Read Pinyin Galatia 4 Bible Online

Galatia 4 - Pinyin bible

Galatia 4

¹A nɨ lèrə̀ nɨ mbyə̀, ànwùə̀ nɨ ngwə̀ nshwəŋə̀ a chyə̂ la lo, ɨ̀ndzɨ̀ghə̀ ndâ à tə pirə̀ e moonə̀ a tsàarə̀ e àpùʼù apə̀ mbaa pə tsaʼnə ɨ̀pwuumə̀ ɨ̀tsùmə̀ pənə ɨ̀pe la.

²Nkwùə̀ nɨ a pirə̀ e moonə̀ la, pànə̀ pa ghu nɨ pɨ twuʼtə̀nə e nkɨ mmə naŋə̀ ɨ̀pwuumə̀ pa tə mbyàa nkwùə̀ nɨ tǎ ɨ̀ghobə a lə̀ nùŋə̀nə lo pɨ ŋâ ɨ̀pwuumə̀ pa ambo ze.

³A kɨ mbə tyìʼə̀ a lenə ambo pə̀ənə̀ nkwùə̀ nɨ pə̀ənə̀ lə̀ pirə̀nə àghòbə, pə̀ənə̀ lə̀ pə la ɨ̀pùʼù ambo ɨ̀zhwùə̀ nɨ lə̀ puʼtə̀nə àtwuə̀ ɨ̀shyə̂ zə̀.

⁴La ngotə nkwùə̀ ɨ̀ lə̀ kùʼù, Nẅùə̀ a tsàa a moonə̀ e àtwuə̀ ɨ̀shyə̂, mə̀ngyə̌ a pyə̀ mbyə̂ e nkwùə̀ nɨ mbòomə pɨ̀Jew à lə̀ mənə mbuʼtə̀,

⁵lo â tô ntsuʼù ɨ̀twuə̀ pànə̀ pa nɨ pɨ pənə a ɨ̀sùmə mbòomə, mbə̀ʼə pə̀ənə̀ tyiʼə̀ mbə nɨ ɨ̀sàanə̀ a nɨ pə ɨ̀poonə̀ pɨ Nẅùə̀.

⁶Tɨ̀tsòŋə̀, a nɨ nèrə̀ lo pɨghə̌ a ɨ̀poonə̀ ɨ̀pe, Nẅùə̀ a lə̀ tsàa Àzhwùə̀ moonə̀ e a tô nkwuunə̀ amwuə mɨ̀ntɨŋmə̀ ɨ̀məənə̀. Àzhwùə̀ za nɨ a za ngɨ̀rə̀ lo pə̀ənə̀ shwəŋə̀ lo, “Abà, Tǎ ɨwəə.”

⁷Lenəla, ka nɨ̀ chi mbə wɨghə ɨ̀pùʼù ambo ɨ̀zhwùə̀ pa nɨ puʼtə̀nə àtwuə̀ ɨ̀shyə̂ zə̀, nɨ̀ tyiʼə̀ mbə la ɨ̀poonə̀ pɨ Nẅùə̀. Tsaʼnə nɨ̀ pənə ɨ̀poonə̀ pɨ Nẅùə̀ la, à pɨ ŋâ a wɨghə nɨ àzwuumə̀ àtsùmə̀ nɨ à pənə ŋâ ambo ɨ̀poonə̀ ɨ̀pe.

⁸Nkwùə̀ nɨ ka nɨ̀ lə̀ zhyə̂ a wɨghə a Nẅùə̀ la, nɨ̀ lə̀ pə la ɨ̀pùʼù ambo ɨ̀zhwùə̀ àtwuə̀ ɨ̀shyə̂ nɨ ka pèrə pə e pɨ Nẅùə̀;

⁹La tɨ̀tsòŋə̀ nɨ nɨ̀ zhyə̂ mə a Nẅùə̀ kə̀ Nẅùə̀ a kɨ nzhyə̂ a wɨghə, mbə̀ʼə nɨ̀ chi nkẅirə̀ ndèrə̀ ambo ɨ̀zhwùə̀ tɨ mɨ̀tɨ̀ŋnə̀ lo pèrə puʼtə̀ a wɨghə lə ɨla? Nɨ̀ tàʼà kẅirə̀ pə ɨ̀pùʼù ambo pèrə mbə̀ʼə àkə?

¹⁰Nɨ̀ wa mbaŋə̀ mɨ̀njyə̂ mɨ̀tse nɨ pɨ̀ŋwɨgrə̀ pɨ̀tse, mɨ̀nkwùə̀ mɨ̀tse nɨ mɨnguʼu mɨ̀tse.

