Read Pinyin Efesòsə̀ 2 Bible Online

Efesòsə̀ 2 - Pinyin bible

Efesòsə̀ 2

¹A lə̀ pə nkwùə̀ ntsàambyə̀ nɨ̀ pə la ɨ̀kwuə̀ pə̀ənə̀ ntii àtɨ̀ŋnə̀ àtwuə̀ pobə tɨ̀pòŋə̀ ɨwɨghə.

²Amwuə nkwùə̀ ghu, nɨ̀ lə̀ mə ndzùŋə̀ mɨ̀nwùə̀ mɨ àtwuə̀ ɨ̀shyə̂ ghə ndzuʼnə a ɨ̀fò wa nɨ à wa mbuʼtə̀ ɨ̀zhwùə̀ tɨ̀pòŋə̀ pa nɨ pənə amwuə ɨ̀fə̂: ɨ̀zhwùə̀ pa nɨ pa nfàʼà tɨ̀tsòŋə̀ amwuə pànə̀ pa nɨ pɨ pa ntɨ̀ŋnə̀ àtwuə̀ ambo Nẅùə̀ la.

³Pə̀ənə̀ pɨ̀tsùmə̀ lə̀ kɨ mə mbə tsaʼa pobə, nchyə̂ a nɨ̀chyə̂mbyə̂ wa ẅùə̀ nɨ mbòbə̀ mbɨ̀ŋmə̀ ɨ̀ tàʼnə, ngɨ̀rə̀ pə mɨ̀nwùə̀ nɨ mbɨ̀ŋmə̀ ɨ̀zəənə̀ pobə ɨ̀kwàŋə̀ ɨ̀pə̀ənə̀ tàʼnə. Lenəla, àtsə̂ ntɨŋmə̀ Nẅùə̀ a pə aŋunə pə̀ənə̀ tyìʼə̀ tsaʼnə a pənə aŋunə ŋwùə̀ mɨsoŋə ntsùmə̀.

⁴La tsaʼnə ka àkoorə̀ mɨ̀liŋə̀ Nẅùə̀ a pə e nɨ àndànə̀, ɨ̀kòŋnə̀ e aŋunə pə̀ənə̀ kɨ nnoʼò tɨsɨŋnə la,

⁵mbaa pə nkwùə̀ nɨ pə̀ənə̀ lə̀ kwɨghə̀nə ntii àtɨ̀ŋnə̀ àtwuə̀ àzəənə̀ la, à lə̀ ghɨ̀rə̀ pə̀ənə̀ pə pɨ̀tɨ̀ŋnə̀ pə̀ənə̀ pɨ Kristù. Pə̀ənə̀ lə̀ làŋə̀ la a ndzùmə̀ àpòŋə̀ ntɨŋmə̀ e nchwarə̀.

⁶Tsaʼnə pə̀ənə̀ lə̀ pwuutə̀nə pə̀ənə̀ pɨ Kristù, Nẅùə̀ à lə̀ zhwuumə̀ a wəənə̀ pɨ pobə ngɨ̀rə̀ pə̀ənə̀ pɨ pobə nwuunə̀ aŋunə aləŋə nɨ̀fò a nɨ̀pwuurə̀.

⁷À lə̀ làŋə̀ a ndzùmə̀ Kristù nnèrə̀ a wəənə̀ nɨ ɨ̀kòŋnə̀ e mbə̀ʼə pànə̀ gha ndzəənə̀ tsaʼnə àpòŋə̀ ntɨŋmə̀ e a noʼnə ntsàarə̀ àzwuumə̀ àtsùmə̀.

⁸Mbə̀ʼnə Nẅùə̀ à lə̀ chwarə̀ a wɨghə la ntii àpòŋə̀ ntɨŋmə̀ e a nɨ làŋə̀ a ndzùmə̀ àpòŋə̀ ntɨŋmə̀ àzɨghə. Ka à lə̀ chwarə̀ e pɨghə nchwarə̀ mbɨ̀ŋmə̀ ɨ̀zɨghə. Àzwuumə̀ nɨ Nẅùə̀ à lə̀ ŋânə àfǐfǐ.

⁹Ka à pə e la ntii àfàʼà àtse nɨ nɨ̀ lə̀ fàʼnə, njiilo kò ŋònə̀ ɨ̀tse a tsòo e a ghàŋə̀ e.

¹⁰Pə̀ənə̀ la ɨ̀pwuumə̀ àfàʼà Nẅùə̀ nɨ à lə̀ tsùŋə̀nə mbwuutə̀ a wəənə̀ pɨ Kristù Yěsû mbə̀ʼə pə̀ənə̀ tə ngɨ̀rə̀ mɨ̀nwùə̀ mɨ̀shìʼnə̀ nɨ à lə̀ pyə̀ mə nnùŋə̀ lo pə̀ənə̀ tə ngɨ̀rə̀.

¹¹Pɨghə pànə̀ nɨ ka nɨ̀ pə a wɨghə pɨ̀Jew tsaʼnə pɨ lə̀ pyə̂nə a wɨghə nɨ pɨ̀Jew pa nfuŋə̀ a wɨghə nɨ pànə̀ nɨ ka pɨ zə̀ərə̀ e, mmə nfuŋə̀ mbɨ̀ŋmə̀ ɨ̀zobə nɨ pànə̀ pɨ zə̀ərə̀nə, la nɨ̀zə̀ərə̀ ɨghobə ghu a pə e pə tsaʼnə pɨ zə̀ərə̀nə a ŋwùə̀ mɨsoŋə, nɨ̀ kẅempə̀ pànə̀ nɨ nɨ̀ lə̀ pənə pèrə nkwùə̀ ntsàambyə̀.

