Read Pinyin Filipì 3 Bible Online

Filipì 3 - Pinyin bible

Filipì 3

¹A nɨ lẅùutə̀ àŋwàʼnə̀ zə nɨ pɨlyimə ɨ̀pâ, nɨ̀ pə nɨ nɨ̀ghaʼà ntiinə nɨ̀ chyə̂nə mbə pànə̀ pɨ Ndòʼnə̀mbyə̂. Ka a pə e ngəʼə̀ ɨ̀tse ambo mɨ̀ŋə̀ a nɨ chi ŋŋwàʼnə̀ ànwùə̀ nɨ ndə̀ ŋwàʼnə̀ mə ambo pɨghə ntiinə a pɨ zòŋə̀ lo kò nɨ̀ kwuunə̀ amwuə ngəʼə̀.

²Nɨ̀ zhìʼtə̀ a wɨghə aŋunə pànə̀ nɨ pobə ghɨ̀rə̀nə mɨ̀nwùə̀ mɨ tɨ̀pòŋə̀, ngyìinə̀ nshwəŋə̀ lo ŋwùə̀ a tə kɨ pə ŋwùə̀ Nẅùə̀ pɨ zə̀ərə̀ e zaʼà.

³Mbə̀ʼnə a pənə pə̀ənə̀ mbə pànə̀ nɨ Nẅùə̀ a zə̀ərə̀ mə a ghobə amwuə ndwuumə̀ nɨ pɨ pyə̀nə mbə zə̀ərə̀. Àzhwùə̀ e a tyiʼə̀ ngɨ̀rə̀ pə̀ənə̀ ghuʼtə̀ e, mbə nɨ nɨ̀ghaʼà, ntiinə ka pə̀ənə̀ ɨ̀poonə̀ pɨ Kristù Yěsû nùŋə̀ a wəənə̀ ntɨŋmə̀ aŋunə mɨ̀nwùə̀ mɨ mbòbə̀ mbɨ̀ŋmə̀.

⁴Ǹkɨ nnùŋə̀ ntɨŋmə̀ mə̀ aŋunə mɨ̀nwùə̀ mɨ mbòbə̀ mbɨ̀ŋmə̀. Ŋònə̀ ɨ̀tse à tə pəla mmə nkwàŋə̀ lo mbə̀ʼə a nùŋə̀ ntɨŋmə̀ e aŋunə mɨ̀nwùə̀ mɨ mbòbə̀ mbɨ̀ŋmə̀, yi mbə̀ʼə ǹnùŋə̀ ntsàarə̀ e.

⁵A nɨ zùŋə̀ mbòomə ɨ̀wəə, pɨ lə̀ zə̀ərə̀ mə̀ tsaʼnə ndə̀ pənə njyə̂ nɨ̀fàamə̂, mbə ŋwùə̀ Israel, nfurə̀ amwuə ngẅàrə̀ Benjàminə̀, mbə ngotə môHibrù. A nɨ zùŋə̀ a mbòomə pɨ̀Jew, ndə̀ nùŋə̀ a ẅèrə tsaʼa ŋwùə̀ Farìsî.

⁶Ngə̀ aŋunə a nɨ zùŋə̀ a ànwùə̀ Nẅùə̀, ndə̀ tə̂ àtwuə̀ a nɨ tòmnə̀ ɨ̀poonə̀ pɨ Kristù. A nɨ ghɨ̀rə̀ mɨ̀nwùə̀ mɨ təəmə̀nə ndzùŋə̀ a mbòomə Nẅùə̀, ka ndə̀ pə mə̀ nɨ àwɨ̀ghə̀ ànwùə̀.

⁷La mɨ̀nwùə̀ mèrə mə nɨ ndə̀ zəənə̀nə tsaʼa àpìi lə, ndòo a mèrə tɨ̀tsòŋə̀ aŋunə pî ntii Kristù.