¹¹Ngwə̀ mbô lo nkwùə̀ ɨ̀tse ndə̀ tsə̀ŋə̀ nkwùə̀ mə̀ nfàʼà ambo pɨghə la àfǐfǐ?

¹²Pɨlyimə ɨ̀pâ, mbuʼù mbô ambo pɨghə lo nɨ̀ pə tsaʼa mɨ̀ŋə̀ tsaʼnə ǹkɨnə mbə tsaʼa pɨghə. A nɨ tô mbyàa tɨ̀tsòŋə̀, nɨ̀ pirə̀ a wɨghə ànwùə̀ àtse tɨ fàntə̀ ambo mɨ̀ŋə̀.

¹³Nɨ̀ zhyə̂ lo la à lə̀ ghɨ̀rə̀ nɨ̀ghòonə̀ ngɨ̀rə̀ mbə nɨ ɨ̀sàanə̀ a nɨ chwìitə̀ ntwuumə̀ ghù ɨ̀shìʼnə̀ wa ambo pɨghə nkwùə̀ ntsàambyə̀.

¹⁴Mbaa pə tsaʼnə nɨ̀ghòonə̀ mə̀ à lə̀ pənə àkwàʼnə̀ ambo pɨghə la, ka nɨ̀ lə̀ twuunə̀ a wɨghə a gha kə̀ ngwâ mə̀; nɨ̀ lə̀ kẅiirə̀ mə̀ pə tsaʼa angèrə̀ Nẅùə̀ kə̀ tsaʼa Kristù Yěsû àtwuə̀ mbɨ̀ŋmə̀ e.

¹⁵Nɨ̀ lə̀ pə nɨ nɨ̀ghaʼà aŋunə mɨ̀ŋə̀, àkə a kùmə̀ nchi ngɨ̀rə̀ lo kò nɨ̀ pə nɨ ẅèrə? Àlàŋə a lə̀ pəla mbə ghu yi nɨ̀ lə̀ tsoʼò ɨ̀mɨghə ɨ̀myə̂ ŋŋâ ambo mɨ̀ŋə̀

¹⁶Tɨ̀tsòŋə̀ wə̀, ǹtyiʼə̀ ngàŋə̀ kɨpaanə ɨwɨghə ntiinə ngwə̀ ntiitə̀ a wɨghə nɨ nkǔŋə nkuŋə?

¹⁷Pànə̀ pa pa ntɨ̀ŋnə̀ aŋunə ànwùə̀ àzɨghə nfɨ̀kə̀ a wɨghə la lo nɨ̀ zùŋə̀ a ghobə, la mbə ka ghɨ̀rə̀ a ghobə ànwùə̀ yè ɨ̀shìʼnə̀ àtse aŋunə pɨghə. Pobə tàʼà pə lo ghàbə̀ a wəənə̀ mbə̀ʼə nɨ̀ tyiʼə̀ mbyiimə̀ pə a ghobə.

¹⁸A pòŋə̀ lo wə̀ pə nɨ ntɨŋmə̀ aŋunə pə̀ənə̀ mbə̀ʼə àkwàŋə̀ o a pə yè ɨ̀shìʼnə̀ aŋunə pobə. A pòŋə̀ lo wə̀ pə nɨ ntɨŋmə̀ a lenə nkwùə̀ ɨ̀tsùmə̀, ka pə e pə ndàʼà nkwùə̀ nɨ mbə nɨ pə̀ənə̀.

¹⁹Ɨ̀poonə̀ ɨ̀pâ nɨ ǹkòŋə̀nə, ngwə̀ kɨ nchi ndzuʼù àndzaŋə ntii wɨghə tsaʼa mə̀ngyə̌ nɨ à kòonə a moonə̀ tə mbyàa nkwùə̀ nɨ nɨ̀ ghǎ zhyə̂ a Kristù.

²⁰Ngwə̀ ngyə̀ lo ntə mbəla mbə pə̀ənə̀ tɨ̀tsòŋə̀, yi ǹkẅebə̀ ndwuumə̀ nɨ mbə̀ʼə ǹshwəŋnə̀ ambo pɨghə ntiinə àtwuə̀ mə̀ a zə ndanə ntsànkə̀ mbə̀ʼə wɨghə.

