Read Pinyin 2 Tèsàlonikà 2 Bible Online

2 Tèsàlonikà 2 - Pinyin bible

2 Tèsàlonikà 2

¹Pɨlyimə ɨ̀pâ, ngə̀ aŋunə nɨ̀tô Ndòʼnə̀mbyə̂ ɨ̀wə̀ənə̀ Yěsû Kristù farə tsaʼnə pə̀ənə̀ pɨ pobə ghǎ shwatə̀ a taʼà alyiʼə, pəə pə mbuʼù mbô ambo pɨghə lo,

²kò mɨ̀ntɨŋmə̀ ɨ̀mɨghə nə̀ʼnə̀ kə̀ ɨ̀twuə̀ ɨ̀pɨghə tsànkə̀ tsaʼnə nɨ̀ mənə ndzuʼù lo njyə̂ Ndòʼnə̀mbyə̂ za ɨ̀ tô mə. Kò nɨ̀ pyiimə̀ a wɨghə ambo pànə̀ nɨ pobə mənə nshwəŋə̀ a lenə. Mbaa pə tsaʼnə pɨ̀tse pə nshwəŋə̀ lo pobə zəənə̀ amwuə ndzə̀əmə̀ nɨ ɨ̀ làŋə̀nə a ɨ̀myə̂ pobə, pɨ̀tse mə nshwəŋə̀ lo pəə lə̀ zuʼù, pɨ̀tse kɨ mə nshwəŋə̀ lo pəə ŋwàʼnə̀nə.

³Kò nɨ̀ pyiimə̀ a wɨghə lo ŋònə̀ ɨ̀tse â fɨ̀kə̀ a wɨghə amwuə àlàŋə àtse ntiinə ka njyə̂ Ndòʼnə̀mbyə̂ za ɨ̀ pə ghǎ tô e tɨghu nkwùə̀ àtɨ̀ŋnə̀ àtwuə̀ za nɨ pànə̌ twuunə̀ a Nẅùə̀ ɨ̀ pyə̀ ntô. Ngàŋə̀ kɨpaanə wa nɨ Nẅùə̀ à ghǎ tsɨ̀nkə̀ ngəʼə̀ àtwuə̀ ze la, ǎ furə̀ a sàŋə̀.

⁴Ngàŋə̀ kɨpaanə à ghǎ twuunə̀ e àzwuumə̀ za àtsùmə̀ nɨ pɨ pa nfuŋə̀ nɨ nẅùə̀ kə̀ àzwuumə̀ za àtsùmə̀ nɨ pɨ pa səəkə̀. Lenəla lòo lo ze a chyə̂ a àtwuə̀ àzwuumə̀ àtsùmə̀ amwuə Ndâ mɨ̀shwàʼà Nẅùə̀. A ghǎ nwuunə̀ e amwuə Ndâ Mɨ̀shwàʼà Nẅùə̀ tyiʼə̀ lòo mbɨ̀ŋmə̀ e aŋunə Nẅùə̀.

⁵Ka nɨ̀ mə nkẅuumə̀ a wɨghə lo ndə̀ shwəŋə̀ a wɨghə nɨ mɨ̀nwùə̀ mə mɨ̀tsùmə̀ nkwùə̀ nɨ ndə̀ pənə pə̀ənə̀?

⁶Nɨ̀ zhyə̂ àzwuumə̀ nɨ a zə nàanə̀ ngàŋə̀ kɨpaanə ghu a tɨ̀tsòŋə̀. Ngotə nkwùə̀ ɨ̀ ghǎ kùʼù pànə̀ zəənə̀ e.

⁷Mɨ̀tɨ̀ŋnə̀ mɨ ngàŋə̀ kɨpaanə mɨ lə̀əmə̀nə mɨ pìʼnə̀ mə a nɨ fàʼà. La ŋònə̀ wa nɨ à mənə ngẅìimə̀ àfàʼà ngàŋə̀ kɨpaanə lo kò a lèrə̀ nɨ mbyə̀ la, ǎ kɨ ẅìimə̀ e pə a lenə tə pyàa nkwùə̀ nɨ Nẅùə̀ à ghǎ fuukə̀ e a àlàŋə.

⁸La nkwùə̀ za nɨ ngàŋə̀ kɨpaanə wa à ghǎ furə̀ a sàŋə̀, Ndòʼnə̀mbyə̂ Yěsû à ghǎ zhwuutə̀ e nɨ àzhwùə̀ za nɨ a za nfurə̀ a ntswùə̀ ze, tsə̀ŋə̀ e nɨ nɨ̀tsìinə̀ e nkwùə̀ nɨ à mənə ntô.

