Read Pinyin Kòlosè 3 Bible Online

Kòlosè 3 - Pinyin bible

Kòlosè 3

¹Tsaʼnə Nẅùə̀ à lə̀ zhwuumə̀nə a Kristù aŋunə nɨ̀wɨghə̀ la, a kɨ mbə tsaʼnə nɨ̀ kɨnə nzhwuumə̀ a nɨ̀wɨghə̀ pɨghə pɨ pobə. Njiilo nɨ̀ nùŋə̀ ntɨŋmə̀ ɨ̀wɨghə pə aŋunə ɨ̀pwuumə̀ nɨ pənə a nɨ̀pwuurə̀ alyiʼə nɨ Kristù à pənə ghu a pàa àpô Nẅùə̀ yè zɨghə̀nə.

²Nɨ̀ nùŋə̀ ntɨŋmə̀ ɨ̀wɨghə pə aŋunə ɨ̀pwuumə̀ nɨ pənə a nɨ̀pwuurə̀, kò nɨ̀ nùŋə̀ a wɨghə pə aŋunə ɨ̀pwuumə̀ nɨ pənə a àtwuə̀ ɨ̀shyə̂.

³Tsaʼnə Kristù à kwɨghə̀nə la, nɨ̀ kɨ nkwɨghə̀ pɨghə pɨ pobə, lenəla nɨ̀chyə̂mbyə̂ ɨwɨghə a tyiʼə̀ ndə̀əmə̀ pobə pɨ ghu Kristù a alyiʼə nɨ Nẅùə̀ à pənə ghu.

⁴Nkwùə̀ nɨ Kristù nɨ à pənə nɨ̀chyə̂mbyə̂ ɨ̀wə̀ənə̀ à ghǎ tô a àtwuə̀ ɨ̀shyə̂, nɨ̀ ghǎ kɨ tô pɨghə pɨ pobə pə nɨ àghuʼtə̀ e.

⁵Lenəla nɨ̀ waʼà ànwùə̀ tɨ̀pòŋə̀ àtsùmə̀ nɨ mbɨ̀ŋmə̀ ɨ̀ za ntàʼà lo nɨ̀ ghɨ̀rə̀; ànwùə̀ tɨ̀pòŋə̀ tsaʼa nɨ̀zɨghə̀ àkwàrə̀, nɨ mɨ̀nwùə̀ mɨ ntsɨ̀ŋnə, nɨ nɨ̀pə nɨ ntoŋə aŋunə mɨ̀nwùə̀ nɨ mbòbə̀ mbɨ̀ŋmə̀ ɨ̀ za ntàʼà, nɨ nɨ̀pə nɨ ɨ̀kwàŋə̀ tɨ̀pòŋə̀, farə a nɨ ghə̀ʼnə̀ aŋunə ɨ̀pwuumə̀. Nɨ̀ tə pə nɨ àghə̀ʼnə̀, yi ǎ tyiʼə̀ pə tsaʼa nɨ̀ wə̀ nguʼtə̀ pɨ̀tɨtoo.

⁶Àtsə̂ ntɨŋmə̀ Nẅùə̀ ǎ pə aŋunə pànə̀ nɨ pobə pa ngɨ̀rə̀ mɨ̀nwùə̀ mə mɨ̀tsùmə̀ ntiinə ka pobə zuʼnə̀ a ghobə a ye.

⁷À lə̀ pə nkwùə̀ ntsàambyə̀ la nɨ̀ mə ngɨ̀rə̀ mɨ̀nwùə̀ mèrə mə nkwùə̀ nɨ ntoŋə aŋunə ɨ̀pwuumə̀ àtwuə̀ ɨ̀shyə̂ ɨ̀ laʼa mbirə̀ mmə mbuʼtə̀ a wɨghə.

⁸La tɨ̀tsòŋə̀ wə̀, nɨ̀ tsoʼò a àpô àzɨghə aŋunə mɨ̀nwùə̀ mɨ àzaŋə̀ loŋə, pobə nɨ̀ghɨ̀rə̀ ànwùə̀ nɨ ntɨŋmə̀ tɨ̀pòŋə̀ kə̀ nɨ ntɨŋmə̀ ghù shyə, nɨ nɨ̀pə nɨ kɨpaanə, nkɨ nshwəŋnə̀ a wɨghə tɨ̀pòŋə̀ aŋunə pə̀ənə̀ apə̀, kə̀ kɨ pə a wɨghə nɨ àshwəŋnə̀ tɨ̀pòŋə̀ àtse a ntswùə̀ pɨghə apə̀.

⁹Kò chwìrə̀ a pə e a tɨ̀tɨ̀rə̀ pɨghə. Nɨ̀ twuunə̀ mə a wɨghə a nɨ̀chyə̂mbyə̂ tɨ̀pòŋə̀ ghobə mɨ̀nwùə̀ mɨ tɨ̀pòŋə̀ ma nɨ nɨ̀ lə̀ mənə ngɨ̀rə̀ la.

