Read Pinyin Galatia 2 Bible Online

Galatia 2 - Pinyin bible

Galatia 2

¹Nguʼu lə̀ làŋə̀ ntsòbə̀ nɨ̀kwàa, ǹchi mmə ndèrə̀ a Yèrusalèmə̀ pəə Barnabas ndòo a Titus lo pəə pɨ pobə lèrə̀.

²Ndə̀ koʼò ndèrə̀ tsaʼnə Nẅùə̀ à lə̀ shwəŋə̀nə. Ndə̀ koʼò la ntsirə̀ ɨ̀twuə̀, nnwuunə̀ tyìʼə̀ pəə pɨ pobə, ntiitə̀ a ghobə nɨ ntwuumə̀ ghù ɨ̀shìʼnə̀ wa nɨ ndə̀ mənə nchwìitə̀ ambo pànə̀ nɨ ka pobə pə ghobə pɨ̀Jew mbə̀ʼə ghɨ̀rə̀ lo kò àfàʼà mə̀ nɨ ndə̀ mənə nfàʼà ghobə zhyə̀ nɨ ngwə̀ nfàʼà tɨ̀tsòŋə̀ a pə àfǐfǐ.

³Ka ŋònə̀ ɨ̀tse a lə̀ nyìimə̀ e a Titus nɨ pəə ze lə̀ mənə ngyìinə̀ lo pɨ zə̀ərə̀ e, mbaa pə tsaʼnə à lə̀ pənə ŋwùə̀ pɨ̀Greek.

⁴La pànə̀ pɨ̀tse nɨ pobə lə̀ mənə nfɨ̀kə̀ lo pobə̌ pɨlyimə ɨ̀pəə a ndzùmə̀ Kristù lə̀ nyaʼtə̀ nkwuunə̀ amwuə pəə mmə ntàʼà lo pɨ̀ zə̀ərə̀ a Titus. Pobə lə̀ tswurə̀ nkwuunə̀ a nɨ nyoorə̀ mɨ̀nwùə̀, ntàʼà lo zhyə̂ tsaʼnə pəə pənə taʼà ŋwùə̀ pəə pɨ Kristù tɨghu ànwùə̀ àtse a korə̀ a wəə.

⁵La tsaʼnə ka pəə lə̀ mə ntàʼà a wəə lo kẅebə̀ a nkǔŋə nkuŋə nɨ a pənə amwuə ntwuumə̀ ghù ɨ̀shìʼnə̀ ambo pɨghə la, ka pəə lə̀ ŋâ a wəə a ghobə nɨ ɨ̀sàanə̀ tyìʼə̀ aŋunə mətùmə nkwùə̀.

⁶Pànə̀ pa nɨ pobə pənə ɨ̀twuə̀ ɨ̀shwatə̀ ɨ̀poonə̀ pɨ Kristù la, ǹshwəŋə̀ lə la ntiinə pobə tə pə ɨ̀twuə̀ kə̀ ka pə ghobə, yi ka za a pə e nɨ ànwùə̀ àtse a nɨ ghɨ̀rə̀ ambo mɨ̀ŋə̀; ka Nẅùə̀ â tsoʼtə̀ e mɨ̀nwùə̀ mɨ pànə̀ la tyìʼə̀ tsaʼnə pə̀ənə̀ zəənə̀nə a ghobə. Ka pànə̀ pɨ lə̀ kẅìʼnə̀ a ghobə ànwùə̀ yè shwuə̀ àtse nɨ mbə̀ʼə a yèmpə̀ a wɨghə aŋunə ntwuumə̀ mə̀.

⁷La pobə lə̀ zəənə̀ lo, Nẅùə̀ a lə̀ ŋâ mə̀ nɨ àfàʼà a nɨ chwìitə̀ ntwuumə̀ ghù ɨ̀shìʼnə̀ ambo pànə̀ nɨ ka pobə pə ghobə pɨ̀Jew nɨ ka pɨ lə̀ mə ndzə̀ərə̀ a ghobə, nkɨ ŋŋâ a Pità nɨ àfàʼà a nɨ chwìitə̀ ntwuumə̀ ghù ɨ̀shìʼnə̀ ambo pɨ̀Jew nɨ pɨ pa ndzə̀ərə̀ a ghobə.

