Read Pinyin Efesòsə̀ 6 Bible Online

Efesòsə̀ 6 - Pinyin bible

Efesòsə̀ 6

¹Ɨ̀poonə̀, nɨ̀ tə ndzuʼnə̀ pɨ̀tǎ ɨ̀pɨghə pobə pɨ̀mǎ ɨ̀pɨghə tsaʼa ɨ̀poonə̀ pɨ Kristù, ntiinə lə la ànwùə̀ ɨ̀shìʼnə̀ a nɨ tə ngɨ̀rə̀.

²Ntsàambyə̀ ntə̌ nɨ ɨ pənə nɨ ànwùə̀ nɨ Nẅùə̀ à kàʼnə ɨ̀ chyə̂ lo “Nɨ̀ zuʼnə̀ a pɨ̀tǎ ɨ̀pɨghə pobə pɨ̀mǎ ɨ̀pɨghə.”

³Nkàʼnə Nẅùə̀ ghu ɨ̀ pə lo, “Mbə̀ʼə mɨ̀nwùə̀ ɨ̀mɨghə yìinə̀ ɨ̀shìʼnə̀, nɨ̀ kɨ mbə nɨ nɨ̀chyə̂mbyə̂ ghu sàa amwuə àtwuə̀ ɨ̀shyə̂ zə̀.”

⁴Pɨ̀tǎ pobə pɨ̀mǎ, kò nɨ̀ tə ntwuʼtə̀ ɨ̀poonə̀ ɨ̀pɨghə amwuə ndwuumə̀ nɨ mɨ̀ntɨŋmə̀ ɨ̀mobə tə zaŋə̀. Nɨ̀ lòo a ghobə nkoʼò amwuə ndwuumə̀ nɨ ɨ̀poonə̀ pɨ Kristù pa ndòo ɨ̀poonə̀ nkoʼò, nkɨ mmə ntəətə̀ a ghobə nɨ ntə̌ Ndòʼnə̀mbyə̂.

⁵Ɨ̀pùʼù, nɨ̀ tə ndzuʼnə̀ pɨ̀masàa ɨ̀pɨghə nɨ pɨ pənə àtwuə̀ ɨ̀shyə̂ ghə nɨ ntɨŋmə̀ ɨ̀wɨghə ɨ̀tsùmə̀, ŋŋuʼnə̀ a mbyə̀ pobə nguʼtə̀ a ghobə, nfàʼà ambo pobə tyìʼə̀ tsaʼa nɨ̀ wə̀ nfàʼà ambo Kristù.

⁶Kò nɨ̀ zuʼnə̀ a wɨghə a ghobə pə nɨ àpwùrə̀ ɨ̀myə̂ ntiinə nɨ̀ wə̀ ntàʼà lo pobə kòŋə̀ a wɨghə, nɨ̀ zuʼnə̀ a ghobə pə tsaʼa ngàŋə àfàʼà Kristù zhyə̀ nɨ zə̀ ngɨ̀rə̀ ànwùə̀ nɨ Nẅùə̀ à tàʼnə nɨ ntɨŋmə̀ ɨ̀ghobə ɨ̀tsùmə̀.

⁷Nɨ̀ fàʼà àfàʼà àzɨghə nɨ ntɨŋmə̀ ɨ̀wɨghə ɨ̀tsùmə̀ nɨ nɨ̀ghaʼà tsaʼa nɨ̀ wə̀ nfàʼà ambo Ndòʼnə̀mbyə̂, ka pə e ambo ŋwùə̀ mɨsoŋə.

⁸Nɨ̀ zhyə̂ lo Ndòʼnə̀mbyə̂ à ghǎ tyaŋə̀ àfàʼà yè ɨ̀shìʼnə̀ nɨ ŋwùə̀ ntsùmə̀ à fàʼnə, kə̀ wə̀ pə àpùʼù, kə̀ ka pə o àpùʼù.

