Read Pinyin 1 Tèsàlonikà 4 Bible Online

1 Tèsàlonikà 4 - Pinyin bible

1 Tèsàlonikà 4

¹A nɨ lẅùutə̀ nɨ pɨlyimə ɨ̀pəə, pəə lanə̀ mə a wɨghə, nɨ̀ kɨ nzhyə̂ tsaʼnə mbə̀ʼə nɨ̀ chyə̂ a nɨ̀chyə̂mbyə̂ wa nɨ à wa ngɨ̀rə̀ Nẅùə̀ a pə nɨ nɨ̀ghaʼà la. Nɨ̀ pyə̀ mə mmə nchyə̂ a nɨ̀chyə̂mbyə̂ ghu. Pəə kùmə̀ mmə mbuʼù mbô tɨ̀tsòŋə̀, ǹdoonə̀ a wɨghə aŋunə nɨ̀linə̀ nɨ Ndòʼnə̀mbyə̂ Yěsû lo nɨ̀ lèrə̀ nɨ mbyə̀ nchyə̂ tyìʼə̀ a lenə.

²Pəə pə tinə̀ a wɨghə lo nɨ̀ ghɨ̀rə̀ a lenə la ntiinə nɨ̀ zhyə̂nə mɨ̀nwùə̀ ma nɨ pəə lə̀ shwəŋə̀nə ambo pɨghə nɨ ɨ̀tɨ̀ŋnə̀ wa nɨ Ndòʼnə̀mbyə̂ Yěsû à lə̀ ŋânə ambo pəə la.

³Ànwùə̀ nɨ Nẅùə̀ a tàʼnə a chyə̂ lo, nɨ̀ laanə̀ nkɨ ngwaʼà ànyòrə̀kə̀.

⁴Pəə tàʼà lo ŋwùə̀ ɨwɨghə moʼo moʼo a lanə̀ a nɨ chyə̂ pobə ngẅùə e amwuə àlàŋə nɨ a pənə nɨ àghuʼtə̀[2].

⁵Ka pə e pə lo à pə nɨ ntoŋə mə̀ngyə̌ tsaʼa ŋònə̀ nɨ ka à zhyə̂ e a Nẅùə̀.

⁶Aŋunə ànwùə̀ zèrə zə̀, kò ŋwùə̀ wɨghə ɨ̀tse a chyâ e ntswùə̀ e amwuə ànwùə̀ ŋònə̀ ɨ̀tse. Ŋwùə̀ wɨghə moʼo moʼo a tə̂ a àtwuə̀ aŋunə ànwùə̀ e ntiinə Ndòʼnə̀mbyə̂ a pɨ chyâ ɨ̀sàʼa aŋunə pànə̀ nɨ pobə pa ngɨ̀rə̀ mbuurə̀ mɨ̀nwùə̀ mɨ tɨ̀pòŋə̀ mə̀ tyìʼə̀ tsaʼnə pəə lə̀ pyə̀ mə nshwəŋə̀ mmə nkwàtə̀ a wɨghə la.

⁷Ka Nẅùə̀ a lə̀ fuŋə̀ e a wəənə̀ la lo pə̀ənə̀ tə ngɨ̀rə̀ ɨ̀nwùə̀ tɨ̀pòŋə̀. À lə̀ fuŋə̀ a wəənə̀ pə lo pə̀ənə̀ tô nchyə̂ a nɨ̀chyə̂mbyə̂ nɨ à laanə̀nə.

⁸Lenəla, ŋònə̀ nɨ à wânə àshwəŋnə̀ zə̀, ka à wâ e la ŋwùə̀ mɨsoŋə. À wâ pə Nẅùə̀ nɨ à ŋânə e nɨ Àzhwùə̀ e.

⁹Ka ɨ̀sùmə ɨ̀tse ɨ pə e ghu ambo mɨ̀ŋə̀ a nɨ ŋŋwàʼnə̀ ambo pɨghə aŋunə nɨ̀kòŋə̀ mbɨ̀ŋmə̀ ɨ̀zɨghə, ntiinə Nẅùə̀ àtwuə̀ ɨ̀pɨ̀ŋmə̀ e à lanə̀ mə a wɨghə tsaʼnə mbə̀ʼə nɨ kòŋə̀ mbɨ̀ŋmə̀ ɨ̀zɨghə.

