Read Pinyin Efesòsə̀ 5 Bible Online

Efesòsə̀ 5 - Pinyin bible

Efesòsə̀ 5

¹Tsaʼnə nɨ̀ pənə ɨ̀poonə̀ pɨ Nẅùə̀ nɨ à kòŋə̀nə la, nɨ̀ taŋnə̀ a nɨ zùŋə̀ mbòbə̀ mɨ̀kwùə̀ ɨ̀ze.

²Nɨ̀ ghɨ̀rə̀ mɨ̀nwùə̀ mɨ̀tsùmə̀ pə a nɨ nèrə̀ lo nɨ̀ kòŋə̀ pə̀ənə̀ tyìʼə̀ tsaʼnə Kristù à lə̀ kòŋə̀nə a wəənə̀ nkwɨghə̀ aŋunə àtɨ̀ghə pànkə̀nə àtwuə̀ nɨ pə̀ənə̀. À lə̀ pə àzwuumə̀ nchàʼtə Nẅùə̀ nkɨ mbə àzwuumə̀ nɨ̀shwàʼà nɨ a pənə nɨ àzhyǎ yè ɨ̀shìʼnə̀ a mbyə̀ Nẅùə̀.

³Tsaʼnə nɨ̀ pənə pànə̀ pɨ Nẅùə̀ la, ka a pòŋə̀ e lo mɨ̀nwùə̀ mɨ ànyòrə̀kə̀ kə̀ ntsɨ̀ŋnə kə̀ àghə̀ʼnə̀ pə a tɨ̀tɨ̀rə̀ pɨghə.

⁴Ka a pòŋə̀ e lo nɨ̀ shwəŋnə̀ ɨ̀shwəŋnə̀ ɨ̀sɨŋnə̀, kə̀ ɨ̀kɨ̀ghə̀ ɨ̀shwəŋnə̀, kə̀ ɨ̀puukə̀ mɨghaanə. La a pòŋə̀ pə lo nɨ tə ŋŋâ a mɨyàa ambo Nẅùə̀.

⁵Ntàʼà lo nɨ̀ zhyə̂ a nkǔŋə nkuŋə lo ka ŋònə̀ nɨ à wa nchyə̂ amwuə ànyòrə̀kə̀, kə̀ amwuə ntsɨ̀ŋnə, kə̀ amwuə àghə̀ʼnə̀ â pə ghǎ pə e nɨ alyiʼə amwuə ànwùə̀ Nɨ̀fò Kristù pobə yè Nẅùə̀.

⁶Kò nɨ̀ pyiimə̀ a wɨghə lo ŋònə̀ ɨ̀tse â fɨ̀kə̀ a wɨghə nɨ àfǐfǐ àshwəŋnə̀. La a ghɨ̀rə̀ mbuurə̀ mɨ̀nwùə̀ zə̀ ngɨ̀rə̀ lo Nẅùə̀ â zaŋə̀ loŋə aŋunə pànə̀ nɨ ka pobə zuʼnə̀ a ghobə a ye.

⁷Tsaʼnə a pənə lə la, kò nɨ̀ pə a wɨghə nɨ ànwùə̀ àtse a nɨ ghɨ̀rə̀ pɨghə pɨ pobə.

⁸Nɨ̀ lə̀ pə nkwùə̀ ɨ̀tse la mbə amwuə ndzùmə, la tɨ̀tsòŋə̀ nɨ nɨ̀ tyiʼnə pànə̀ pɨ Ndòʼnə̀mbyə̂ la nɨ̀ tyiʼə̀ la amwuə nkàʼà. Njiilo nɨ̀ chyə̂ tsaʼa pànə̀ nɨ pɨ pənə amwuə nkàʼà.

⁹Mbə̀ʼnə mɨ̀ntàamə nɨ nkàʼà ɨ wə̀ ndzumə̀ chyə̂ amwuə ɨ̀shìʼnə̀ ntsùmə̀ nɨ mɨ̀nwùə̀ mɨ təəmə̀nə ghobə nkǔŋə nkuŋə.

¹⁰Nɨ̀ kyiitə̀ a nɨ ghɨ̀rə̀ ànwùə̀ zhyə̀ nɨ Ndòʼnə̀mbyə̂ ǎ pə nɨ nɨ̀ghaʼà.

