Read Pinyin 2 Tèsàlonikà 1 Bible Online

2 Tèsàlonikà 1 - Pinyin bible

2 Tèsàlonikà 1

¹Àŋwàʼnə̀ zə̀ a àŋwàʼnə̀ mɨ̀ŋə̀ Pàolò mbə pəə pɨ Salàsə̀ pobə Timotì. A zə ndèrə̀ ambo pànə̀ pɨ Tǎ ɨ̀wə̀ənə̀ Nẅùə̀ pobə Ndòʼnə̀mbyə̂ Yěsû Kristù nɨ pɨ pənə amwuə ɨ̀shwatə̀ ɨ̀poonə̀ pɨ Kristù nɨ pənə a àlaʼà Tèsàlonikà.

²Nẅùə̀ Tǎ ɨ̀wə̀ənə̀ pobə Ndòʼnə̀mbyə̂ Yěsû Kristù pobə̂ nèrə̀ a wɨghə nɨ àpòŋə̀ ntɨŋmə̀ nkɨ ŋŋâ a wɨghə nɨ àporə̀porə̀.

³Pɨlyimə ɨ̀pəə, pəə chyə̂ a nɨ ŋâ a mɨyàa ambo Nẅùə̀ nkwùə̀ ɨ̀tsùmə̀ mbə̀ʼə wɨghə ntiinə àpyiimə̀ ntɨŋmə̀ àzɨghə a zə̀ kẅùə̀ tyìʼə̀ ɨ̀shìʼnə̀, ɨ̀kòŋnə̀ nɨ nɨ̀ pənə nɨ ẅèrə aŋunə ŋwùə̀ moʼo moʼo ɨ kɨ mmə nkẅuə̀ ndèrə̀ nɨ mbyə̀.

⁴Lenəla pəə pə ntsòo a ghàŋə̀ ɨ̀wəə mbə̀ʼə wɨghə amwuə pɨ̀tse ɨ̀shwatə̀ ɨ̀poonə̀ pɨ Nẅùə̀ ntii àẅìimə̀ ntɨŋmə̀ ghobə àpyiimə̀ ntɨŋmə̀ nɨ nɨ̀ pənə nɨ zèrə nkwùə̀ nɨ pɨ lə̀ mənə nnyàŋə̀ a wɨghə ngɨ̀rə̀ nɨ zəənə̀ ngəʼə̀.

⁵Mɨ̀nwùə̀ mə mɨ̀tsùmə̀ nèrə̀ la lo ntsòʼtə ɨ̀sàʼa Nẅùə̀ ɨ̀ kùʼnə̀, lenəla nɨ̀ ghǎ kùʼnə̀ a nɨ kwuunə̀ amwuə ànwùə̀ Nɨ̀fò Nẅùə̀ za nɨ ngwə̀ ndzəənə̀ ngəʼə̀ aŋunə la.

⁶Nẅùə̀ nɨ a wa ngɨ̀rə̀ ànwùə̀ nɨ a kùʼnə̀nə, ǎ ŋâ ngəʼə̀ ambo pànə̀ nɨ pɨ pa ŋŋâ a wɨghə nɨ ngəʼə̀.

⁷A ghǎ fuukə̀ a wɨghə amwuə ngəʼə̀ nɨ nɨ̀ mənə ndzəənə̀ kɨ fuukə̀ farə a wəə amwuə nkwùə̀ za nɨ Ndòʼnə̀mbyə̂ Yěsû à ghǎ furə̀ a nɨ̀pwuurə̀ nshwuʼə̀ pobə pəngèrə̀ ɨ̀pe pɨ̀tɨ̀ŋnə̀,

⁸amwuə àləəmə̀ ɨ̀mǔ a nɨ tô chyâ ɨ̀sàʼa aŋunə pànə̀ nɨ ka pobə zhyə̂ a ghobə a Nẅùə̀, pobə pyə̀ nɨ pobə pa ka zuʼnə̀ a ghobə ntwuumə̀ ghù ɨ̀shìʼnə̀ mbə̀ʼə Ndòʼnə̀mbyə̂ ɨ̀wə̀ənə̀ Yěsû.

⁹Nẅùə̀ à ghǎ chyâ ɨ̀sàʼa nɨ ɨ ghoŋə̀nə nɨ nkuŋə̀ aŋunə pobə, nnàanə̀ a ghobə lo kò pobə tô a ghobə a mbyə̀ Ndòʼnə̀mbyə̂ kə̀ nkɨ mbə a ghobə amwuə àghuʼtə̀ Nẅùə̀ yè tɨ̀ŋnə̀ za apə̀,

¹⁰aŋunə njyə̂ za nɨ à ghǎ tô kẅiirə̀ àghuʼtə̀ ambo pə̀ənə̀ ɨ̀pe pɨ̀laanə̀nə farə ambo pànə̀ nɨ pɨ nùŋə̀nə ntɨŋmə̀ aŋunə ze. Nɨ̀ ghǎ kɨ pə àzɨghə pɨghə pɨ pobə ntiinə nɨ̀ nùŋə̀nə ntɨŋmə̀ ɨ̀wɨghə aŋunə ntwuumə̀ nɨ pəə lə̀ chwìitə̀nə ambo pɨghə.

¹¹La ɨ̀sùmə nɨ pəə pa nchàʼtə̀ a Nẅùə̀ mbə̀ʼə wɨghə nkwùə̀ ɨ̀tsùmə̀ lo Nẅùə̀ ɨ̀wə̀ənə̀ â ghɨ̀rə̀ nɨ̀ kùʼnə̀ a nɨ chyə̂ a nɨ̀chyə̂mbyə̂ wa nɨ à fuŋə̀nə a wɨghə lo nɨ̀ tô nchyə̂ la. Â lòo mɨ̀tɨ̀ŋnə̀ ɨ̀me ŋŋâ a wɨghə nɨ ɨ̀pwuumə̀ pɨ̀shìʼnə̀ pa pɨ̀tsùmə̀ nɨ nɨ̀ tàʼnə, nkɨ mmyàanə̀ àfàʼà nɨ nɨ̀ nùŋə̀nə ntɨŋmə̀ ɨ̀wɨghə lo fàʼà ambo ze.

¹²Nɨ ndwuumə̀ wə̀, nɨ̌ ghɨ̀rə̀ nɨ̀linə̀ nɨ Ndòʼnə̀mbyə̂ pə nɨ àghuʼtə̀, a kɨ nguʼtə̀ a wɨghə ntii àpòŋə̀ ntɨŋmə̀ me pobə yi Ndòʼnə̀mbyə̂ Yěsû Kristù.