⁸A nɨ kẅìʼnə̀, ndòo ɨ̀pwuumə̀ ɨ̀tsùmə̀ nɨ m̀bənə nɨ pèrə aŋunə pî, ngwaʼà a pèrə ntiinə ntàʼà a nɨ zhyə̂ a Kristù Yěsû Ndòʼnə̀mbyə̂ mə̀, nɨ à pənə ànwùə̀ nɨ a pòŋə̀nə ntsàarə̀ ànwùə̀ àtsùmə̀. Ntii Kristù, ǹgwaʼà ɨ̀pwuumə̀ ɨ̀tsùmə̀ nɨ pèrə pənə amwuə àtwuə̀ ɨ̀shyə̂ zə, ntyiʼə̀ ndòo ɨ̀pwuumə̀ ɨ̀tsùmə̀ tsaʼa ntsɨ̀ŋnə mbə̀ʼə pə nɨ Kristù,

⁹pwuutə̀ pəə ze pə taʼà ŋwùə̀. Ka mɨ̀nwùə̀ ɨ̀mâ mɨ təəmə̀nə chi mbə e pə ntiinə ǹdzùŋə̀nə a mbòomə. Mɨ chyə̂ pə ntiinə ǹnùŋə̀nə ntɨŋmə̀ mə̀ aŋunə Kristù, nkɨ mbə mɨ̀nwùə̀ mɨ təəmə̀nə nɨ Nẅùə̀ à ŋânə a nɨ làŋə̀ a ndzùmə̀ àpyiimə̀ ntɨŋmə̀.

¹⁰Ǹtàʼà a nɨ zhyə̂ a Kristù, a nɨ pə nɨ ɨ̀tɨ̀ŋnə̀ nɨ Nẅùə̀ à lə̀ ŋânə ambo Yěsû a zhwuumə̀ a nɨ̀wɨghə̀. Ǹkɨ ntàʼà a nɨ zəənə̀ ngəʼə̀ tsaʼa ze, kɨ kwɨghə̀ tsaʼa ze,

¹¹mbə̀ʼə àlàŋə a tə mbəla mbə ghu, nga nzhwuumə̀ a za nɨ̀wɨghə̀.

¹²Ka ǹtàʼà shwəŋə̀ mə̀ pə lo mbə mə nɨ ɨ̀pwuumə̀ nɨ ǹtàʼnə a nɨ pə nɨ pèrə, ka kɨ mə tàʼà shwəŋə̀ mə̀ pə lo Nẅùə̀ à fàʼà mə àfàʼà aŋunə mɨ̀ŋə̀ mmyàanə̀, ngwə̀ nkyiitə̀ pə nɨ ɨ̀tɨ̀ŋnə̀ mə̀ a nɨ pə nɨ pèrə ntiinə Kristù Yěsû à ẅìimə̀ mə mə̀ ǹtyiʼə̀ ɨye.

¹³Pɨlyimə ɨ̀pâ, ka ǹkwàŋə̀ mə̀ lo m̀byàa mə alyiʼə nɨ m̀bənə koʼò pyàa. La taʼà ànwùə̀ a pə ghu nɨ m̀bənə ghɨ̀rə̀; a pə lo, mbɨ myàʼtə̀ ɨ̀pwuumə̀ ɨ̀tsùmə̀ nɨ pənə a ndzùmə̀ mɨ̀ŋə̀ kyiitə̀ ɨ̀tɨ̀ŋnə̀ mə̀ zùŋə̀ pyə̀ nɨ pənə a mbyə̀.

¹⁴Ngwə̀ nkɨ̀ɨrə̀ tyìʼə̀ nɨ ɨ̀tɨ̀ŋnə̀ ndèrə̀ a alyiʼə nɨ ǹtə̂nə ɨ̀myə̂ ɨ̀mâ ghu la, mbə̀ʼə ghə̀ kẅiirə̀ mɨ̀ntsoʼnə̀ mɨ àfàʼà ɨ̀mâ myə̀ nɨ Nẅùə̀ à fuŋə̀nə mə̀ lo n̂koʼò nkẅiirə̀ a nɨ làŋə̀ a ndzùmə̀ Kristù Yěsû.

