Read Pinyin 1 Tèsàlonikà 2 Bible Online

1 Tèsàlonikà 2 - Pinyin bible

1 Tèsàlonikà 2

¹Pɨlyimə ɨ̀pəə, nɨ̀ zhyə̂ tyìʼə̀ ɨ̀shìʼnə̀ lo ka nɨ̀tô ɨwəə lo karə̀ a wɨghə a lə̀ lèrə̀ e àfǐfǐ.

²Nɨ̀ zhyə̂ tsaʼnə pəə lə̀ kɨ tô ambo pɨghə la pɨ pyə̀ nnyàŋə̀ nkɨ ndzòomə̀ a wəə a àlaʼà Filipì. La Nẅùə̀ a ghɨ̀rə̀ lo mɨ̀ntɨŋmə̀ ɨ̀məə tɨ̀ŋnə̀ lo pəə̂ chwìitə̀ ntwuumə̀ e ghù ɨ̀shìʼnə̀ wa ambo pɨghə tɨ àkẅàrə̀, mbaa pə tsaʼnə pànə̀ pɨ̀noʼnə lə̀ mənə ndzòŋə̀ lo kò ẅèrə sìimə̀ la.

³Lenəla ka pəə ghɨ̀rə̀ a wəə la àfàntə̀ ànwùə̀ a nɨ chwìitə̀ ànwùə̀ nɨ pəə pa nchwìitə̀, ka kɨ pə a wəə nɨ àkwàŋə̀ tɨ̀pòŋə̀ àtse nkɨ ka mə fɨ̀ghə̀ a wəə wɨghə.

⁴A chyə̂ pə lo, Nẅùə̀ à lə̀ chyâ ntwuumə̀ ghù ɨ̀shìʼnə̀ wə̀ amwuə ɨ̀larə̀ mbô ɨ̀pəə lo pəə̂ chwìitə̀. Ka pəə mə nchwìitə̀ a wəə pə lo â pòŋə̀ pə̀ənə̀, pəə pa nchwìitə̀ pə lo â pòŋə̀ a Nẅùə̀ nɨ à zhyə̂nə mɨ̀ntɨŋmə̀ ɨ̀məə.

⁵Nẅùə̀ a ndzəənə̀ zəənə̀nə ɨ̀wəə lo ka pəə lə̀ tô a wəə nɨ àshwəŋnə̀ àfɨ̀ghə̀ àtse a nɨ ghɨ̀rə̀ lo pànə̀ kòŋə̀ a wəə. Ka kɨ tô a wəə nɨ ɨ̀shwəŋnə̀ pɨ̀shìʼnə̀ pɨ̀tse a nɨ lòo fɨ̀ghə̀ a wɨghə kẅiirə̀ ɨ̀pwuumə̀ pɨ̀tse ambo pɨghə.

⁶Ka pəə lə̀ mə ntàʼà a wəə a àghuʼtə̀ ambo ŋònə̀ ɨ̀tse, kə̀ ambo pɨghə kə̀ ambo pɨ̀tse pə̀ənə̀,

⁷mbaa pə tsaʼnə a lə̀ pənə alyiʼə ànwùə̀ àzəə a nɨ pyiitə̀ a wɨghə nɨ àyèmpə̀ tsaʼa ngàŋə ntwuumə̀ Kristù. Pəə lə̀ potə̀ pə mbɨ̀ŋmə̀ ɨ̀zəə a tɨ̀tɨ̀rə̀ pɨghə tyìʼə̀ tsaʼa mǎ pɨ ɨ̀poonə̀ à wa ntwuʼtə̀ ɨ̀poonə̀ ɨ̀pe.

⁸Pəə lə̀ kòŋə̀ a wɨghə tɨsɨŋnə, ka mə tàʼà a wəə pə a nɨ chwìitə̀ ndàʼà ntwuumə̀ Nẅùə̀ ghù ɨ̀shìʼnə̀ wa ambo pɨghə. Pəə lə̀ ŋâ farə a nɨ̀chyə̂mbyə̂ ɨ̀wəə a nɨ fàʼà ambo pɨghə ntiinə pəə pa nkòŋə̀ a wɨghə nɨ ntɨŋmə̀ ɨ̀wəə ɨ̀tsùmə̀.

⁹Nɨ̀ tə mə nkẅempə̀ ɨ̀shìʼnə̀ nɨ pɨlyimə ɨ̀pəə, yi nɨ̌ zhyə̂ tsaʼnə pəə lə̀ mənə nnẅùʼə̀ mbɨ̀ŋmə̀ ɨ̀zəə nfàʼà nɨ ɨ̀twuʼə̀ pobə njyə̂ a nɨ zəənə̀ lo kò nɨ̀ zəənə̀ ngəʼə̀ a nɨ twuʼtə̀ a wəə nkwùə̀ nɨ pəə lə̀ mənə nchwìitə̀ ntwuumə̀ Nẅùə̀ ghù ɨ̀shìʼnə̀ wa a tɨ̀tɨ̀rə̀ pɨghə.

¹⁰Pɨghə pɨ Nẅùə̀ la pɨ̀ndzəənə̀ zəənə̀nə ɨ̀pəə lo àkwùə̀ nɨ̀yìinə̀ àzəə a lə̀ laanə̀, ntəəmə̀ nkɨ ka pə nɨ ntsɨ̀ŋnə ɨ̀tse a mbyə̀ pɨghə pa nɨ nɨ̀ nùŋə̀nə ntɨŋmə̀ ɨ̀wɨghə aŋunə Kristù la.

