Read Pinyin Kòlosè 4 Bible Online

Kòlosè 4 - Pinyin bible

Kòlosè 4

¹Pɨghə pɨ̀masàa nɨ nɨ̀ pənə nɨ ɨ̀pùʼù, nɨ̂ twuʼtə̀ a ghobə amwuə ndwuumə̀ nɨ ɨ təəmə̀nə nkɨ mbòŋə̀. Nɨ̀ kẅempə̀ lo nɨ̀ kɨ mbə nɨ masàa nɨ à pənə a nɨ̀pwuurə̀.

²Nɨ̀ làŋə̀ nɨ mbyə̀ ntə̂ àtwuə̀ amwuə àchàʼtə̀ Nẅùə̀. Nɨ̀ mə nchàʼtə̀ a Nẅùə̀ nɨ̀ nùŋə̀ ntɨŋmə̀ aŋunə ànwùə̀ nɨ nɨ̀ wə̀ nshwəŋə̀ ambo ze, nkɨ ŋŋâ a mɨyàa ambo ze.

³Nɨ̀ mə nchàʼtə̀ a Nẅùə̀ nkẅempə̀ a wəə mbə̀ʼə Nẅùə̀ â nyaʼkə̀ àlàŋə ambo pəə mbə̀ʼə pəə chwìitə̀ ntwuumə̀ ghù ɨ̀shìʼnə̀ wa mbə̀ʼə Kristù ambo pə̀ənə̀ nɨ ka pobə lə̀ zhyə̂ a ghobə a ẅèrə nkwùə̀ ntsàambyə̀ la. Ngwə̀ a ndâ ɨ̀tsaŋə̀ lə ntii ntwuumə̀ ghù ɨ̀shìʼnə̀ yɨ̀ghu nɨ m̀mənə nchwìitə̀.

⁴Nɨ̂ chàʼtə̀ a Nẅùə̀ lo â ghɨ̀rə̀ ǹshwəŋnə̀ amwuə àlàŋə nɨ a laanə̀nə mbə̀ʼə pànə̀ tsùŋə̀ ndzuʼù ntwuumə̀ yɨ̀ghu.

⁵Nɨ̂ pə nchyə̂ nɨ àzhìʼtə̀ nkwùə̀ nɨ nɨ̀ mənə ngɨ̀rə̀ mɨ̀nwùə̀ pɨghə pɨ pànə̀ pa nɨ pɨ pirə̀ mə a ghobə tɨ nùŋə̀ ntɨŋmə̀ ɨ̀ghobə aŋunə Kristù. Nɨ̀ pə nɨ mɨlyiʼə ɨ̀sàanə̀ nɨ̀ fàʼà mɨ̀nwùə̀ mɨ̀shìʼnə̀ ambo pobə.

⁶Nẅùə̀ nɨ nɨ̀ mənə nshwəŋnə̀ pɨghə pɨ pobə nɨ̀ ghɨ̀rə̀ àshwəŋnə̀ àzɨghə a potə̀, ànwùə̀ nɨ nɨ̀ mənə nshwəŋnə̀ â ghɨ̀rə̀ pobə̂ pə nɨ nɨ̀ghaʼà. Nɨ̀ tə pəla ngɨ̀rə̀ a lenə, yi nɨ̌ zhyə̂ àlàŋə nɨ mbə̀ʼə nɨ̀ kẅùə̀ àpyiitə̀ àshwəŋnə̀ àtsùmə̀ nɨ pobə̌ pyiitə̀ a wɨghə nɨ zèrə.

⁷Takikùsə̀ wa nɨ à pənə ndyimə mə̀ nɨ ngwa nkòŋə̀, nkɨ mbə ngàŋə̀ àkwùə̀ nɨ̀yìinə̀ mə̀ amwuə àfàʼà nɨ pəə pɨ pobə pa nfàʼà ambo Ndòʼnə̀mbyə̂ nɨ ntɨŋmə̀ ɨ̀wəə ɨ̀tsùmə̀ la, ǎ tyiʼə̀ shwəŋə̀ a wɨghə nɨ ànwùə̀ àtsùmə̀ nɨ a lə̀ làŋə̀nə aŋunə mɨ̀ŋə̀.

⁸Ɨ̀sùmə nɨ ngwə̀ ntsàa e ambo pɨghə ɨ̀ chyə̂ la lo â ghɨ̀rə̀ nɨ̀ zhyə̂ tsaʼnə pəə pə nchyə̂ nkɨ ngɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀.