¹¹Kò nɨ̀ chyâ a wɨghə àpô àzɨghə amwuə mɨ̀nwùə̀ nɨ pànə̀ pa ngɨ̀rə̀ amwuə ndzùmə nɨ ka àyèmpə̀ àtse â pə e aŋunə. Nɨ̀ fuukə̀ mɨ̀nwùə̀ mèrə mə̀ a sàŋə̀ pànə̀ zəənə̀.

¹²Mbə̀ʼnə ɨ̀sɨŋnə̀ wa ghu a nɨ shwəŋə̀ mɨ̀nwùə̀ ma nɨ pobə pa ngɨ̀rə̀ amwuə ndzùmə la.

¹³La àzwuumə̀ àtsùmə̀ nɨ nkàʼà ɨ wa nkyàʼà a za nfurə̀ a sàŋə̀ pànə̀ pɨ̀tsùmə̀ zəənə̀.

¹⁴Mbə̀ʼnə la à ghɨ̀rə̀ e nkàʼà ngɨ̀rə̀ pɨ zəənə̀ àzwuumə̀ àtsùmə̀. Lə̌ ɨ̀sùmə nɨ pɨ pa nshwəŋə̀ lo, “Ngàŋə̀ pɨlô, lòo a ɨ̀shyə̂ pə̀ʼkə̀ aŋunə nɨ̀wɨghə̀ mbə̀ʼə nkàʼà Kristù ɨ kyàʼà o.”

¹⁵Nɨ̀ zhìʼtə̀ a wɨghə amwuə ndwuumə̀ nɨ nɨ̀ wa nchyə̂. Kò nɨ̀ chyə̂ a wɨghə tsaʼa ɨ̀puukə̀, nɨ̀ chyə̂ pə tsaʼa ngàŋə àzhìʼtə̀.

¹⁶Kò nɨ̀ pyiimə̀ a wɨghə lo mɨlyiʼə ɨ̀sàanə̀ nɨ nɨ̀ pənə nɨ ẅèrə â lèrə̀ àfǐfǐ. Nɨ̀ ghɨ̀rə̀ pə mɨ̀nwùə̀ mɨ̀shìʼnə̀ ntiinə nguʼu mbyə̂ wə̀ ɨ pɨ̂.

¹⁷Njiilo kò nɨ̀ pə a wɨghə ɨ̀kɨ̀ghə̀. Nɨ̀ kyiitə̀ pə a nɨ zhyə̀ ànwùə̀ nɨ Ndòʼnə̀mbyə̂ à tàʼnə lo nɨ̀ ghɨ̀rə̀.

¹⁸Kò nɨ̀ tə nnô mɨ̀lùʼù mbaarə̀, yi mèrə pɨ tsə̀ŋə̀ a wɨghə tsə̀ŋə̀nə. Nɨ̀ ghɨ̀rə̀ àzhwùə̀ Nẅùə̀ â lẅenə̀ a wɨghə.

¹⁹Nɨ̀ mə nshwəŋnə̀ a tɨ̀tɨ̀rə̀ pɨghə nɨ àshwəŋnə̀ pɨ̀psalm, nɨ àzòbə̀ nchyə, nɨ mɨnchyə mɨ àzhwùə̀, ndzòbə̀ nguʼtə̀ a Ndòʼnə̀mbyə̂ ghu nɨ ntɨŋmə̀ ɨwɨghə ɨ̀tsùmə̀.

²⁰Nɨ̀ mə ŋŋâ a mɨyàa nkwùə̀ ɨ̀tsùmə̀, aŋunə ànwùə̀ àtsùmə̀ ambo Nẅùə̀ Tǎ aŋunə nɨ̀linə̀ nɨ Ndòʼnə̀mbyə̂ ɨ̀wə̀ənə̀ Yěsû Kristù.

²¹Nɨ̀ zuʼnə̀ mbɨ̀ŋmə̀ ɨ̀zɨghə tsaʼa pànə̀ nɨ pɨ pa mbô a Kristù.

²²Pə̀ngyə̌, nɨ̀ zuʼnə̀ pɨ̀lwuumə̀ ɨ̀pɨghə tyìʼə̀ tsaʼnə nɨ̀ wa ndzuʼnə̀ a Ndòʼnə̀mbyə̂ la.

