀, ka pə e pə lo pɨ nyìimə̀ a wɨghə nyìimə̀nə.

⁶Nɨ̀ kẅempə̀ lo ŋònə̀ nɨ à wa mbyə̀ mɨ̀zɨghə̀ nɨ àkẅùʼtə̀ à ghǎ kɨ fùʼù mɨ̀zɨghə̀ mɨ kɨ̂. Ŋònə̀ nɨ ka à pyə̀ e nɨ àkẅùʼtə̀, à ghǎ kɨ fùʼù mɨ̀zɨghə̀ mɨ̀noʼnə.

⁷Ŋwùə̀ ntsùmə̀ â ŋâ tyìʼə̀ tsaʼnə ntɨŋmə̀ e kòŋə̀nə. Kò a ŋâ nɨ àsùŋə̀ mbɨ̀ŋmə̀, kə̀ tsaʼa pɨ nyìimə̀ e nyìimə̀nə, ntiinə Nẅùə̀ à kòŋə̀nə a ŋònə̀ nɨ à wa ŋŋâ nɨ nɨ̀ghaʼà.

⁸Nẅùə̀ à kùʼnə̀ a nɨ ŋâ a wɨghə nɨ àzwuumə̀ àtsùmə̀ nkwùə̀ nɨ nɨ̀ tàʼnə. Lenəla, nɨ̌ pə nɨ àzwuumə̀ àtsùmə̀ za nɨ nɨ̀ tàʼnə amwuə nkwùə̀ ɨ̀tsùmə̀ chi kẅìʼnə̀ pə nɨ pɨ̀noʼnə mbə̀ʼə lòo fàʼà ɨ̀fàʼà pɨ̀shìʼnə̀ ghu lèrə̀ nɨ mbyə̀.

⁹A chyə̂ amwuə àŋwàʼnə̀ Nẅùə̀ lo: “À wa ŋŋâ ɨ̀pwuumə̀ pɨ̀noʼnə ambo ngàŋə̀ àfumə̀; mɨ̀nwùə̀ ɨ̀me mɨ təəmə̀nə ghoŋə̀ nɨ nkuŋə̀.”[1]

¹⁰Nẅùə̀ wa nɨ à wa ŋŋâ ngẅàrə̀ ɨ̀pwuumə̀ ambo pànə̀ pa nɨ pobə pa mbyə̀ nkɨ mbə ze wa nɨ à wa ŋŋâ àpaanə̀ aŋunə mɨ̀zɨghə̀, la ze wa nɨ ǎ ŋâ wɨghə nɨ ngẅàrə̀ ɨ̀pwuumə̀ ɨ̀tsùmə̀ nɨ nɨ̀ tàʼnə, kɨ ghɨ̀rə̀ zèrə kẅuə̀ nkùʼù nkwùə̀ nɨ nɨ̌ fùʼù, mbə̀ʼə kẅìʼnə̀ mɨ̀ntàamə nɨ nɨ̌ zumə̀ ntii mɨ̀nwùə̀ ɨ̀mɨghə mɨ təəmə̀nə.

¹¹Ǎ ghɨ̀rə̀ nɨ̀ pə nɨ ɨ̀pwuumə̀ pɨ̀noʼnə amwuə ɨ̀làŋə ɨ̀tsùmə̀ mbə̀ʼə nɨ̀ tyiʼə̀ ngàbə̀ àpô nkwùə̀ ɨ̀tsùmə̀, pànə̀ pɨ̀noʼnə tyiʼə̀ ndàŋə̀ a ndzùmə̀ pɨghə ŋŋâ a mɨyàa ambo Nẅùə̀ ntii ɨ̀pwuumə̀ nɨ nɨ̀ ŋânə,

¹²ntiinə àfàʼà zèrə zə̀ ka à yèmpə̀ e pə ndàʼà pànə̀ pɨ Nẅùə̀, a kɨ ngɨ̀rə̀ pànə̀ pɨ̀noʼnə mə ŋŋâ a mɨyàa ambo Nẅùə̀.

¹³A nɨ zùŋə̀ tsaʼnə pɨ zəənə̀nə nɨ̀ ŋâ mbɨ̀ŋmə̀ ɨ̀zɨghə aŋunə àfàʼà ghu la, pànə̀ pɨ̀noʼnə̌ ghuʼtə̀ a Nẅùə̀. Pànə̀ pɨ̀noʼnə kɨ nguʼtə̀ a Nẅùə̀ a nɨ zùŋə̀ amwuə ndwuumə̀ nɨ nɨ̀ kɨnə mmə nfàʼà nɨ ntwuumə̀ Kristù ghù ɨ̀shìʼnə̀ wa nɨ nɨ̀ nùŋə̀nə ntɨŋmə̀ ɨ̀wɨghə aŋunə, farə nɨ̀ghàbə̀ àpô ɨwɨghə ambo pobə nɨ pànə̀ pɨ̀nyaanə.

¹⁴Tsaʼnə a pənə a lenə la, nɨ̌ pə amwuə mɨ̀ntɨŋmə̀ ɨ̀mobə pobə̂ tyiʼə̀ nchàʼtə̀ a Nẅùə̀ nɨ ntɨŋmə̀ ɨ̀ghobə ɨ̀tsùmə̀ mbə̀ʼə wɨghə ntii àpòŋə̀ ntɨŋmə̀ Nẅùə̀ za nɨ a nèrə̀nə ambo pɨghə la.

¹⁵Pə̀ənə̀ ŋâ a mɨyàa ambo Nẅùə̀ aŋunə mɨntyaŋnə mɨ tɨ ndùnə̀ nɨ à ŋânə ambo pə̀ənə̀ la.