⁹Pɨ̀masàa, nɨ̀ kɨ ngɨ̀rə̀ ɨ̀shìʼnə̀ aŋunə ɨ̀pùʼù ɨ̀pɨghə. Kò nɨ̀ kɨ nshwàŋə̀ a ghobə. Nɨ̀ zhyə̂ lo pɨghə pɨ pobə chyə̂ la nɨ taʼà masàa nɨ à pənə a nɨ̀pwuurə̀, ndòo ŋwùə̀ ntsùmə̀ ndəŋə ndəŋə.

¹⁰A nɨ lẅùutə̀, nɨ̀ təəmə̀ ntɨ̀ŋnə̀ pɨghə pɨ Ndòʼnə̀mbyə̂ njiilo mɨ̀tɨ̀ŋnə̀ ɨ̀me nɨ mɨ noʼnə la mɨ ghɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀.

¹¹Nɨ̀ ẅî ɨ̀pwuumə̀ ntsòo ɨ̀tsùmə̀ nɨ Nẅùə̀ à ŋânə ambo pɨghə mbə̀ʼə zhyə̂ a nɨ zòŋnə̀ ànwùə̀ nɨ a furə̀nə ambo devə̀lə̀.

¹²Mbə̀ʼnə ka pə̀ənə̀ mə ndzòŋnə̀ a wə̀ənə̀ la pànə̀ pɨ mɨsoŋə. Pə̀ənə̀ pə ndzòŋnə̀ pə ɨ̀zhwùə̀ tɨ̀pòŋə̀ ghobə ngàŋə àfàʼà Satàanə̀ nɨ pənə a nɨ̀pwuurə̀. Ɨ̀zhwùə̀ pèrə pə chyə̂ mbə la pɨ̀saʼà pɨ ɨ̀laʼà, nɨ pànə̀ nɨ pobə pənə nɨ ɨ̀tɨ̀ŋnə̀ ghobə mɨ̀tɨ̀ŋnə̀ mɨ ɨ̀zhwùə̀ tɨ̀pòŋə̀ nɨ mɨ ma mbuʼtə̀ àtwuə̀ ɨ̀shyə̂ ndzùmə zə.

¹³A pòŋə̀ tɨ̀tsòŋə̀ lo nɨ̀ ẅî ɨ̀pwuumə̀ ntsòo pa nɨ Nẅùə̀ à wa ŋŋâ ambo pɨghə la. Njiilo nkwùə̀ nɨ mɨ̀njyə̂ mɨ tɨ̀pòŋə̀ tônə, nɨ̀ pə nɨ mɨ̀tɨ̀ŋnə̀ a nɨ zòŋnə̀ ntsàarə̀ a ngàŋə̀ mbwùunə̀, nkɨ mbirə̀ ntəəmə̀ ntɨ̀ŋnə̀ nkwùə̀ nɨ nɨ̀ myàanə̀nə mɨ̀làʼà.

¹⁴Nɨ̀ chwuʼtə̀ mbɨ̀ŋmə̀ ntəəmə̀, ngẅî a nkǔŋə nkuŋə tsaʼa ɨ̀kòbə̀ a ntəərə̀ pɨghə, nkɨ ngẅî mɨ̀nwùə̀ mɨ təəmə̀nə a ghàŋə̀ pɨghə tsaʼa àpàʼà ntsòo,

¹⁵Ngẅî ànwùə̀ a nɨ kɨ̀ɨrə̀ ngə̀ nchwìitə̀ ntwuumə̀ ghù ɨ̀shìʼnə̀ wa mbə̀ʼə àporə̀porə̀ tsaʼa ɨtabə ɨ̀pɨghə.

¹⁶Nɨ̀ lòo àpyiimə̀ ntɨŋmə̀ tsaʼa àpàʼà ntsòo nɨ mbə̀ʼə a kẅiirə̀ mɨ̀nkyerə̀ mɨ ntsòo mɨ̀tsùmə̀ nɨ ngàŋə̀ mbwùunə̀ à màʼnə aŋunə pɨghə nkwùə̀ ɨ̀tsùmə̀.

