Read Pinyin Filipì 2 Bible Online

Filipì 2 - Pinyin bible

Filipì 2

¹Tsaʼnə nɨ̀ pwuutə̀nə pɨghə pɨ Kristù a porəkə̀ mɨ̀ntɨŋmə̀ ɨ̀mɨghə tsaʼnə à wa nkòŋə̀ a wɨghə ndyìʼtə̀ mɨ̀ntɨŋmə̀ ɨ̀mɨghə la, nkɨ mbwuutə̀ pɨghə pɨ Àzhwùə̀, nkɨ nkòŋə̀ mbɨ̀ŋmə̀ ɨ̀zɨghə, nkɨ mmə nkoorə̀ mɨ̀lɨŋə̀ mɨ pɨlyimə ɨ̀pɨghə la,

²a pòŋə̀ lo nɨ̀ pwuutə̀ mbə nɨ̀pùʼu nɨ moʼo, nkòŋə̀ mbɨ̀ŋmə̀ ɨ̀zɨghə, ngɨ̀rə̀ lo nɨ̀ pə taʼà ntswùə̀ mbə̀ʼə ntɨŋmə̀ mə̀ ɨ̂ myàanə̀ ndẅenə̀ nɨ nɨ̀ghaʼà.

³Kò nɨ̀ tə nkwàŋə̀ a wɨghə pə mbɨ̀ŋmə̀ ɨ̀zɨghə, kə̀ ntə nkoʼò mbɨ̀ŋmə̀, nɨ̀ shwuʼkə̀ mbɨ̀ŋmə̀ ɨ̀zɨghə pə a ɨ̀shyə̂ mmə nkwàŋə̀ lo pɨ̀tse pə̀ənə̀ tsàarə̀ a wɨghə.

⁴Nɨ̀ mə nkwàŋə̀ pə mɨ̀nwùə̀ nɨ mbə̀ʼə mèrə yèmpə̀ pɨ̀tse pə̀ənə̀. Kò nɨ̀ kwàŋə̀ a wɨghə pə mbɨ̀ŋmə̀ ɨ̀zɨghə.

⁵Nɨ̀ ghɨ̀rə̀ mbòomə ɨwɨghə a kɨ mbə tsaʼa mbòomə nɨ Kristù à lə̀ pənə nɨ ẅèrə.

⁶Yěsû à lə̀ patə mbə pə tsaʼa Nẅùə̀ la, ka à lə̀ nèrə̀ e lo pobə Nẅùə̀ chi ndəŋə ndəŋə.

⁷La, à lə̀ myàʼtə̀ mɨ̀nwùə̀ mɨ̀tsùmə̀ nɨ à lə̀ pənə nɨ mèrə, nshuʼkə̀ mbɨ̀ŋmə̀ e a ɨ̀shyə̂, ndòo mbɨ̀ŋmə̀ e aŋunə ngàŋə̀ àfàʼà, pɨ pyə̂ e tsaʼa ŋwùə̀ mɨsoŋə.

⁸À lə̀ pə̀ŋə̀ ntyiʼə̀ ŋwùə̀ mɨsoŋə la nshwuʼkə̀ mbɨ̀ŋmə̀ e a ɨ̀shyə̂, ndzuʼnə a Nẅùə̀, mbyiimə̀ a nɨ̀wɨghə̀ pɨ zhwuutə̀ e aŋunə àtɨ̀ghə pànkə̀nə.

⁹Lenəla, Nẅùə̀ a tsùŋə̀ ŋŋaŋə̀ e a àtɨ̀ghə, ŋŋâ e nɨ nɨ̀linə̀ nɨ nɨ tsàarə̀nə mɨ̀linə̀ mɨ̀tsùmə̀.

¹⁰Mbə̀ʼə ŋwùə̀ ntsùmə̀ a gha ndzuʼù nɨ̀linə̀ nɨ Yěsû a nɨ̀pwuurə̀, kə̀ a àtwuə̀ ɨ̀shyə̂, kə̀ a ndzùmə̀ ɨ̀shyə̂, pobə ŋuʼnə̀ a ɨ̀shyə̂ nguʼtə̀ e,

¹¹njiilo ŋwùə̀ ntsùmə̀ à pyiimə̀ a sàŋə̀ sàŋə̀ lo Yěsû Kristù la Ndòʼnə̀mbyə̂. Nshwəŋə̀ a lenəla ŋŋâ àghuʼtə̀ ambo Tǎ Nẅùə̀koʼò.