⁸Mbə̀ʼnə Nẅùə̀ wa nɨ à lə̀ ŋânə ɨ̀tɨ̀ŋnə̀ ambo Pità lo â pə ngàŋə̀ ntwuumə̀ ambo pɨ̀Jew la, à kɨ mbə tyìʼə̀ ze nɨ à lə̀ ŋânə mə̀ nɨ ɨ̀tɨ̀ŋnə̀ lo m̂bə ngàŋə̀ ntwuumə̀ Kristù ambo pànə̀ nɨ ka pobə pə ghobə pɨ̀Jew.

⁹Nkwùə̀ nɨ Jemə̀ nɨ Pità pobə Jònə nɨ pobə lə̀ pənə ɨ̀twuə̀, lə̀ zəənə̀nə àfàʼà nɨ Nẅùə̀ à ŋânə ambo pəə, pobə lə̀ shyə̀ mbô ɨ̀məə Barnabas ntyiʼə̀ mbyiimə̀ lo pəə lèrə̀ ambo pànə̀ nɨ ka pobə pə ghobə pɨ̀Jew, pobə̂ kɨ ndèrə̀ àzobə ambo pɨ̀Jew.

¹⁰Ànwùə̀ nɨ pobə lə̀ shwəŋə̀nə ambo pəə a lə̀ pə lo pəə tsùŋə̀ mmə nnaŋə̀ ngàŋə àfumə̀, a kɨ mbə ànwùə̀ nɨ m̀byə̀ mə nkòŋə̀ lo ghɨ̀rə̀.

¹¹Nkwùə̀ nɨ Pità à lə̀ tônə a Antyòkə̀, ndə̀ saʼà e a mbyə̀ pɨlyimə a ndzùmə̀ Kristù, ntiinə ànwùə̀ nɨ a lə̀ ghɨ̀rə̀nə ka a lə̀ kùʼnə̀ e.

¹²Jemə̀ a lə̀ tsàa pànə̀ pɨ̀tse a Antyòkə̀. La nkwùə̀ nɨ pobə lə̀ kɨ tô ghu, Pità a lə̀ mə ndzɨghə̀ ghobə pɨlyimə a ndzùmə̀ Kristù nɨ ka pobə pə a ghobə pɨ̀Jew. Nkwùə̀ nɨ pànə̀ pèrə pə lə̀ pyàanə ghu, à lə̀ twuunə̀ e a nɨ chi ndzɨghə̀ pobə pɨ pobə. À lə̀ mə ngɨ̀rə̀ lə la ntiinə à lə̀ mənə mbô pànə̀ nɨ pɨ lə̀ mənə nshwəŋə̀ lo pɨ̀ zə̀ərə̀ pànə̀ nɨ ka pobə pə ghobə pɨ̀Jew.

¹³Pɨ̀tse pɨlyimə a ndzùmə̀ Kristù nɨ pobə pənə pɨ̀Jew lə̀ pìʼnə̀ a nɨ ghɨ̀rə̀ mɨ̀nwùə̀ amwuə ndwuumə̀ nɨ pobə zhyə̂nə lo ka mɨ kùʼnə̀ e tyìʼə̀ tsaʼnə Pità à lə̀ mənə ngɨ̀rə̀. Mbaa pə Barnabas à lə̀ pwuutə̀ a ghobə a nɨ ghɨ̀rə̀ ànwùə̀ nɨ à zhyə̂nə lo ka à kùʼnə̀ e.

¹⁴Nkwùə̀ nɨ ndə̀ zəənə̀nə lo ka nɨ̀chyə̂mbyə̂ ɨghobə a təəmə̀ e a nɨ zùŋə̀ a nkǔŋə nkuŋə nɨ à pənə amwuə ntwuumə̀ ghù ɨ̀shìʼnə̀ la, ndə̀ pyiitə̀ ambo Pità a mbyə̀ pobə pɨ̀tsùmə̀ lo, “Ghò nɨ wə̀ pənə o pə ŋwùə̀ pɨ̀Jew la mmə nchyə̂ o pə tsaʼa ŋònə̀ nɨ ka à pə e ŋwùə̀ pɨ̀Jew, ka kɨ chi chyə̂ o tsaʼa ŋwùə̀ pɨ̀Jew, wə̀ tyiʼə̀ mmə nnyìimə̀ pànə̀ nɨ ka pobə pə ghobə pɨ̀Jew lo pobə̂ zùŋə̀ a mbòomə pɨ̀Jew lə̀ ɨla?”