¹²A lə̀ pə nkwùə̀ ghu la ka nɨ̀ pə a wɨghə nɨ ànwùə̀ àtse a nɨ ghɨ̀rə̀ pɨghə pɨ Kristù. Ka nɨ̀ lə̀ pə a wɨghə amwuə pànə̀ pɨ Nẅùə̀ nɨ à lə̀ tsoʼnə; mbə pɨ̀tô tônə.

¹³La tɨ̀tsòŋə̀, ntiinə nɨ̀ pənə taʼà ŋwùə̀ pɨghə pɨ Kristù Yěsû, pɨghə pa nɨ nɨ̀ lə̀ pə mə a ndyə̌ sàa aŋunə Nẅùə̀, pɨ lòo mə a wɨghə mbaatə̀ a Nẅùə̀ ntiinə Kristù à lə kwɨghə̀nə tsaʼa mômbyə̂ nɨ̀shwàʼà àtwuə̀ pə̀ənə̀.

¹⁴Mbə̀ʼnə Kristù àtwuə̀ mbɨ̀ŋmə̀ e à ŋâ mə a àporə̀porə̀ ambo pə̀ənə̀ ndàŋə̀ aŋunə nɨ̀ghɨ̀rə̀ pànə̀ nɨ pɨ pənə pɨ̀Jew pobə pànə̀ nɨ ka pobə pə ghobə pɨ̀Jew pobə tyiʼə̀ taʼà ŋwùə̀. À lə̀ shàʼtə̀ nkaʼà kɨpaanə nɨ ɨ lə̀ pənə a tɨ̀tɨ̀rə̀ pobə.

¹⁵À lə̀ pyaatə̀ a mbòomə pɨ̀Jew wa nɨ à wa nnèrə̀ mɨ̀nwùə̀ nɨ pɨ ghɨ̀rə̀ nɨ myə̀ nɨ kò pɨ ghɨ̀rə̀. À lə̀ ghɨ̀rə̀ a lenə la mbə̀ʼə pwuutə̀ pɨ̀Jew pobə pànə̀ nɨ ka pobə pə ghobə pɨ̀Jew pobə tyiʼə̀ mbə taʼà ngẅàrə̀ nkɨ mbə taʼà ŋwùə̀ pobə pɨ pobə, lenəla nchyâ àporə̀porə̀ a tɨ̀tɨ̀rə̀ pobə.

¹⁶Yěsû à lə̀ làŋə̀ aŋunə nɨ̀wɨghə̀ e aŋunə àtɨ̀ghə pànkə̀nə mbwuutə̀ mɨ̀ngẅàrə̀ mə mɨmbaa ngɨ̀rə̀ lo kɨpaanə ɨ̀ghobə â myə̀ ntyiʼə̀ ndòo a ghobə nkẅirə̀ nkwə̂ ambo Nẅùə̀.

¹⁷Kristù à lə̀ tô nchwìitə̀ ntwuumə̀ ghù ɨ̀shìʼnə̀ wa mbə̀ʼə àporə̀porə̀ ambo ŋwùə̀ ntsùmə̀. À lə̀ chwìitə̀ ambo pɨghə pa nɨ ka nɨ̀ pə a wɨghə pɨ̀Jew mbə ndyə̌ sàa aŋunə Nẅùə̀ nkɨ nchwìitə̀ ambo pɨ̀Jew nɨ pɨ lə̀ paatə̀nə a Nẅùə̀.

¹⁸Mbə̀ʼnə pə̀ənə̀ pɨ̀tsùmə̀, pɨ̀Jew nɨ pànə̀ nɨ ka pobə pə ghobə pɨ̀Jew làŋə̀nə la a ndzùmə̀ Kristù mbə nɨ àlàŋə a nɨ lèrə̀ ambo Tǎ nɨ taʼà Àzhwùə̀.

¹⁹Nɨ ndwuumə̀ wə̀ ka nɨ̀ chi mbə wɨghə pɨ̀ghɨ̀ɨnə̀ kə̀ pɨ̀tô tônə; pɨghə pɨ pànə̀ pɨ Nẅùə̀ tyiʼə̀ mbə taʼà àlaʼà, nkɨ mbə ngẅàrə̀ ndâ Nẅùə̀,

²⁰pɨ tyiʼə̀ mboomə̀ a wɨghə aŋunə àtsirə̀ ndâ za nɨ ngàŋə ntwuumə̀ Kristù nɨ ngàŋə ntwuumə̀ Nẅùə̀ lə̀ poomə̀nə zhyə̀ nɨ Kristù Yěsû àtwuə̀ mbɨ̀ŋmə̀ e à pənə nɨ̀ghòorə nɨ nɨ̀lẅuə̀ nɨ ndâ.

²¹A ze nɨ à ẅìimə̀nə ndâ zə̀ ntsùmə̀ ngɨ̀rə̀ ɨ̀ kẅùə̀ mbə ndâ Mɨ̀shwàʼà Nẅùə̀ yɨ̀ ndaanə̀nə nɨ pɨ ŋâ mə ambo Ndòʼnə̀mbyə̂.

²²Nɨ̀pwuutə̀ ɨwɨghə pɨghə pɨ pobə à ghɨ̀rə̀ nɨ pwuutə̀ pɨghə pɨ̀tse pə̀ənə̀ ntyiʼə̀ mbə tsaʼa ndâ nɨ Nẅùə̀ à wə̀ nchyə̂ amwuə ndàŋə̀ a ndzùmə̀ Àzhwùə̀ e.