¹²Lenəla nɨ pɨlyimə ɨ̀pâ nɨ ǹkòŋə̀nə, tyìʼə̀ tsaʼnə nɨ̀ lə̀ pənə ndzuʼnə̀ mə̀ nkwùə̀ nɨ ndə̀ pənə pə̀ənə̀ la, a pòŋə̀ lo nɨ̀ chi ntsùŋə̀ ndzuʼnə̀ mə̀ tɨ̀tsòŋə̀ nɨ ka mbə mə̀ pə̀ənə̀. Nɨ̀ pə nɨ àkẅàrə̀ Nẅùə̀, mmə ngwùrə̀ mbə̀ʼə nɨ̀chwarə̀ ɨwɨghə â koʼò mbwùumə̀,

¹³ntiinə Nẅùə̀ à wa ŋŋâ ntɨŋmə̀ lo nɨ̀ tə ngɨ̀rə̀ pə mɨ̀nwùə̀ ma nɨ à tàʼnə, nkɨ mmə ŋŋâ ɨ̀tɨ̀ŋnə̀ lo nɨ tə ngɨ̀rə̀ tyìʼə̀ mɨ̀nwùə̀ ma nɨ mɨ pòŋə̀nə la.

¹⁴Nɨ ghɨ̀rə̀ ànwùə̀ àtsùmə̀ tɨghu nɨ̀ lẅùmpə̀ kə̀ ntànkə̀.

¹⁵Nɨ̀ tə mmə ngɨ̀rə̀ a lenə ŋwùə̀ a laʼa fèrə̀ e a wɨghə apə̀, nɨ̀ tyiʼə̀ mbə ɨ̀poonə̀ pɨ Nẅùə̀ pɨ̀laanə̀nə nɨ pɨ chyə̂nə a tɨ̀tɨ̀rə̀ ngàŋə ngɨ̀rə̀ ɨ̀nwùə̀ tɨ̀pòŋə̀. Nɨ̀ chyə̂ amwuə pànə̀ pɨ nɨ pobə pa ngɨ̀rə̀ a ghobə pə tɨ̀pòŋə̀ la, tsaʼa pɨsaŋə nɨ pèrə pa ntâ àtɨ̀ghə nɨ ɨ̀twuʼə̀.

¹⁶Nɨ̀ ẅìimə̀ a àshwəŋnə̀ Nẅùə̀ zə nɨ a za ŋŋâ nɨ̀chyə̂mbyə̂ ambo pànə̀ la â tɨ̀ŋnə̀ mbə̀ʼə a ghǎ mbə njyə̂ nɨ Kristù ǎ kẅirə̀ tô la, m̀bə nɨ nɨ̀ghaʼà a nɨ zəənə̀ lo ka àfàʼà mə̀ a lə̀ lèrə̀ àfǐfǐ.

¹⁷Tsaʼnə nɨ̀ nùŋə̀nə mɨ̀ntɨŋmə̀ ɨ̀mɨghə aŋunə Nẅùə̀ la, a kɨ mbə la tsaʼa àzwuumə̀ nɨ̀shwàʼà[1], a tə mbə pə lo pɨ̀ zhwuutə̀ mə̀ ndòo àləəmə̀ mbɨ̀ŋmə̀ mə̀ nkẅìrə̀ àtwuə̀ àzwuumə̀ nɨ̀shwàʼà zə̀, yi mbɨ̀ŋmə̀ mə̀ ɨ̌ pòŋə̀, pə̀ənə̀ pɨ̀tsùmə̀ pə nɨ nɨ̀ghaʼà.

¹⁸A tə pə a lenə, nɨ̀ pə nɨ nɨ̀ghaʼà tsaʼa mɨ̀ŋə̀.

¹⁹Ndòʼnə̀mbyə̂ Yěsû à tə mbyiimə̀ ǹfaʼa ntsàa a Timotì ambo pɨghə mbə̀ʼə â tô ndzəənə̀ a wɨghə nkẅirə̀ ntô nshwəŋə̀ mə̀ tsaʼnə nɨ̀ pənə mbə̀ʼə ntɨŋmə̀ mə̀ ɨ pə nɨ nɨ̀ghaʼà.

