Read Pinyin Galatia 6 Bible Online

Galatia 6 - Pinyin bible

Galatia 6

¹Pɨlyimə ɨ̀pâ, ŋwùə̀ à tə mbəla mbə a tɨ̀tɨ̀rə̀ pɨghə ngɨ̀rə̀ ànwùə̀ tɨ̀pòŋə̀, pɨghə pa nɨ nɨ̀ pənə nɨ Àzhwùə̀ Nẅùə̀, nɨ̀ shìitə̀ e tyìʼə̀ ndaa ndaa. Nɨ̀ mə ngɨ̀rə̀ a lenə, nɨ̀ zhìʼtə̀ a wɨghə mbə̀ʼə nɨ̀ wɨ̀ghə̀ àkwàʼnə̀.

²Yèmpə̀ a nɨ pìʼì ngəʼə̀ ndyimə o tsaʼa ɨ̀zò mbə̀ʼə ghɨ̀rə̀ ànwùə̀ nɨ Kristù à lə̀ shwəŋə̀nə.

³Ŋònə̀ ɨ̀tse à tɨ mbəla mmə ndòo mbɨ̀ŋmə̀ e aŋunə àzwuumə̀ àtse la mbə e àfǐfǐ, yi à fɨ̀ghə̀ la mbɨ̀ŋmə̀ e

⁴A pòŋə̀ lo ŋwùə̀ moʼo moʼo a naŋə̀ ngɨ̀rə̀ mɨ̀nwùə̀ ɨ̀ze, ɨ pəla mbòŋə̀, a tsòo a ghàŋə̀ e tɨghu à lòo mmɨ̀nkə̀ pə aŋunə ngɨ̀rə̀ mɨ̀nwùə̀ ŋònə̀ ɨ̀tse.

⁵Tyiʼə̀ â pə a lenə ntiinə ŋwùə̀ ntsùmə̀ a chyə̂ a nɨ pìʼì ngəʼə̀ e.

⁶Ŋwùə̀ ntsùmə̀ nɨ pɨ̌ nèrə̀ e nɨ àshwəŋnə̀ Nẅùə̀ la, â ghàbə̀ ɨ̀pwuumə̀ pɨ̀shìʼnə̀ nɨ à pənə nɨ pèrə ŋŋâ a pɨ ŋònə̀ wa nɨ à nèrə̀nə e la.

⁷Kò nɨ̀ kɨ fɨ̀ghə̀ mbɨ̀ŋmə̀ ɨ̀zɨghə. Ka ŋwùə̀ â nyèŋə̀ e Nẅùə̀. Ŋwùə̀ ntsùmə̀ a ghǎ fùʼù la tyìʼə̀ àzwuumə̀ nɨ a lə̀ pyə̀nə.

⁸Ŋònə̀ nɨ à pyə̀nə amwuə ndwuumə̀ nɨ mbòbə̀ mbɨ̀ŋmə̀ ɨ̀ tàʼnə, à ghǎ fùʼù a nɨ̀wɨghə̀. La ŋònə̀ nɨ à pyə̀nə amwuə ndwuumə̀ nɨ Àzhwùə̀ a tàʼnə, à ghǎ fùʼù a nɨ̀chyə̂mbyə̂ wa nɨ à ghoŋə̀nə nɨ nkuŋə̀.

⁹Kò pə̀ənə̀ kaanə̀ a wəənə̀ a nɨ ghɨ̀rə̀ ɨ̀pòŋə̀, ntiinə nkwùə̀ ɨ̀ ghǎ kùʼù pə̀ənə̀ fùʼù mbə̀ʼə pə̀ənə̀ ka kaanə̀ a wəənə̀ a àlàŋə.

¹⁰Njiilo, tsaʼa pə̀ənə̀ pənə nɨ ɨ̀sàanə̀ la, pə̀ənə̀ ghɨ̀rə̀ ɨ̀pòŋə̀ ambo ŋwùə̀ ntsùmə̀; ɨ kɨ tô ambo pànə̀ nɨ pɨ nùŋə̀nə ntɨŋmə̀ ɨ̀ghobə aŋunə Nẅùə̀.

¹¹Nɨ̀ zəənə̀ mbuurə̀ ɨ̀myə̂ mɨ àŋwàʼnə̀ mɨ ẅùunə nɨ ǹdòonə àpô mə̀ ŋŋwàʼnə̀ alyiʼə àŋwàʼnə̀ zə̀ ghu ambo pɨghə!

¹²La a pànə̀ pa nɨ pobə pa ntàʼà lo ghɨ̀rə̀ pɨ zəənə̀ a ghobə tsaʼa pànə̀ pɨ̀shìʼnə̀ nɨ pobə pa nnyìimə̀ lo pɨ̀ zə̀ərə̀ a wɨghə. Pobə pa ngɨ̀rə̀ a lenə la mbə̀ʼə pɨ kaŋə nyàŋə̀ a ghobə ntii àtɨ̀ghə pànkə̀nə Kristù.

¹³Mbaa pə pànə̀ pə̀ nɨ pɨ zə̀ərə̀nə a ghobə lə ka pobə mə ngɨ̀rə̀ a ghobə ànwùə̀ nɨ mbòomə a tàʼnə, la ntàʼà pə lo pɨ zə̀ərə̀ a wɨghə mbə̀ʼə pobə tə ntsòo a ghàŋə̀ lo nɨ̀ pyiimə̀ lo pɨ zə̀ərə̀ a wɨghə.

¹⁴La ngə̀ aŋunə mɨ̀ŋə̀, mbɨ tsòo a ghàŋə̀ mə̀ pə mbə̀ʼə àtɨ̀ghə pànkə̀nə Ndòʼnə̀mbyə̂ ɨ̀wə̀ənə̀ Yěsû Kristù. Tsaʼnə Kristù à lə̀ kwɨghə̀nə aŋunə àtɨ̀ghə pànkə̀nə la, ndwuumə̀ nɨ pànə̀ pɨ àtwuə̀ ɨ̀shyə̂ ghuʼtə̀nə ɨ̀pwuumə̀, ɨ kwɨghə̀ mə e ambo mɨ̀ŋə̀.

¹⁵Ka a pə e ànwùə̀ àtse a nɨ zə̀ərə̀ a ŋwùə̀ kə̀ nɨ̀ka zə̀ərə̀ e a ye. Ntɨ̀ŋnə̀ ànwùə̀ a chyə̂ pə a nɨ pə ŋònə̀ shwuə̀.

¹⁶Àporə̀porə̀ pobə àkoorə̀ mɨ̀lɨŋə̀ Nẅùə̀ â pə ambo ŋwùə̀ ntsùmə̀ wa nɨ à zuʼnə àtəətə̀ zə̀ nkɨ mbə ambo pànə̀ pɨ Israel, pə̀ənə̀ ɨ̀pe.

¹⁷A nɨ furə̀ tɨ̀tsòŋə̀, kò ŋònə̀ ɨ̀tse a chi ŋŋâ e a gha nɨ ngəʼə̀ ntiinə ngwə̀ nɨ ɨ̀lènə̀ Yěsû aŋunə mɨ̀ŋə̀.

¹⁸Àpòŋə̀ ntɨŋmə̀ Ndòʼnə̀mbyə̂ ɨ̀wə̀ənə̀ Yěsû Kristù â pə pobə pɨ Àzhwùə̀ àzɨghə mbǎ pɨlyimə ɨ̀pâ. Amen.