¹⁰Tɨ̀tsòŋə̀ nɨ̀ wə̀ ntyiʼə̀ mbə nɨ nɨ̀chyə̂mbyə̂ ghù shwuə̀. Lə̌ nɨ̀chyə̂mbyə̂ wa nɨ Nẅùə̀ à wa ngɨ̀rə̀ nɨ̀ pə nɨ ẅèrə nshwuə̀ e nkwùə̀ ɨ̀tsùmə̀ mbə̀ʼə tsùŋə̀ zhyə̂ e ze wa nɨ à lə̀ tsùŋə̀nə a wɨghə la.

¹¹Tsaʼnə a pənə lə la, ka tə̀chwìi ɨ̀tse a chi mbə e a tɨ̀tɨ̀rə̀ pɨ̀Jew pobə pànə̀ nɨ ka pobə pə ghobə pɨ̀Jew, pànə̀ nɨ pɨ zə̀ərə̀nə a ghobə pobə pànə̀ nɨ ka pɨ zə̀ərə̀ e a ghobə. Ka tə̀chwìi a kɨ mbə e ghu a tɨ̀tɨ̀rə̀ pɨ̀furə̀ a àlaʼà pobə pànə̀ nɨ pobə pa nchyə̂ a mɨpaʼa, ɨ̀pùʼù pobə pànə̀ nɨ ka pɨ pə a ghobə ɨ̀pùʼù. Kristù la ntsùmə̀ ntsùmə̀ nkɨ mbə amwuə ŋwùə̀ ntsùmə̀.

¹²Nɨ̀ chyə̂ mbə la ɨ̀poonə̀ pɨ Nẅùə̀ nɨ pobə laanə̀nə. À kòŋə̀ a wɨghə nkɨ ntsoʼò a wɨghə. Njiilo nɨ̀ lòo mɨ̀nwùə̀ mə̀ ngẅî tsaʼa atsəʼə àzɨghə. Mɨ̀nwùə̀ mɨ ghu pə la; àkoorə̀ mɨ̀lɨŋə̀, nɨ̀pə nɨ ntɨŋmə̀ ghù ɨ̀shìʼnə̀, nɨ̀shwuʼkə̀ mbɨ̀ŋmə̀ a ɨ̀shyə̂, nɨ̀potə̀ mbɨ̀ŋmə̀ pobə nɨ̀ẅìimə̀ mbɨ̀ŋmə̀.

¹³Nɨ̀ mə ngẅìimə̀ mɨ̀ntɨŋmə̀ ɨ̀mɨghə nkɨ mmə ndə̀ənə̀ ɨ̀fàntə̀ ɨ̀nwùə̀ a tɨ̀tɨ̀rə̀ pɨghə. Nɨ̀ chyə̂ a nɨ lə̀ənə̀ ɨ̀fàntə̀ ɨ̀nwùə̀ pɨ̀tse pə̀ənə̀ tsaʼnə Ndòʼnə̀mbyə̂ à kɨnə mmə ndə̀ənə̀ ɨ̀pɨghə.

¹⁴Aŋunə ɨ̀nwùə̀ pə ɨ̀tsùmə̀ nɨ̀ kòŋə̀ mbɨ̀ŋmə̀ ɨ̀zɨghə. Ɨ̀kòŋnə̀ ɨ wa mbwuutə̀ àzwuumə̀ àtsùmə̀ a taʼà alyiʼə.

¹⁵Kristù à ghɨ̀rə̀ mə lo nɨ̀ chyə̂ nɨ àporə̀porə̀ a tɨ̀tɨ̀rə̀ pɨghə. Lenəla, àporə̀porə̀ za a chyə̂ a nɨ yèmpə̀ a wɨghə aŋunə ànwùə̀ za àtsùmə̀ nɨ nɨ̀ wa ngɨ̀rə̀, zèrə a kùmə̀ ndòo a wɨghə nɨ̀ pə a taʼà alyiʼə tsaʼa taʼà ŋwùə̀. Lenəla nɨ̀ chyə̂ a nɨ ŋâ a mɨyàa ambo Nẅùə̀ nkwùə̀ ɨ̀tsùmə̀.

¹⁶Àshwəŋnə̀ Kristù a chyə̂ a nɨ pə amwuə mɨ̀ntɨŋmə̀ ɨ̀mɨghə ɨ̀shìʼnə̀. Nɨ̀ lòo àshwəŋnə̀ zèrə za nɨ àzhìʼtə̀ a nɨ nèrə̀ nkɨ ntəətə̀ mbɨ̀ŋmə̀ ɨ̀zɨghə, mmə ndzòbə̀ mɨnchyə a nɨ yetə̀ a Nẅùə̀, nkɨ ndzòbə̀ a mɨ̀tse mɨnchyə nɨ mèrə mə nnèrə̀ lo nɨ̀ wə̀ ngyetə̀ a Nẅùə̀. Nɨ̀ zòbə̀ a nɨ ŋâ a mɨyàa ambo ze nkwùə̀ ɨ̀tsùmə̀.

