Read Pinyin Galatia 5 Bible Online

Galatia 5 - Pinyin bible

Galatia 5

¹Ngə̀ aŋunə a nɨ pə àpùʼù, Kristù à kyàatə̀ mə mɨnkɨrə mɨ àpùʼù aŋunə pə̀ənə̀ lo mbə̀ʼə pə̀ənə̀ kaŋə chi pə ɨ̀pùʼù. Pə̀ənə̀ təəmə̀ ntɨ̀ŋnə̀; kò pə̀ənə̀ chi ndòo àkəʼə̀ àpùʼù nchi chyâ a loŋə pə̀ənə̀.

²Nɨ̀ zhwiʼtə̀! Mɨ̀ŋə̀ Pàolò ngwə̀ nshwəŋə̀ ambo pɨghə lo, nɨ̀ tɨ myàʼtə̀ lo pɨ zə̀ərə̀ a wɨghə yi ka nɨ̀ chi mbə wɨghə nɨ ànwùə̀ àtse pɨghə pɨ Kristù.

³Ǹchi nkẅìʼnə̀ nkwàtə̀ a wɨghə lo ŋònə̀ nɨ ǎ myàʼtə̀ lo pɨ zə̀ərə̀ e, a chyə̂ a nɨ ghɨ̀rə̀ ànwùə̀ àtsùmə̀ nɨ mbòomə a shwəŋə̀nə.

⁴Pɨghə pa nɨ nɨ̀ tàʼnə lo mɨ̀nwùə̀ ɨ̀mɨghə təəmə̀ ndzùŋə̀ pə a mbòomə la, nɨ̀ ghàbə̀ mə mbɨ̀ŋmə̀ ɨ̀zɨghə pɨghə pɨ Kristù, nkɨ nfurə̀ a wɨghə amwuə àpòŋə̀ ntɨŋmə̀ Nẅùə̀.

⁵La ngə̀ aŋunə pə̀ənə̀, pə̀ənə̀ nùŋə̀ mə ntɨŋmə̀ ɨ̀wəənə̀ aŋunə Nẅùə̀ ntyiʼə̀ mmə mbyabə̀ lo Àzhwùə̀ e a ŋâ wəənə̀ nɨ ntɨ̀ŋnə̀ a nɨ ghɨ̀rə̀ mɨ̀nwùə̀ ɨ̀məənə̀ təəmə̀ a mbyə̀ ze.

⁶Mbə̀ʼnə pə̀ənə̀ tɨ mbə pə̀ənə̀ pɨ Kristù, nɨ̀zə̀ərə̀ a ŋwùə̀ kə̀ nɨ̀ka zə̀ərə̀ e ka a pə e nɨ ànwùə̀ àtse a nɨ ghɨ̀rə̀. Ànwùə̀ nɨ a pənə ghu la àpyiimə̀ ntɨŋmə̀ za nɨ a za nfàʼà ndàŋə̀ a ndzùmə̀ ɨ̀kòŋnə̀ la.

⁷Nɨ̀ lə̀ pə ngɨ̀rə̀ tyìʼə̀ ɨ̀shìʼnə̀, àtwuə̀ àzɨghə a kùmə̀ mbə̀ŋə̀ ɨ̀wə̌ lo kò nɨ̀ chi ndzuʼnə a nkǔŋə nkuŋə?

⁸Ka mbuurə̀ nɨ̀pə̀ŋə̀ zə̀ ɨ furə̀ e la ambo Nẅùə̀ nɨ à lə̀ fuŋə̀nə a wɨghə.

⁹Pə̀ənə̀ zhyə̂ lo, la ghɨ̀rə̀ mɨlyiʼə mbyə̌ ngɨ̀rə̀ àpaanə̀ àtsùmə̀ a koʼò.

¹⁰Aŋunə nɨ̀linə̀ nɨ Ndòʼnə̀mbyə̂ m̀byiimə̀ nkǔŋə nkuŋə lo ka nɨ̀ pə nkẅiirə̀ a wɨghə àkwàŋə̀ ŋònə̀ nyàanə ndàŋə̀ e àzâ. Nẅùə̀ à ghǎ chyâ ɨ̀sàʼa aŋunə ŋwùə̀ nɨ à chyânə àtsànkə̀ àtwuə̀ pɨghə kə̀ a pə ɨ̀wə̌.