²¹Nɨ̀ tiitə̀ mə̀, pɨghə pa nɨ nɨ̀ tàʼnə lo pə a ɨ̀sùmə mbòomə, nɨ̀ wa la tɨ ndzuʼù ànwùə̀ nɨ mbòomə a shwəŋə̀nə?

²²Pɨ ŋwàʼnə̀ amwuə àŋwàʼnə̀ Nẅùə̀ lo Abràhamə̀ a lə̀ pə nɨ ɨ̀pômbyàŋnə̀ ɨpaa; taʼà a pə moonə̀ àpùʼù, ẅùə̀ a pə moonə̀ ngẅùə e.

²³Àpùʼù zə̀ a lə̀ pyə̂ a moonə̀ tyìʼə̀ tsaʼnə pɨ pa mbyə̂ a moonə̀ ntsùmə̀. La ngẅùə e à lə̀ pyə̂ a moonə̀ a nɨ zùŋə̀ tyìʼə̀ tsaʼnə Nẅùə̀ à lə̀ kàʼnə.

²⁴Pɨ mɨ̀nkə̀ ànwùə̀ zə̀ aŋunə pə̀ngyə̌ pɨpaa: Pə̀ngyə̌ pèrə pə a pə mɨ̀kàanə̀ mɨmbaa. Taʼà ɨ̀kàanə̀ a furə̀ aŋunə mbarə̀ Sinai, mbyə̂ ɨ̀poonə̀ nɨ pənə ɨ̀pùʼù, mə̀ngyə̌ ẅèrə wə̀ a pə Hagar.

²⁵Hagar a chyə̂ tsaʼa mbarə̀ Sinai nɨ ɨ pənə àlaʼà Àrabyà, ntəəmə̀ tsaʼa Yèrusalèmə̀ tɨ̀tsòŋə̀ a pənə ndâ ɨ̀pùʼù pobə pɨ ɨ̀poonə̀ ɨ̀pe.

²⁶La Yèrusalèmə̀ wa nɨ à pənə a nɨ̀pwuurə̀ la ka à pə e ndâ àpùʼù, a ze nɨ à pənə mǎ ɨ̀wəənə̀

²⁷Mbə̀ʼnə pɨ ŋwàʼnə̀nə amwuə àŋwàʼnə̀ Nẅùə̀ lo, “Mə ngaʼà o mbǎ nkǐ mə̀ngyə̌! Pìʼnə̀ a nɨ kyiinə̀ ngaʼà mbǎ ghò wa nɨ wə̀ laʼa mə nkòo o a moonə̀ ndzuʼù àndzaŋə apə̀; ntiinə ɨ̀poonə̀ pɨ mə̀ngyə̌ nɨ pɨ lə̀ kantə̀ mə la, pɨ ghǎ noʼò tsàarə̀ ɨ̀poonə̀ pɨ mə̀ngyə̌ wa nɨ à pənə a ndâ ndwuumə̀.”

²⁸Pɨghə pɨlyimə ɨ̀pâ a ndzùmə̀ Kristù, tɨ̀tsòŋə̀ wə̀ pə̀ənə̀ tyiʼə̀ tsaʼa Isàkə̀, mbə ɨ̀poonə̀ pɨ Nẅùə̀ nɨ à lə̀ kàʼnə.

²⁹A kɨ mbə tɨ̀tsòŋə̀ la tyìʼə̀ tsaʼnə a lə̀ pyə̀nə mbə. Moonə̀ wa nɨ pɨ lə̀ pyə̂nə e tyìʼə̀ tsaʼnə pɨ pa mbyə̂ a moonə̀ à lə̀ tyiʼə̀ mmə nnyàŋə̀ a moonə̀ wa nɨ pɨ lə̀ pyə̂nə e ndàŋə̀ a ndzùmə̀ ɨ̀tɨ̀ŋnə̀ Àzhwùə̀.

³⁰La àŋwàʼnə̀ Nẅùə̀ a mə nshwəŋə̀ lo àkə? A shwəŋə̀ lo, “Kantə̀ a mə̀ngyə̌ àpùʼù wa pobə moonə̀ e ntiinə mbə̀ʼə moonə̀ àpùʼù mə̀ngyə̌ wa a laʼa ndzɨghə̀ e ndâ mə̀ apə̀.”

³¹Lenəla nɨ pɨlyimə ɨ̀pâ, ka pə̀ənə̀ pə wəənə̀ ɨ̀poonə̀ pɨ àpùʼù mə̀ngyə̌. Pə̀ənə̀ a ɨ̀poonə̀ pɨ mə̀ngyə̌ ndâ.