Read Pinyin Galatia 3 Bible Online

Galatia 3 - Pinyin bible

Galatia 3

¹Ɨ̀puukə̀ pànə̀ pɨ Galatia, àpuukə̀ àtwuə̀ pɨghə à chyâ ɨ̀wə̌? Yi pɨ lanə ntiitə̀ a sàŋə̀ sàŋə̀ a laanə̀ àtwuə̀ pɨghə tsaʼnə pɨ lə̀ kẅùumə̀nə a Yěsû aŋunə àtɨ̀ghə pànkə̀nə?

²Nɨ̀ tyiʼə̀ mbyiitə̀ a wɨghə nɨ àpyiitə̀ àshwəŋnə̀ zə̀: nɨ̀ lə̀ kẅiirə̀ Àzhwùə̀ Nẅùə̀ pə tsaʼnə nɨ̀ lə̀ pənə ngɨ̀rə̀ mɨ̀nwùə̀ nɨ mbòomə a tàʼnə la kə̀ nɨ̀ lə̀ kẅiirə̀ pə tsaʼnə nɨ̀ lə̀ zuʼnə ntwuumə̀ ghù ɨ̀shìʼnə̀ wa nnùŋə̀ ntɨŋmə̀ ɨ̀wɨghə aŋunə?

³Lə̌ tsaʼnə nɨ̀ puukə̀nə? Nɨ̀ lə̀ pìʼnə̀ nɨ Àzhwùə̀ Nẅùə̀, nɨ̀ kùmə̀ ntyiʼə̀ ntàʼà lẅùutə̀ nɨ mɨ̀tɨ̀ŋnə̀ mɨ ŋwùə̀ mɨsoŋə lə la ghu?

⁴Njiilo mɨ̀nwùə̀ ma mɨ̀tsùmə̀ nɨ mɨ lə̀ tsirə̀nə a wɨghə, mɨ lə̀ pə la àfǐfǐ? Ngaŋə mbə̀ʼə mɨ lə̀ pə e àfǐfǐ apə̀.

⁵A chyə̂ la lo Nẅùə̀ wa nɨ à wa ŋŋâ Àzhwùə̀ ambo pɨghə nkɨ ngɨ̀rə̀ mɨ̀nwùə̀ mɨ yerə̀nə yerə̀nə a tɨ̀tɨ̀rə̀ pɨghə la, a wa ngɨ̀rə̀ la ntiinə nɨ̀ zùŋə̀nə a mbòomə, kə̀ ntiinə nɨ̀ zuʼnə ntwuumə̀ ghù ɨ̀shìʼnə̀ wa nnùŋə̀ ntɨŋmə̀ ɨ̀wɨghə aŋunə?

⁶Tɨ̀tsòŋə̀ wə̀ nɨ̀ kwàŋə̀ ànwùə̀ mbə̀ʼə Abràhamə̀, a lə̀ nùŋə̀ ntɨŋmə̀ aŋunə Nẅùə̀, lenəla Nẅùə̀ a tyiʼə̀ ndòo e tsaʼa ŋònə̀ nɨ mɨ̀nwùə̀ ɨ̀me təəmə̀nə a mbyə̀ zə.

⁷Lenəla, nɨ̀ zəənə̀ lo, la pànə̀ nɨ pɨ pənə nɨ àpyiimə̀ ntɨŋmə̀ nɨ pɨ pənə ɨ̀poonə̀ pɨ Abràhamə̀.

⁸Àŋwàʼnə̀ Nẅùə̀ a lə̀ zàamə̀ ngɨ̀rə̀ a laanə̀ lo Nẅùə̀ à ghǎ ghɨ̀rə̀ mɨ̀nwùə̀ mɨ pànə̀ nɨ ka pobə pə ghobə pɨ̀Jew təəmə̀ ndàŋə̀ a ndzùmə̀ àpyiimə̀ ntɨŋmə̀ àzobə. Nẅùə̀ a lə̀ zàamə̀ nkàʼà ambo Abràhamə̀ nshwəŋə̀ lo “Ngǎ làŋə̀ a ndzùmə̀ ghò chyâ mborə̀ aŋunə ŋwùə̀ ntsùmə̀.”