¹¹Ngə̀ aŋunə mɨ̀ŋə̀ nɨ pɨlyimə ɨ̀pâ, ǹtə mbəla ndèrə̀ nɨ mbyə̀ mmə nchwìitə̀ lo a pòŋə̀ lo pɨ̀ zə̀ərə̀ pə̀ənə̀ pɨ chi ntyiʼə̀ nnyàŋə̀ mə̀ lə ntii àkə? A tə pə la mbə a lenə, yi mbə̀ʼə ngəʼə̀ ɨ̀tse chi mbə e ghu ambo mɨ̀ŋə̀ a nɨ chwìitə̀ mbə̀ʼə àtɨ̀ghə pànkə̀nə Kristù apə̀

¹²Ngwə̀ nkòŋə̀ lo pànə̀ nɨ pɨ pa ŋâ a wɨghə nɨ ngəʼə̀ pobə pyə̀ ndàŋə̀ nɨ mbyə̀ ndzə̀ərə̀ mbɨ̀ŋmə̀ ɨ̀zobə.

¹³Pɨlyimə ɨ̀pâ, Kristù à lə̀ fuŋə̀ a wɨghə lo nɨ̀ furə̀ amwuə ndâ àpùʼù. La kò zèrə zə̀ a ghɨ̀rə̀ e lo nɨ̀ tyiʼə̀ ngɨ̀rə̀ pə mɨ̀nwùə̀ nɨ mbòbə̀ mbɨ̀ŋmə̀ ɨ̀ za ntàʼà. Nɨ̀ pə pə nɨ ɨ̀kòŋnə̀ wa nɨ ɨ̌ pə ghɨ̀rə̀ nɨ̀ mə ngyèmpə̀ pɨ̀tse pə̀ənə̀.

¹⁴Mbə̀ʼnə pɨ pwuutə̀nə mɨ̀ntə̌ mɨ̀tsùmə̀ aŋunə tàʼà ntə̌ nshwəŋə̀ lo, “Kòŋə̀ a momaa o tyìʼə̀ tsaʼnə wə̀ kòŋə̀nə mbɨ̀ŋmə̀ o.”

¹⁵Nɨ̀ tə mbəla mbə mɨ̀nyàamə̀ mmə ndyompə̀ mbɨ̀ŋmə̀ ɨ̀zɨghə, nɨ̀ zhìʼtə̀ a wɨghə yi nɨ̌ tô kwurə̀ mbɨ̀ŋmə̀ ɨ̀zɨghə pɨghə nɨ pɨghə.

¹⁶Ànwùə̀ nɨ ngwə̀ nshwəŋə̀ ambo pɨghə a chyə̂ la lo, nɨ̀ yìinə̀ amwuə ndwuumə̀ nɨ Àzhwùə̀ a tàʼnə; kò nɨ̀ kɨ ngyìinə̀ a wɨghə pə amwuə ndwuumə̀ nɨ mbòbə̀ mbɨ̀ŋmə̀ ɨ tàʼnə.

¹⁷Mbə̀ʼnə, ànwùə̀ nɨ mbòbə̀ mbɨ̀ŋmə̀ ɨ tàʼnə ka a pə e zhyə̀ nɨ Àzhwùə̀ tàʼnə; zhyə̀ za nɨ Àzhwùə̀ a tàʼnə ka kɨ mbə e zhyə̀ nɨ mbòbə̀ mbɨ̀ŋmə̀ ɨ tàʼnə, lenəla, pobə pə pɨpaa pobə pɨ ngàŋə mbwùunə̀ mmə ngɨ̀rə̀ lo kò wə̀ chi ngɨ̀rə̀ ànwùə̀ nɨ wə̀ tàʼnə a nɨ ghɨ̀rə̀.