¹⁰A tyìʼə̀ nkǔŋə nkuŋə lo nɨ̀ kòŋə̀ pɨlyimə ɨ̀pɨghə pɨ̀tsùmə̀ a àlaʼà Màsèdonyà àtsùmə̀. La pəə pə mbuʼù mbô ambo pɨghə pɨlyimə ɨ̀pəə lo nɨ̀ chi nkòŋə̀ a ghobə ndèrə̀ nɨ mbyə̀.

¹¹Nɨ̀ kyiitə̀ nɨ ɨ̀tɨ̀ŋnə̀ a nɨ chyə̂ nɨ àporə̀porə̀, ŋwùə̀ ɨwɨghə moʼo moʼo â tə̂ àtwuə̀ tyìʼə̀ aŋunə ànwùə̀ e nɨ à mənə ngɨ̀rə̀, nkɨ mmə nfàʼà nɨ mbô ɨ̀mɨghə tyìʼə̀ tsaʼnə pəə lə̀ tiitə̀nə a wɨghə la.

¹²Nɨ̀ tə pəla mmə ngɨ̀rə̀ a lenə, nɨ̀ ghɨ̀rə̀ lo pànə̀ pa nɨ ka pobə nùŋə̀ a ghobə ntɨŋmə̀ ɨ̀ghobə aŋunə Kristù lo pobə ŋâ a wɨghə nɨ àghuʼtə̀. Nɨ̀ kɨ ndzɨghə̀ a wɨghə àpàamə̀ ŋònə̀ ɨ̀tse apə̀.

¹³Pɨlyimə ɨ̀pəə, ka pəə tàʼà a wəə lo nɨ̀ nwuunə̀ nɨ ɨ̀pùʼu mbə̀ʼə pànə̀ nɨ pɨ kwɨkə̀ mə, kə̀ mbə nɨ àsòmnə̀ tsaʼa pànə̀ nɨ ka pobə pyiimə̀ a ghobə a Kristù mmə mbyabə̀ nkwùə̀ nɨ à ghǎ kẅirə̀ tô.

¹⁴Tsaʼnə pə̀ənə̀ pyiimə̀nə lo Yěsû à lə̀ kwɨghə̀ nkẅirə̀ nzhwuumə̀ a nɨ̀wɨghə̀ la, a tyìʼə̀ ndəŋə ndəŋə lo Nẅùə̀ à ghǎ kɨ ghɨ̀rə̀ pànə̀ pa nɨ pobə lə̀ kɨnə kwɨghə̀ nnùŋə̀ mɨ̀ntɨŋmə̀ ɨ̀mobə aŋunə Kristù la pobə̂ kẅirə̀ nkwə̂ pobə pɨ pobə.

¹⁵Pəə shwəŋə̀ a wɨghə nɨ ànwùə̀ zə̀ ndzùŋə̀ la àshwəŋnə̀ Ndòʼnə̀mbyə̂. Pəə pa nɨ pəə ghǎ pirə̀ aŋunə nkwùə̀ nɨ Ndòʼnə̀mbyə̂ à ghǎ tô la, ka pəə pə ghǎ lèrə̀ a wəə a mbyə̀ pànə̀ nɨ pobə kwɨkə̀ mə.

¹⁶Pànə̀ ghǎ zuʼù ngyə̀ ntɨ̀ŋnə̀ ɨ̂ furə̀ a nɨ̀pwuurə̀ nshwuʼə̀, àtwuə̀ pəngèrə̀ â kɨ nkyiinə̀, ntàŋnə̀ Nẅùə̀ ɨ̂ tswuə̀. Lenəla, pànə̀ pa nɨ pobə lə̀ kɨnə kwɨghə̀ nnùŋə̀ ntɨŋmə̀ ɨ̀ghobə aŋunə Kristù la pobə̂ pyə̀ nzhwuumə̀.

¹⁷Pobə zhwuumə̀ a lenə la, pə̀ənə̀ pa nɨ pə̀ənə̀ pirə̀nə pɨ̀tɨ̀ŋnə̀ mbirə̀ a ndzùmə̀ la, pɨ lòo a wəənə̀ pɨ pobə pɨ̀tsùmə̀ nkoʼò amwuə mbàʼà, pə̀ənə̀ ghə̀ mbòmpə̀ pə̀ənə̀ pɨ Ndòʼnə̀mbyə̂ a àtɨ̀ghə. Lenəla, pə̀ənə̀ tyiʼə̀ mbə pə̀ənə̀ pɨ Ndòʼnə̀mbyə̂ nɨ nkuŋə̀ nɨ nkuŋə̀.

¹⁸Lenəla nɨ̀ tompə̀ a ŋwùə̀ ɨwɨghə moʼo moʼo nɨ àshwəŋnə̀ zə̀.