Read Pinyin Efesòsə̀ 3 Bible Online

Efesòsə̀ 3 - Pinyin bible

Efesòsə̀ 3

¹Ntii ànwùə̀ nɨ Nẅùə̀ à ghɨ̀rə̀nə a nɨ pwuutə̀ pɨ̀Jew pobə pànə̀ nɨ ka pobə pə ghobə pɨ̀Jew la, mɨ̀ŋə̀ Pàolò nɨ ngwə̀ a ndâ ɨ̀tsaŋə̀ ntii Kristù Yěsû, ngwə̀ nchàʼtə̀ a Nẅùə̀ mbə̀ʼə wɨghə.

²Ǹzhyə̂ nkǔŋə nkuŋə lo nɨ̀ pyə̀ mə ndzuʼù àfàʼà nɨ Nẅùə̀ à ŋânə ambo mɨ̀ŋə̀ nɨ àpòŋə̀ ntɨŋmə̀ lo nfàʼà mbə̀ʼə ɨ̀shìʼnə̀ ɨ̀wɨghə.

³Nẅùə̀ à lə̀ nèrə̀ ànwùə̀ e yè lə̀əmə̀nə ambo mɨ̀ŋə̀ tsaʼnə mbyə̀ mə nnyaʼa ŋŋwàʼnə̀ a zèrə ambo pɨghə.

⁴Nɨ̀ tə fuŋə̀ ànwùə̀ nɨ ŋ̀ŋwàʼnə̀nə yi nɨ̌ zhyə̂ ànwùə̀ yè lə̀əmə̀nə nɨ ǹzhyə̂nə mbə̀ʼə Kristù.

⁵Ka Nẅùə̀ à lə̀ nèrə̀ e ànwùə̀ zèrə zə̀ ambo ɨ̀waanə̀ pə̀ənə̀ ghù ntsàambyə̀. La tɨ̀tsòŋə̀ à kùmə̀ ndàŋə̀ a ndzùmə̀ Àzhwùə̀ e ngɨ̀rə̀ a laanə̀ ambo ngàŋə ntwuumə̀ Kristù pobə ngàŋə ntwuumə̀ Nẅùə̀ nɨ à lə̀ tsoʼnə.

⁶Ànwùə̀ zə̀ nɨ Nẅùə̀ à lə̀ lə̀əmə̀nə a pə lo, a nɨ làŋə̀ a ndzùmə̀ ntwuumə̀ ghù ɨ̀shìʼnə̀ wa, pànə̀ nɨ ka pobə pə ghobə pɨ̀Jew lə̀ pə nɨ ɨ̀sàanə̀ a nɨ pwuutə̀ pobə pɨ̀Jew mbə nɨ mborə̀ Nẅùə̀. Pobə pɨ̀tsùmə̀ lə̀ pwuutə̀ mbə taʼà ŋwùə̀ a nɨ pə nɨ àzwuumə̀ nɨ Nẅùə̀ à lə̀ làŋə̀nə a ndzùmə̀ Kristù Yěsû nkàʼà.

⁷Nẅùə̀ nɨ àpòŋə̀ ntɨŋmə̀ e, à lə̀ ghɨ̀rə̀ mbə ngàŋə̀ àfàʼà e a nɨ chwìitə̀ ntwuumə̀ ghù ɨ̀shìʼnə̀ wa ndàŋə̀ a ndzùmə̀ ɨ̀tɨ̀ŋnə̀ nɨ à lə̀ ŋânə ambo mɨ̀ŋə̀.

⁸Mbaa pə tsaʼnə ka mbə mə̀ ŋònə̀ ɨ̀tse a tɨ̀tɨ̀rə̀ pànə̀ pɨ Nẅùə̀ nɨ pɨ kɨ̂nə ntsàarə̀ pànə̀ pɨ̀tsùmə̀ la, Nẅùə̀ à kɨ mbirə̀ mbə e pə nɨ àpòŋə̀ ntɨŋmə̀ a nɨ ŋâ mə̀ nɨ ɨ̀sàanə̀ lo n̂chwìitə̀ ntwuumə̀ ghù ɨ̀shìʼnə̀ wa mbə̀ʼə àfùʼù nɨ a pənə amwuə Kristù ambo pànə̀ nɨ ka pobə pə ghobə pɨ̀Jew.

⁹À lə̀ ŋâ mə̀ nɨ àfàʼà lo ngɨ̀rə̀ pànə̀ pɨ̀tsùmə̀ zhyə̂ tsaʼnə àkwàŋə̀ e yè lə̀əmə̀nə za a ghǎ lòo alyiʼə. Nẅùə̀ nɨ à tsùŋə̀nə a àzwuumə̀ àtsùmə̀ à lə̀ lə̀əmə̀nə a zèrə aŋunə mɨnguʼu mɨnguʼu.

¹⁰À lə̀ ghɨ̀rə̀ a lenə la lo pə tɨ̀tsòŋə̀ làŋə̀ a ndzùmə̀ àshwatə̀ ɨ̀poonə̀ pɨ Kristù ghɨ̀rə̀ ɨ̀zhwùə̀ nɨ pənə nɨ ɨ̀tɨ̀ŋnə̀ ghobə mɨ̀tɨ̀ŋnə̀ mmə mbuʼtə̀ a nɨ̀pwuurə̀ la zhyə̂ ànwùə̀ àtsùmə̀ mbə̀ʼə àkwàŋə̀ Nẅùə̀.

