Read Pinyin 2 Tèsàlonikà 3 Bible Online

2 Tèsàlonikà 3 - Pinyin bible

2 Tèsàlonikà 3

¹A nɨ lẅùutə̀ nɨ pɨlyimə, nɨ̀ chàʼtə̀ Nẅùə̀ aŋunə pəə lo ntwuumə̀ Ndòʼnə̀mbyə̂ wa ɨ̂ fàʼà sìimə̀ ndèrə̀ nɨ mbyə̀, pànə̀ kẅiirə̀ a ẅèrə nɨ àghuʼtə̀ tyìʼə̀ tsaʼnə nɨ̀ lə̀ kɨnə nkẅiirə̀ àzɨghə ẅèrə.

²Nɨ̀ kɨ chàʼtə̀ Nẅùə̀ lo â kẅiirə̀ a wəə ambo ngàŋə̀ ntɨŋmə̀ ghù shyə pobə ngàŋə ngɨ̀rə̀ ɨ̀nwùə̀ tɨ̀pòŋə̀, ntiinə ka a pə e ŋwùə̀ ntsùmə̀ nɨ à nùŋə̀nə ntɨŋmə̀ aŋunə ntwuumə̀ ghu.

³La Ndòʼnə̀mbyə̂ à wa nnùŋə̀ ànwùə̀ nɨ à kàʼnə. Ǎ kɨ ghɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀ nkɨ pyabə̀ a wɨghə aŋunə ngàŋə̀ ngɨ̀rə̀ ɨ̀nwùə̀ tɨ̀pòŋə̀ wa.

⁴Ndòʼnə̀mbyə̂ à ghɨ̀rə̀ pəə zhyə̂ nkǔŋə nkuŋə lo nɨ̀ wə̀ ngɨ̀rə̀, mbə kɨ làŋə̀ nɨ mbyə̀ mə ghɨ̀rə̀ mɨ̀nwùə̀ ma nɨ pəə shwəŋə̀nə ambo pɨghə la.

⁵Ndòʼnə̀mbyə̂ â ghɨ̀rə̀ nɨ̀ tsùŋə̀ nzhyə̂ tsaʼnə Nẅùə̀ a kòŋə̀nə pə̀ənə̀ nkɨ ghɨ̀rə̀ nɨ̀ zhyə̂ ẅìimə̀ ntɨŋmə̀ tyìʼə̀ tsaʼnə Kristù a lə̀ kɨnə ngẅìimə̀ nkwùə̀ nɨ pɨ lə̀ mənə nnyàŋə̀ e la.

⁶Pɨlyimə, pəə shwəŋə̀ ambo pɨghə aŋunə nɨ̀linə̀ nɨ Ndòʼnə̀mbyə̂ Yěsû Kristù lo nɨ̀ pankə̀ pɨlyimə pa pɨ̀tsùmə̀ nɨ pobə pənə pɨ̀lòŋə, ka mə zùŋə̀ a ghobə pɨ̀mbòomə pa nɨ pəə lə̀ nèrə̀nə ambo pobə la.

⁷Mbə̀ʼnə pɨghə àtwuə̀ mbɨ̀ŋmə̀ àzɨghə nɨ̀ zhyə̂ tyìʼə̀ ɨ̀shìʼnə̀ lo nɨ̀ chyə̂ a nɨ zùŋə̀ mbòbə̀ mɨ̀kwùə̀ ɨ̀zəə. Ka pəə lə̀ pə wəə pɨ̀lòŋə nkwùə̀ nɨ pəə lə̀ pənə pə̀ənə̀.

⁸Ka pəə lə̀ zɨghə̀ a wəə àzwuumə̀ ŋwùə̀ àfǐfǐ. La pəə lə̀ mə nfàʼà nɨ ɨ̀twuʼə̀ pobə njyə̂, nkyiitə̀ nnẅùʼə̀ mbɨ̀ŋmə̀ ɨ̀zəə lo mbə̀ʼə pəə kaŋə pə àpìʼì ambo ŋwùə̀ ɨwɨghə ɨ̀tse.