¹⁷Nɨ̀ lòo a nɨ̀chwarə̀ nɨ Nẅùə̀ à lə̀ chwarə̀nə a wɨghə nɨ ẅèrə la ngẅî tsaʼa tɨ̀làarə̀ ntsòo, ndòo àshwəŋnə̀ Nẅùə̀ tsaʼa mɨnẅuə ntsòo nɨ Àzhwùə̀ Nẅùə̀ a za ŋŋâ ambo pɨghə.

¹⁸Nɨ̀ ghɨ̀rə̀ mɨ̀nwùə̀ mɨ̀tsùmə̀ nɨ àchàʼtə̀ Nẅùə̀, mmə ndoonə̀ a Nẅùə̀ lo â yèmpə̀ a wɨghə. Nɨ̀ chàʼtə̀ a Nẅùə̀ nkwùə̀ ɨ̀tsùmə̀ a nɨ zùŋə̀ tsaʼnə Àzhwùə̀ Nẅùə̀ a mənə ntiitə̀ a wɨghə. Tsaʼnə a pənə lə la, nɨ̀ chwuʼtə̀ mbɨ̀ŋmə̀ mmə nchàʼtə̀ a Nẅùə̀ nkwùə̀ ɨ̀tsùmə̀ tɨ kaanə̀ nkẅempə̀ pànə̀ pɨ Nẅùə̀ pɨ̀tsùmə̀.

¹⁹Nɨ̀ kɨ mmə nchàʼtə̀ a Nẅùə̀ nkẅempə̀ mə̀ lo Nẅùə̀ â ŋâ mə̀ nɨ ntwuumə̀ ghù ɨ̀shìʼnə̀ wa amwuə nkwùə̀ za nɨ m̀bənə shwəŋə̀, njiilo ǹkɨ mmə nchwìitə̀ a ẅèrə tɨ àkẅàrə̀, nshantə̀ ànwùə̀ àtsùmə̀ nɨ a lə̀əmə̀nə amwuə ntwuumə̀ ghù ɨ̀shìʼnə̀ wa.

²⁰Ǹchyə̂ mbə la ŋwùə̀ ntəəmə̀ a àtwuə̀ nɨ Kristù mbaa pə tsaʼnə ngwə̀ a nkaʼà ɨ̀tsaŋə̀ lə. Nɨ̀ mə nchàʼtə̀ a Nẅùə̀ nkẅempə̀ mə̀ lo nchwìitə̀ ntwuumə̀ ghù ɨ̀shìʼnə̀ wa amwuə ndwuumə̀ nɨ ǹtənə mbə chwìitə̀.

²¹Takikùsə̀, ndyimə ɨ̀wəənə̀ ghù ɨ̀shìʼnə̀ nɨ à nùŋə̀nə ntɨŋmə̀ e aŋunə àfàʼà Ndòʼnə̀mbyə̂ à pɨ tiitə̀ a wɨghə nɨ ànwùə̀ àtsùmə̀ mbə̀ʼə mə̀ mbə̀ʼə nɨ̀ zhyə̂ tsaʼnə ngwə̀ mbə pobə àfàʼà nɨ ngwə̀ nfàʼà.

²²La ɨ̀sùmə nɨ ngwə̀ ntsàa e ambo pɨghə mbə̀ʼə â tiitə̀ a wɨghə tsaʼnə pəə pɨ̀tsùmə̀ pə mbə, kɨ pə̀ʼkə̀ mɨ̀ntɨŋmə̀ ɨ̀mɨghə.

²³Tǎ Nẅùə̀ pobə Ndòʼnə̀mbyə̂ Yěsû Kristù ŋâ a àporə̀porə̀ nɨ ɨ̀kòŋnə̀ ghobə àpyiimə̀ ntɨŋmə̀ ambo ɨ̀poonə̀ pɨ Kristù.

²⁴Àpòŋə̀ ntɨŋmə̀ Nẅùə̀ â pə ambo ŋwùə̀ wa ntsùmə̀ nɨ à kòŋə̀nə Ndòʼnə̀mbyə̂ ɨ̀wə̀ənə̀ Yěsû Kristù nɨ ɨ̀kòŋnə̀ tɨ myə̀ la.