¹⁷Aŋunə ànwùə̀ àtsùmə̀ nɨ nɨ̀ wa ngɨ̀rə̀ kə̀ nshwəŋə̀, nɨ̀ mə ngɨ̀rə̀ a zèrə̀ àtsùmə̀ aŋunə nɨ̀linə̀ nɨ Ndòʼnə̀mbyə̂ Yěsû. Nɨ̀ ŋâ a mɨyàa ambo Tǎ Nẅùə̀ aŋunə nɨ̀linə̀ nɨ Nẅùə̀.

¹⁸Pɨghə pə̀ngyə̌ pɨ zoʼnə, nɨ̀ zuʼnə̀ pɨ̀lwuumə̀ ɨ̀pɨghə. La ndwuumə̀ nɨ pànə̀ nɨ pobə nùŋə̀nə ntɨŋmə̀ ɨ̀ghobə aŋunə Ndòʼnə̀mbyə̂ chyə̂ a nɨ ghɨ̀rə̀.

¹⁹Pɨghə pɨ̀lwuumə̀, nɨ̀ kòŋə̀ pə̀ngyə̌ ɨ̀pɨghə, kò nɨ̀ kɨ ntsə̂ aŋunə pobə.

²⁰Pɨghə ɨ̀poonə̀, nɨ̀ tə ndzuʼnə̀ pɨ̀tǎ pobə pɨ̀mǎ ɨ̀pɨghə aŋunə ànwùə̀ àtsùmə̀ nɨ pobə pa ngɨ̀rə̀. Lə̌ ànwùə̀ nɨ a za ngɨ̀rə̀ Ndòʼnə̀mbyə̂ a pə nɨ nɨ̀ghaʼà.

²¹Pɨghə pɨ̀tǎ, kò nɨ̀ tə ngɨ̀rə̀ mɨ̀ntɨŋmə̀ ɨ̀poonə̀ ɨ̀pɨghə tə ndzaŋə̀. Nɨ̀ tə ghɨ̀rə̀ lo mɨ̀ntɨŋmə̀ ɨ̀mobə zaŋə̀ yi mɨ̀ntɨŋmə̀ ɨ̀mobə̌ porə̀.

²²Pɨghə ɨ̀pùʼù, nɨ̀ zuʼnə̀ pɨ̀masàa ɨ̀pɨghə aŋunə ànwùə̀ àtsùmə̀ nɨ nɨ̀ wa nfàʼà ambo pobə àtwuə̀ ɨ̀shyə̂. Kò nɨ fàʼà a wɨghə pə nkwùə̀ nɨ ɨ̀myə̂ ɨ̀mobə pənə aŋunə pɨghə njiilo pobə ghuʼtə̀ a wɨghə. La nɨ̀ fàʼà ambo pobə nɨ ntɨŋmə̀ ɨ̀wɨghə ɨ̀tsùmə̀ ntiinə nɨ̀ wə̀ ŋŋâ àghuʼtə̀ pə ambo Ndòʼnə̀mbyə̂.

²³Àfàʼà za àtsùmə̀ nɨ nɨ̀ mənə nfàʼà, nɨ̀ fàʼà nɨ ntɨŋmə̀ ɨ̀wɨghə ɨ̀tsùmə̀. Nɨ̀ fàʼà a zèrə pə tsaʼa nɨ̀ wə̀ nfàʼà ambo Ndòʼnə̀mbyə̂, ka pə e tsaʼa nɨ̀ wə̀ nfàʼà ambo pànə̀ pɨ mɨsoŋə.

²⁴Nɨ̀ zhyə̂ lo Ndòʼnə̀mbyə̂ à ghǎ tsoʼò àfàʼà àzɨghə nɨ ɨ̀pwuumə̀ pa nɨ à lə̀ nùŋə̀nə ambo pə̀ənə̀ ɨ̀pe. Ntiinə ngotə ŋònə̀ nɨ nɨ̀ wa nfàʼà ambo ze a Ndòʼnə̀mbyə̂ Kristù.

²⁵Ŋwùə̀ ntsùmə̀ nɨ à wa ngɨ̀rə̀ a tɨ̀pòŋə̀ à ghǎ kẅiirə̀ ɨ̀ntsoʼò àfàʼà aŋunə ɨ̀nwùə̀ tɨ̀pòŋə̀ ɨ̀pe nɨ à wa ngɨ̀rə̀. Ntiinə Nẅùə̀ a ghǎ tsoʼtə̀ ɨ̀sàʼa pànə̀ pɨ̀tsùmə̀ la ndəŋə ndəŋə.