¹¹Nẅùə̀ à lə̀ ghɨ̀rə̀ ànwùə̀ zə̀ a nɨ zùŋə̀ a àkwàŋə̀ e nɨ a ghoŋə̀nə nɨ nkuŋə̀, zhyə̀ nɨ a lə̀ lòonə alyiʼə ndàŋə̀ a ndzùmə̀ Kristù Yěsû Ndòʼnə̀mbyə̂ ɨ̀wə̀ənə̀.

¹²A nɨ làŋə̀ a ndzùmə̀ nɨ̀pwuutə̀ ɨ̀wəənə̀ pɨ Kristù ghobə àpyiimə̀ ntɨŋmə̀ àzəənə̀ aŋunə ze, pə̀ənə̀ chyə̂ nɨ ntɨŋmə̀ a nɨ tô a mbyə̀ Nẅùə̀ tɨ àkẅàrə̀.

¹³Lenəla, ngwə̀ mbuʼù mbô ambo pɨghə lo kò ntɨŋmə̀ ɨ̀wɨghə porə̀ mbə̀ʼə ngəʼə̀ nɨ ngwə̀ ndzəənə̀ ntii wɨghə. Ngəʼə̀ zèrə zə̀ ntsùmə̀ ɨ chyə̂ aŋunə ɨ̀shìʼnə̀ ɨ̀wɨghə.

¹⁴Tsaʼnə m̀bənə ngàŋə̀ ɨ̀tsaŋə̀ ntii pànə̀ nɨ ka pobə pə ghobə pɨ̀Jew la, ngwə̀ ntə̂ mɨ̀kẅìʼtə ɨ̀mâ a mbyə̀ Tǎ,

¹⁵Tǎ wa nɨ mɨ̀ngẅàrə̀ mɨ̀tsùmə̀ nɨ mɨ pənə a nɨ̀pwuurə̀ ghobə myə̀ nɨ mɨ pənə a àtwuə̀ ɨ̀shyə̂ pa nkẅiirə̀ mɨ̀linə̀ ɨ̀mobə ambo ze.

¹⁶Ngwə̀ nchàʼtə̀ a Nẅùə̀ lo aŋunə àfùʼù tɨ àndànə̀ e za a làŋə̀ a ndzùmə̀ Àzhwùə̀ e ŋŋâ a wɨghə nɨ mɨ̀tɨ̀ŋnə̀ ngɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀.

¹⁷Ngwə̀ nchàʼtə̀ a Nẅùə̀ lo Kristù a chyə̂ amwuə mɨ̀ntɨŋmə̀ ɨ̀mɨghə ndàŋə̀ a ndzùmə̀ àpyiimə̀ ntɨŋmə̀ àzɨghə mbə̀ʼə nɨ̀ təəmə̀ ntɨ̀ŋnə̀ nkɨ chyə̂ nɨ ɨ̀kòŋnə̀,

¹⁸ngwə̀ nchàʼtə̀ a Nẅùə̀ lo pɨghə pɨ pànə̀ pɨ Nẅùə̀ pɨ̀tsùmə̀ nɨ̀ pə nɨ ɨ̀tɨ̀ŋnə̀ a nɨ zhyə̂ tsaʼnə ɨ̀kòŋnə̀ Kristù ɨ pənə: nzhyə̂ tsaʼnə ɨ faŋə̀nə mbə nkɨ nsàa mbə, nzhyə̂ tsaʼnə ɨ ŋaŋə̀nə nkɨ mmìnə̀ mbə.

¹⁹Nɨ̀ kɨ nzhyə̂ ɨ̀kòŋnə̀ Kristù wa nɨ ɨ tsàarə̀nə a àzhìʼtə̀ ŋwùə̀ mɨsoŋə a nɨ zhyə̂ la, njiilo nɨ̀ lẅenə̀ nɨ mbòomə Nẅùə̀ ntsùmə̀.

²⁰Pə̀ənə̀ ghuʼtə̀ a Nẅùə̀ wa nɨ à pənə nɨ ɨ̀tɨ̀ŋnə̀ a nɨ ghɨ̀rə̀ mɨ̀nwùə̀ ma nɨ mɨ tsàarə̀nə a myə̀ nɨ mbə̀ʼə pə̀ənə̀ pyə̀ mbyiitə̀ kə̀ nkwàŋə̀ ndàŋə̀ a ndzùmə̀ ɨ̀tɨ̀ŋnə̀ wa nɨ ɨ wa nfàʼà amwuə pə̀ənə̀ la.

²¹Pə̀ənə̀ ghɨ̀rə̀ àghuʼtə̀ Nẅùə̀ â pə amwuə àshwatə̀ ɨ̀poonə̀ pɨ Kristù nkɨ mbə ambo Kristù Yěsû amwuə ɨ̀waanə̀ ɨ̀waanə̀ ngoŋə̀ nɨ nkuŋə̀ nɨ nkuŋə̀. Amen.