⁹Tsaʼnə Abràhamə̀ à lə̀ nùŋə̀nə ntɨŋmə̀ e aŋunə Nẅùə̀, Nẅùə̀ a kɨ nchyâ mborə̀ aŋunə ze la; njiilo Nẅùə̀ ǎ kɨ chyâ mborə̀ aŋunə ŋwùə̀ wa ntsùmə̀ wa nɨ à kɨnə nnùŋə̀ ntɨŋmə̀ e aŋunə ze la tyìʼə̀ a lenə.

¹⁰Ndòonə̀ ɨ chyə̂ àtwuə̀ pànə̀ pa pyə̀ nɨ pɨ tə̂nə àtwuə̀ a nɨ fàʼà ànwùə̀ za nɨ mbòomə a tàʼnə lo pɨ fàʼà la, ntiinə pɨ ŋwàʼnə̀ amwuə àŋwàʼnə̀ Nẅùə̀ lo, “Ndòonə̀ ɨ chyə̂ àtwuə̀ ŋònə̀ wa nɨ ka à mə ngɨ̀rə̀ e mɨ̀nwùə̀ mɨ̀tsùmə̀ nɨ mbòomə à tàʼnə.”

¹¹A laanə̀ tɨ̀tsòŋə̀ wə̀ lo mbə̀ʼə ka mɨ̀nwùə̀ mɨ ŋwùə̀ təəmə̀ e a mbyə̀ Nẅùə̀ pə̀ ntiinə a wə̀ ndzùŋə̀ a mbòomə. Mbə̀ʼnə àŋwàʼnə̀ Nẅùə̀ a shwəŋə̀ lo, “Ŋònə̀ wa nɨ mɨ̀nwùə̀ ɨ̀me təəmə̀nə ntiinə à nùŋə̀nə ntɨŋmə̀ aŋunə Nẅùə̀ la, à ghǎ chyə̂.”

¹²La ka mbòomə a pə e nɨ ànwùə̀ àtse a nɨ ghɨ̀rə̀ ghobə àpyiimə̀ ntɨŋmə̀. Pɨ ŋwàʼnə̀ amwuə àŋwàʼnə̀ Nẅùə̀ pə lo, “Ŋònə̀ wa nɨ à wa ngɨ̀rə̀ ànwùə̀ za àtsùmə̀ nɨ mbòomə à tàʼnə la, à ghǎ chyə̂ aŋunə mbòomə.”

¹³Kristù à lə̀ tsuʼù ɨ̀twuə̀ ɨ̀pə̀ənə̀ aŋunə ndòonə̀ wa nɨ mbòomə à lə̀ chyânə àtwuə̀ pə̀ənə̀, tsaʼnə ze àtwuə̀ ɨ̀pɨ̀ŋmə̀ e à lə̀ pìʼnə ndòonə̀ ɨ̀wəənə̀. Ntiinə pɨ ŋwàʼnə̀ amwuə àŋwàʼnə̀ Nẅùə̀ lo, “Ndòonə̀ ɨ chyə̂ àtwuə̀ ŋònə̀ wa ntsùmə̀ nɨ pɨ kànə̀nə e aŋunə àtɨ̀ghə.”

¹⁴Kristù à lə̀ ghɨ̀rə̀ zèrə zə̀ ànwùə̀ la lo mborə̀ za nɨ à lə̀ kàʼnə ambo Abràhamə̀ la ɨ̂ tô ambo pànə̀ nɨ ka pobə pə ghobə pɨ̀Jew ndàŋə̀ a ndzùmə̀ Kristù Yěsû, mbə̀ʼə pə̀ənə̀ tyiʼə̀ ndàŋə̀ a ndzùmə̀ àpyiimə̀ ntɨŋmə̀ nkẅiirə̀ Àzhwùə̀ za nɨ Nẅùə̀ à lə̀ kàʼnə la.

