Read Pinyin Kòlosè 2 Bible Online

Kòlosè 2 - Pinyin bible

Kòlosè 2

¹Ǹtàʼà ghɨ̀rə̀ nɨ̀ zhyə̂ tsaʼnə ngwə̀ nkyiitə̀ nfàʼà mbə̀ʼə wɨghə pobə pɨ pànə̀ nɨ pɨ pənə a mbòmpə àlaʼà Laodicea nɨ pɨ̀tse pànə̀ nɨ pɨ laʼa mə ndzəənə̀ ghobə a gha apə̀.

²Ǹtàʼà a lenə la mbə̀ʼə mɨ̀ntɨŋmə̀ ɨ̀mobə tɨ̀ŋnə̀ njiilo ɨ̀kòŋnə̀ nɨ ɨ pənə a tɨ̀tɨ̀rə̀ pɨghə ɨ̂ pwuutə̀ a wɨghə ngɨ̀rə̀ nɨ pə taʼà ŋwùə̀. Ǹtàʼà lo nɨ̀ mə mbyabə̀ tsaʼa pànə̀ nɨ pobə zhyə̂nə ànwùə̀ mbə̀ʼə Nẅùə̀ nɨ ka pànə̀ lə̀ zhyə̂ a ghobə. Ànwùə̀ ghu a pə Kristù àtwuə̀ mbɨ̀ŋmə̀ e.

³A ze wa nɨ à wa ngɨ̀rə̀ pə̀ənə̀ zhyə̂ mɨ̀nwùə̀ mɨ Nẅùə̀ mɨ̀tsùmə̀. Mɨ̀nwùə̀ mèrə mə la mborə̀ Nẅùə̀.

⁴Ǹshwəŋə̀ ambo pɨghə lo kò nɨ̀ pyiimə̀ a wɨghə lo ŋwùə̀ â lòo ɨ̀shwəŋnə̀ ndòo nfɨ̀kə̀ a wɨghə ghu, kə̀ pèrə pòŋə̀ pə ɨla ghu.

⁵Mbaa pə tsaʼnə ka mbə mə̀ pə̀ənə̀ nɨ mbɨ̀ŋmə̀ mə̀ la, ngwə̀ pə̀ənə̀ amwuə àzhwùə̀. Mbaa pə tsaʼnə ka mbə mə̀ pə̀ənə̀ la, ǹgaʼà a nɨ zəənə̀ tsaʼa àpyiimə̀ ntɨŋmə̀ àzɨghə aŋunə Kristù a zə̀ nkẅuə̀ mmə ntɨ̀ŋnə̀.

⁶Tsaʼnə nɨ̀ pyiimə̀nə lo Kristù Yěsû a Ndòʼnə̀mbyə̂ ɨwɨghə la, nɨ̀ tə nchyə̂ a nɨ̀chyə̂mbyə̂ wa nɨ à tàʼnə la.

⁷Àpyiimə̀ ntɨŋmə̀ àzɨghə a tɨ̀ŋnə̀ la ntii mɨ̀nwùə̀ nɨ pɨ lə̀ nèrə̀nə a wɨghə nɨ mèrə. Nɨ̀ mə ŋŋâ a mɨyàa ambo Nẅùə̀ nkẅùə̀ ɨ̀tsùmə̀ aŋunə ànwùə̀ àtsùmə̀

⁸Nɨ̀ zhìʼtə̀ a wɨghə mbə̀ʼə ŋònə̀ ɨ̀tse a lòo a wɨghə tsaʼa ɨ̀pùʼù a nɨ zùŋə̀ àkɨ̀ghə̀ àzhìʼtə̀ pɨ̀chwìrə̀ za nɨ pobə pa nnèrə̀ a wɨghə nɨ zèrə la. Ànwùə̀ nɨ pobə nèrə̀nə a wɨghə nɨ zèrə la ànwùə̀ nɨ pobə lòonə ambo pɨ̀tǎ pɨ̀tǎ ɨ̀pobə. Ànwùə̀ ghu a pə ndzùŋə̀ la mbòomə mɨ̀nwùə̀ mɨ àtwuə̀ ɨ̀shyə̂. Ànwùə̀ nɨ pobə pa nnèrə̀ a furə̀ la ambo pànə̀ pɨ àtwuə̀ ɨ̀shyə̂ ka à furə̀ e ambo Kristù.

⁹Kò nɨ̀ pyiimə̀ a wɨghə pɨ̀nèrə̀ pɨ̀ghu fɨ̀kə̀ a wɨghə ntiinə mɨ̀tɨ̀ŋnə̀ mɨ Nẅùə̀ pobə mbòomə e ntsùmə̀ ɨ̀ za amwuə Kristù nɨ à pənə ŋwùə̀ mɨsoŋə.

¹⁰Lenəla, nɨ̀ pə nɨ nɨ̀chyə̂mbyə̂ nɨ à lẅenə̀nə ntiinə nɨ̀ pənə pɨghə pɨ Kristù. A kɨ mbə àtwuə̀ mɨ̀tɨ̀ŋnə̀ mɨ̀tsùmə̀ pobə pànə̀ pɨ̀tsùmə̀ nɨ pobə pa mbuʼtə̀.

