Read Pinyin 1 Tèsàlonikà 5 Bible Online

1 Tèsàlonikà 5 - Pinyin bible

1 Tèsàlonikà 5

¹Pɨlyimə ɨ̀pâ, ngə̀ aŋunə njyə̂ kə̀ nkwùə̀ nɨ mɨ̀nwùə̀ mèrə mə ghǎ lòo a alyiʼə, ka pəə chi mbə tsə̀ŋə̀ a wəə nkwùə̀ a nɨ ŋwàʼnə̀ ambo pɨghə.

²Pɨghə àtwuə̀ mbɨ̀ŋmə̀ àzɨghə zhyə̂ lo njyə̂ nɨ Ndòʼnə̀mbyə̂ à ghǎ kẅirə̀ tô, ɨ̀ ghǎ pə la tsaʼa njyə̂ nɨ ɨ̀ndzə̀ərə̀ à tô a ntɨ̀ŋnə̀ ɨ̀twuʼə̀.

³Nkwùə̀ nɨ pànə̀ mənə nshwəŋə̀ lo, “Ɨlyiʼə mə mbonə̀, ka àkẅàrə̀ a pə e ghu” a tyiʼə̀ nkwùə̀ ghu nɨ ngəʼə̀ ɨ̌ wùutə̀ tsirə̀ a ghobə tyìʼə̀ tsaʼa mə̀ngyə̌ à kòo a moonə̀ mmə ndzuʼù àndzaŋə. Nkwùə̀ ghu pobə chi mbə ghobə nɨ alyiʼə nɨ mbə̀ʼə pobə kɨ̀ɨrə̀ ndèrə̀ apə̀.

⁴La ngə̀ aŋunə pɨghə pɨlyimə ɨ̀pâ, ka nɨ̀ pə wɨghə amwuə ndzùmə nɨ mbə̀ʼə njyə̂ ghu wùutə̀ ntô e ambo pɨghə tsaʼa ɨ̀ndzə̀ərə̀.

⁵Pɨghə pɨ̀tsùmə̀ chyə̂ mbə la ɨ̀poonə̀ nɨ nɨ̀ wə̀ ngɨ̀rə̀ mɨ̀nwùə̀ mɨ̀shìʼnə̀ tsaʼa pànə̀ nɨ pobə pənə amwuə nkàʼà nkɨ mbə amwuə njyə̂. Ka pə̀ənə̀ chi mmə ngɨ̀rə̀ a wə̀ənə̀ a tɨ̀pòŋə̀ tsaʼa pànə̀ nɨ pobə pənə amwuə ɨ̀twuʼə̀ kə̀ amwuə ndzùmə.

⁶Lenəla, kò pə̀ənə̀ tə ndyə̂ a wəənə̀ tsaʼa pɨ̀tse pə̀ənə̀. Njiilo pə̀ənə̀ nwuunə̀ a nɨ̀lyìinə̀ nkɨ ngẅìimə̀ mbɨ̀ŋmə̀ ɨ̀zəənə̀.

⁷Mbə̀ʼnə pànə̀ pa ndyə̂ la nɨ ɨ̀twuʼə̀, nkɨ mmə nnô mbaarə̀ la nɨ ɨ̀twuʼə̀.

⁸Tsaʼnə pə̀ənə̀ pənə amwuə njyə̂ la, a pòŋə̀ lo pə̀ənə̀ tə ngẅìimə̀ mbɨ̀ŋmə̀ ɨ̀zəənə̀. Pə̀ənə̀ ghɨ̀rə̀ lo àpyiimə̀ ntɨŋmə̀ àzəənə̀ aŋunə Yěsû pobə ɨ̀kòŋnə̀ ɨ̀wəənə̀ aŋunə pɨ̀tse pə̀ənə̀ kẅupə̀ a wəənə̀ tsaʼa àpàʼà ntsòo a nàanə̀ a ghàŋə̀ soyì. Pə̀ənə̀ lòo a nɨ̀chwarə̀ wa nɨ pə̀ənə̀ pa mbyabə̀ ambo Nẅùə̀ la tsaʼa tɨ̀làarə̀ ntsòo.

⁹Mbə̀ʼnə ka Nẅùə̀ à lə̀ tsoʼò e a wəənə̀ la lo pə̀ənə̀ tə ndzəənə̀ ngəʼə̀ ntii àtsə̂ ntɨŋmə̀ e. À lə̀ tsoʼò a wəənə̀ pə lo pə̀ənə̀ tô nkẅiirə̀ a nɨ̀chwarə̀ ndàŋə̀ a ndzùmə̀ Ndòʼnə̀mbyə̂ ɨ̀wə̀ənə̀ Yěsû Kristù,

¹⁰nɨ à lə̀ kwɨghə̀nə àtwuə̀ nɨ pə̀ənə̀, lo pə̀ənə̀ tə nkwɨghə̀ kə̀ mbə pɨ̀tɨ̀ŋnə̀ pə̀ənə̀ chyə̂ la pə̀ənə̀ pɨ pobə.

¹¹Lenəla, nɨ̀ tompə̀ a ŋwùə̀ ɨwɨghə moʼo moʼo, nkɨ ngyèmpə̀ a ŋwùə̀ moʼo moʼo â kẅuə̀ tyìʼə̀ tsaʼnə nɨ̀ mənə ngɨ̀rə̀ la.

