Read Pinyin Galatia 1 Bible Online

Galatia 1 - Pinyin bible

Galatia 1

¹A mɨ̀ŋə̀ Pàolò nɨ Nẅùə̀ à lə̀ tsàanə lo n̂tô mbə ngàŋə̀ ntwuumə̀ Kristù. Ka a lə̀ twuumə̀ e ŋwùə̀ ntwuumə̀ mə̀, kə̀ ka ndə̀ làŋə̀ mə̀ la a ndzùmə̀ ŋwùə̀ zaʼà mbòŋə̀ ntô. La ndə̀ tô ndàŋə̀ la a ndzùmə̀ Yěsû Kristù pobə tǎ ɨ̀wəənə̀ Nẅùə̀ nɨ a lə̀ zhwuumə̀nə e aŋunə nɨ̀wɨghə̀.

²Pànə̀ pɨ̀tsùmə̀ nɨ pəə pɨ pobə pɨ nfàʼà a nɨ̀ghə̂ mbə̀ʼə ntwuumə̀ ghù ɨ̀shìʼnə̀ pwuutə̀ mə̀ a nɨ chàʼtə̀ ɨ̀shwatə̀ ɨ̀poonə̀ pɨ Kristù a Galatia.

³Ǹchàʼtə̀ a Nẅùə̀ lo Tǎ ɨ̀wə̀ənə̀ Nẅùə̀ pobə Ndòʼnə̀mbyə̂ ɨ̀wə̀ənə̀ Yěsû Kristù nèrə̀ àpòŋə̀ ntɨŋmə̀ àzobə ambo pɨghə, ŋŋâ a wɨghə nɨ àporə̀porə̀.

⁴Yěsû à lə̀ ŋâ a nɨ̀chyə̂mbyə̂ e nkwɨghə̀ aŋunə tɨ̀pòŋə̀ ɨ̀wə̀ənə̀ a nɨ fuukə̀ a wəənə̀ amwuə tɨ̀pòŋə̀ nɨ à pənə tɨ̀tsòŋə̀ wə̀. À lə̀ ghɨ̀rə̀ la ànwùə̀ nɨ Nẅùə̀ Tǎ ɨ̀wə̀ənə̀ à lə̀ tàʼnə.

⁵Àghuʼtə̀ â pə ambo Nẅùə̀ ngoŋə̀ nɨ nkuŋə̀ nɨ nkuŋə̀! Amen.

⁶A tsàarə̀ mə̀ amwuə ndwuumə̀ nɨ ndyə̌ pirə̀nə e tɨ sàa nɨ̀ zùŋə̀ ntyiʼə̀ mmyàʼtə̀ a Nẅùə̀ nɨ à lə̀ fuŋə̀nə a wɨghə ndàŋə̀ a ndzùmə̀ àpòŋə̀ ntɨŋmə̀ Kristù, ntyiʼə̀ mbyiimə̀ ntwuumə̀ ghù ɨ̀shìʼnə̀ ghù nyaanə!

⁷Ka a pə e pə lo ntwuumə̀ ghù ɨ̀shìʼnə̀ ghu nyaanə ɨ wə̀ ghu, la a chyə̂ pə lo pànə̀ pɨ̀tse pə ghu tsànkə̀ ɨ̀twuə̀ ɨ̀pɨghə ntaŋnə̀ a nɨ kẅebə̀ ntwuumə̀ Kristù ghù ɨ̀shìʼnə̀ wa.

⁸La a tə mbə pə pəə kə̀ angèrə̀ nɨ à furə̀nə a nɨ̀pwuurə̀ nchwìitə̀ ntwuumə̀ ghù ɨ̀shìʼnə̀ ghù nyaanə ndàŋə̀ e a ẅùə̀ nɨ pəə lə̀ chwìitə̀nə ambo pɨghə, yi a pòŋə̀ lo â lèrə̀ amwuə àkɨɨnə̀ ɨ̀mǔ.

⁹Tsaʼnə pəə pyə̀ mə nshwəŋə̀ ambo pɨghə la, tyiʼə̀ ǹchi nkẅirə̀ nshwəŋə̀ a wɨghə lo ŋwùə̀ à tə nchwìitə̀ ntwuumə̀ ghù ɨ̀shìʼnə̀ ghù nyaanə ndàŋə̀ ẅùə̀ nɨ nɨ̀ lə̀ kẅiirə̀ mə, yi Nẅùə̀ à ghǎ tsàa e amwuə àkɨɨnə̀ ɨ̀mǔ.

¹⁰Ànwùə̀ zèrə zə nɨ ngwə̀ nshwəŋə̀ lə a chi lə pə lo ngwə̀ tàʼà lo pànə̀ kòŋə̀ mə̀? Ngaŋə! Ngwə̀ ntàʼà pə lo Nẅùə̀ â kòŋə̀ mə̀! Kə̀ ngwə̀ tàʼà pə a nɨ ghɨ̀rə̀ ànwùə̀ nɨ a pòŋə̀ pànə̀? A tə pə pə lo ngwə̀ ntàʼà a nɨ ghɨ̀rə̀ ànwùə̀ nɨ a pòŋə̀ pə̀ənə̀ yi ka mbə mə̀ ngàŋə̀ àfàʼà Kristù.