²³Mbə̀ʼnə ŋònə̀ mbyàŋnə̀ à chyə̂ mbə àtwuə̀ mə̀ngyə̌ tyìʼə̀ tsaʼnə Kristù à kɨnə mbə àtwuə̀ àshwatə̀ ɨ̀poonə̀ pɨ Kristù nɨ a pənə mbɨ̀ŋmə̀ e, Kristù àtwuə̀ mbɨ̀ŋmə̀ e a tyiʼə̀ mbə ngàŋə̀ nchwarə̀ e.

²⁴Lenəla, pə̀ngyə̌ chyə̂ a nɨ zuʼnə̀ pɨ̀lwuumə̀ ɨ̀pobə amwuə ɨ̀làŋə ɨ̀tsùmə̀ tyìʼə̀ tsaʼnə àshwatə̀ ɨ̀poonə̀ pɨ Kristù a kɨnə ndzuʼnə̀ a Kristù aŋunə ɨ̀nwùə̀ ɨ̀tsùmə̀.

²⁵Pɨ̀lwuumə̀, nɨ̀ kòŋə̀ pə̀ngyə̌ ɨ̀pɨghə tyìʼə̀ tsaʼnə Kristù à lə̀ kòŋə̀nə àshwatə̀ ɨ̀poonə̀ pɨ Kristù nkwɨghə̀ aŋunə àtɨ̀ghə pànkə̀nə.

²⁶À lə̀ ŋâ a nɨ̀chyə̂mbyə̂ e àtwuə̀ nɨ àshwatə̀ ɨ̀poonə̀ pɨ Kristù mbə̀ʼə ŋâ a zèrə tsaʼa àzwuumə̀ tə̀chwìi ambo Nẅùə̀, nsùu a zèrə a laanə̀ nɨ nchyə ndàŋə̀ a ndzùmə̀ àshwəŋnə̀ e,

²⁷mbə̀ʼə ghɨ̀rə̀ àshwatə̀ ɨ̀poonə̀ pɨ Kristù â təəmə̀ a mbyə̂ ze nɨ nɨ̀pòŋə̀ e ntsùmə̀ ndaanə̀ ka pə e nɨ àpàbə kə̀ nɨ alyiʼə pyiʼtə̀nə, kə̀ nɨ ntsɨ̀ŋnə ɨ̀tse. La zèrə a təəmə̀, ka pə e nɨ ɨ̀fèrə ɨ̀tse.

²⁸Lə̌ ndwuumə̀ nɨ mbyàŋnə̀ chyə̂ a nɨ kòŋə̀ pə̀ngyə̌ ɨ̀pobə tyìʼə̀ tsaʼa mbɨ̀ŋmə̀ ɨ̀zobə. Ŋònə̀ wa nɨ à wa nkòŋə̀ a ngẅùə e, à kòŋə̀ la mbɨ̀ŋmə̀ e.

²⁹Ntiinə ka ŋònə̀ ɨ̀tse â pə e ghu nɨ à wa mbàanə̀ mbɨ̀ŋmə̀ e. À wa ndzə̂ nkɨ mmə mbyatə̀ a zèrə tyìʼə̀ tsaʼnə Kristù à wa ngɨ̀rə̀ aŋunə àshwatə̀ ɨ̀poonə̀ ɨ̀pe.

³⁰Mbə̀ʼnə pə̀ənə̀ chyə̂ mbə la ɨlaamə mbɨ̀ŋmə̀ Kristù.

³¹Tsaʼnə àŋwàʼnə̀ Nẅùə̀ a za nshwəŋə̀ lo, “Lə̌ ɨ̀sùmə nɨ ŋònə̀ mbyàŋnə̀ à ghǎ myàʼtə̀ a tǎ ɨ̀ghobə pobə mǎ e, ghə̀ pwuutə̀ pobə ngẅùə e, pobə pa pɨpaa tyiʼə̀ mbə taʼà ŋwùə̀.”

³²Ànwùə̀ zèrə zə̀ a lə̀əmə̀ tə mmìnə̀, la m̀mə nshwəŋə̀ lə mbə̀ʼə Kristù ghobə àshwatə̀ ɨ̀poonə̀ ɨ̀pe.

³³Mbaa pə tsaʼnə a pənə lə la, ŋwùə̀ ɨwɨghə moʼo moʼo â kòŋə̀ a ngẅùə e tyìʼə̀ tsaʼnə à wa nkòŋə̀ mbɨ̀ŋmə̀ e. Mə̀ngyə̌ ntsùmə̀ â kɨ nguʼtə̀ a ndwuumə̀ e.