Read Pinyin Efesòsə̀ 4 Bible Online

Efesòsə̀ 4 - Pinyin bible

Efesòsə̀ 4

¹Tsaʼnə a pənə lə la, mɨ̀ŋə̀, ngàŋə̀ ɨ̀tsaŋə̀ mbə̀ʼə Ndòʼnə̀mbyə̂, ngwə̀ mbuʼù mbô ambo pɨghə lo nɨ̀ yìinə̀ àkwùə̀ nɨ̀yìinə̀ àzɨghə â kùʼnə̀ amwuə ndwuumə̀ nɨ Nẅùə̀ à lə̀ fuŋə̀nə a wɨghə.

²Aŋunə ànwùə̀ àtsùmə̀ nɨ nɨ̀ wa ngɨ̀rə̀, nɨ̀ mə nshwuʼkə̀ nkɨ mmə mbotə̀ mbɨ̀ŋmə̀ ɨ̀zɨghə, mmə ngẅìimə̀ mɨ̀ntɨŋmə̀ ɨ̀mɨghə, nkɨ mmə nnèrə̀ ɨ̀kòŋnə̀ ambo pɨlyimə ɨ̀pɨghə nkwùə̀ za nɨ pobə fàntə̀nə, ka pə e àzaŋə̀ loŋə.

³Tsaʼnə Àzhwùə̀ Nẅùə̀ a ghɨ̀rə̀ mə nɨ̀ pə taʼà ŋwùə̀ la, nɨ̀ taŋnə̀ amwuə àlàŋə àtsùmə̀ a nɨ chyə̂ amwuə àporə̀porə̀ mbə̀ʼə pə taʼà ŋwùə̀.

⁴A ye tyìʼə̀ taʼà mbɨ̀ŋmə̀ nɨ taʼà Àzhwùə̀ tyìʼə̀ tsaʼnə Nẅùə̀ à lə̀ fuŋə̀nə a wɨghə lo nɨ̀ pə nɨ taʼà àkwàŋə̀ nkwùə̀ nɨ à lə̀ fuŋə̀nə a wɨghə.

⁵Ndòʼnə̀mbyə̂ à chyə̂ moʼo, àpyiimə̀ ntɨŋmə̀ a pə moʼo, àkẅiirə̀ nchyə a kɨ mbə moʼo.

⁶Nẅùə̀ à chyə̂ moʼo, nkɨ mbə Tǎ pɨ ŋwùə̀ ntsùmə̀, mmə mbuʼtə̀ a ŋwùə̀ ntsùmə̀, mmə nfàʼà amwuə ŋwùə̀ ntsùmə̀ nkɨ mbə amwuə ŋwùə̀ ntsùmə̀.

⁷La ŋwùə̀ ntsùmə̀ amwuə pə̀ənə̀ à wa nɨ ànwùə̀ àtse a nɨ ghɨ̀rə̀ tsaʼnə Kristù à mɨ̀nkə̀nə ŋŋâ ambo ze.

⁸Tsaʼnə àŋwàʼnə̀ Nẅùə̀ a shwəŋə̀nə lo: “Nkwùə̀ nɨ à lə̀ koʼnə ndèrə̀ a nɨ̀pwuurə̀, à lə̀ lòo pànə̀ nɨ à lə̀ kootə̀nə pobə pə a ndzùmə̀ ze; ntyiʼə̀ ŋŋâ ɨ̀pwuumə̀ ambo pə̀ənə̀.”

⁹Pɨ tə ŋwàʼnə̀ amwuə àŋwàʼnə̀ Nẅùə̀ lo, “À lə̀ koʼò ndèrə̀ a nɨ̀pwuurə̀”, zèrə zə̀ ànwùə̀ a pə lə lo àkə? A nèrə̀ la lo à lə̀ pyə̀ nshwuʼə̀ ndèrə̀ a ɨ̀sùmə ɨ̀shyə̂.

¹⁰Ŋònə̀ wa nɨ à lə̀ shwuʼnə ndèrə̀ a ɨ̀sùmə ɨ̀shyə̂ la a tyìʼə̀ ze wa nɨ à lə̀ koʼnə mbə àtwuə̀ nɨ̀pwuurə̀, mbə̀ʼə pə alyiʼə àtsùmə̀ a nɨ̀pwuurə̀ ghobə àtwuə̀ ɨ̀shyə̂.

¹¹A ze wa nɨ à wa ngɨ̀rə̀ lo pɨ̀tse pànə̀ pə ngàŋə ntwuumə̀ Kristù, pɨ̀tse pə ngàŋə ntwuumə̀ Nẅùə̀, pɨ̀tse pə pɨ̀nɨ̀fàngɨrəshyə̀, pɨ̀tse pə pɨ̀pastò, pɨ̀tse nkɨ mbə pɨ̀nèrə̀.