¹⁵A pòŋə̀ lo pə̀ənə̀ pa nɨ pə̀ənə̀ kẅuə̀ mə nkùʼù, ntəəmə̀ ntɨ̀ŋnə̀ aŋunə Kristù la, pə̀ənə̀ pə nɨ àkwàŋə̀ moʼo. Pɨghə pɨ̀tse tə mbəla mbə nɨ àkwàŋə̀ yè nyaanə amwuə pɨghə yi Nẅùə̀ a pɨ ghɨ̀rə̀ nɨ̀ zhyə̂.

¹⁶La ànwùə̀ yè tɨ̀ŋnə̀ a pə lo pə̀ənə̀ ẅìimə̀ a zhyə̀ za nɨ pə̀ənə̀ pə mə nɨ zèrə la, ngẅìimə̀ a tɨ̀ŋnə̀.

¹⁷Pɨlyimə ɨ̀pâ, nɨ̀ zùŋə̀ mbòbə̀ mɨ̀kwùə̀ ɨ̀zâ tsaʼa pɨ̀tse pə̀ənə̀, ngɨ̀rə̀ mɨ̀nwùə̀ nɨ pəə ghɨ̀rə̀nə, nkɨ nkyiitə̀ a nɨ tsùŋə̀ nnaŋə̀ pə̀ənə̀ nɨ pɨ chyə̂nə tsaʼnə pəə lə̀ tàʼnə lo nɨ chyə̂.

¹⁸Nshwəŋə̀ mə a zə̀ nkẅirə̀ nshwəŋə̀ tə ngwə̀ nshwəŋə̀ tɨ̀tsòŋə̀ lə nɨ nchyə a ɨ̀myə̂ mɨ̀ŋə̀ ntiinə pànə̀ pɨ̀tse pə ghu nɨ nɨ̀chyə̂mbyə̂ ɨ̀ghobə a ghɨ̀rə̀nə pobə pə ngàŋə kɨpaanə Kristù aŋunə nɨ̀wɨghə̀ e aŋunə àtɨ̀ghə pànkə̀nə.

¹⁹Pobə ghǎ lẅùutə̀ pə amwuə àkɨɨnə̀ ɨ̀mǔ ntiinə pobə lòo mɨ̀pùmə̀ ɨ̀mobə ngɨ̀rə̀ a nẅùə̀ ɨghobə ghu, mmə nkoʼò mbɨ̀ŋmə̀ aŋunə ɨ̀pwuumə̀ nɨ pə ntô nɨ ɨ̀sɨŋnə̀ aŋunə pobə, àkwàŋə̀ àzobə a pə pə aŋunə ɨ̀pwuumə̀ nɨ mbòbə̀ mbɨ̀ŋmə̀ ɨ tàʼnə.

²⁰La ngə̀ aŋunə pə̀ənə̀, àlaʼà àzəənə̀ a chyə̂ a nɨ̀pwuurə̀, pə̀ənə̀ kɨ mmə mbyabə̀ a ngàŋə̀ nchwarə̀ ɨ̀wəənə̀, Ndòʼnə̀mbyə̂ Yěsû Kristù lo a furə̀ ghu ntô.

²¹A ghǎ tô lòo ɨ̀tɨ̀ŋnə̀ wa nɨ ɨ ghɨ̀rə̀nə lo ɨ̀pwuumə̀ ɨ̀tsùmə̀ zuʼnə̀ e la, kẅebə̀ ɨ̀porə̀ mbɨ̀ŋmə̀ ɨ̀zəənə̀ zə ɨ pə̀ŋə̀ ntyiʼə̀ tsaʼa zhyə̀ za nɨ ɨ pòŋə̀nə tə ntsìinə̀.