⁹Pəə lə̀ mə ngɨ̀rə̀ a lenə la ka pə e pə lo ka pəə lə̀ pə a wəə nɨ ɨ̀tɨ̀ŋnə̀ a nɨ pyiitə̀ àyèmpə̀ ambo pɨghə. Pəə lə̀ ghɨ̀rə̀ a lenə la mbə̀ʼə â pə àlènə̀ ambo pɨghə a nɨ zùŋə̀.

¹⁰Nkwùə̀ nɨ pə̀ənə̀ lə̀ pənə la, pəə lə̀ mə shwəŋə̀ ambo pɨghə lo, “Ŋònə̀ nɨ à twuunə̀nə e a nɨ fàʼà kò ze zɨghə̀ e.”

¹¹Pəə shwəŋə̀ lə la ntiinə pəə zuʼnə lo pànə̀ pɨ̀tse pa amwuə pɨghə nɨ pobə pənə pɨ̀lòŋə nzhyə̂ kànə̀ a ghobə kànə̀nə kwuunə̀ amwuə mɨ̀nwùə̀ mɨ pə̀ənə̀, ka mə fàʼà a ghobə àfàʼà àtse.

¹²Pəə shwəŋə̀ nkɨ mmə nkwàtə̀ mbuurə̀ pànə̀ zə̀ aŋunə nɨ̀linə̀ nɨ Ndòʼnə̀mbyə̂ Yěsû Kristù lo pobə̂ chyə̂ nɨ̀chyə̂mbyə̂ ẅùə̀ nɨ a təəmə̀nə, nkɨ mə nfàʼà àfàʼà mbə̀ʼə pə nɨ àzobə àzwuumə̀ yè zɨghə̀nə.

¹³La ngə̀ aŋunə pɨghə nɨ pɨlyimə, kò nɨ̀ kaanə̀ a wɨghə a nɨ ghɨ̀rə̀ mɨ̀nwùə̀ mɨ̀shìʼnə̀.

¹⁴Ŋònə̀ ɨ̀tse amwuə pɨghə a tə mbəla ka zuʼnə e ànwùə̀ nɨ pəə ŋwàʼnə̀nə amwuə àŋwàʼnə̀ zə̀, nɨ̀ tə̂ nɨ̀lyə̂ aŋunə ze ɨ̀shìʼnə̀, kò nɨ̀ pə a wɨghə nɨ ànwùə̀ àtse a nɨ ghɨ̀rə̀ pɨghə pɨ pobə, njiilo ɨ̀sɨŋnə̀ koorə̀ e.

¹⁵La kò nɨ̀ lòo a wɨghə a ye tsaʼa ngàŋə̀ kɨpaanə ɨwɨghə, nɨ̀ kwàtə̀ e tsaʼa ndyimə nɨ à nùŋə̀nə ntɨŋmə̀ aŋunə Kristù.

¹⁶Ndòʼnə̀mbyə̂ àtwuə̀ ɨ̀pɨ̀ŋmə̀ e nɨ à wa ŋŋâ a wəənə̀ nɨ àporə̀porə̀, â ŋâ a wɨghə nɨ àporə̀porə̀ nkwùə̀ ɨ̀tsùmə̀, amwuə ɨ̀làŋə ɨ̀tsùmə̀. Ndòʼnə̀mbyə̂ â pə pɨghə pobə.

¹⁷A mɨ̀ŋə̀ Pàolò nɨ ngwə̀ ŋŋwàʼnə̀ àŋwàʼnə̀ zə̀ a nɨ chàʼtə̀ a wɨghə nɨ àpô mə̀. Lə̌ àlènə̀ mə̀ aŋunə ɨ̀ŋwàʼnə̀ ɨ̀pâ ɨ̀tsùmə̀, lə̌ nkɨ mbə tsaʼnə ngwa ŋŋwàʼnə̀ ɨ̀ŋwàʼnə̀ ɨ̀pâ ɨ̀tsùmə̀.

¹⁸Ndòʼnə̀mbyə̂ Yěsû Kristù â nèrə̀ àpòŋə̀ ntɨŋmə̀ e ambo pɨghə pɨ̀tsùmə̀.