¹¹Pɨlyimə ɨ̀pâ, ntàʼà ghɨ̀rə̀ nɨ̀ zhyə̂ lo ntwuumə̀ ghù ɨ̀shìʼnə̀ nɨ ndə̀ chwìitə̀nə ambo pɨghə la, ka ɨ lə̀ furə̀ e la ambo ŋwùə̀ mɨsoŋə.

¹²Ka ndə̀ kẅiirə̀ mə̀ a ẅèrə ambo ŋwùə̀, ka a lə̀ kə̀ nèrə̀ e ŋònə̀ ɨ̀tse nnèrə̀ mə̀. La, ɨ lə̀ tô pə tsaʼnə àtwuə̀ mbɨ̀ŋmə̀ Yěsû Kristù a lə̀ nèrə̀nə mə̀.

¹³Nɨ̀ lə̀ zuʼù tsaʼnə nɨ̀chyə̂mbyə̂ mə̀ amwuə ànwùə̀ Nẅùə̀ pɨ̀Jew a lə̀ pənə, amwuə ndwuumə̀ nɨ ndə̀ lanə nnyàŋə̀ ɨ̀shwatə̀ ɨ̀poonə̀ pɨ Nẅùə̀, ntàʼà a nɨ pyatə̀ a pèrə tyìʼə̀ pyatə̀nə.

¹⁴Ndə̀ tsàarə̀ nkàŋə̀ ɨ̀zâ ɨ̀tsùmə̀ amwuə ànwùə̀ Nẅùə̀ pɨ̀Jew, ndanə ntə̂ àtwuə̀ a nɨ zùŋə̀ a mbòomə pɨ̀tǎ pɨ̀tǎ ɨ̀pəə.

¹⁵La Nẅùə̀ wa nɨ à lə̀ pyə̀nə ntsoʼò mə̀ zaʼà pɨ pòŋə̀ ghǎ pyə̂ mə̀, à lə̀ fuŋə̀ mə̀ ndàŋə̀ a ndzùmə̀ àpòŋə̀ ntɨŋmə̀ e nfuŋə̀ lo n̂tô nfàʼà ambo ze nkwùə̀ nɨ

¹⁶à lə̀ ghaʼnə a nɨ nèrə̀ a moonə̀ e ambo mɨ̀ŋə̀ lo ntə nchwìitə̀ ntwuumə̀ ghù ɨ̀shìʼnə̀ wa mbə̀ʼə e ambo pànə̀ nɨ ka pobə pə ghobə pɨ̀Jew. Lenəla, ka ndə̀ ghə̀ mə̀ ambo ŋònə̀ ɨ̀tse a nɨ kẅiirə̀ àtəətə̀.

¹⁷Ka ndə̀ kɨ nkoʼò ndèrə̀ mə̀ a Yèrusalèmə̀ ambo pànə̀ nɨ pobə lə̀ pyə̀nə mbə ngàŋə ntwuumə̀ Kristù zaʼà mbòŋə̀ pə àzâ. Ndə̀ zùŋə̀ furə̀ ndèrə̀ pə a àlaʼà Àrabyà ntyiʼə̀ furə̀ ghu nkwə̂ a Dàmaskòsə̀.

¹⁸Nguʼu lə̀ làŋə̀ ɨtarə, ǹkoʼò ndèrə̀ a Yèrusalèmə̀ a nɨ ghaanə̀ a Pità nchyə̂ pəə ze ngàbə̀ ɨpaa.

¹⁹Ka ndə̀ zəənə̀ mə̀ a taʼà ngàŋə̀ ntwuumə̀ Kristù ghùtse ndàŋə̀ e a Jemə̀, momaa Ndòʼnə̀mbyə̂.

²⁰Aŋunə mɨ̀nwùə̀ mə nɨ ŋ̀ŋwàʼnə̀nə ambo pɨghə lə, ka ǹnyìi mə̀ a chwìrə̀ a mbyə̀ Ndòʼnə̀mbyə̂ njiilo Nẅùə̀ a yèmpə̀ mə̀.

²¹Ndə̀ furə̀ ghu ndèrə̀ a pàa àlaʼà Siryà pobə Sìlisyà.

²²Nkwùə̀ ghu, ɨ̀shwatə̀ ɨ̀poonə̀ pɨ Kristù nɨ lə̀ pənə a Judyà pirə̀ a ghobə ɨ̀sɨghə̀ mə̀ tɨ zəənə̀.

²³Pobə lə̀ mə ndzuʼù zuʼnə tsaʼnə pɨ lə̀ mənə nshwəŋə̀ lo, “Ŋònə̀ wa nɨ à lə̀ mənə nnyàŋə̀ a wəənə̀ la à wə̀ ntyiʼə̀ nchwìitə̀ ntwuumə̀ ghù ɨ̀shìʼnə̀ nɨ à lə̀ mənə ntàʼà lo pyaatə̀ pyaatə̀nə la.”

²⁴Pobə lə̀ tyiʼə̀ mmə ŋŋâ a mɨyàa ambo Nẅùə̀ ntii mə̀.