⁹Ngàŋə̀ kɨpaanə ẅèrə wə̀ à ghǎ tô nɨ mɨ̀tɨ̀ŋnə̀ nɨ Satàanə̀ à ŋânə a nɨ ghɨ̀rə̀ mɨ̀nwùə̀ mɨ yerə̀nə yerə̀nə mɨ pɨ̀chwìrə̀ nɨ ɨ̀lènə̀ ɨ̀nwùə̀ ghobə mɨ̀nwùə̀ mɨ kə̀ʼnə̀nə mɨ pɨ̀chwìrə̀.

¹⁰À ghǎ lòo mbuurə̀ tɨ̀pòŋə̀ ntsùmə̀ a nɨ lòo nfɨ̀kə̀ pə̀ənə̀ nɨ pobə ghǎ pî ntiinə pobə lə̀ twuunə̀nə a ghobə a nɨ kòŋə̀ a nkǔŋə nkuŋə mbə̀ʼə chwarə̀.

¹¹Ntii ànwùə̀ zanə, Nẅùə̀ a tsànkə̀ ɨ̀zhìʼtə̀ ɨ̀pobə ngɨ̀rə̀ lo pobə̂ pyiimə̀ ànwùə̀ nɨ ka a pə e nkǔŋə nkuŋə.

¹²Lenəla, Nẅùə̀ à ghǎ chyâ ɨ̀sàʼa aŋunə pànə̀ pa nɨ ka pobə pyiimə̀ a ghobə a nkǔŋə nkuŋə, nkòŋə̀ a pə a nɨ ghɨ̀rə̀ tɨ̀pòŋə̀.

¹³Lenəla nɨ pɨlyimə nɨ Ndòʼnə̀mbyə̂ à kòŋə̀nə, pəə chyə̂ a nɨ ŋâ a mɨyàa ambo Nẅùə̀ nkwùə̀ ɨ̀tsùmə̀ ntii a wɨghə nɨ Nẅùə̀ a lə̀ tsoʼò a wɨghə lo nɨ̀ pə pɨ̀tsàa pɨ̀mbyə̀ pɨ pə̀ənə̀ nɨ à ghǎ chwarə̀ a nɨ làŋə̀ a ndzùmə̀ àfàʼà Àzhwùə̀ Nẅùə̀ nɨ a ghɨ̀rə̀nə nɨ̀ pə pànə̀ pɨ laanə̀nə ntiinə nɨ̀ nùŋə̀nə ntɨŋmə̀ ɨwɨghə aŋunə nkǔŋə nkuŋə.

¹⁴Nẅùə̀ à lə̀ fuŋə̀ a wɨghə a nɨ pə lə ndàŋə̀ la ndzùmə̀ ntwuumə̀ ghù ɨ̀shìʼnə̀ wa nɨ pəə lə̀ chwìitə̀nə ambo pɨghə la, njiilo mbə̀ʼə nɨ̀ pə nɨ àghuʼtə̀ nɨ Ndòʼnə̀mbyə̂ ɨ̀wə̀ənə̀ Yěsû Kristù à pənə nɨ zèrə la.

¹⁵Lenəla nɨ pɨlyimə, nɨ̀ təəmə̀ ntɨ̀ŋnə̀, ngẅìimə̀ ànwùə̀ nɨ pəə lə̀ nèrə̀nə a wɨghə nkwùə̀ nɨ pəə lə̀ mənə nchwìitə̀ ntwuumə̀ kə̀ amwuə àŋwàʼnə̀ nɨ pəə lə̀ ŋwàʼnə̀nə.

¹⁶Ndòʼnə̀mbyə̂ ɨ̀wə̀ənə̀ Yěsû Kristù àtwuə̀ ɨ̀pɨ̀ŋmə̀ e pobə Tǎ ɨ̀wə̀ənə̀ Nẅùə̀ nɨ à kòŋə̀nə a wəənə̀ ndàŋə̀ a ndzùmə̀ àpòŋə̀ ntɨŋmə̀ e â ghɨ̀rə̀ mɨ̀ntɨŋmə̀ ɨ̀məənə̀ tɨ̀ŋnə̀ nkwùə̀ ɨ̀tsùmə̀, kɨ ghɨ̀rə̀ lo nɨ̀ pə nɨ àkwàŋə̀ yè ɨ̀shìʼnə̀ mbyiimə̀ ntə mbyabə̀ ànwùə̀ nɨ à lə̀ kàʼnə.

¹⁷Â lə̀ʼtə̀ mɨ̀ntɨŋmə̀ ɨ̀mɨghə ŋŋâ a wɨghə nɨ mɨ̀tɨ̀ŋnə̀, ngɨ̀rə̀ lo nɨ̀ tə nshwəŋə̀ pə ɨ̀shwəŋnə̀ pɨ̀shìʼnə̀ nkɨ mmə ngɨ̀rə̀ pə mɨ̀nwùə̀ mɨ̀shìʼnə̀.