¹¹Nkwùə̀ nɨ nɨ̀ lə̀ pwuutə̀nə mbə taʼà ŋwùə̀ pɨghə pɨ Kristù la, à lə̀ zə̀ərə̀ a wɨghə. Ka zə̀ərə̀ e a wɨghə pə tsaʼnə pànə̀ pɨ mɨsoŋə pa ndzə̀ərə̀ pə̀ənə̀. La Kristù mbə ŋònə̀ nɨ à lə̀ zə̀ərə̀nə a wɨghə amwuə Àzhwùə̀ nkɨ nfuukə̀ a tɨ̀pòŋə̀ ɨwɨghə.

¹²Nkwùə̀ nɨ pɨ lə̀ ŋânə a wɨghə nɨ àkẅiirə̀ nchyə, a lə̀ pə tsaʼa nɨ̀ lə̀ kwɨghə̀ pɨ tẅəŋə̀ a wɨghə, Nẅùə̀ a zhwuumə̀ a wɨghə pɨ Kristù. A lə̀ pə a lenə ambo pɨghə la ntiinə nɨ̀ lə̀ pyiimə̀ lo mɨ̀tɨ̀ŋnə̀ mɨ Nẅùə̀ nɨ mɨ lə̀ zhwuumə̀nə a Kristù ghǎ kɨ zhwuumə̀ a wɨghə.

¹³À lə̀ pə nkwùə̀ ɨ̀tse la, nɨ̀ pə tsaʼa ɨ̀kwuə̀ pə̀ənə̀ ntiinə nɨ̀ lə̀ pəʼnə a mbòomə Nẅùə̀. A lə̀ pə nkwùə̀ ghu la Kristù a pirə̀ e tɨ fuukə̀ a tɨ̀pòŋə̀ ɨ̀tse a mbɨ̀ŋmə̀ pɨghə. La tɨ̀tsòŋə̀, Nẅùə̀ à ŋâ a wɨghə nɨ nɨ̀chyə̂mbyə̂ tsaʼnə à zhwuumə̀nə a wɨghə pɨghə pɨ Kristù nkɨ ndə̀ənə̀ a tɨ̀pòŋə̀ ɨwɨghə la.

¹⁴A lə̀ pə̀ tsaʼa lo Nẅùə̀ à lə̀ pyaatə̀ a tɨ̀pòŋə̀ ɨ̀wə̀ənə̀ nɨ pɨ lə̀ ŋwàʼnə̀nə amwuə àŋwàʼnə̀ ka ẅèrə a chi mbirə̀ e ghu. Nẅùə̀ à lə̀ paanə̀ a tɨ̀pòŋə̀ ghu aŋunə àtɨ̀ghə pànkə̀nə tyìʼə̀ tsaʼnə pɨ lə̀ paanə̀nə a Kristù aŋunə àtɨ̀ghə pànkə̀nə a kwɨghə̀ la.

¹⁵Nẅùə̀ à lə̀ tsàarə̀ mɨ̀tɨ̀ŋnə̀ pobə pɨ pànə̀ nɨ pobə mənə mbuʼtə̀ àtwuə̀ ɨ̀shyə̂. Ŋwùə̀ ntsùmə̀ à lə̀ zəənə̀ mɨ̀tɨ̀ŋnə̀ ɨ̀me a nɨ làŋə̀ a ndzùmə̀ nɨ̀wɨghə̀ Kristù aŋunə àtɨ̀ghə pànkə̀nə.

¹⁶Tsaʼnə a pənə lə la, kò nɨ̀ pyiimə̀ a wɨghə pànə̀ tə nshwəŋə̀ ambo pɨghə lo nɨ̀ fàntə̀ ntiinə nɨ̀ wə̀ ndzɨghə̀ mɨ̀zɨghə̀ mɨ̀tse kə̀ ntiinə nɨ̀ wə̀ nnô mɨ̀lùʼù mɨ̀tse, kə̀ ntiinə nɨ̀ pənə a ɨlyiʼə nɨ̀ghaʼà pɨ̀tse, kə̀ njyə̂ nɨ̀ghaʼà aŋunə ŋwɨgrə̀ shwuə̀, kə̀ aŋunə nɨ̀ghaʼà njyə̂ àlaʼà.

¹⁷Pɨ̀mbòomə pèrə pə pɨ̀tsùmə̀ chyə̂ mbə la tsaʼa pɨləgrə nɨ pèrə̌ nèrə̀ mɨ̀nwùə̀ mɨ̀shìʼnə̀ ma nɨ Nẅùə̀ à ghǎ tsàa la. Kristù à ghɨ̀rə̀ mə mɨ̀nwùə̀ mèrə mə koʼò mbwùumə̀.

