Read Pinyin Filipì 4 Bible Online

Filipì 4 - Pinyin bible

Filipì 4

¹Pɨlyimə ɨ̀pâ, ǹdanə nkòŋə̀ a wɨghə nkɨ mmə ngyìi a nɨ zəənə̀ a wɨghə mbə̀ʼnə nɨ̀ ghɨ̀rə̀ mə ntɨŋmə̀ mə̀ pə nɨ nɨ̀ghaʼà, pɨ gha ntuŋə̀ ngùʼu mə̀ ntii wɨghə. Pɨ̀swùə ɨ̀pâ nɨ ǹkòŋə̀nə, nɨ̀ təəmə̀ ntɨ̀ŋnə̀ aŋunə Ndòʼnə̀mbyə̂.

²Mbuʼù mbô ambo Euodia nɨ Syntyche lo pobə̂ pwuutə̀ mbə taʼà ŋwùə̀ tsaʼa pɨlyimə a ndzùmə̀ Ndòʼnə̀mbyə̂.

³M̀buʼù mbô ambo ghò mbǎ ngàŋə̀ àkwùə̀ nɨ̀yìinə̀ mə̀, lo wə̀ yèmpə̀ pə̀ngyə̌ pə ntiinə pobə fàʼnə pəə pɨ pobə nɨ Klemènə̀, nɨ pɨ̀tse pə̀ənə̀ nɨ mɨ̀linə̀ ɨ̀mobə pənə amwuə àŋwàʼnə̀ nɨ̀chyə̂mbyə̂ a nɨ sìimə̀ ntwuumə̀ ghù ɨ̀shìʼnə̀ wə̀.

⁴Nɨ̀ pə nɨ nɨ̀ghaʼà aŋunə Ndòʼnə̀mbyə̂ nkwùə̀ ɨ̀tsùmə̀. Nchi nkẅirə̀ nshwəŋə̀ ambo pɨghə lo nɨ̀ pə nɨ nɨ̀ghaʼà.

⁵Nɨ̀ ghɨ̀rə̀ pànə̀ pɨ̀tsùmə̀ zəənə̀ àẅìimə̀ ntɨŋmə̀ àzɨghə ntiinə nkwùə̀ nɨ̀tô Ndòʼnə̀mbyə̂ ɨ zə ntyiʼə̀ a mbô.

⁶Kò nɨ̀ kɨ ntòmnə̀ mbɨ̀ŋmə̀ ɨ̀zɨghə mbə̀ʼə ànwùə̀ àtse. Nɨ̀ pə nchàʼtə̀ a Nẅùə̀ mbyiitə̀ àzwuumə̀ àtsùmə̀ nɨ nɨ̀ tàʼnə, mbə nɨ ntɨŋmə̀ a nɨ ŋâ a mɨyàa aŋunə àzwuumə̀ àtsùmə̀ nɨ nɨ̀ pyiitə̀nə.

⁷Nɨ̀ tə pəla mmə ngɨ̀rə̀ a lenə, àporə̀porə̀ Nẅùə̀ nɨ a tsàarə̀nə àzhìʼtə̀ ŋwùə̀ mɨsoŋə a pɨ ghɨ̀rə̀ mɨ̀ntɨŋmə̀ ɨ̀mɨghə nɨ ɨ̀kwàŋə̀ ɨ̀pɨghə ɨ pə aŋunə Yěsû Kristù.

⁸A nɨ lẅùutə̀ nɨ pɨlyimə ɨ̀pâ, nshwəŋə̀ ambo pɨghə lo nɨ̀ tə̂ àtwuə̀ aŋunə mɨ̀nwùə̀ mɨ nkǔŋə nkuŋə pobə mɨ̀nwùə̀ nɨ mɨ kùʼnə̀nə lo pɨ ghuʼtə̀, myə̀ nɨ mɨ təəmə̀nə, myə̀ nɨ mɨ laanə̀nə pobə myə̀ nɨ pɨ kòŋə̀nə nɨ myə̀ nɨ mɨ pòŋə̀nə. Zhyə̀ nɨ a pòŋə̀nə tə ndẅùutə̀ kə̀ zhyə̀ nɨ a kùʼnə̀nə lo pɨ yetə̀; a pòŋə̀ lo nɨ̀ kwàŋə̀ mbə̀ʼə mɨ̀nwùə̀ mèrə mə.

⁹Nɨ̀ mə ngɨ̀rə̀ mɨ̀nwùə̀ ma myə̀ nɨ ǹnèrə̀nə ambo pɨghə, nɨ myə̀ nɨ nɨ̀ kẅiirə̀nə ambo mɨ̀ŋə̀, kə̀ myə̀ nɨ nɨ̀ zuʼnə a ntswùə̀ mɨ̀ŋə̀, kə̀ myə̀ nɨ nɨ̀ zəənə̀nə ambo mɨ̀ŋə̀. Nɨ̀ chyâ a mèrə amwuə mɨ̀fàʼnə ɨ̀mɨghə. Nẅùə̀ àporə̀porə̀ ǎ tyiʼə̀ pə pɨghə pɨ pobə.

¹⁰Ǹgaʼà tyìʼə̀ tɨsɨŋnə aŋunə Ndòʼnə̀mbyə̂ ntiinə aŋunə ntyə̌ sàa nɨ tàʼà mə àlàŋə a nɨ yèmpə̀ mə̀ ka zəənə̀ a wɨghə, la nɨ̀ kùmə̀ mbə nɨ zèrə tɨ̀tsòŋə̀ wə̀, nnèrə̀ amwuə ndwuumə̀ nɨ nɨ̀ kwàŋə̀nə a nɨ yèmpə̀ mə̀.