¹²À lə̀ ghɨ̀rə̀ a lenə la mbə̀ʼə ghɨ̀rə̀ pànə̀ pɨ Nẅùə̀ kùʼnə̀ a nɨ fàʼà àfàʼà Nẅùə̀, ngɨ̀rə̀ mbɨ̀ŋmə̀ Kristù ɨ kẅùə̀

¹³tə mbyàa tsaʼnə pə̀ənə̌ pwuutə̀ pə taʼà ŋwùə̀ tsaʼnə pə̀ənə̀ nùŋə̀nə ntɨŋmə̀ ɨ̀wəənə̀ aŋunə Nẅùə̀ nkɨ nzhyə̂ a moonə̀ e ɨ̀shìʼnə̀. Lenəla, ntyiʼə̀ mbə pànə̀ pɨ Nẅùə̀ nɨ pɨ kẅuə̀nə nkùʼù mbə tsaʼa Kristù.

¹⁴Njiilo ka pə̀ənə̀ pə chi pə a wəənə̀ tsaʼa àghòbə zhyə̀ nɨ ngàŋə àfɨ̀ghə̀ za ndòo mɨ̀nwùə̀ ma nɨ pobə pa nnèrə̀ nɨ àzhìʼtə̀ àzobə yè tɨ̀ŋnə̀ ntinə̀ a ghobə ghu tsaʼa nchyə ghù pə̀grə̀nə nɨ ɨ wə̀ ntinə̀ a mɨlyiʼə àkànwuʼə amwuə nchyə ndèrə̀ nɨ mbyə̀ nkwə̂ nɨ ndzùmə̀.

¹⁵Pə̀ənə̀ tyiʼə̀ mbə pə pànə̀ nɨ pɨ pa nshwəŋə̀ a nkǔŋə nkuŋə nɨ ɨ̀kòŋnə̀. Nɨ ndwuumə̀ wə̀ pə̀ənə̀ kẅuə̀ amwuə mɨ̀nwùə̀ mɨ̀tsùmə̀ mbə tsaʼa Kristù wa nɨ à pənə àtwuə̀.

¹⁶A ze wa nɨ à wa ngẅìimə̀ mbɨ̀ŋmə̀ ntsùmə̀ ngɨ̀rə̀ ɨ̀ pə a taʼà alyiʼə, mɨŋaŋə tyiʼə̀ ndzùnkə̀ ɨlaamə mbɨ̀ŋmə̀ ɨ̀tsùmə̀. Ɨlaamə pə tə mmə nfàʼà amwuə ndwuumə̀ nɨ pyə̀nə mbə fàʼà, mbɨ̀ŋmə̀ ntsùmə̀ ɨ tyiʼə̀ nkẅuə̀ nɨ ɨ̀kòŋnə̀.

¹⁷Ngwə̀ nshwəŋə̀ ànwùə̀ zə̀ aŋunə nɨ̀linə̀ nɨ Ndòʼnə̀mbyə̂, nkwàtə̀ a wɨghə lo kò nɨ̀ chi ndèrə̀ nɨ mbyə̀ nchyə̂ tsaʼa pànə̀ nɨ ka pobə pə ghobə pɨ̀Jew nɨ ɨ̀kwàŋə̀ pobə pənə ɨ̀kwàŋə̀ ɨ̀fǐfǐ

¹⁸Ɨ̀zhìʼtə̀ ɨ̀pobə chyə̂ pə amwuə ndzùmə ka pobə kɨ mbə a ghobə nɨ nɨ̀chyə̂mbyə̂ wa nɨ Nẅùə̀ à wa ŋŋâ ntiinə àtɨ̀ŋnə̀ àtwuə̀ àzobə a ghɨ̀rə̀ mə ka pobə chi mmə nzhyə̂ a ghobə ànwùə̀.

¹⁹Ɨ̀twuə̀ ɨ̀pobə zwuumə̀ mə, ka pobə chi mbə a ghobə nɨ ɨ̀sɨŋnə̀ ntyiʼə̀ ngɨ̀rə̀ pə mɨ̀nwùə̀ mɨ̀tsùmə̀ nɨ mbɨ̀ŋmə̀ ɨ̀zobə tàʼnə ghobə mbuurə̀ ɨ̀kɨ̀fî mɨ̀nwùə̀ mɨ̀tsùmə̀.

²⁰Ka la pə e mbuurə̀ mɨ̀nwùə̀ nɨ nɨ̀ lə̀ lanə̀nə mbə̀ʼə Kristù la!

²¹Nɨ̀ lə̀ zuʼù a nkǔŋə nkuŋə mbə̀ʼə e, pɨ kɨ nnèrə̀ a wɨghə nɨ nkǔŋə nkuŋə nɨ à pənə amwuə Yěsû tsaʼa ɨ̀zùŋə̀ ndzùmə̀ ɨ̀pe.