¹⁸Kò nɨ̀ pyiimə̀ a wɨghə lo ŋònə̀ ɨ̀tse â wâ a wɨghə ntiinə à wə̀ nnèrə̀ lo pɨ̀ shwuʼkə̀ mbɨ̀ŋmə̀ a ɨ̀shyə̂. Kò nɨ̀ pyiimə̀ a wɨghə lo ŋònə̀ ɨ̀tse â shwəŋə̀ lo nɨ̀ ghuʼtə̀ pəngèrə̀. Nɨ̀ tə ngɨ̀rə̀ a lenə yi nɨ̌ pî mɨntyaŋnə ma nɨ Nẅùə̀ à shwəŋə̀nə lo à ghǎ ŋâ ambo pɨghə la. Ŋònə̀ ntsùmə̀ nɨ à nèrə̀nə a lenə la à wa nshwəŋə̀ lo à wə̀ ndzəənə̀ a zèrə amwuə ndzə̀əmə̀. Mbuurə̀ ŋònə̀ zèrə zə̀ à wa nkoʼò la mbɨ̀ŋmə̀ àfǐfǐ ndzùŋə̀ ɨ̀kwàŋə̀ tɨ̀pòŋə̀ nɨ pənə a ntɨŋmə̀ ze.

¹⁹Ka mbuurə̀ ŋònə̀ zèrə zə̀ chi mmə nùŋə̀ e ntɨŋmə̀ e aŋunə Kristù wa nɨ à pənə àtwuə̀ ambo àshwatə̀ ɨ̀poonə̀ pɨ Kristù la. Tsaʼnə àtwuə̀ a za mbuʼtə̀ mbɨ̀ŋmə̀ ntsùmə̀ la, a tsaʼnə Kristù à wa mbuʼtə̀ pànə̀ pɨ̀tsùmə̀ nɨ pobə nùŋə̀nə ntɨŋmə̀ aŋunə ze njiilo pobə tyiʼə̀ taʼà ŋwùə̀. Tsaʼa mɨŋaŋə ma ndòo mɨ̀zùnkə mɨ mbɨ̀ŋmə̀ mbwuutə̀ ngɨ̀rə̀ mɨ pə taʼà ŋwùə̀ la a kɨ mbə la tyìʼə̀ tsaʼnə Kristù à shwatə̀nə pànə̀ pɨ̀tsùmə̀ nɨ pobə nùŋə̀nə ntɨŋmə̀ ɨ̀ghobə aŋunə ze a nɨ pə taʼà ŋwùə̀ a ɨ̀sùmə ze. Àshwatə̀ zèrə zə̀ a tyiʼə̀ nkẅùə̀ tsaʼnə Nẅùə̀ à tàʼnə.

²⁰A tə pə lo Kristù à lə̀ kwɨghə̀ yi nɨ̀ lə̀ kwɨghə̀ pɨghə pɨ pobə. Njiilo ka nɨ̀ chi mbirə̀ mbə wɨghə la a ɨ̀sùmə pɨ̀mbòomə pɨ àtwuə̀ ɨ̀shyə̂ zə. A tyiʼə̀ ngɨ̀rə̀ àkə lo nɨ̀ chi nchyə̂ tsaʼa pànə̀ pɨ àtwuə̀ ɨ̀shyə̂? A ghɨ̀rə̀ àkə lo nɨ̀ tə ndzuʼnə̀ pɨ̀mbòomə pə.

²¹Pɨ̀nèrə̀ mbòomə pɨ pɨ̀chwìrə̀ pa pə nshwəŋə̀ ambo pɨghə lo, “Kò wə̀ ẅìimə̀ o àzwuumə̀ zə, kò wə̀ zhwiʼì o àzwuumə̀ zə a ntswùə̀ ghò, kò wə̀ pètə̀ o àzwuumə̀ zə̀.”

²²Pɨ̀mbòomə pèrə pə pa nshwəŋə̀ la mbə̀ʼə ɨ̀pwuumə̀ pa nɨ pèrə pa mbɨ̂ mbə̀ʼə ŋònə̀ ɨ̀tse a fàʼà nɨ pèrə. Pɨ̀mbòomə pə la pɨ̀mbòomə nɨ pànə̀ pɨ mɨsoŋə kwàŋə̀nə nkɨ mmə nnèrə̀.

²³Pɨ̀mbòomə pə nɨ pànə̀ pa nnèrə̀ shwuə̀ tsaʼa àzhìʼtə̀ a zə amwuə, ntyiʼə̀ ngɨ̀rə̀ lo pobə̂ ghuʼtə̀ a Nẅùə̀. Pèrə pa nnèrə̀ pànə̀ lo pobə̂ shwuʼkə̀ mbɨ̀ŋmə̀ ɨ̀zobə ntyiʼə̀ ngɨ̀rə̀ lo mbɨ̀ŋmə̀ ɨ̀zobə zəənə̀ ngəʼə̀ ka mɨ̀zùŋə. La pànə̀ tə pəla ndzùŋə̀ pɨ̀mbòomə pèrə pə̀, pèrə yèmpə̀ e a ghobə lo pobə̂ myàʼtə̀ àzwuumə̀ nɨ mbòbə̀ mbɨ̀ŋmə̀ ɨ̀ za ntàʼà apə̀.