Read Pinyin 1 Tèsàlonikà 1 Bible Online

1 Tèsàlonikà 1 - Pinyin bible

1 Tèsàlonikà 1

¹Àŋwàʼnə̀ zə̀ à ŋwàʼnə̀ mɨ̀ŋə̀ Pàolò, m̀bə pəə pɨ Sìlvanùsə̀[1] pobə Timotì. Àŋwàʼnə̀ zèrə zə̀ a mə ndèrə̀ ambo pànə̀ pɨ Nẅùə̀ Tǎ pobə Ndòʼnə̀mbyə̂ Yěsû Kristù, nɨ pobə pənə amwuə àshwatə̀ ɨ̀poonə̀ pɨ Kristù nɨ a pənə a Tèsàlonikà. Nẅùə̀ â nèrə̀ àpòŋə̀ ntɨŋmə̀ e aŋunə pɨghə nkɨ ŋŋâ a wɨghə nɨ àporə̀porə̀.

²Pəə pa ŋŋâ a mɨyàa ambo Nẅùə̀ mbə̀ʼə wɨghə pɨ̀tsùmə̀ nkɨ mə nkẅempə̀ a wɨghə pɨ̀tsùmə̀ amwuə àchàʼtə̀ Nẅùə̀ àzəə tyìʼə̀ nkwùə̀ ɨ̀tsùmə̀.

³Pəə pə nkɨ mmə nchàʼtə̀ a Nẅùə̀ Tǎ ɨ̀wə̀ənə̀ nkẅempə̀ tsaʼnə nɨ̀ wə̀ nfàʼà ambo Ndòʼnə̀mbyə̂ Yěsû Kristù nɨ ntɨŋmə̀ ɨ̀wɨghə ɨ̀tsùmə̀. Pəə pə nchi mmə nkẅempə̀ tsaʼnə nɨ̀ wə̀ nfàʼà nɨ ɨ̀tɨ̀ŋnə̀ a nɨ yèmpə̀ pə̀ənə̀ ntiinə nɨ̀ kòŋə̀nə a ghobə farə tsaʼnə nɨ̀ wə̀ nnèrə̀ àẅìimə̀ ntɨŋmə̀ àzɨghə ntiinə nɨ̀ nùŋə̀nə ntɨŋmə̀ aŋunə Ndòʼnə̀mbyə̂ Yěsû Kristù.

⁴Pɨlyimə ɨ̀pəə nɨ Nẅùə̀ à kòŋə̀nə, pəə zhyə̂ lo Nẅùə̀ à lə̀ tsoʼò mə a wɨghə lo nɨ̀ pə pə̀ənə̀ ɨ̀pe.

⁵Ntwuumə̀ ghù ɨ̀shìʼnə̀ wa nɨ pəə lə̀ tônə nɨ ẅèrə ambo pɨghə la ka ɨ lə̀ tô e la nɨ ndàʼà àshwəŋnə̀ ntswùə̀, ɨ lə̀ tô nɨ mɨ̀tɨ̀ŋnə̀. Àzhwùə̀ Nẅùə̀ a nèrə̀ lo ẅèrə la nkǔŋə nkuŋə. Nɨ̀ zhyə̂ mɨ̀nwùə̀ nɨ pəə lə̀ mə ngɨ̀rə̀ a tɨ̀tɨ̀rə̀ pɨghə. Mèrə lə̀ pə̀ la a nɨ yèmpə̀ a wɨghə.

⁶Nɨ̀ lə̀ mɨ̀ŋnə̀ a wəə pɨ Ndòʼnə̀mbyə̂. Mbaa pə tsaʼnə nɨ̀ lə̀ mənə ndzəənə̀ ngəʼə̀, nɨ̀ lə̀ kẅiirə̀ ntwuumə̀ ghù ɨ̀shìʼnə̀ wa nɨ ɨ lə̀ furə̀nə ambo Àzhwùə̀ Nẅùə̀ nɨ nɨ̀ghaʼà.

⁷Lenəla nɨ̀ tyiʼə̀ mbə àlènə̀ ambo pànə̀ pɨ̀tsùmə̀ nɨ pobə nùŋə̀nə ntɨŋmə̀ aŋunə Kristù a àlaʼà Màsèdonyà pobə Àkayà.

⁸Mbə̀ʼnə ka a pə e ndàʼà ntwuumə̀ mbə̀ʼə Ndòʼnə̀mbyə̂ nɨ ɨ furə̀nə ambo pɨghə nsìimə̀ amwuə Màsèdonyà pobə Àkayà, ànwùə̀ mbə̀ʼə àpyiimə̀ ntɨŋmə̀ àzɨghə aŋunə Nẅùə̀ a kɨ mmə nsìimə̀ a alyiʼə àtsùmə̀. Lenəla ka pəə chi mbə a wəə nɨ ànwùə̀ àtse a nɨ shwəŋə̀ mbə̀ʼə ẅèrə.

⁹Pobə àtwuə̀ mbɨ̀ŋmə̀ àzobə lə̀ kɨ mmə nshwəŋə̀ tsaʼnə nɨ̀ lə̀ kẅiirə̀nə a wəə nkɨ mbə̀ŋə̀ mɨ̀ntɨŋmə̀ ɨ̀mɨghə ntwuunə̀ a wɨghə a nɨ tə nguʼtə̀ pɨ̀tɨtoo, ntyiʼə̀ nfàʼà ambo Nẅùə̀ wa nɨ à pənə ghù ntɨ̀ŋnə̀, nkɨ mbə nkǔŋə nkuŋə Nẅùə̀ la.

¹⁰Tɨ̀tsòŋə̀, nɨ̀ wə̀ mbyabə̀ a moonə̀ e Yěsû wa nɨ à lə̀ zhwuumə̀nə e aŋunə nɨ̀wɨghə̀ la lo â furə̀ a nɨ̀pwuurə̀ ntô. A Yěsû wa nɨ à wa nfuukə̀ a wəənə̀ amwuə ngəʼə̀ nɨ Nẅùə̀ nɨ à ghǎ chyâ aŋunə pə̀ənə̀ la.