¹⁵A tyìʼə̀ nkǔŋə nkuŋə pə̀ənə̌ pɨ̀Jew tsaʼnə pɨ lə̀ pyə̂nə a wəənə̀, ka pə wəənə̀ “Ngàŋə ngɨ̀rə̀ ɨ̀nwùə̀ tɨ̀pòŋə̀, tsaʼa pànə̀ nɨ ka pobə pə ghobə pɨ̀Jew.”

¹⁶Pə̀ənə̀ zhyə̂ lo Nẅùə̀ à ghɨ̀rə̀ mɨ̀nwùə̀ mɨ ŋwùə̀ təəmə̀ ndàŋə̀ la ndzùmə̀ àpyiimə̀ ntɨŋmə̀ e aŋunə Yěsû Kristù, Ka pə e pə a nɨ ghɨ̀rə̀ mɨ̀nwùə̀ nɨ mbòomə a tàʼnə. Lenəla, pə̀ənə̀ kɨ nnùŋə̀ mə ntɨŋmə̀ ɨ̀wəənə̀ aŋunə Kristù Yěsû njiilo mɨ̀nwùə̀ ɨ̀məənə̀ təəmə̀ a mbyə̀ Nẅùə̀ ntii àpyiimə̀ ntɨŋmə̀ àzəənə̀ aŋunə Kristù, ka pə e pə a nɨ zùŋə̀ a mbòomə. Mbə̀ʼnə ka ŋònə̀ ɨ̀tse a pə e ghu nɨ mɨ̀nwùə̀ ɨ̀me təəmə̀nə a mbyə̀ Nẅùə̀ pə ntiinə a ghɨ̀rə̀nə mɨ̀nwùə̀ nɨ mbòomə a tàʼnə.

¹⁷Tsaʼnə pə̀ənə̀ tàʼnə a nɨ pwuutə̀ pə̀ənə̀ pɨ Kristù mbə̀ʼə mɨ̀nwùə̀ ɨ̀məənə̀ təəmə̀ a mbyə̀ Nẅùə̀ la, pɨ tə zəənə̀ lo pə̀ənə̀ la ngàŋə ngɨ̀rə̀ ɨ̀nwùə̀ tɨ̀pòŋə̀ tsaʼa pànə̀ nɨ ka pobə pə ghobə pɨ̀Jew, â nèrə̀ lə lo Kristù la ngàŋə̀ àfàʼà ɨ̀nwùə̀ tɨ̀pòŋə̀? Ka a pə e a lenə!

¹⁸Ǹtə mbəla mmə ngɨ̀rə̀ mɨ̀nwùə̀ nɨ ndə̀ làʼnə̀ mə lo kò pànə̀ ghɨ̀rə̀ a ghobə a mèrə, yi mbɨ tyiʼə̀ pə la tsaʼa ŋònə̀ nɨ à wə̀ mbəʼə̀ a mbòomə.

¹⁹A nɨ zùŋə̀ a mbòomə, ndə̀ kwɨghə̀ ntii mbòomə mbə̀ʼə pə nɨ nɨ̀chyə̂mbyə̂ pəə Nẅùə̀.

²⁰Ndə̀ kwɨghə̀ pəə Kristù nkwùə̀ nɨ pɨ lə̀ kẅùumə̀nə e aŋunə àtɨ̀ghə pànkə̀nə; ka la pirə̀ mmə nchyə̂ e mɨ̀ŋə̀ nchyə̂, la a chyə̂ Kristù nchyə̂ amwuə mɨ̀ŋə̀. A nɨ zùŋə̀ tsaʼnə ngwə̀ nchyə̂ tɨ̀tsòŋə̀, ntɨŋmə̀ mə̀ chyə̂ e pə aŋunə Moonə̀ Nẅùə̀, nɨ a lə̀ kòŋə̀nə mə̀ ŋŋâ nɨ̀chyə̂mbyə̂ e àtwuə̀ nɨ mɨ̀ŋə̀.

²¹Ka ntwuunə̀ mə̀ àpòŋə̀ ntɨŋmə̀ Nẅùə̀, ntiinə pɨ tə pə ghɨ̀rə̀ lo mɨ̀nwùə̀ mɨ ŋwùə̀ təəmə̀ a mbyə̀ Nẅùə̀ ndàŋə̀ pə a ndzùmə̀ mbòomə, yi Kristù a lə̀ kwɨghə̀ pə àfǐfǐ.