¹¹Nɨ̀ zhyə̂ lo pəə lə̀ twuʼtə̀ a wɨghə tyìʼə̀ tsaʼnə tǎ à wa ntwuʼtə̀ ɨ̀poonə̀ ɨ̀pe.

¹²Pəə lə̀ mə mborəkə̀ mɨ̀ntɨŋmə̀ ɨ̀mɨghə, ntompə̀ a wɨghə nkɨ mmə ntinə̀ a wɨghə mbə̀ʼə nɨ̀ chyə̂ a nɨ̀chyə̂mbyə̂ wa nɨ à kùʼnə̀nə a mbyə̀ Nẅùə̀ nɨ à lə̀ fuŋə̀nə a wɨghə amwuə ànwùə̀ nɨ̀fò e pobə àghuʼtə̀ e la.

¹³Taʼà ànwùə̀ nɨ pəə pa ŋŋâ a mɨyàa ambo Nẅùə̀ nkwùə̀ ɨ̀tsùmə̀ à chyə̂ lo nkwùə̀ nɨ nɨ̀ lə̀ zuʼnə àshwəŋnə̀ Nẅùə̀ za ambo pəə la, nɨ̀ lə̀ kẅiirə̀, ka kẅiirə̀ a wɨghə pə tsaʼa àshwəŋnə̀ nɨ a furə̀nə ambo ŋwùə̀ mɨsoŋə. Nɨ̀ lə̀ kẅiirə̀ tyìʼə̀ àshwəŋnə̀ Nẅùə̀ àtwuə̀ mbɨ̀ŋmə̀ e, a kɨ mbə zèrə. Àshwəŋnə̀ zèrə zə̀ nɨ a za nfàʼà a tɨ̀tɨ̀rə̀ pɨghə pa nɨ nɨ̀ nùŋə̀nə ntɨŋmə̀ ɨ̀wɨghə aŋunə Kristù la.

¹⁴Pɨlyimə ɨ̀pəə, ànwùə̀ nɨ a zə̀ ngɨ̀rə̀ a wəə a ànwùə̀ nɨ a lə̀ kɨnə ngɨ̀rə̀ ɨ̀shwatə̀ ɨ̀poonə̀ pɨ Kristù a àlaʼà Judyà nɨ pobə lə̀ nùŋə̀nə ntɨŋmə̀ ɨ̀ghobə aŋunə Kristù. Pànə̀ pɨ àlaʼà àzɨghə nyàŋə̀ a wɨghə tyìʼə̀ tsaʼnə pɨ̀Jew lə̀ nyàŋə̀nə a ghobə la.

¹⁵Pobə pɨ̀tse lə̀ zhwuutə̀nə a Ndòʼnə̀mbyə̂ Yěsû. Pobə pɨ̀tse zhwuutə̀ ngàŋə ntwuumə̀ Nẅùə̀. Pobə pɨ̀tse kɨ nkantə̀ a wəə. Mɨ̀nwùə̀ ɨ̀mobə mɨ̀tsùmə̀ nɨ pobə lə̀ mənə ngɨ̀rə̀ lə̀ ghɨ̀rə̀ ntɨŋmə̀ Nẅùə̀ ɨ zaŋə̀. Pobə lə̀ mə ngɨ̀rə̀ mɨ̀nwùə̀ mɨ tɨ̀ŋnə̀ aŋunə ŋwùə̀ ntsùmə̀.

¹⁶Pobə lə̀ mə ntaŋnə̀ a nɨ zòŋə̀ lo kò pəə chwìitə̀ ntwuumə̀ ghù ɨ̀shìʼnə̀ wa ambo pànə̀ nɨ ka pobə pə ghobə pɨ̀Jew mbə̀ʼə pobə kaŋə chwarə̀. Pobə lə̀ ghɨ̀rə̀ a lenə la tɨ̀pòŋə̀ ɨ̀ghobə a koʼò mbwùumə̀ a mbyə̀ Nẅùə̀. La tɨ̀tsòŋə̀, àtsə̂ ntɨŋmə̀ Nẅùə̀ a kunə̀ aŋunə pobə.

¹⁷La ngə̀ aŋunə pəə nɨ pɨlyimə ɨ̀pəə, nkwùə̀ nɨ pɨ lə̀ ghàpə̀nə a wəənə̀ aŋunə mətùmə nkwùə̀ lo kò pə̀ənə̀ chi ndzəənə̀ a wəənə̀ la, pəə lə̀ kɨ mbirə̀ nkẅuumə̀ a wɨghə tyìʼə̀ kẅuumə̀nə, ngyìi ntaŋnə̀ lo mbə̀ʼə pə̀ənə̀ chi ndzəənə̀.

¹⁸Pəə lə̀ mə ntàʼà a nɨ tô ambo pɨghə, nkɨ tô mɨ̀ŋə̀ Pàolò ndə̀ kyiitə̀ nkẅirə̀ nkyiitə̀ la Satàanə̀ a nàanə̀ a wəə

¹⁹A pɨ ɨ̀wə̌ nɨ pobə̌ ghɨ̀rə̀ pəə pyiimə̀ mmə mbyabə̀? A pɨ ɨ̀wə̌ nɨ pobə̌ ghɨ̀rə̀ pəə pə nɨ nɨ̀ghaʼà? A pɨ ɨ̀wə̌ nɨ pobə̌ ghɨ̀rə̀ pɨ tuŋə̀ ngùʼu ɨzəə nkwùə̀ nɨ Kristù à ghǎ tô? Ka la pə e pɨghə?

²⁰A nkǔŋə nkuŋə lo nɨ̀ chyə̂ mbə la kɨ̀tèrə̀ mə̀ pobə nɨ̀ghaʼà mə̀.