¹²Pəə pə mbuʼù mbô ambo pɨghə, mbǎ pɨlyimə ɨ̀pəə, lo nɨ̀ ghuʼtə̀ pànə̀ pa nɨ pobə pa nfàʼà ɨ̀shìʼnə̀ a tɨ̀tɨ̀rə̀ pɨghə, mbə pànə̀ pa nɨ Ndòʼnə̀mbyə̂ a nùŋə̀nə lo pobə pə àtwuə̀ pɨghə mmə ndə̀ʼtə̀ a wɨghə la.

¹³Nɨ̀ ŋâ a ghobə nɨ àghuʼtə̀ ghobə ɨ̀kòŋnə̀ amwuə ɨ̀làŋə ɨ̀tsùmə̀ ntii àfàʼà nɨ pobə pa nfàʼà. Nɨ̀ chyə̂ nɨ àporə̀porə̀ a tɨ̀tɨ̀rə̀ pɨghə.

¹⁴Pəə pə nkɨ nchi mmə mbuʼù mbô ambo pɨghə, mbǎ pɨlyimə ɨ̀pəə, lo nɨ̀ kwàtə̀ pɨ̀lòŋə, ntompə̀ pànə̀ nɨ mɨ̀ntɨŋmə̀ ɨ̀mobə porə̀nə. Nɨ̀ yèmpə̀ pànə̀ nɨ pobə porə̀nə, nkɨ nzhyə̂ ẅìimə̀ mɨ̀ntɨŋmə̀ ɨ̀mɨghə pɨghə pɨ ŋwùə̀ ntsùmə̀.

¹⁵Nɨ̀ zəənə̀ lo kò ŋwùə̀ ɨwɨghə ɨ̀tse a kẅuə̀ e a tɨ̀pòŋə̀ àtwuə̀ tɨ̀pòŋə̀. La nɨ̀ taŋnə̀ pə a nɨ ghɨ̀rə̀ ɨ̀pòŋə̀ a tɨ̀tɨ̀rə̀ pɨghə farə ambo pɨ̀tse pə̀ənə̀.

¹⁶Nɨ̀ pə nɨ nɨ̀ghaʼà nkwùə̀ ɨ̀tsùmə̀,

¹⁷mmə nchàʼtə̀ a Nẅùə̀ nkwùə̀ ɨ̀tsùmə̀,

¹⁸nkɨ mmə ŋŋâ a mɨyàa ambo Nẅùə̀ aŋunə ànwùə̀ àtsùmə̀ nɨ a tônə, ntiinə la ànwùə̀ nɨ Nẅùə̀ à tàʼnə ambo pɨghə tsaʼnə nɨ̀ pwuutə̀nə pɨghə pɨ Kristù Yěsû la.

¹⁹Kò nɨ̀ twuunə̀ a wɨghə ànwùə̀ nɨ Àzhwùə̀ Nẅùə̀ a tàʼnə.

²⁰Kò nɨ̀ wâ a wɨghə àshwəŋnə̀ ngàŋə̀ ntwuumə̀ Nẅùə̀.

²¹La nɨ̀ zhwiʼì ànwùə̀ àtsùmə̀ nɨ a tônə ambo pɨghə, ngẅìimə̀ a zhyə̀ nɨ a pənə yè ɨ̀shìʼnə̀,

²²nkɨ mbankə̀ mbuurə̀ tɨ̀pòŋə̀ ntsùmə̀.

²³Nẅùə̀ àtwuə̀ ɨ̀pɨ̀ŋmə̀ e nɨ à pənə Nẅùə̀ àporə̀porə̀ à sùu a wɨghə nɨ̀ laanə̀ tə ndaanə̀ nkɨ ngɨ̀rə̀ àzhwùə̀ àzɨghə nɨ ntɨŋmə̀ ɨ̀wɨghə pobə mbɨ̀ŋmə̀ ɨ̀zɨghə pə tɨ ɨ̀fèrə tə mbyàa nkwùə̀ nɨ Ndòʼnə̀mbyə̂ ɨ̀wə̀ənə̀ Yěsû à ghǎ tô la.

²⁴Ze wa nɨ à fuŋə̀nə a wɨghə la à wa nnùŋə̀ mɨ̀nkàʼnə ɨ̀me, mbə kɨ ghɨ̀rə̀ ànwùə̀ ghu myàanə̀.

²⁵Nɨ̀ kɨ nchàʼtə̀ a Nẅùə̀ nchyâ a wəə amwuə, mbǎ pɨlyimə ɨ̀pâ.

²⁶Nɨ̀ chàʼtə̀ pɨlyimə ɨ̀pə̀ənə̀, nkampə̀ a ghobə nɨ ɨ̀kòŋnə̀ Nẅùə̀.

²⁷Mbuʼù mbô ambo pɨghə aŋunə nɨ̀linə̀ nɨ Ndòʼnə̀mbyə̂ lo nɨ̀ fuŋə̀ àŋwàʼnə̀ zə̀ ambo pɨlyimə pɨ̀tsùmə̀.

²⁸Ndòʼnə̀mbyə̂ ɨ̀wə̀ənə̀ Yěsû Kristù â nèrə̀ àpòŋə̀ ntɨŋmə̀ e aŋunə pɨghə.