Read Pinyin 1 Tèsàlonikà 3 Bible Online

1 Tèsàlonikà 3 - Pinyin bible

1 Tèsàlonikà 3

¹Lenəla, tsaʼnə ka pəə lə̀ chi nzhyə̂ a wəə a nɨ ẅìimə̀ mɨ̀ntɨŋmə̀ ɨ̀məə la, pəə lə̀ pyiimə̀ lo pəə ghoŋə̀ a wəə a àlaʼà Atènsə̀.

²Pəə lə̀ tyiʼə̀ ntsàa a ndyimə ɨwəə Timotì ambo pɨghə, nɨ à kɨnə mbə ngàŋə̀ àfàʼà Nẅùə̀ tsaʼnə a kɨnə mə nchwìitə̀ ntwuumə̀ ghù ɨ̀shìʼnə̀ wa lo à tô ntompə̀ a wɨghə ngɨ̀rə̀ àpyiimə̀ ntɨŋmə̀ àzɨghə aŋunə Kristù a kẅùə̀,

³mbə̀ʼə ntɨŋmə̀ taʼà ŋwùə̀ wɨghə a kaŋə nə̀ʼnə̀ ntiinə pɨ mənə nnyàŋə̀ e. Pɨghə àtwuə̀ ɨ̀pɨ̀ŋmə̀ àzɨghə nɨ̀ pyə̀ nzhyə̂ lo pɨ chyə̂ a nɨ nyàŋə̀ a wəənə̀.

⁴Nɨ̀ kɨ nkẅempə̀ lo nkwùə̀ nɨ pə̀ənə̀ lə̀ pənə, pəə lə̀ shwəŋə̀ ambo pɨghə lo pɨ chyə̂ a nɨ nyàŋə̀ a wəənə̀, tsaʼnə a zə̀ nkɨ mmə ngɨ̀rə̀ nɨ̀ mə ndzəənə̀ lə.

⁵Tsaʼnə ka ndə̀ chyə̂ nzhyə̂ ẅìimə̀ mə̀ ntɨŋmə̀ la, ndə̀ tsàa a Timotì lo zhyə̂ tsaʼnə àpyiimə̀ ntɨŋmə̀ àzɨghə aŋunə Kristù a zə mbə ntiinə ndə̀ mə mbô lo Satàanə̀ ǎ kwàʼnə̀ a wɨghə, àfàʼà àzəənə̀ â lèrə̀ àfǐfǐ.

⁶La tɨ̀tsòŋə̀, Timotì à furə̀ ambo pɨghə nkẅirə̀ nkwə̂ nɨ ntwuumə̀ ghù ɨ̀shìʼnə̀ mbə̀ʼə àpyiimə̀ ntɨŋmə̀ àzɨghə farə tsaʼnə nɨ̀ kòŋə̀nə mbɨ̀ŋmə̀ ɨzɨghə pobə pɨ̀tse pə̀ənə̀. À tiitə̀ a wəə lo nɨ̀ wa nkẅempə̀ a wəə tyìʼə̀ ɨ̀shìʼnə̀, nkɨ mmə nkòŋə̀ a nɨ zəənə̀ a wəə tyìʼə̀ tsaʼnə pəə kɨnə mmə nkòŋə̀ a nɨ zəənə̀ a wɨghə.

⁷Lenəla nɨ pɨlyimə, mbaa pə tsaʼnə pəə pə ndzəənə̀ mbuurə̀ ngəʼə̀ ntsùmə̀ pɨ kɨ mmə nnyàŋə̀ a wəə la, àpyiimə̀ ntɨŋmə̀ nɨ nɨ̀ pənə nɨ zèrə a porəkə̀ mɨ̀ntɨŋmə̀ ɨ̀məə.

⁸Tɨ̀tsòŋə̀ mbə̀ʼə pəə chyə̂ ɨ̀shìʼnə̀ tsaʼnə nɨ̀ wə̀ ntəəmə̀ ntɨ̀ŋnə̀ aŋunə nɨ̀chyə̂mbyə̂ ɨwɨghə pɨghə pɨ Ndòʼnə̀mbyə̂

⁹Mbə̀ʼə pəə ŋâ a mɨyàa ambo Nẅùə̀ ɨ̀wə̀ənə̀ lə ɨla ghu ntii wɨghə? Pəə pə ŋŋâ a mɨyàa ambo ze mbə̀ʼə nɨ̀ghaʼà nɨ pəə pənə nɨ ẅèrə a mbyə̀ ze ntii wɨghə.

¹⁰Pəə pə nchàʼtə̀ a Nẅùə̀ nɨ ntɨŋmə̀ ɨ̀wəə ɨ̀tsùmə̀ nɨ ɨ̀twuʼə̀ pobə njyə̂ lo pə̀ənə̀ chi ndzəənə̀ mɨ̀sɨghə̀ ɨ̀məənə̀ mbə̀ʼə pəə ŋâ a wɨghə nɨ àzwuumə̀ nɨ a puŋə̀nə amwuə àpyiimə̀ ntɨŋmə̀ àzɨghə.

¹¹Tɨ̀tsòŋə̀, Nẅùə̀ Tǎ ɨ̀wə̀ənə̀ àtwuə̀ ɨ̀pɨ̀ŋmə̀ e pobə Ndòʼnə̀mbyə̂ ɨ̀wə̀ənə̀ Yěsû pobə̂ nyaʼkə̀ àlàŋə ambo pəə a nɨ tô ambo pɨghə.

¹²Ndòʼnə̀mbyə̂ â ghɨ̀rə̀ ɨ̀kòŋnə̀ nɨ nɨ̀ pənə nɨ ẅèrə ɨ kẅuə̀ ndèrə̀ nɨ mbyə̀ a tɨ̀tɨ̀rə̀ pɨghə nkɨ ngɨ̀rə̀ nɨ̀ kòŋə̀ pɨ̀tse pə̀ənə̀ tyìʼə̀ tsaʼnə pəə kòŋə̀nə a wɨghə la.

¹³Lenəla, ǎ ghɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀ njiilo nɨ̀ laanə̀, nkɨ nchi mbə a wɨghə nɨ ɨ̀fèrə ɨ̀tse a mbyə̀ Nẅùə̀ Tǎ ɨ̀wə̀ənə̀ apə̀ amwuə nkwùə̀ za nɨ Ndòʼnə̀mbyə̂ ɨ̀wə̀ənə̀ à ghǎ tô pobə pɨ pə̀ənə̀ ɨ̀pe pɨ laanə̀nə pɨ̀tsùmə̀ la.