¹⁸La Àzhwùə̀ a tə mbəla mmə ndòo a wɨghə nɨ àlàŋə, yi ka nɨ̀ chi mbə wɨghə a ɨ̀sùmə mbòomə.

¹⁹A nɨ zùŋə̀ ndwuumə̀ nɨ pànə̀ pɨ mɨsoŋə pənə, mɨ̀nwùə̀ nɨ pobə pa ngɨ̀rə̀ ma nnèrə̀ mbòbə̀ mbɨ̀ŋmə̀ ɨ̀zobə a sàŋə̀ sàŋə̀. Pobə pa ngɨ̀rə̀ a məghàbə̀ nɨ ɨ̀nwùə̀ ntsɨ̀ŋnə pobə ɨ̀nwùə̀ tɨ̀pòŋə̀ ɨ̀tsùmə̀;

²⁰nɨ̀ghuʼtə̀ pɨ̀tɨtoo pobə nɨ̀furə̀ ɨ̀lɨ̀ŋmə̀. Pànə̀ tyiʼə̀ mmə mbàanə̀ mbɨ̀ŋmə̀ ɨ̀zobə ndzòŋnə̀, mbə nɨ àghə̀ʼnə̀ pobə àzaŋə̀ loŋə farə a nɨ tàʼà lo pə nɨ àzwuumə̀ àtsùmə̀. Pobə mə ntyiʼə̀ ngàpə̀ mbə a mɨ̀ndâ mɨ̀ndâ.

²¹Pobə pa nkòonə̀, mmə nnô mbaarə̀, ndzɨghə̀ nnô, ngɨ̀rə̀ ɨ̀nwùə̀ məghàbə̀ pobə mɨ̀tse mɨ̀nwùə̀ mɨ tɨ̀pòŋə̀. Ǹchi nkwàtə̀ a wɨghə tɨ̀tsòŋə̀ tyìʼə̀ tsaʼnə ndə̀ pyə̀nə nkwàtə̀ lo pànə̀ pyə̀ nɨ pɨ pa ngɨ̀rə̀ mbuurə̀ mɨ̀nwùə̀ zə̀ ɨ ghǎ kwuunə̀ a ghobə amwuə ànwùə̀ Nɨ̀fò Nẅùə̀ apə̀.

²²Ɨ̀pwuumə̀ pyə̀ nɨ Àzhwùə̀ Nẅùə̀ a za ŋŋâ la; ɨ̀kòŋnə̀ pobə nɨ̀ghaʼà, nɨ àporə̀porə̀, nɨ àẅìimə̀ ntɨŋmə̀, nɨ ntɨŋmə̀ ghù ɨ̀shìʼnə̀ pobə mbòomə ghù ɨ̀shìʼnə̀, nɨ nɨ̀nùŋə̀ ntɨŋmə̀ aŋunə Nẅùə̀,

²³nɨ nɨ̀shwuʼkə̀ mbɨ̀ŋmə̀ ghobə nɨ̀ẅìimə̀ mbɨ̀ŋmə̀. Ka mbòomə ghùtse a pə e ghu nɨ à twuunə̀nə ɨ̀nwùə̀ pèrə pə̀.

²⁴Pànə̀ nɨ pɨ pənə pànə̀ pɨ Kristù la pànə̀ nɨ pɨ ẅìimə̀nə mbɨ̀ŋmə̀ ɨ̀zobə, ntwuunə̀ a ghobə ànwùə̀ àtsùmə̀ nɨ mbòbə̀ mbɨ̀ŋmə̀ ɨ tàʼnə.

²⁵Pə̀ənə̀ tɨ mbəla mbə nɨ Àzhwùə̀, pə̀ənə̀ yìinə̀ amwuə ndwuumə̀ nɨ Àzhwùə̀ a tàʼnə.

²⁶Kò pə̀ənə̀ tə nkoʼò mbɨ̀ŋmə̀ kə̀ nkɨ ngɨ̀rə̀ ntɨŋmə̀ ŋwùə̀ ɨwɨghə ɨ̀tse ɨ zaŋə̀ kə̀ nkɨ mbə nɨ àghə̀ʼnə̀ amwuə pɨghə.