¹⁵Pɨlyimə ɨ̀pâ, tyiʼə̀ n̂dòo àlènə̀ ànwùə̀ aŋunə mɨ̀nwùə̀ nɨ mɨ ma ngɨ̀rə̀ a ŋwùə̀ mɨsoŋə: pànə̀ tə pəla nnùŋə̀ ànwùə̀ mbyiimə̀, taʼà ŋwùə̀ ɨghobə a chi nkẅebə̀ e apə̀ kə̀ nchi nkẅìʼnə̀ e ànwùə̀ àtse aŋunə apə̀.

¹⁶Nẅùə̀ à lə̀ kàʼà mɨ̀nwùə̀ mèrə mə ambo Abràhamə̀ pobə àtsɨ̀ŋə̀ e; ka àŋwàʼnə̀ Nẅùə̀ a shwəŋə̀ e lo, “Ambo pobə pɨ ɨ̀poonə̀ ɨ̀pe” a nɨ nèrə̀ lo a ɨ̀poonə̀ pɨ̀noʼnə; a lə̀ kɨ nshwəŋə̀ pə lo, “Ambo pɨghə moonə̀ o” a nɨ nèrə̀ lo, a taʼà ŋwùə̀ nɨ à pənə Kristù.

¹⁷Ànwùə̀ nɨ ngwə̀ nshwəŋə̀ a chyə̂ la lo, Nẅùə̀ à lə̀ wàrə̀ ɨ̀kàanə̀, nkàʼà lo à pɨ nùŋə̀ a ẅèrə. Mbòomə wa nɨ à lə̀ kɨ tô nguʼu nkɨrə nɨ̀kwàa nɨ mɨ̀ghumə̀ mɨntarə làŋə̀ mə la, mbə̀ʼə ka à tsə̀ŋə̀ e ɨ̀kàanə̀ wa kə̀ mbyaatə̀ nkàʼnə Nẅùə̀ za.

¹⁸Mbə̀ʼnə a tə mbə zhyə̀ nɨ Nẅùə̀ à lə̀ ghɨ̀rə̀ ànwùə̀ zə̀ ndzùŋə̀ la a mbòomə, yi ka à lə̀ chi ndzùŋə̀ la nkàʼnə za. La pə̀ənə̀ zhyə̂ lo à lə̀ ghɨ̀rə̀ ndzùŋə̀ la nkàʼnə e za nɨ à lə̀ kàʼnə ambo Abràhamə̀.

¹⁹Àfàʼà mbòomə a tyiʼə̀ mbə la àkə? Pɨ lə̀ kẅìʼnə̀ a mbòomə la lo â ghɨ̀rə̀ pànə̀ tə nzhyə̂ ɨ̀nwùə̀ tɨ̀pòŋə̀; ẅèrə a kɨ mbə a nɨ pə ghu tə mbyàa nkwùə̀ nɨ moonə̀ Abràhamə̀ wa nɨ nkàʼnə ɨ̀ lə̀ pənə mbə̀ʼə e la, â ghǎ ntô. Nẅùə̀ à lə̀ làŋə̀ a ndzùmə̀ pəngèrə̀ ŋŋâ mbòomə wa ambo ŋwùə̀ mɨsoŋə nɨ à lə̀ təəmə̀nə a tɨ̀tɨ̀rə̀ Nẅùə̀ pobə pànə̀ pɨ mɨsoŋə.

²⁰La ka ŋwùə̀ mɨsoŋə a chyə̂ mbə e a nɨ pə a tɨ̀tɨ̀rə̀ nkwùə̀ nɨ à mənə nfàʼà e taʼà ŋwùə̀. Nẅùə̀ à kùmə̀ nkɨ mbə e la ze nɨ ze.

²¹A nèrə̀ lə lo mbòomə à wə̀ ndzòŋnə̀ pobə mɨ̀nkàʼnə mɨ Nẅùə̀? Ngaŋə! Ka a pə e a lenə ntiinə a pə la pə lo mbòomə à ghɨ̀rə̀ pànə̀ chyə̂ pɨ̀tɨ̀ŋnə̀, yi mbòomə à ghɨ̀rə̀ mɨ̀nwùə̀ mɨ pə̀ənə̀ təəmə̀ a mbyə̀ Nẅùə̀.