¹¹Ka ǹshwəŋə̀ mə̀ pə ntiinə m̀buŋə̀nə àzwuumə̀ àtse. M̀mèrə̀kə̀ mə a nɨ kẅiirə̀ ànwùə̀ àtsùmə̀ nɨ a tônə ambo mɨ̀ŋə̀ nɨ nɨ̀ghaʼà.

¹²Ǹzhyə̂ mə a nɨ ẅìimə̀ mbɨ̀ŋmə̀ chyə̂ tɨ àzwuumə̀ kə̀ nkwùə̀ nɨ ɨ̀pwuumə̀ pənə ghu nnoʼò. Ǹdanə̀ mə a nɨ chyə̂ amwuə mbòomə ntsùmə̀; amwuə nkwùə̀ nɨ àzwuumə̀ a pənə ghu kə̀ nkwùə̀ nɨ ka a pə e ghu, farə amwuə nkwùə̀ nɨ ɨ̀pwuumə̀ noʼnə kə̀ nkwùə̀ nɨ ɨ̀pwuumə̀ kɨ̂nə.

¹³Ǹgwa ngɨ̀rə̀ ànwùə̀ àtsùmə̀ ndàŋə̀ a ndzùmə̀ ze wa nɨ à wa ŋŋâ mə̀ nɨ ɨ̀tɨ̀ŋnə̀.

¹⁴La, a pòŋə̀ tsaʼnə nɨ̀ lə̀ yèmpə̀nə mə̀ ndòo ngəʼə̀ mə̀ ɨ̀ tyiʼə̀ ɨ̀zɨghə la.

¹⁵Pɨghə pànə̀ pɨ Filipì àtwuə̀ mbɨ̀ŋmə̀ ɨ̀zɨghə nɨ̀ zhyə̂ ndwuumə̀ nɨ ndə̀ pìʼnə̀nə nsìimə̀ ntwuumə̀ ghù ɨ̀shìʼnə̀ wə̀ nkwùə̀ nɨ ndə̀ furə̀nə a Màsèdonyà; ka àshwatə̀ ɨ̀poonə̀ pɨ Kristù àtse a lə̀ pə e ghu nɨ a lə̀ pyiimə̀nə a nɨ kwuunə̀ ɨ̀shiʼə̀ pəə pɨ pobə a nɨ ŋâ kə̀ nkẅiirə̀ ndàŋə̀ e a wɨghə,

¹⁶ntiinə nkwùə̀ nɨ ndə̀ pənə pə a Tèsàlonikà la, nɨ̀ lə tsàa àyèmpə̀ ambo mɨ̀ŋə̀ nkẅirə̀ ntsàa.

¹⁷Ka a pə e pə lo ntàʼà ɨ̀pwuumə̀ pyə̀ nɨ nɨ̀ ŋânə ambo mɨ̀ŋə̀ la. Ntàʼà pə lo pɨ chi nkẅìʼnə̀ ntyaŋə̀ a wɨghə.

¹⁸Ɨ̀pwuumə̀ pa pyə̀ nɨ nɨ̀ lə̀ tsàanə ambo mɨ̀ŋə̀ la lə̀ noʼò ntsàarə̀ ndwuumə̀ nɨ ndə̀ tàʼnə. Ka ǹchi mbuŋə̀ mə̀ àzwuumə̀ àtse ntii ɨ̀pwuumə̀ pa pyə̀ nɨ nɨ̀ lə̀ tsàanə ambo Epaphroditus lo â tô ŋŋâ wə̀, pèrə pə ɨ̀pwuumə̀ àchàʼtə̀ Nẅùə̀ pɨ àzhyǎ, nkɨ mbə ɨ̀pwuumə̀ nɨ̀shwàʼà nɨ Nẅùə̀ à kòŋə̀nə.

¹⁹Nẅùə̀ mə̀ a wa nɨ ɨ̀pwuumə̀ àghuʼtə̀ pɨ̀noʼnə; a pɨ ŋâ ɨ̀pwuumə̀ ɨ̀tsùmə̀ nɨ pèrə puŋə̀nə ambo pɨghə a nɨ làŋə̀ a ndzùmə̀ Kristù Yěsû.

²⁰Àghuʼtə̀ tɨ ndànə̀ â pə ambo Nẅùə̀ Tǎ ɨ̀wə̀ənə̀ ngoŋə̀ nɨ nkuŋə̀ nɨ nkuŋə̀. Amen.

²¹Nɨ̀ chàʼtə̀ pànə̀ pɨ Nẅùə̀ pɨ̀tsùmə̀ a ndzùmə Kristù Yěsû. Pɨlyimə nɨ pɨ pənə a nɨ̀ghə̂ pəə pɨ pobə pə nkɨ nchàʼtə̀ a wɨghə.

²²Pànə̀ pɨ Nẅùə̀ pɨ̀tsùmə̀ chàʼtə̀ a wɨghə, nkɨ tô pyə̀ nɨ pɨ pənə a ndâ Kaasà pobə tsùŋə̀ chàʼtə̀ a wɨghə.

²³Àpòŋə̀ ntɨŋmə̀ Ndòʼnə̀mbyə̂ Yěsû kristù a pə aŋunə pɨghə pɨ̀tsùmə̀.