⁹Ngwə̀ ntsàa e pobə Ònesimùsə̀. Ònesimùsə̀ a kɨ mbə ndyimə ɨwəə nɨ pəə kòŋə̀nə. À wə̀ nkɨ mmə nfàʼà àze ambo Kristù nɨ ntɨŋmə̀ e ɨ̀tsùmə̀. A ŋònə̀ nɨ à furə̀nə amwuə taʼà àlaʼà pɨghə pɨ pobə. Pobə Takikùsə̀ tyiʼə̀ tiitə̀ a wɨghə nɨ ànwùə̀ àtsùmə̀ nɨ a zə̀ ndòo alyiʼə a nɨ̀ghə̂.

¹⁰Àristakùsə̀, ŋònə̀ nɨ pəə ze pənə a ndâ ɨ̀tsaŋə̀ à wə̀ nchàʼtə̀ a wɨghə. Mark ẅùə̀ nɨ à pənə ndyimə Barnabas à wə̀ nkɨ mmə nchàʼtə̀ a wɨghə. (Nɨ̀ pyə̀ mə ndzuʼù àtəətə̀ mbə̀ʼə Mark. A pəla ntô nɨ̀ kẅiirə̀ e ɨ̀shìʼnə̀.)

¹¹Yěsû wa nɨ pɨ pa nfuŋə̀ nɨ Justùsə̀ la à wə̀ nkɨ mmə nchàʼtə̀ a wɨghə. Pànə̀ pə pɨtarə a ndàʼà pɨ̀Jew nɨ pobə nùŋə̀nə ntɨŋmə̀ ɨ̀ghobə aŋunə Kristù nɨ pobə pə nfàʼà pəə pɨ pobə a nɨ chwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀. Pobə lə̀ lə̀ʼtə̀ mə̀ ka mɨ̀zùŋə.

¹²Epafràsə̀ à wə̀ nkɨ mmə nchàʼtə̀ a wɨghə. À kɨ mbə ze la ŋònə̀ nɨ à furə̀nə amwuə taʼà àlaʼà pɨghə pɨ pobə nkɨ mbə ngàŋə̀ àfàʼà Kristù. À wə̀ nchàʼtə̀ a Nẅùə̀ nkwùə̀ ɨ̀tsùmə̀ tyìʼə̀ tɨ kaanə̀ mbə̀ʼə nɨ̀ təəmə̀ ntɨ̀ŋnə̀ tsaʼa pànə̀ pɨ Nẅùə̀ nɨ pobə kẅuə̀nə, nkɨ ntsùŋə̀ nzhyə̂ ànwùə̀ àtsùmə̀ nɨ Nẅùə̀ à wa ntàʼà.

¹³Mbə̀ʼə mɨ̀ŋə̀ àtwuə̀ ɨ̀pɨ̀ŋmə̀ mə̀ ǹtiitə̀ a wɨghə tsaʼnə à tsùŋə̀nə nfàʼà ambo pɨghə farə ambo ɨ̀poonə̀ pɨ Kristù nɨ pobə pənə a Laodicea pobə Hierapolis.

¹⁴Lukə̀ nɨ à pənə doktà mbarə̀ pə̀ənə̀ nɨ pə̀ənə̀ kòŋə̀nə pobə Demàsə̀ pə̀ nkɨ mmə nchàʼtə̀ a wɨghə.

¹⁵Nɨ̀ tsùŋə̀ nchàʼtə̀ pɨlyimə ɨ̀pə̀ənə̀ nɨ pobə pənə a Laodicea. Nɨ̀ kɨ nchàʼtə̀ a Nimfà pobə àshwatə̀ ɨ̀poonə̀ pɨ Kristù za nɨ a pənə a ndâ ze ŋŋâ wə̀.

¹⁶Nkwùə̀ nɨ nɨ̀ fuŋə̀nə àŋwàʼnə̀ zə, nɨ̀ tsàa a zèrə ambo àshwatə̀ ɨ̀poonə̀ pɨ Kristù nɨ a pənə a Laodicea lo pobə̂ kɨ nfuŋə̀ àzobə. Nɨ̀ zəənə̀ lo nɨ̀ kɨ nfuŋə̀ àŋwàʼnə̀ nɨ ǹtsàanə ambo pɨlyimə ɨ̀pə̀ənə̀ nɨ pobə pənə a Laodicea.

¹⁷Nɨ̀ shwəŋə̀ ambo Archippus lo â zəənə̀ lo à myàanə̀ àfàʼà za nɨ Ndòʼnə̀mbyə̂ à ŋânə ambo ze lo â fàʼà la.

¹⁸Mɨ̀ŋə̀ Pàolò, ŋ̀ŋwàʼnə̀ àchàʼtə̀ zə la nɨ àpô mə̀. Kò nɨ̀ lə̀ənə̀ a wɨghə lo ngwə̀ a ndâ ɨ̀tsaŋə̀. Nẅùə̀ â nèrə̀ a wɨghə nɨ àpòŋə̀ ntɨŋmə̀ e.