²²La àŋwàʼnə̀ Nẅùə̀ a shwəŋə̀ lo ŋwùə̀ ntsùmə̀ àtwuə̀ ɨ̀shyə̂ ghə à wə̀ a ɨ̀sùmə ɨ̀tɨ̀ŋnə̀ ɨ̀nwùə̀ tɨ̀pòŋə̀. Lenəla, mɨntyaŋnə ma nɨ Nẅùə̀ à lə̀ kàʼnə la, pɨ ghǎ ŋâ mèrə la ambo ŋònə̀ nɨ à nùŋə̀nə ntɨŋmə̀ e aŋunə Yěsû.

²³Nkwùə̀ nɨ mbə̀ʼə pànə̀ lə̀ nùŋə̀ ntɨŋmə̀ ɨ̀ghobə aŋunə Yěsû Kristù ɨ̀ lə̀ kɨ tô, mbòomə a kô mə a wəənə̀ nfɨ̀ŋnə̀ tsaʼa ngàŋə ɨ̀tsaŋə̀ tə mbyàa nkwùə̀ nɨ Nẅùə̀ à ghǎ ghɨ̀rə̀ àpyiimə̀ ntɨŋmə̀ a furə̀ ndaanə̀.

²⁴Pə̀ənə̀ lə̀ pə a ɨ̀sùmə mbòomə tə mbyàa nkwùə̀ nɨ Kristù à lə̀ tônə mbə̀ʼə mɨ̀nwùə̀ ɨ̀məənə̀ tyiʼə̀ ntəəmə̀ a mbyə̀ Nẅùə̀ ntiinə pə̀ənə̀ nùŋə̀nə ntɨŋmə̀ ɨ̀wəənə̀ aŋunə ze.

²⁵Tɨ̀tsòŋə̀ tsaʼnə àpyiimə̀ ntɨŋmə̀ a tô mə la, ka pə̀ənə̀ chi mbə wəənə̀ a ɨ̀sùmə ɨ̀tɨ̀ŋnə̀ mbòomə.

²⁶Pɨghə pɨ̀tsùmə̀ pwuutə̀ mbə taʼà ŋwùə̀ pɨghə pɨ Yěsû ntyiʼə̀ mbə ɨ̀poonə̀ pɨ Nẅùə̀ a nɨ làŋə̀ a ndzùmə̀ àpyiimə̀ ntɨŋmə̀.

²⁷Mbə̀ʼnə pɨghə pɨ̀tsùmə̀ pa nɨ pɨ lə̀ ŋânə a wɨghə nɨ àkẅiirə̀ nchyə mbwuutə̀ a wɨghə pɨ Kristù la, nɨ̀ tyiʼə̀ la tsaʼa Kristù àtwuə̀ ɨ̀pɨ̀ŋmə̀ e.

²⁸Ka tə̀chwìi a pə e ghu a tɨ̀tɨ̀rə̀ pɨ̀Jew nɨ pànə̀ nɨ ka pobə pə ghobə pɨ̀Jew, ka pə e a tɨ̀tɨ̀rə̀ àpùʼù pobə ŋònə̀ nɨ ka a pə e àpùʼù, ka kɨ chi pə e a tɨ̀tɨ̀rə̀ ŋònə̀ mbyàŋnə̀ pobə mə̀ngyə̌, ntiinə pɨghə pɨ̀tsùmə̀ tyiʼnə mbə la taʼà ŋwùə̀ amwuə Kristù.

²⁹A tə mbə zhyə̀ nɨ nɨ̀ pənə pànə̀ pɨ Kristù, yi pɨghə̌ ngotə ɨ̀poonə̀ pɨ Abràhamə̀, mbə pɨ̀zɨghə̀ pɨ ndâ ɨ̀pe tsaʼnə Nẅùə̀ à lə̀ kàʼnə la.