²²Nɨ̀ sòrə̀ ngòbə̀ ndùnə̀ za nɨ ɨ̀ pənə aŋunə pɨghə ngɨ̀rə̀ lo nɨ̀ tə nchyə̂ tsaʼnə nɨ̀ lə̀ pyə̀nə mmə nchyə̂. Ngòbə̀ za nɨ ɨ̀ lə̀ mənə ntsə̀ŋə̀ ɨ̀zhìʼtə̀ ɨ̀pɨghə nfɨ̀kə̀ a wɨghə nɨ̀ ghɨ̀rə̀ pə mɨ̀nwùə̀ nɨ mɨ̀ntɨŋmə̀ ɨ̀mɨghə lə̀ mənə ntàʼà la.

²³Nɨ̀ ghɨ̀rə̀ Nẅùə̀ â pə̀ŋə̀ mɨ̀ntɨŋmə̀ ɨ̀mɨghə ghobə ɨ̀kwàŋə̀ ɨ̀pɨghə, ngɨ̀rə̀ pèrə tyiʼə̀ pɨ̀shwuə̀.

²⁴Nɨ̀ ẅî ngòbə̀ shwuə̀ za nɨ ɨ̀ shwuə̀nə a Nẅùə̀, mbə nɨ nkǔŋə nkuŋə nɨ̀chyə̂mbyə̂ wa nɨ à təəmə̀nə nkɨ ndaanə̀.

²⁵Njiilo chwìrə̀ â myə̀, ŋwùə̀ moʼo moʼo â tyiʼə̀ nshwəŋə̀ pə a nkǔŋə nkuŋə ambo ndyimə e ntiinə pə̀ənə̀ pɨ̀tsùmə̀ chyə̂ mbə la ɨlaamə mbɨ̀ŋmə̀ Kristù.

²⁶Wə̀ zaŋə̀ a loŋə kò wə̀ pyiimə̀ o lo àzaŋə̀ loŋə ghu a ghɨ̀rə̀ wə̀ ghɨ̀rə̀ a tɨ̀pòŋə̀, kò wə̀ kɨ mbyiimə̀ lo nẅùumə̀ a kɨ ẅènə̀ wə̀ pirə̀ nɨ àzaŋə̀ loŋə ghu.

²⁷Kò nɨ̀ ŋâ ɨ̀sàanə̀ ambo Satàanə̀ lo â kwàʼnə̀ a wɨghə

²⁸Ŋònə̀ nɨ à pyə̀ mə mmə ndzə̀ərə̀ â waʼà ɨ̀zə̀ərə̀, ndòo mbô ɨ̀me mbìʼnə̀ a nɨ fàʼà mbə̀ʼə kɨ pə àze nɨ àzwuumə̀ nɨ mbə̀ʼə a lòo ngyèmpə̀ ngàŋə àfumə̀ ghu.

²⁹Kò nɨ̀ pyiimə̀ a wɨghə lo àshwəŋnə̀ tɨ̀pòŋə̀ â tə nfurə̀ a ntswùə̀ pɨghə. Nɨ̀ tə nshwəŋnə̀ pə ɨ̀shwəŋnə̀ pɨ̀shìʼnə̀ nɨ mbə̀ʼə pèrə yèmpə̀ a ŋwùə̀ a kẅuə̀ kẅuə̀nə mbə nɨ àzwuumə̀ nɨ à tàʼnə, njiilo ànwùə̀ nɨ nɨ̀ wa nshwəŋə̀ a ghɨ̀rə̀ pə ɨ̀shìʼnə̀ ambo pànə̀ pyə̀ nɨ pɨ pə ndzuʼù.

³⁰Kò nɨ̀ ghɨ̀rə̀ Àzhwùə̀ Nẅùə̀ a pə nɨ àsòmnə̀. A zèrə nɨ a pənə àlènə̀ Nẅùə̀ aŋunə pɨghə a nɨ nèrə̀ lo Nẅùə̀ à ghǎ tô tsuʼù ɨ̀twuə̀ ɨ̀pɨghə.

³¹Kò nɨ̀ pə nɨ ntɨŋmə̀ ghù shyə, nɨ àtsə̂ ntɨŋmə̀, nɨ àzaŋə̀ loŋə. Kò nɨ̀ kɨ nkyiinə̀ nshwəŋnə̀ kə̀ nkɨ ndzòomə̀ pə̀ənə̀. Kò nɨ̀ kɨ mbə a wɨghə nɨ kɨpaanə ɨ̀tse.

³²Nɨ̀ ghɨ̀rə̀ pə mɨ̀nwùə̀ mɨ̀shìʼnə̀ a tɨ̀tɨ̀rə̀ pɨghə, nshwuʼkə̀ mɨ̀ntɨŋmə̀ ɨ̀mɨghə ndə̀ənə̀ ɨ̀fàntə̀ ɨ̀nwùə̀ pɨ̀tse pə̀ənə̀ tyìʼə̀ tsaʼnə Nẅùə̀ à lə̀ làŋə̀nə a ndzùmə̀ Kristù ndə̀ənə̀ ɨ̀pɨghə.