²⁰Ka ŋònə̀ ɨ̀tse a pə e ghu tsaʼa Timotì nɨ à pənə nɨ ntɨŋmə̀ aŋunə pɨghə tsaʼa mɨ̀ŋə̀ mmə ntàʼà lo nɨ̀ chyə̂ ɨ̀shìʼnə̀.

²¹Ŋwùə̀ ntsùmə̀ à wa nkwàŋə̀ pə àze, ngɨ̀rə̀ pə ànwùə̀ nɨ ǎ yèmpə̀ pə mbɨ̀ŋmə̀ e, ka pə ghɨ̀rə̀ e ànwùə̀ nɨ Yěsû Kristù à tàʼnə.

²²La ngə̀ aŋunə Timotì, nɨ̀ zhyə̂ a ŋwùə̀ nɨ à pənə ẅèrə, nkɨ nzhyə̂ ndwuumə̀ nɨ à fàʼnə pəə ze tsaʼa tǎ pobə moonə̀ a nɨ sìimə̀ ntwuumə̀ ghù ɨ̀shìʼnə̀ wə̀.

²³Lə̌ ɨ̀sùmə nɨ ǹkwàŋə̀nə lo twuumə̀ e ambo pɨghə tyìʼə̀ tsaʼnə mbɨ zəənə̀ mɨ̀nwùə̀ mə ngyìinə̀ a pàa mɨ̀ŋə̀.

²⁴La ngə̀ aŋunə mɨ̀ŋə̀, ǹdanə nnùŋə̀ ntɨŋmə̀ aŋunə Ndòʼnə̀mbyə̂ mbyiimə̀ lo nkwùə̀ ɨpaa ǹtô àzâ ambo pɨghə.

²⁵Ǹdzəənə̀ a pòŋə̀ lo n̂tsàa a ndyimə mə̀ Epaphroditus â kẅirə̀ nkwə̂ ambo pɨghə. A ze wa nɨ pəə ze fàʼnə nkɨ mbwuutə̀ ndzòŋnə̀ ntsòo wə̀. A kɨ mbə ŋâ ambo pànə̀ pɨ̀tsùmə̀, nkɨ mbə ze wa nɨ nɨ̀ lə̀ twuumə̀nə e lo â tô ngyèmpə̀ mə̀ ŋŋâ ɨ̀pwuumə̀ pyə̀ nɨ ǹtàʼnə.

²⁶À wə̀ ngyìi a nɨ kẅirə̀ ndzəənə̀ a wɨghə nkɨ mbə nɨ àsòmnə̀ ntiinə nɨ̀ lə̀ zuʼnə lo à lə̀ pə ngòonə̀.

²⁷A tyiʼə̀ nkǔŋə nkuŋə lo à pə ngòonə̀ tə ntyiʼə̀ a nɨ kwɨghə̀. La Nẅùə̀ a koorə̀ mɨ̀lɨŋə̀ ɨ̀me, ka koorə̀ e pə ndàʼà mɨ̀lɨŋə̀ ɨ̀me, à lə̀ kɨ nkoorə̀ mɨ̀lɨŋə̀ ɨ̀mâ lo kò yɨ̀tse ngəʼə̀ ɨ̀ tô nkẅìʼnə̀ àtwuə̀ zhyə̀ nɨ m̀bənə amwuə.

²⁸Ǹdanə tàʼà lo tsàa e ambo pɨghə mbə̀ʼə nɨ̀ ghaʼà a nɨ chi ndzəənə̀ e, ntɨŋmə̀ mə̀ ɨ̂ kɨ mbotə̀.

²⁹À tə ntô, nɨ̀ kẅiirə̀ e tsaʼa ndyimə a ndzùmə̀ Ndòʼnə̀mbyə̂ nɨ nɨ̀ghaʼà. A pòŋə̀ lo nɨ̀ ŋâ àghuʼtə̀ ambo pànə̀ tsaʼa pə̀,

³⁰ntiinə à lə̀ pyàa a ntswùə̀ nɨ̀wɨghə̀ ntii àfàʼà Kristù nkɨ ŋŋâ mə̀ nɨ àyèmpə̀ zhyə̀ nɨ mbə̀ʼə nɨ̀ lə̀ ŋâ a wɨghə apə̀.